Paglaom ha Butnga han Pagturaw—Asembleya ha Usa nga Kampo han mga Kalagiw

AN Kakuma nga kampo han mga kalagiw nahimumutang ha norte nga bahin han Kenya, hirani ha giutan han Sudan. Sobra 86,000 ka tawo an naukoy didto. Mamara hinduro an lugar, ngan an temperatura ha adlaw naabot hin 50°C. Kalyap an kamadarahog butnga han mga kalagiw. Para ha damu, an kampo usa nga lugar han pagturaw. Kondi, an iba may-ada paglaom.

Upod ha mga kalagiw amo an pipira nga mga Saksi ni Jehova nga madasigon nga nagpapasamwak han maopay nga sumat han Ginhadian. Bahin hira han usa nga gutiay nga kongregasyon ha Lodwar, nga 120 kilometro ha sur han kampo. An sunod nga kongregasyon may kahirayoon nga walo-ka-oras nga pagbiyahe.

Tungod kay an mga kalagiw diri puydi gumawas ha kampo, damu an diri nakakatambong ha mga asembleya ngan mga kombensyon nga gindudumara han mga Saksi ni Jehova. Tungod hini, ginhikay an pagdumara hin usa nga adlaw han espesyal nga asembleya ha sulod han kampo.

Pagbiyahe Ngadto ha Norte

Basi suportahan an asembleya, 15 nga Saksi ha bungto han Eldoret, nga 480 kilometros ha sur han kampo, an nagboluntaryo nga himoon an makuri hinduro nga pagbiyahe ngadto ha mamara hinduro nga norte, upod an usa nga estudyante ha Biblia nga nagpagamit han iya gutiay nga bus ngan drayber. An ira kinasingkasing nga hingyap amo an pagdasig ngan pagparig-on han ira kabugtoan.

Durante han usa ka mahagkot nga temprano nga kaagahon, nagtikang an pagbiyahe ha bukidnon nga dapit han weste nga Kenya. An mabatsi nga kalsada nagtipasagka nga naagi ha kaumhan ngan kagurangan antes magtipalusong ngadto ha mapaso nga klima han disyerto. An mga panon han mga kanding ngan mga kamelyo nananabsab ha uga nga tuna. Damu nga membro han tribo an nagbabaktas nga nakasul-ot han ira tradisyonal nga mga panapton, ngan damu an may dara nga mga balbag, bawog, ngan pana. Katapos magbiyahe hin 11 ka oras, dinangat an mga Saksi ha Lodwar, usa nga mapaso ngan matapotapo nga komunidad nga may-ada haros 20,000 ka tawo. Katapos han mapaso nga pagkarawat ha ira han nag-abiabi nga mga Saksi, namahuway an mga nagbiyahe basi magin andam hira para ha usa ka bug-os nga kataposan han semana nga buruhaton.

Kinabuwasan, ginkadto han mga bisita an pipira han mga kiritaon han lugar. An Danaw Turkana, an pinakadaku nga danaw ha Kenya, amo an usa nga lugar nga kinahanglan makita han mga bisita. Napapalibotan ito hin kilo-kilometro nga kabanwaan, ngan inuukyan han pinakadamu nga buaya ha  kalibotan. An alkaline nga katubigan nabulig ha pagsuporta han pipira la nga mga tawo nga naukoy ha baybayon hito. Nalipay an mga bisita nga pahimulsan an gab-i ha pagtambong ha Teokratiko nga Eskwelahan ha Ministeryo ngan Katirok ha Pag-alagad upod han lokal nga kongregasyon. Maopay pagkit-on an ira Kingdom Hall, nga gintukod han 2003 pinaagi han programa ha pagtukod han mga Saksi para ha mga nasud nga limitado ha pinansyal.

An Adlaw han Espesyal nga Asembleya

Igin-gahin an Domingo para ha adlaw han espesyal nga asembleya. An Lodwar nga Kongregasyon ngan an bisita nga kabugtoan gintugotan na ha pagsulod ha kampo han alas-8:00 h.a., salit an mga Saksi naikag nga magtikang hin temprano. An kalsada nagpaliko-liko nga naagi ha mamara nga tuna tipakadto ha giutan han Sudan. Napapalibotan an dalan hin magtais nga kabukiran. An kiritaon nagtikahaluag ha barangay han Kakuma. Nag-inuran hito nga panahon, ngan ginbahaan an pipira nga mga bahin han diri-sementado nga dalan tipasulod ha kampo. Kasagaran han mga balay an hinimo tikang ha baldosa nga lapok nga may mga atop nga lata o trapal. An mga grupo han mga taga-Etiopia, taga-Somalia, taga-Sudan, ngan iba pa naukoy ha ira tagsa nga mga dapit. An mga nagbiyahe malipayon nga gin-abiabi han mga pinalagiw.

Gindumara an asembleya ha usa nga training center. An mga dibuho ha mga pader nagpakita han mga kangirhat han kinabuhi han mga pinalagiw, kondi an disposisyon han mga nakada ha training center hito nga adlaw nagpakita hin paglaom. An tagsa nga pakigpulong iginpahayag ha Ingles ngan  Swahili. Iginpahayag pa ngani han pipira nga mga mamumulong nga maaram gud han duha nga yinaknan an ira mga pakigpulong ha duha nga yinaknan. Usa nga kalagiw nga bugto nga lalaki nga taga-Sudan an siyahan nga nagpahayag ha ulohan nga, “Pag-usisa han Aton Simboliko nga Kasingkasing.” An iba nga mga bahin gindumara han bisita nga mga tigurang.

An usa nga espesyal nga bahin han tagsa nga asembleya amo an bawtismo. Ha ikatarapos nga bahin han pahayag ha bawtismo, an ngatanan nakatutok ha uusa nga kandidato han hiya tumukdaw. Pinalagiw hi Gilbert upod han iya amay tikang ha ira gintikangan nga nasud durante han pamatay ha mga tribo han 1994. Ha tinikangan, naglaom hira nga magin talwas ha Burundi, kondi waray pag-iha nasantop nira nga namimeligro pa gihapon hira. Pinalagiw hi Gilbert ngadto ha Zaire, katapos ngadto ha Tanzania—usahay natago hiya ha kagurangan—ngan ha kataposan ngadto ha Kenya. Damu an nakaluha han karawaton hiya han mamumulong sugad nga bugto ha kongregasyon. Samtang natindog hi Gilbert ha atubangan han gutiay nga grupo han 95 ka tawo, ginbaton niya hin matin-aw ngan may kompyansa nga “Ndiyo!”—an Swahili nga pulong para han “Oo!”—an duha nga pakiana nga iginpakiana ha iya han mamumulong. Hiya ngan an pipira nga iba pa nga kabugtoan mano-mano nga nakaukab na hin gutiay nga buho ngan ginsapinan nira ito hin trapal nga ginagamit hadto sugad nga atop han iya inuukyan ha kampo. Sugad nga pamatuod han iya kaikag nga mabawtismohan, hito mismo nga aga iya na ginpuno an buho hin tubig, nga nagamit hin balde, nga nag-uusahan la hiya!

Usa han importante nga mga bahin ha sesyon ha kulop amo an pagsumat hin mga eksperyensya mahitungod han naiiba nga kahimtang han pinalagiw nga mga Saksi. Iginsaysay han usa nga bugto nga lalaki kon paonan-o niya gindaop an usa ka tawo nga napahuway ilarom han usa nga puno.

“Pirme ba talwas an paglingkod ha ilarom han usa nga puno?”

“Oo,” binaton an tawo. Katapos hiya siniring, “Kondi diri, diri ngay-an ha gab-i.”

Ginbasa han bugto an Mika 4:3, 4 ha iya: “Hira an tagsa-tagsa nga tawo malingkod ha sirong han iya balagon han ubas ngan ha sirong han iya kahoy nga igera; ngan waray bisan hin-o nga maghahadlok ha ira.” “Maaram ka,” hiya nagsaysay, “ha bag-o nga kalibotan han Dios, pirme na ito magigin talwas.” Ginkarawat han lalaki an usa ka literatura nga bulig ha pag-aram han Biblia.

Usa nga bugto nga babaye nga nagbiyahe ngadto ha Kakuma an namatayan pa la hin tulo nga duok nga mga membro han pamilya. Ha pagkomento mahitungod han kabugtoan ha kampo, hiya nagsiring: “Usa ini nga lugar nga damu hinduro an kakurian; kondi, gintitipigan nira nga marig-on an ira pagtoo. Naukoy hira ha diri malipayon nga lugar, kondi malipayon hira nga nag-aalagad kan Jehova. May-ada hira mamurayawon nga relasyon ha Dios. Nadasig ako nga magpadayon ha pagin mamurayawon ngan mag-alagad kan Jehova. Waray ako mairireklamo!”

Waray gud pag-iha natapos an asembleya. Ha ultimo nga pahayag, ginsiring han mamumulong nga presente an mga representante tikang ha walo nga nasud. An usa han mga Saksi nga pinalagiw nagkomento nga ini nga asembleya usa nga pamatuod han pagkaurosa ngan gugma han mga Saksi ni Jehova dida ha nababahin nga kalibotan. An ira pagminagburugto usa nga totoo nga Kristiano nga pagminagburugto.—Juan 13:35.

 [Kahon/Retrato ha pahina 25]

AN NAWARA NGA KABATAAN NGA KALALAKIN-AN HAN SUDAN

Tikang ha tinikangan han girra sibil ha Sudan han 1983, lima ka milyon ka tawo na an nawad-an hin balay. Kaupod ha ira amo an mga 26,000 nga kabataan, nga nahibulag ha ira mga pamilya. Yinukot ha ira an pinalagiw ngadto ha mga kampo han mga kalagiw ha Etiopia, diin nagpabilin hira ha sulod hin mga tulo ka tuig. Tungod kay napiritan hira ha pagbalhin utro, usa ka tuig nga nagbinaktas hira tipabalik ha norte nga Kenya nga inagi ha Sudan, nga gindaot hin mga sundalo, tulisan, sakit, ngan ihalas nga mga mananap. Katunga la han kabataan an nakatalwas hinin makuri hinduro nga mga pagbiyahe, ngan ha urhi hira an nagin nangunguna nga mga membro han Kakuma nga kampo. Gintawag hira han mga ahensya nga namulig sugad nga an nawara nga kabataan nga kalalakin-an han Sudan.

An Kakuma nga kampo han mga kalagiw urukyan na yana han magkalain-lain an nasyonalidad nga mga kalagiw tikang ha Sudan, Somalia, Etiopia, ngan iba pa nga mga nasud. Pag-abot han usa nga dinangop ha kampo, tinatagan hiya hin pipira nga importante nga materyales para ha pagtukod hin urukyan ngan hin trapal para iatop. Makaduha ha usa ka bulan, an tagsa nga dinangop tinatagan hin mga 6 ka kilo nga harina, 1 ka kilo nga balatong, ngan asyete ngan asin. Iginbabarter han damu nga mga dinangop an pipira han ira mga rasyon basi makakuha hin iba nga mga kinahanglanon.

An pipira hinin nawara nga kabataan nga kalalakin-an nahibalik na ha ira mga pamilya o ginpaukoy na ha iba nga mga nasud. Kondi sumala ha Office of Refugee Resettlement, “yinukot pa an nahibibilin ha matapotapo ngan malangaw nga kampo ha Kakuma, diin kinahanglan hira mangalimbasog hinduro basi makabiling hin pagkaon ngan magtrabaho gud basi makaeskwela.”

[Ginkuhaan han Retrato]

Ha pagtugot han Refugees International

[Mapa ha pahina 23]

(Para ha aktuwal nga format, kitaa an publikasyon)

KENYA

Kakuma nga kampo

Danaw Turkana

Lodwar

Eldoret

Nairobi

[Retrato ha pahina 23]

Makuri an mga kahimtang han pagkinabuhi ha sulod han kampo

[Retrato ha pahina 23]

Iginrarasyon an tubig ha Kakuma nga kampo

[Retrato ha pahina 23]

Ginhimo han mga Saksi nga taga-Kenya an makuri hinduro nga pagbiyahe ngadto ha norte basi dasigon an ira kabugtoan

[Retrato ha pahina 24]

Usa nga misyonero nga nag-iinterpretar hin pahayag han usa nga lokal nga espesyal payunir

[Retrato ha pahina 24]

Buho diin gindumara an bawtismo

[Ginkuhaan han Retrato ha pahina 23]

Pagrasyon hin tubig ngan Kakuma nga Kampo han mga Pinalagiw: Ha pagtugot han Refugees International