Sumat han mga Parasamwak han Ginhadian

An Tangkod nga Katawohan Nagdadara hin Kadayawan kan Jehova

HA BUG-OS nga kalibotan, an mga Saksi ni Jehova—kabataan ngan lagas—kilala ha ira pagin tangkod. Tagda an mga ehemplo tikang ha tulo nga nasud.

Usa ka adlaw, an disisyete-anyos nga hi Olusola, nga naukoy ha Nigeria, tiuli tikang ha eskwelahan han nakakita hiya hin pitaka ha dalan. Gindara niya ito ha prinsipal, nga nag-ihap han kwarta, ngan inabot ito hin ₦6,200 (mga $45, E.U.). Igin-uli han prinsipal an pitaka ha maestro nga nawad-an hito. Tungod ha apresasyon, gintagan han maestro hi Olusola hin ₦1,000 (mga $7, E.U.) ngan ginsidngan hiya nga ibayad ito ha iya mga baraydan ha eskwelahan. Han hinbatian han iba nga mga estudyante an nahitabo, nakakaminos nga gin-inintremisan nira hi Olusola. Paglabay hin pipira ka semana, an usa nga estudyante nagreport nga ginkawat an iya kwarta, salit ginhangyo an mga magturutdo nga usisahon an ngatanan nga mga estudyante. “Kadi, tindog didi,” siring han maestro kan Olusola. “Maaram ako nga sugad nga usa han mga Saksi ni Jehova, diri ka nangangawat.” Nabilngan an kwarta ha duha han mga bata nga lalaki nga nag-inintremis kan Olusola, ngan mabug-at an nagin sirot ha ira. Hi Olusola nagsurat: “Malipayon gud ako nga kilala ako sugad nga usa han mga Saksi ni Jehova, nga diri gud mangangawat, ngan tungod hito nadadayaw hi Jehova.”

Usa ka adlaw, paglalakat pa la ni Marcelo, nga taga-Argentina, tikang ha iya balay han may nakita hiya nga bag nga nakadto ha tuna mga pipira la ka metros tikang ha luyo nga purtahan hito. Iya iginsulod an bag ha balay ngan hinay-hinay nga gin-abrihan nira nga mag-asawa ito. Nahipausa gud hira nga ha pakabiling hin daku gud nga kantidad hin kwarta, mga credit card, ngan pipira nga pirmado na nga mga tseke, nga an usa hito para ha usa ka milyon ka piso. Ha usa nga resibo, may nakita hira nga numero han telepono. Gintawagan nira an tag-iya ngan naghikay ha pag-uli han bag upod han mga sulod hito ha lugar nga gintatrabahoan ni Marcelo. Han inabot an tag-iya, baga hin kinukulba hiya. Ginsidngan hiya han agaron ni Marcelo nga kumalma, tungod kay hi Marcelo usa han mga Saksi ni Jehova. Sugad nga balos han pakabiling han bag, gintagan han tag-iya hi Marcelo hin 20 pesos la (mga $6, E.U.). Ini nga gutiay nga premyo nakapahangit ha agaron tungod kay nalipay gud hiya ha pagin tangkod ni Marcelo. Nakahatag ini kan Marcelo han higayon ha pagsaysay nga sugad nga usa han mga Saksi ni Jehova, karuyag niya magin tangkod ha ngatanan nga panahon.

Inin masunod nga eksperyensya tikang ha Kyrgyzstan. Hi Rinat, nga sais-anyos nga bata nga lalaki, nakakita hin pitaka nga kanan babaye nga naukoy ha hirani. An sulod han pitaka 1,100 som (mga $25, E.U.). Han igin-uli ni Rinat an nawara nga pitaka ha babaye, gin-ihap han babaye an kwarta ngan katapos ginsumatan an iroy ni Rinat nga kulang ito hin 200 som. Nagsiring hi Rinat nga waray niya kuhaa ito nga kwarta. Katapos ginawas an ngatanan basi pamilngon an nawawara nga kwarta ngan nabilngan ito ha lugar diin nakita an pitaka. Nahipausa gud an babaye. Iya iginpahayag an iya pagpasalamat kan Rinat ngan ha iya iroy, siyahan ha pag-uli han nawara nga kwarta ngan ikaduha, ha pagpadaku kan Rinat ha Kristiano nga paagi.