Mga Pakiana Tikang ha mga Magbarasa

An pagkaon ba ni David ngan han iya katawohan han mga tinapay nga halad nagpapasabot nga mahimo talapason an balaud han Dios nga diri masisirotan an usa kon aada ha makuri nga mga kahimtang?—1 Samuel 21:1-6.

Sumala ha Lebitiko 24:5-9, an mga tinapay nga halad nga sinasaliwnan kada Sabbath iginrireserba para magin pagkaon han mga saserdote. Nagin angayan ini nga paggamit tungod han prinsipyo nga baraan an mga tinapay ngan magigin pagkaon ito han kalalakin-an nga ada ha pag-alagad ha Dios—an mga saserdote. An paghatag hito ha ordinaryo nga trabahador o pagkaon hito para la ha kalipayan sigurado nga sayop. Kondi, waray sala nga nahimo an saserdote nga hi Ahimelek han iginhatag niya an iginpresenta nga tinapay kan David ngan ha iya katawohan.

Posible nga nagtutuman hi David hin usa nga espesyal nga toka tikang kan Hadi Saul. Gutóm hi David ngan an iya katawohan. Ginhunahuna ni Ahimelek nga malimpyo hira ha seremonyal nga paagi. Bisan kon ha istrikto nga pag-interpretar han Balaud an ira pagkaon han mga tinapay nga halad sayop gud, uyon ito ha iginpahamtang nga basihan nga paggamit han iginpresenta nga tinapay. Tungod kay ginhuhunahuna ini, naghimo hi Ahimelek hin eksepsyon ha balaud. Gin-gamit ni Jesu-Kristo mismo ini nga panhitabo ha pag-ilustrar han pagin sayop han ura-ura kaistrikto nga paagi han pag-aplikar han balaud may kalabotan ha Sabbath nga gin-obligar han interpretasyon hito han mga Pariseo.—Mateo 12:1-8.

Kondi, an gin-unabi nga panhitabo diri nangangahulogan nga mahimo talapason an balaud han Dios kon nagigin makuri an kahimtang. Pananglitan, nahitabo an baga hin seryoso nga kahimtang han nakikiaway an Israelita nga mga girriro ha mga Pilisteohanon. Hi Hadi Saul nagsiring: “Maghikaraot an tawo nga kumaon hin bisan ano nga karan-on ngada ha ka kulop, ngan ako makabulos ha akon mga kaaway.” An Biblia nasiring: “Ira hinampak an . . . mga Pilisteohanon hadto nga adlaw.” An mga sundalo kapoy tungod ha pakig-away ngan gutóm, ngan ‘an katawohan nangihaw hin mga hayop dida ha tuna ngan nangaon hini upod an dugo.’ (1 Samuel 14:24, 31-33) Nakasala hira kan Jehova pinaagi ha pagtalapas han iya balaud mahitungod ha dugo. An ira mga ginbuhat nagtalapas han amo la nga gamit han dugo nga igintugot han Dios, nga amo an “pagtabon han sala.” (Lebitiko 17:10-12; Genesis 9:3, 4) Maopay na la, maloloy-on nga ginkarawat ni Jehova an espesyal nga mga halad para hadton mga nakasala.—1 Samuel 14:34, 35

Oo, ginlalaoman ni Jehova nga susundon naton an iya mga balaud ilarom han ngatanan nga mga kahimtang. “Amo ini an gugma han Dios,” siring ni apostol Juan, “nga pagtumanon ta an iya mga sugo.”—1 Juan 5:3.

[Retrato ha pahina 30]

Iginbubutang an bag-o nga mga tinapay nga halad ha sulod han tabernakulo kada Sabbath