An Usa nga Trahedya Tigda nga Nahitatabo

HI Owen, sobra dos anyos nga bata nga lalaki, nag-uuyag ha banyo ha ira balay. Nakasaka hiya ha kabinet han mga medisina nga kahuna han iya mga kag-anak nga diri niya naaabot. Ha sulod han kabinet, may nakita hiya nga botilya nga nakakuha han iya atensyon. Iya gin-abrihan ito ngan gin-inom an likido nga nakada ha sulod hito. Nahitabo an usa nga trahedya.

Aksido an sulod han botilya, ngan makasurubo, namatay an bata nga hi Owen. Nasubo hinduro an iya mga kag-anak. An iya amay, hi Percy, namiling hin pagliaw tikang ha klerigo han iya relihiyon. “Kay ano nga nahitabo ini?” nagpakiana hiya. An klerigo binaton, “Karuyag han Dios nga magkaada hin usa pa nga gutiay nga anghel ha langit.” Tungod kay nanluya ha sobra nga kasubo, inabat han namatayan nga kag-anak nga diri gud makatadunganon ini. Katuyoan gud ba han Dios nga mahitabo an sugad nga trahedya? Nawarayan interes hi Percy ha iya relihiyon, ngan nagdesisyon hiya nga umundang ha pakig-upod hito.

Ha pagpamalandong ni Percy ha nahitabo, hiya naghunahuna: ‘Nauul-olan pa ba an akon anak? Makikita ko pa ba utro hiya?’

Bangin naghuhunahuna ka liwat kon ano an nahitatabo ha kamatay han usa ngan kon magigin posible ba nga makaupod utro an aton patay na nga mga hinigugma ha tidaraon. An Pulong han Dios, an Biblia, nagtatagana hin mga baton ngada hini nga mga pakiana. An mga pahina hito nagsusulod hin matin-aw ngan nakakaliaw nga mga baton para ha ngatanan nga nakakaeksperyensya hin pariho nga mga trahedya. Labaw nga importante pa ngani, nagpapahayag ito hin mahimayaon nga paglaom nga iginsasaad han Dios—an pagkabanhaw.

Alayon basaha an masunod nga artikulo basi hibaroan an dugang pa mahitungod hinin urusahon hinduro nga paglaom.