Mga Kristiano—Ikalipay Kon Hin-o Kamo!

“Hiya nga naghahambog, ighambog niya hi Jehova.”—1 KORINTO 1:31, NW.

 1. Ano an kasagaran nga disposisyon han mga tawo mahitungod han relihiyon?

 “KAWARAY-INTERES.” Diri pa la maiha nga ginamit ito nga pulong han usa nga komentarista ha mga buruhaton han relihiyon basi isaysay an disposisyon han damu nga mga tawo ngada ha ira relihiyon. Hiya nagsaysay: “An pinakamakatirigamnan nga hitabo ha moderno nga relihiyon, diri an relihiyon mismo—kondi an disposisyon nga husto nga tinatawag nga ‘kawaray-interes.’” Ha dugang pa nga pagsaysay, iya tinagan hin kahulogan an kawaray-interes sugad nga “kawaray pagtagad mahitungod han relihiyon han usa.” Siring niya nga damu nga mga tawo “an natoo ha Dios . . . ; diri la hira nagtatagad ha iya.”

 2. (a) Kay ano nga diri urusahon nga an mga tawo nawawad-an hin interes ha espirituwal? (b) An kawaray-interes mahimo magresulta hin ano nga peligro ha totoo nga mga Kristiano?

² An mga estudyante han Biblia diri nahipapausa hinin kalyap nga kawaray-interes. (Lukas 18:8) Ngan kon mahitungod han relihiyon ha kabug-osan, ginlalaoman gud ito nga kawaray-interes. An palso nga relihiyon maiha na nga naglilimbong ngan nagpapakyas ha ginlalaoman ha ira han katawohan. (Pahayag 17:15, 16) Kondi, para ha totoo nga mga Kristiano, peligroso an diri-kinasingkasing ngan waray kadasig nga disposisyon. Makakaeksperyensya kita hin makasurubo nga mga resulta kon magin waray-pagtagad kita ha aton pagtoo ngan mawara an aton kadasig ha pag-alagad ha Dios ngan ha kamatuoran han Biblia. Hi Jesus nagpahamangno kontra han sugad nga pagin malanhod han ginpahamangnoan niya an siyahan-siglo nga mga Kristiano nga naukoy ha Laodisea: “Ikaw diri mataghom ngan diri man mapaso; buot ko unta nga mataghom ka o mapaso. . . . Malanhod ka.”—Pahayag 3:15-18.

Pakasabot Kon Hin-o Kita

 3. Ano nga mga bahin han pangirilal-an han mga Kristiano an ira ikinalilipay?

³ Basi maatohan an kawaray-interes ha espirituwal, an mga Kristiano kinahanglan magkaada klaro nga pagsabot kon hin-o hira, ngan kinahanglan magin malipayon hira kon hin-o hira. Sugad nga mga surugoon ni Jehova ngan mga disipulo ni Kristo, mababasa naton ha Biblia an mga pagsaysay kon hin-o kita. Kita an “mga saksi” ni Jehova, “mga kabulig han Dios ha pagbuhat,” samtang aktibo nga iginpapahayag naton ha iba an “maopay nga sumat.” (Isaias 43:10; 1 Korinto 3:9; Mateo 24:14) Kita an mga tawo nga ‘naghihigugmaay ha usa kag usa.’ (Juan 13:34) An totoo nga mga Kristiano mga indibiduwal nga “pinaagi han paggamit, an ira mga balatian nagkababatid na ha pagkilala han maopay ngan han maraot.” (Hebreo 5:14) Kita an “mga kalamrag han kalibotan.” (Filipos 2:15) Nangangalimbasog kita nga “manggawi hin maopay ha butnga han mga Hentil.”—1 Pedro 2:12; 2 Pedro 3:11, 14.

 4. Paonan-o mahibabaroan han usa nga magsiringba ni Jehova kon ano an diri pangirilal-an niya?

⁴ An totoo nga mga magsiringba ni Jehova maaram liwat kon ano an diri pangirilal-an nira. “Diri hira kanan kalibotan,” sugad la han ira Lider, hi Jesu-Kristo, nga diri bahin han kalibotan. (Juan 17:16) Nagpapabilin hira nga bulag tikang ha “mga Hentil,” nga “mga ginpadulman an ira mga sarabotan, ngan nahimulag ha kinabuhi [nga tikang] ha Dios.” (Efeso 4:17, 18) Sugad nga resulta, an mga sumurunod ni Jesus ‘nagdudumiri ha pagkadiri-matinoohon ngan mga kairiphon nga kalibotanon,  nag-uukoy ha kabuotan ngan ha katadongan ngan ha pagkamatinoohon ha Dios dinhi hini nga kalibotan.’—Tito 2:12.

 5. Ano an iginpapasabot han sagdon nga ‘ighambog hi Jehova’?

⁵ An aton klaro nga pagsabot ha aton pangirilal-an ngan ha aton relasyon ha Soberano nga Magmarando han uniberso nagpapagios ha aton nga ‘ighambog hi Jehova.’ (1 Korinto 1:31, NW) Ano nga klase ito hin paghambog? Sugad nga totoo nga mga Kristiano, malipayon kita nga hi Jehova an aton Dios. Aton ginsusunod an sagdon: “Hiya nga naghahambog mahitungod ha iya kalugaringon maghambog hiya tungod hini mismo nga butang, an pagkaada hilarom nga pagsabot ngan an pagkaada kahibaro mahitungod ha akon, nga ako hi Jehova, an Usa nga nagpapakita hin mahigugmaon-nga-pagkabuotan, hustisya ngan pagkamatadong dinhi ha tuna.” (Jeremias 9:24, NW) Aton ‘iginhahambog’ an pribilehiyo nga kilala naton an Dios ngan ginagamit kita niya ha pagbulig ha iba.

An Ayat ha Pagtipig hin Klaro nga Pagsabot

 6. Kay ano nga nakukurian an iba ha pagtipig hin klaro nga pagsabot ha ira pangirilal-an sugad nga mga Kristiano?

⁶ Oo, an pagtipig hin klaro nga pagsabot ha aton husto nga pangirilal-an sugad nga mga Kristiano diri pirme masayon. Usa nga olitawohay nga nagtubo sugad nga Kristiano an nahinunumdom nga may-ada panahon nga nakaeksperyensya hiya hin panluya ha espirituwal: “May mga panahon nga ha pag-abat ko diri ako maaram kon kay ano nga usa ako han mga Saksi ni Jehova. Gintutdoan ako han kamatuoran han Biblia tikang ha pagkabata. Usahay naghunahuna ako nga usa la ini han establisado na, kinakarawat nga relihiyon.” Bangin ginpapabay-an han iba nga an ira pagkilala ha ira kalugaringon maimpluwensyahan han mga artista, han media, ngan han panlantaw yana ha kinabuhi nga diri uyon ha kaburut-on han Dios. (Efeso 2:2, 3) An iba nga mga Kristiano bangin makaeksperyensya usahay hin mga panahon han pagruhaduha ha kalugaringon ngan pag-usisa utro han ira mga prinsipyo ngan mga tumong.

 7. (a) Ano nga klase hin pag-usisa ha kalugaringon an angayan para ha mga surugoon han Dios? (b) Diin nakatago an peligro?

⁷ Sayop ba an pag-usisa hin maopay ha aton kalugaringon ha pana-panahon? Diri. Bangin nahinunumdoman mo nga gindasig ni apostol Pablo an mga Kristiano nga magpadayon nga usisahon an ira kalugaringon: “Pagproyba kamo ha iyo ngahaw, kon aada kamo ha pagtoo, proybahi niyo an iyo mga kalugaringon [“kon ano kamo,” NW].” (2 Korinto 13:5) Gindadasig dinhi han apostol an mga Kristiano nga mag-usisa hin maopay basi hibaroan an anoman nga kaluyahan ha espirituwal nga bangin nagtutubo, basi makahimo hin kinahanglanon nga mga paagi ha pagtadong hito. Basi masarihan han usa nga Kristiano kon hiya ba aada ha pagtoo, kinahanglan siguruhon niya kon an iya mga pulong ngan mga buhat nauyon ha iya gin-aangkon nga pagtoo. Kondi, kon nahisisimang, magigin waray kapulsanan ngan mahimo makadaot ha espirituwal an pag-usisa ha kalugaringon nga nagpapagios ha aton nga pangitaon an aton “pangirilal-an” o mamiling hin mga baton nga waray koneksyon ha aton relasyon kan Jehova o ha Kristiano nga kongregasyon. a Diri gud kita maruruyag nga ‘magkalulunod kita may kalabotan ha aton pagtoo’!—1 Timoteo 1:19.

Diri Kita Talwas ha mga Kakurian

8, 9. (a) Paonan-o iginpahayag ni Moises an iya mga pagbati hin pagruhaduha ha kalugaringon? (b) Paonan-o binaton hi Jehova ha mga pagbati ni Moises hin pagin diri takos? (c) Paonan-o ka naaapektohan han mga pasarig ni Jehova?

⁸ Sadang ba umabat hin kapakyasan an mga Kristiano nga usahay nakakaeksperyensya hin pagruhaduha ha kalugaringon? Syempre diri! Oo, mahimo hira maliaw ha paghibaro nga natural la an sugad nga mga pagbati hin kapakyasan. An matinumanon nga mga saksi han Dios ha naglabay nga mga panahon nakaeksperyensya hito. Tagda pananglitan, hi Moises, nga nagpakita hin diri-ordinaryo nga pagtoo, pagkamaunungon, ngan debosyon. Han igintoka hi Moises ha baga in daku hinduro nga buruhaton, naaawod nga nagpakiana hiya: “Hin-o ako?” (Eksodo 3:11) Bangin an baton nga nahunahuna niya amo an, ‘Ordinaryo la ako nga tawo!’ o ‘Diri ako takos hito!’ An pipira nga mga bahin han gintikangan nga klase hin pamilya ni Moises bangin nakahimo ha iya nga umabat nga hiya diri takos: Nagtikang hiya ha nasud han  mga uripon. Iginsalikway hiya han mga Israelita. Diri hiya maopay nga mamumulong. (Eksodo 1:13, 14; 2:11-14; 4:10) Magbarantay hiya han mga karnero, an trabaho nga kinangangalasan han mga Ehiptohanon. (Genesis 46:34) Diri urusahon nga inabat niya nga diri hiya takos magin paratalwas han uripon nga katawohan han Dios!

⁹ Ginpasarig ni Jehova hi Moises pinaagi han paghatag ha iya hin duha nga masasarigan nga saad: “Ha pagkamatuod ako maupod ha imo; ngan amo ini an magigin tigaman, nga ginsugo ko ikaw: kon madara mo an katawohan tikang ha Ehipto, kamo mag-aalagad ha Dios dida hini nga bukid.” (Eksodo 3:12) Ginsumatan han Dios an iya nag-aalang nga surugoon nga Hiya pirme maupod ha iya. Dugang pa, iginpapasabot ni Jehova nga iya gud luluwason an iya katawohan. Ha paglabay han mga katuigan, an Dios nagsaad hin pariho nga bulig. Pananglitan, pinaagi kan Moises hiya nagsiring ha nasud han Israel han hirani na hira sumulod ha Tuna nga Iginsaad: “Magpakabaskog ka ngan magmaisugon. . . . Hi Jehova nga imo Dios, hiya an maupod ha imo: diri ka niya kakawangon, o diri ka man tatalikdan.” (Deuteronomio 31:6) Ginpasarig liwat ni Jehova hi Josue: “Waray bisan hin-o nga tawo nga takos makaato ha imo ha ngatanan nga adlaw han imo kinabuhi. . . . Maupod ako ha imo. Diri ko ikaw kakawangon, diri ko ikaw babayaan.” (Josue 1:5) Ngan nagsasaad hiya ha mga Kristiano: “Diri ko gud ikaw ibibilin, ngan diri ko gud ikaw babayaan.” (Hebreo 13:5) An pagkaada hito nga makusog nga suporta sadang magpalipay ha aton nga mga Kristiano kita!

10, 11. Paonan-o nabuligan an Lebihanon nga hi Asap nga matipigan an husto nga disposisyon para ha kapulsanan han iya pag-alagad kan Jehova?

¹⁰ Mga lima ka siglo an naglabay katapos ni Moises, usa ka matinumanon nga Lebihanon nga hi Asap an tangkod nga nagsurat mahitungod han iya mga pagruhaduha ha kapulsanan han pagpadayon han matadong nga buhat. Samtang nangangalimbasog hi Asap ha pag-alagad ha Dios bisan pa han mga kakurian ngan mga pagsulay, nakita niya nga an iba nga nagtamay ha Dios nagin mas gamhanan ngan mainuswagon. Paonan-o naapektohan hi Asap? “Mahitungod ha akon, gutiay [na] la an akon mga tiil mahibulag,” siring niya. “Gutiay [na] la an akon mga biksal manhitalindas. Kay aawaon ako hadton mga palabilabihon, han pakakita ko han kauswagan han mga magraot.” Nagtikang hiya magruhaduha ha kapulsanan han pagin usa nga magsiringba ni Jehova. “Ha pagkamatuod kawang la an paghugas ko han akon kasingkasing, ngan an paghunaw ko han akon kamot ha pagkaputli,” naghunahuna ni Asap. “Ha bug-os nga adlaw ginbunalan ako.”—Salmo 73:2, 3, 13, 14.

¹¹ Paonan-o gin-atubang ni Asap inin nakakaguol nga mga pagbati? Iya ba ginnigaran ito? Waray. Iya iginpahayag ito ha pag-ampo ha Dios, sugad han mababasa naton ha Salmo 73. An nakagbag-o han disposisyon ni Asap amo an iya pagbisita ha santuaryo han templo. Samtang nakadto hiya, nasantop niya nga an debosyon ha Dios amo pa gihapon an pinakamaopay buhaton. Tungod kay napakusog utro an iya apresasyon ha espirituwal, nasabtan niya nga hi Jehova nangangalas ha karaotan ngan ha igo nga panahon sisirotan niya an mga magraot. (Salmo 73:17-19) Tungod kay natadong an disposisyon, naparig-on utro ni Asap an iya pagtagad ha pangirilal-an sugad nga dungganon nga surugoon ni Jehova. Hiya nagsiring ha Dios: “Magpapadayon ako hin pag-upod ha imo: imo ginkaptan an akon too nga kamot. Imo ako pagmamandoan han imo sagdon, ngan kon matapos karawata ako ha himaya.” (Salmo 73:23, 24) Nalipay  ngan natagbaw utro hi Asap ha iya Dios.—Salmo 34:2.

Maaram Gud Hira Kon Hin-o Hira

12, 13. Paghatag hin mga susbaranan nga mga tawohan ha Biblia nga nalipay ha ira relasyon ha Dios.

¹² An usa nga paagi ha pagparig-on han aton pagtagad ha Kristiano nga pangirilal-an amo an pag-usisa ngan pagsubad ha pagtoo han maunungon nga mga magsiringba, nga bisan pa han kakurian nalipay gud ha ira relasyon ha Dios. Hunahunaa hi Jose nga anak ni Jakob. Han bata pa hiya, ha malingoon nga paagi iginbaligya hiya sugad nga uripon ngan gindara ngadto ha Ehipto, ginatos ka kilometro an kahirayo tikang ha iya mahadlukon-ha-Dios nga amay ngan hirayo gud ngan naiiba tikang ha iya mahigugmaon ngan mabinuligon nga panimalay. Samtang nakadto hi Jose ha Ehipto, waray tawo nga iya maaroan hin sagdon nga tikang ha Dios, ngan kinahanglan atubangon niya an makuri nga mga sitwasyon nga nagsari han iya moral ngan pagsarig ha Dios. Kondi, matin-aw nga nangalimbasog gud hiya nga matipigan an marig-on nga pagtagad ha pangirilal-an sugad nga usa nga surugoon han Dios, ngan nagpabilin hiya nga matinumanon ha hinbabaroan niya nga husto. Ginhunahuna niya nga dungganon hiya sugad nga usa nga magsiringba ni Jehova bisan pa han diri-maopay nga palibot, ngan waray hiya mag-alang ha pagpahayag han iya pagbati.—Genesis 39:7-10.

¹³ Paglabay hin walo ka siglo, usa nga Israelita nga daragita nga nagin uripon han Siryahanon nga heneral nga hi Naaman an waray mahingalimot han iya pangirilal-an sugad nga magsiringba ni Jehova. Han nagkaada higayon, maisugon nga naghatag hiya hin maopay nga pamatuod mahitungod kan Jehova han iginpakilala niya hi Eliseo sugad nga propeta han totoo nga Dios. (2 Hadi 5:1-19) Paglabay hin mga tuig katapos hito, an batan-on nga hi Hadi Josia, bisan pa kon nag-ukoy hiya  ha maraot nga palibot, nagpasa hin balaud para ha mga reporma ha relihiyon ha sulod hin maiha nga panahon, nag-ayad han templo han Dios, ngan nanguna ha nasud basi mahibalik ha pagsingba kan Jehova. Nalipay hiya ha iya pagtoo ngan pagsingba. (2 Kronikas, kapitulo 34, 35) Hi Daniel ngan an iya tulo nga Hebreohanon nga mga kaupod ha Babilonya waray gud mahingalimot han ira pangirilal-an sugad nga mga surugoon ni Jehova, ngan bisan ilarom han pag-ipit ngan pagsulay, ira gintipigan an ira integridad. Matin-aw, nalipay hira ha pagin mga surugoon ni Jehova.—Daniel 1:8-20.

Magin Malipayon Kon Hin-o Kamo

14, 15. Ano an nahiuupod ha paghambog han aton Kristiano nga pangirilal-an?

¹⁴ Naglampos ini nga mga surugoon han Dios tungod kay ira ginpatubo an maopay nga pagtagad ha ira kahimtang ha atubangan han Dios. Kumusta man kita yana? Ano an nahiuupod ha paghambog han aton Kristiano nga pangirilal-an?

¹⁵ Siyahan, nag-uupod ini hin hilarom nga apresasyon ha pagin usa han katawohan nga nagdadara han ngaran ni Jehova, nga nagpapahimulos han iya bendisyon ngan pag-uyon. Sigurado an Dios kon hin-o an nadapig ha iya. Hi apostol Pablo, nga nabuhi ha panahon han duro an kasamok ha relihiyon, nagsurat: “[“Hi Jehova,” NW] nakilala han mga iya.” (2 Timoteo 2:19; Numeros 16:5) Hi Jehova nalilipay hadton “mga iya.” Hiya nasiring: ‘Hiya nga nakawkaw ha iyo nakawkaw ha tawo-tawo han akon mata.’ (Sakarias 2:8) Matin-aw, hi Jehova nahigugma ha aton. Sugad nga balos, an aton relasyon ha iya sadang igbasar ha hilarom nga gugma ha iya. Hi Pablo nagsiring: “Kon an usa ka tawo nahigugma ha Dios, amo ini hiya an kinikilala niya.”—1 Korinto 8:3.

16, 17. Kay ano nga ikinalilipay han mga Kristiano, batan-on ngan lagas, an ira espirituwal nga panurundon?

¹⁶ An mga batan-on nga nagdaku sugad nga mga Saksi ni Jehova sadang mag-usisa kon an ira ba Kristiano nga pangirilal-an nagigin mas marig-on tungod han personal nga relasyon ha Dios. Diri mahimo nga magdepende la hira ha pagtoo han ira mga ginikanan. Mahitungod han tagsa nga surugoon han Dios, hi Pablo nagsurat: “Ha iya kalugaringon nga agaron hiya matukdaw o mahuhulog.” Salit, hi Pablo nagpadayon: “An tagsa-tagsa ha aton maghahatag ha Dios hin ihap mahitungod han iya kalugaringon.” (Roma 14:4, 12) Matin-aw, an diri-bug-os-kasingkasing nga pagkarawat ha tradisyon han pamilya ha pagsingba diri makakaparig-on han duok, nagpapadayon nga relasyon kan Jehova.

¹⁷ Ha bug-os nga kasaysayan, may-ada katulinan han damu sunod-sunod nga mga saksi ni Jehova. Nagtikang ito ha matinumanon nga tawo nga hi Abel—mga 6,000 ka tuig na an naglabay—ngada ha ‘daku nga panon’ han moderno nga mga Saksi ngan tubtob ha mga magsiringba ni Jehova nga magpapahimulos han waray kataposan nga tidaraon. (Pahayag 7:9; Hebreo 11:4) Kita an pinakabag-o la nga grupo hinin hilawig nga katulinan han matinumanon nga mga magsiringba. May-ada kita urusahon gud nga espirituwal nga panurundon!

18. Paonan-o an aton mga prinsipyo ngan mga suruklan nagbubulag ha aton tikang ha kalibotan?

¹⁸ Nahidadabi liwat ha aton Kristiano nga pangirilal-an an mga prinsipyo, mga kalidad, mga suruklan, ngan mga pamatasan nga nagpapakilala ha aton sugad nga mga Kristiano. Ito ‘An Dalan,’ an amo la nga malampuson nga paagi han pagkinabuhi ngan ha pagpalipay ha Dios. (Buhat 9:2; Efeso 4:22-24) An mga Kristiano ‘nagpuproyba [‘nagsisiguro,’ NW] han ngatanan nga mga butang’ ngan nagtitipig han mga maopay! (1 Tesalonika 5:21) May-ada kita klaro nga pagsabot ha daku nga kaibahan butnga han Kristianidad ngan han kalibotan nga nagpahirayo ha Dios. Iginpapatin-aw ni Jehova an bisan ano nga kaibahan butnga han totoo nga pagsingba ngan han palso. Pinaagi han iya propeta nga hi Malakias, hiya nagpahayag:  “[“Sigurado nga makikita utro niyo an,” NW] ginkakalainan han matadong ngan han maraot, han ginkakalainan niya nga nag-aalagad ha Dios ngan niya nga diri nag-aalagad ha iya.”—Malakias 3:18.

19. An totoo nga mga Kristiano diri gud magigin mga biktima han ano?

¹⁹ Tungod kay importante gud nga ighambog naton hi Jehova dida hinin masamok nga kalibotan, ano an makakabulig ha aton basi makagtipig hin husto nga paghambog tungod ha aton Dios ngan marig-on nga pagtagad ha aton Kristiano nga pangirilal-an? An makakabulig nga mga suhestyon mababasa ha masunod nga artikulo. Samtang ginhihisgotan ini, makakasiguro ka hini: An totoo nga mga Kristiano diri gud magigin mga biktima han “kawaray-interes.”

[Footnote]

Nahinunumdoman Mo Ba?

• Paonan-o mahimo ‘ighambog hi Jehova’ han mga Kristiano?

• Ano an imo hinbaroan tikang ha mga susbaranan ni Moises ngan ni Asap?

• Hin-o nga mga tawohan ha Biblia an nalipay ha ira pag-alagad ha Dios?

• Ano an nahidadabi ha paghambog han aton Kristiano nga pangirilal-an?

[Mga Pakiana]

[Retrato ha pahina 14]

Ha usa ka panahon, hi Moises inabat hin pagruhaduha ha kalugaringon

[Mga Retrato ha pahina 15]

Damu nga mga surugoon ni Jehova ha kadaan nga mga panahon an nalipay ha ira matin-aw nga pangirilal-an