An Paglaom ha Pagkabanhaw—Ano an Kahulogan Hito Para ha Imo?

“Imo binubuklad an imo kamot, ngan ginbubusog an tinguha han tagsa nga buhi.”—Salmo 145:16.

1-3. Ano an paglaom han iba ha tidaraon? Iilustrar.

 AN NOYBE anyos nga hi Christopher ngan an iya bugto nga lalaki kaupod han ira batâ, dadâ, ngan duha nga patod ha pagsangyaw ha balay-balay hito nga aga ha ira Kristiano nga ministeryo hirani ha Manchester, ha Inglatera. An aton magasin nga Awake! nagsaysay han nahitabo. “Han kulop, magkaupod nga nagbiyahe hira ha pamasyada ngadto ha Blackpool, ha usa nga kahirani nga resort ha ligid han dagat. Hira ngatanan nga 6 upod na an 12 ka tawo namatay dayon tungod han aksidente ha highway, nga iginsaysay han polisya sugad nga ‘bug-os nga kabungkagan.’ ”

² Han gab-i antes han trahedya, an pamilya tinambong ha Pag-aram ha Libro han Kongregasyon, diin ginhisgotan an topiko nga kamatayon. “Hi Christopher mahunahunaon gud pirme nga bata,” siring han iya amay. “Hito nga gab-i, matin-aw nga iginsaysay niya an mahitungod han bag-o nga kalibotan ngan han iya paglaom ha tidaraon. Katapos, samtang nagpapadayon an amon paghisgot, hi Christopher tigda la nga nagsiring: ‘An kaopayan han pagin usa han mga Saksi ni Jehova amo nga, bisan kon nakakabido an kamatayon, maaram kita nga magkikirigta utro kita pag-abot han panahon.’ Bisan usa ha amon nga presente didto waray gud maghunahuna nga ito nga mga pulong magigin handumanan gud.” a

³ Mga tuig antes pa hito, han 1940, hi Franz, usa nga taga-Austria nga Saksi, inatubang ha sentensya nga pupugotan tungod han iya pagpabilin nga maunungon kan Jehova. Samtang priso ha Berlin, hi Franz nagsurat ha iya iroy: “Sumala han akon hinbaroan, kon nanumpa ako ha [militar], nakabuhat unta ako hin sala nga takos han kamatayon. Diri ko gud ito makakarawat. Diri ako mababanhaw. . . . Ngan yana, hinigugma ko nga Nanay ngan ngatanan nga akon kabugtoan, ginsumatan ako yana nga adlaw han sentensya ha akon nga kamatayon, ngan papatayon na ako buwas nga aga, ngan ayaw kamo kahadlok. May-ada ako kusog tikang ha Dios, pariho gud han ngatanan nga totoo nga mga Kristiano ha naglabay. . . . Kon magpabilin kamo nga marig-on tubtob ha kamatayon, magkikirigta utro kita ha pagkabanhaw. . . . Tubtob ha aton pagkirigta utro.” b

 4. Ano an epekto ha imo han mga eksperyensya nga iginsaysay dinhi, ngan ano an sunod nga paghihisgotan naton?

⁴ An paglaom ha pagkabanhaw importante gud kan Christopher ngan kan Franz. Totoo ito ha ira. Sigurado nga ini nga mga asoy nakakabantad han aton kasingkasing! Basi mapahilarom an aton apresasyon kan Jehova ngan basi maparig-on an aton paglaom ha pagkabanhaw, aton paghisgotan kon kay ano nga mahitatabo an pagkabanhaw ngan kon paonan-o ini sadang makaapekto ha aton mismo.

Bisyon han Tunan-on nga Pagkabanhaw

5, 6. Ano an iginpapahayag han bisyon nga iginrekord ni apostol Juan ha Pahayag 20:12, 13?

⁵ Ha usa nga bisyon han mga hitabo durante han Milenyo nga Pagmando ni Kristo Jesus, hinkit-an ni apostol Juan nga nahitatabo an pagkabanhaw ha tuna. “Hinkit-an ko an mga minatay, ngan an dagku ngan gudtiay,” siring niya. “Ngan ihinatag han dagat an mga minatay nga nakada hito; ngan ihinatag han kamatayon ngan Hades an mga minatay nga nakada ha ira.” (Pahayag 20:12, 13) Anoman an ranggo—“dagku” man o “gudtiay”—pagagawson  an ngatanan nga bihag dida ha Hades (Sheol), an komon nga lubnganan han katawohan. Adton nagkamatay ha dagat mabubuhi liwat hito nga panahon. Inin urusahon nga hitabo bahin han katuyoan ni Jehova.

⁶ An usa ka yukot ka tuig nga pagmando ni Kristo titikangan han paggapos kan Satanas ngan paglabog ha iya ha kahiladman. Waray usa hadton mga binanhaw bisan han mga naluwas ha daku nga kagol-anan an malilimbongan ni Satanas durante hito nga pagmando, kay hiya waray na mahihimo. (Pahayag 20:1-3) An usa ka yukot ka tuig baga in maiha nga panahon para ha imo, kondi ha pagkamatuod, “sugad hin usa ka adlaw” la ito kan Jehova.—2 Pedro 3:8.

 7. Ano an magigin basihan han paghukom durante han Milenyo nga Pagmando ni Kristo?

⁷ Sumala ha bisyon, an Milenyo nga Pagmando ni Kristo magigin panahon han paghukom. Hi apostol Juan nagsurat: “Hinkit-an ko an mga minatay, ngan an dagku ngan gudtiay, nga nagkakatukdaw ha atubangan han lingkuranan nga hadianon; ngan pinamuklad an mga basahon; ngan may lain nga basahon nga binuklad, nga amo an basahon han kinabuhi. Ngan an mga minatay pinanhukman sumala ha ira mga buhat, tikang ha mga butang nga nanhisurat ha mga basahon. . . . Ngan ginhukman an tagsa-tagsa ha ira sumala ha ira mga buhat.” (Pahayag 20:12, 13) Tigamni nga an basihan hini nga paghukom diri an ginbuhat o waray buhata han tawo antes hiya mamatay. (Roma 6:7) Lugod, igbabasar ito ha “mga basahon” nga aabrihan ha tidaraon. An mga bubuhaton han usa ka tawo katapos niya hibaroan an mga sulod han mga basahon amo an babasaran ha pagsiguro kon an iya ba ngaran mahisusurat ha “basahon han kinabuhi.”

“Pagkabanhaw ha Kinabuhi” o ‘Pagkabanhaw ha Paghukom hin Sirot’

 8. Ano an duha han posible nga mga resulta para ha mga binanhaw?

⁸ Una pa ha bisyon ni Juan, iginhulagway hi Jesus sugad nga may-ada han “mga yawi han kamatayon ngan han impyerno [“Hades,” NW].” (Pahayag 1:18) Nag-aalagad hiya sugad nga kan Jehova “Prinsipe han kinabuhi,” nga tinagan hin gahum ha paghukom “ha mga buhi ngan ha mga minatay.” (Buhat 3:15; 2 Timoteo 4:1) Paonan-o niya bubuhaton ini? Pinaagi han pagbanhawa hadton nangangaturog ha kamatayon. “Ayaw kamo panhipausa hini; kay maabot an oras nga an ngatanan, nga aadto ha mga lubnganan, makakabati han iya tingog ngan . . . manggogowa.” Ngan hiya nagdugang: “An mga maopay an buhat manggogowa ha pagkabanhaw ha kinabuhi; kondi an mga maraot an buhat mababanhaw ha paghukom hin sirot.” (Juan 5:28-30) Salit, ano nga tidaraon an naghuhulat ha matinumanon nga kalalakin-an ngan kababayin-an ha kadaan nga mga panahon?

 9. (a) Ha pagbalik ha pagkabanhaw, ano an sigurado nga hibabaroan han damu? (b) Ano nga gidadakui nga edukasyonal nga buruhaton an pagbubuhaton?

⁹ Kon ini nga mga magtinumanon ha kadaan nga panahon bumalik na ha pagkabanhaw, hibabaroan dayon nira nga an mga saad nga ira ginsarigan natutuman na yana. Magigin interesado gud hira mahibaro kon hin-o an Binhi han babaye han Dios, nga gin-unabi ha siyahan nga tagna ha Biblia, ha Genesis 3:15! Malilipay gud hira ha pakabati nga inin iginsaad nga Mesias, hi Jesus, nagmatinumanon tubtob ha kamatayon, nga hito nga paagi iginhatag an iya kinabuhi sugad nga halad lukat! (Mateo 20:28) Adton mag-aabiabi ha ira ha kabuhi utro malilipay gud ha pagbulig ha ira nga makasabot nga ini nga tagana nga lukat usa nga kapahayagan han diri-takos nga pagkabuotan ngan kalooy ni Jehova. Kon hibaroan na han mga binanhaw kon ano an ginhihimo han Ginhadian han Dios ha pagtuman han katuyoan ni Jehova para ha tuna, an ira mga kasingkasing sigurado nga magsasap-ay hin mga kapahayagan han pagdayaw kan Jehova. Magkakaada hira hin damu nga higayon ha pagpakita han ira debosyon ha ira mahigugmaon nga langitnon nga Amay ngan ha iya Anak. An ngatanan nga buhi hiton nga panahon malilipay ha pakigbahin ha gidadakui nga edukasyonal nga buruhaton nga kinahanglan ha pagtutdo ha binilyon nga mga nabalik tikang ha lubnganan, nga kinahanglan kumarawat liwat han tagana han Dios nga lukat.

10, 11. (a) An Milenyo maghahatag hin ano nga mga higayon ha ngatanan dinhi ha tuna? (b) Paonan-o sadang makaapekto ini ha aton?

¹⁰ An binanhaw nga hi Abraham maliliaw gud ha pakaeksperyensya han pagkatotoo han kinabuhi ilarom han pagmando hiton nga “syudad” nga iya ginpamulat. (Hebreo 11:10, NW) Malilipay gud an matinumanon hadto nga hi Job kon hibaroan  niya nga an iya pagkinabuhi nagparig-on han iba nga mga surugoon ni Jehova nga inatubang hin mga pagsari ha ira integridad! Ngan maruruyag gud hi Daniel nga hibaroan an mahitungod han katumanan han mga tagna nga giniyahan hiya ha pagsurat hito!

¹¹ Oo, an ngatanan nga makarawat hin kinabuhi ha matadong nga bag-o nga kalibotan, pinaagi han pagkabanhaw man o pinaagi han kaluwas ha daku nga kagol-anan, mahibabaro hin damu mahitungod han katuyoan ni Jehova para ha tuna ngan ha mga umurukoy hito. Tungod han paglaom nga mabuhi ha waray kataposan ngan magdayaw kan Jehova ha kadayonan, magigin makalilipay gud an Milenyo nga programa han edukasyon. Kondi, an pinakaimportante amo an aton ginbubuhat sugad nga indibiduwal samtang nahibabaro kita ha mga sulod han mga basahon. Bubuhaton ba naton an aton hinbabaroan? Pamamalandungon ba naton ngan iaaplikar an importante nga impormasyon nga magpaparig-on ha aton basi maatohan an ultimo nga pagsari ni Satanas ha pagpasimang ha aton tikang ha kamatuoran?

12. Ano an mabulig ha kada usa nga magkaada bug-os nga pakigbahin ha edukasyonal nga buruhaton ngan ha paghimo han tuna nga magin usa ka paraiso?

¹² Diri naton sadang hingalimtan an urusahon nga mga bendisyon nga magigin resulta han pag-aplikar han mga kapulsanan han halad lukat ni Kristo. Adton nahibalik ha kinabuhi ha pagkabanhaw mawawaray na mga sakit o mga depekto ha lawas nga gin-aantos yana. (Isaias 33:24) Tungod han maopay nga lawas ngan han linalaoman nga hingpit nga kahimsog, an ngatanan nga mga umurukoy ha bag-o nga kalibotan makakahimo makigbahin hin bug-os ha edukasyonal nga buruhaton ha pagtutdo ha binilyon nga mga binanhaw dida ha dalan han kinabuhi. Ito nga mga umurukoy makikigbahin liwat ha gidadakui nga buruhaton dinhi ha tuna—nga amo an paghimo han bug-os nga tuna nga magin usa ka paraiso ha kadayawan ni Jehova.

13, 14. Ano an katuyoan han pagbuhii kan Satanas ha ultimo nga pagsari, ngan ano nga resulta an posible para ha tagsa ha aton?

¹³ Kon buhian na hi Satanas tikang ha kahiladman para ha ultimo nga pagsari, mangangalimbasog hiya ha paglimbong utro ha mga tawo. Sumala ha Pahayag 20:7-9, an ngatanan nga ‘nalimbongan nga mga nasud,’ o mga grupo han katawohan, nga nadaog han maraot nga impluwensya ni Satanas huhukman nga takos han kabungkagan: ‘Maabot an kalayo tikang ha langit, ngan maglalamoy ha ira.’ Para hadton nakaeksperyensya han pagkabanhaw durante han Milenyo, ini nga kabungkagan mangangahulogan han ira pagkabanhaw ha paghukom hin sirot. Ha kabaliktaran, an binanhaw nga mga magtiripig-han-integridad makarawat han regalo nga kinabuhi nga waray kataposan. Oo, an ira pagkabanhaw amo an “pagkabanhaw ha kinabuhi.”—Juan 5:29.

¹⁴ Paonan-o an paglaom ha pagkabanhaw nakakaliaw ha aton bisan yana? Mas importante pa gud, ano an kinahanglan buhaton naton basi masiguro nga kakarawaton naton an mga kapulsanan hito ha tidaraon?

Mga Leksyon nga Mahibabaroan Naton Yana

15. Paonan-o an pagtoo ha pagkabanhaw makakabulig yana?

¹⁵ Bangin bag-o la nga namatayan ka hin usa nga hinigugma ngan bangin nangangalimbasog ka pa nga malamposan an daku nga pagbag-o han kahimtang tungod han sugad kabirilhon nga nawara. An paglaom ha pagkabanhaw nabulig ha imo nga magkaada hin kamurayawan ha hunahuna ngan kusog nga diri naieksperyensyahan han iba tungod kay diri hira maaram han kamatuoran. ‘Diri namon buot, nga kamo diri manhibaro mahitungod han mga nanhingaturog [ha kamatayon],’ ginliaw ni Pablo an mga taga-Tesalonika, ‘nga diri kamo masubo, sugad han iba nga waray paglaom.’ (1 Tesalonika 4:13) Nahahanduraw mo ba an imo kalugaringon nga aadto ha bag-o nga kalibotan, nga nakakakita han pagkabanhaw? Kon amo, maliliaw ka yana pinaagi han pamalandong ha paglaom nga makita utro an imo mga hinigugma.

16. Ano an posible nga aabaton mo kon mahitabo na an pagkabanhaw?

¹⁶ Bangin nag-aantos ka yana han pisikal nga mga epekto han pagrebelde ni Adan, bangin pinaagi han sakit. Ayaw tuguti nga an kasakit tungod hini magpahinabo nga hingalimtan mo an makalilipay nga paglaom han imo pakaeksperyensya mismo han pagkabanhaw ngan mabuhi utro nga may-ada bag-o nga kahimsog ngan kusog ha bag-o nga kalibotan. Niyan ha pagpukrat mo han imo mga mata ngan makita mo an maglipayon nga mga  bayhon nga disidido ha pagsumat ha imo han ira kalipay ha imo pagkabanhaw, sigurado nga magpapasalamat ka ha Dios tungod han iya mahigugmaon-nga-pagkabuotan.

17, 18. Ano an duha nga importante nga leksyon nga sadang hinumdoman naton?

¹⁷ Samtang yana, tagda an duha nga leksyon nga sadang hinumdoman naton. An usa amo an pagkaimportante han bug-os-kalag nga pag-alagad kan Jehova yana mismo. Sugad nga pagsubad ha aton Agaron, hi Kristo Jesus, an aton nagsasakripisyo-ha-kalugaringon nga pagkinabuhi nagpapakita hin gugma kan Jehova ngan ha aton mga igkasi-tawo. Kon tungod han pagkontra o persikusyon nawad-an kita han aton panginabuhi o han aton kagawasan, determinado kita nga magpabilin nga marig-on ha pagtoo anoman nga mga kakurian an aton atubangon. Kon an mga parakontra magtarhog pagpatay ha aton, niyan an paglaom ha pagkabanhaw nagliliaw ngan nagpaparig-on ha aton nga magpabilin nga maunungon kan Jehova ngan ha iya Ginhadian. Oo, an aton kadasig ha buruhaton nga pagsangyaw han Ginhadian ngan ha paghimo hin disipulo naghahatag ha aton hin paglaom ha waray kataposan nga mga bendisyon nga igin-andam ni Jehova para ha mga magtadong.

¹⁸ An ikaduha nga leksyon may kalabotan ha kon paonan-o naton inaatubang an mga pagsulay tungod han pagkadiri-hingpit. An aton kahibaro ha paglaom ha pagkabanhaw ngan an aton apresasyon ha diri-takos nga pagkabuotan ni Jehova nagpaparig-on han aton determinasyon nga magpabilin nga marig-on ha pagtoo. “Ayaw niyo higugmaa an kalibotan, bisan an mga bagay ha kalibotan,” nagpahamangno hi apostol Juan. “Kon may tawo nga maghigugma ha kalibotan, an gugma han Amay waray dida ha iya. Kay an ngatanan nga aada ha kalibotan, an kairiphon han unod ngan an kairiphon han mga mata, ngan an paghambog han kinabuhi, diri kanan Amay, kondi kanan kalibotan. Ngan an kalibotan nawawara, ngan an iya kairiphon; kondi an nagbubuhat han kaburut-on han Dios nagpapadayon ha gihapon.” (1 Juan 2:15-17) An nakakadani nga mga butang han kalibotan sugad han materyalismo diri gud magigin makaruruyag ha aton kon itanding naton ito ha “kinabuhi nga totoo.” (1 Timoteo 6:17-19) Kon sulayon kita ha pagbuhat hin imoralidad, marig-on nga aatohan naton ito. Maaram kita nga kon mamatay kita antes han Armagedon, an pagpadayon ha paggawi nga diri naruruyagan ni Jehova mahimo magdara ha aton ngada ha kahimtang nga pariho hadton mga waray paglaom ha pagkabanhaw.

19. Ano nga waray-kapariho nga pribilehiyo an diri naton sadang hingalimtan?

 ¹⁹ Labaw ha ngatanan, diri gud naton sadang hingalimtan an waray-kapariho nga pribilehiyo nga lipayon an kasingkasing ni Jehova yana ngan ha kadayonan. (Proberbios 27:11) An aton pagkamatinumanon tubtob ha kamatayon o an aton padayon nga pagtipig han integridad tubtob ha kataposan hinin maraot nga sistema nagpapakita kan Jehova nga nadapig kita ha iya may kalabotan ha isyu han pagkasoberano ha uniberso. Hito nga panahon magigin makalilipay gud an pagkinabuhi ha Paraiso ha tuna pinaagi man han kaluwas ha daku nga kagol-anan o pinaagi han pakaeksperyensya han milagroso nga pagkabanhaw!

Pagpatagbaw han Aton mga Hingyap

20, 21. Ano an mabulig ha aton nga magpabilin nga matinumanon bisan kon may-ada kita waray mabaton nga mga pakiana mahitungod han pagkabanhaw? Isaysay.

²⁰ An aton paghisgot mahitungod han pagkabanhaw waray makabaton han ngatanan nga mga pakiana naton. Ano nga kahikayan an hihimoon ni Jehova para hadton mga inasaw-an han hira namatay? (Lukas 20:34, 35) Mahitatabo ba an pagkabanhaw ha lugar diin namatay an mga tawo? An mga nabanhaw ba mahibabalik ha kinabuhi nga hirani ha urukyan han ira mga pamilya? An damu nga iba pa nga mga pakiana mahitungod han mga kahikayan ha pagkabanhaw diri pa nababaton. Kondi, kinahanglan hinumdoman naton an mga pulong ni Jeremias: “Hi Jehova maopay ha ira nga naghuhulat ha iya, ha kalag nga nangingita ha iya. Maopay nga an tawo maglalaom ngan ha mahilumon maghuhulat han kaluwasan ni Jehova.” (Pagtangis 3:25, 26) Ha igo nga panahon ni Jehova, an ngatanan nga mga pakiana naton babatunon tubtob nga matagbaw gud kita hin bug-os. Kay ano nga makakasiguro kita hini?

²¹ Pamalandonga an giniyahan nga mga pulong han salmista han hiya nagkanta mahitungod kan Jehova: “Imo binubuklad an imo kamot, ngan ginbubusog an tinguha han tagsa nga buhi.” (Salmo 145:16) Samtang nagtitikalagas kita, an aton mga hingyap nagbabag-o. An aton ginlaoman han kabataan pa kita diri na naton ginhihingyap yana. An aton panlantaw ha kinabuhi naaapektohan han naieksperyensyahan naton sugad man han aton mga paglaom. Bisan pa hito, anoman an aton husto nga mga hingyap ha bag-o nga kalibotan, sigurado nga tatagbawon ito ni Jehova.

22. Kay ano nga may-ada kita masasarigan nga hinungdan ha pagdayaw kan Jehova?

²² An pinakaimportante para ha kada usa ha aton yana amo an pagin matinumanon. “Kinahanglan ha mga tinaporan, nga hiagian an tagsa-tagsa nga magmatinumanon.” (1 Korinto 4:2) Mga tinaporan kita han mahimayaon nga maopay nga sumat han Ginhadian han Dios. An aton kamaduruto ha pagpasamwak hinin maopay nga sumat ha ngatanan nga aton iginkikita mabulig ha aton nga magpabilin dida ha dalan ngadto ha kinabuhi. Hinumdumi pirme nga “an panahon ngan an higayon [“diri linalaoman nga panhitabo,” NW]” nahinanabo ha aton ngatanan. (Eklesiastes 9:11) Basi maibanan an anoman nga diri kinahanglanon nga kabaraka tungod han mga kawaray-kasigurohan han kinabuhi, kapti hin marig-on an mahimayaon nga paglaom ha pagkabanhaw. Laomi nga kon pananglitan mamatay ka antes magtikang an Milenyo nga Pagmando ni Kristo, maliliaw ka ha pagkasigurado han pag-abot han katalwasan. Ha panahon ni Jehova masisiring mo utro an mga pulong ni Job nga iginsiring ha Maglalarang: “Ikaw magtatawag, ngan ako mabaton ha imo.” An ngatanan nga pagdayaw ihatag unta kan Jehova, nga naghihingyap nga mabuhi utro an ngatanan nga aada ha iya panumdoman!—Job 14:15.

[Mga footnote]

Nahinunumdoman Mo Ba?

• Ha ano nga basihan huhukman an mga tawo durante han Milenyo?

• Kay ano nga an iba makakaeksperyensya han “pagkabanhaw ha kinabuhi” ngan an iba, “pagkabanhaw ha paghukom hin sirot”?

• Paonan-o an paglaom ha pagkabanhaw nagliliaw ha aton yana?

• Paonan-o an mga pulong han Salmo 145:16 nabulig ha aton nga magkaada husto nga panlantaw ha waray pa mabaton nga mga pakiana mahitungod han pagkabanhaw?

[Mga Pakiana]

[Mga Retrato ha pahina 21]

Paonan-o an pagtoo ha pagkabanhaw nabulig ha aton yana?