Ayaw Panluya ha Pagbuhat han Maopay

“MANGGAWI kamo hin maopay ha butnga han mga Hentil,” nagsagdon hi apostol Pedro. (1 Pedro 2:12) An Griego nga pulong nga iginhubad nga “maopay” nagtutudlok ha usa nga butang nga “mahusay, darayawon, dungganon, ekselente.” Yana nga panahon, baga hin diri gud reyalistiko an paglaom hin darayawon o dungganon nga panggawi ha mga tawo ha kabug-osan. Kondi, ha kabug-osan, an katawohan ni Jehova yana naglalampos ha pagsunod ha sagdon ni Pedro. Ha pagkamatuod, kilala hira ha bug-os nga kalibotan tungod han ira maopay nga panggawi.

Labi nga makatirigamnan ini kon aton tatagdon an mga problema ngan mga tensyon nga aton inaatubang durante hinin “magpakalilisang nga mga panahon” nga makuri pakibagayan. (2 Timoteo 3:1) An mga pagsari bahin na han aton adlaw-adlaw nga kinabuhi, ngan komon an pagkontra ha Kristiano nga paagi han pagkinabuhi. Dugang pa, bisan kon an pipira nga mga pagsari lumalabay la, an iba nagpapadayon, ngan nagtitikaduro pa ngani. Bisan pa hito, hi apostol Pablo nagsagdon: “Diri kita manluya ha pagbuhat han maopay; kay ha igo nga panahon mag-aani kita, kon diri kita manluya.” (Galasia 6:9) Paonan-o gud ba posible an pagbuhat—ngan padayon nga pagbuhat—han maopay samtang naatubang hin makasurubo nga mga pagsari ngan nagpapadayon nga mga pagkontra?

Bulig ha Pagbuhat han Maopay

An pagin “darayawon, dungganon, ekselente” matin-aw nga naghihidabi han nakatago nga pagkatawo, usa nga kalidad han kasingkasing. Salit, an pagtipig hin maopay nga panggawi bisan kon naatubang hin mga pagsari ngan mga kakurian, diri patigda-tigda nga reaksyon, kondi resulta han inadlaw nga pagsunod ngan pagbuhat han mga prinsipyo ha Biblia ha ngatanan nga mga bahin han kinabuhi. Ano an pipira nga mga butang nga makakabulig ha aton may kalabotan hini? Tagda an masunod.

Kultibara an panhunahuna ni Kristo. Nagkikinahanglan hin pagpaubos an pag-ilob hin mga butang nga baga hin waray hustisya. An tawo nga hitaas an pagtagad ha kalugaringon posible nga diri makakailob hin pagmaltrato. Kondi, hi Jesus “nagpaubos . . . ha iya ngahaw, nga nagmasinugtanon tubtob ha kamatayon.” (Filipos 2:5, 8) Pinaagi ha pagsubad ha iya, diri kita ‘magkakabubutlaw, ngan diri manluluya’ ha aton sagrado nga pag-alagad. (Hebreo 12:2, 3) Buhata an mapainubsanon nga pagsunod pinaagi ha kinaburut-on nga pakigkooperar ha mga nangunguna ha iyo lokal nga kongregasyon. (Hebreo 13:17) Mahibaro ha pagtagad ha iba sugad nga “maoroopay” ha imo, nga gin-uuna an ira mga interes kay han imo kalugaringon.—Filipos 2:3, 4.

Hinumdumi nga hi Jehova nahigugma ha imo. Kinahanglan magin kombinsido kita nga hi Jehova, “amo hiya, ngan nga hiya magbabalos han ngatanan nga nagbibiling ha iya.” (Hebreo 11:6) Napaid gud hiya ha aton ngan karuyag niya nga magkaada kita kinabuhi nga waray kataposan. (1 Timoteo 2:4; 1 Pedro 5:7) An paghinumdom nga waray makakawara han gugma han Dios para ha aton mabulig ha aton nga diri umundang ha pagbuhat han maopay kon nakakaeksperyensya hin pagsari.—Roma 8:38, 39.

Ihatag an bug-os nga pagsarig kan Jehova. Importante an pagsarig kan Jehova, labi na kon an mga pagsari baga hin waray kataposan o kon iginbubutang hito ha peligro an kinabuhi. Kinahanglan magkaada kita bug-os nga pagsarig nga diri tutugotan ni Jehova nga an bisan ano nga pagsari magin ‘labaw ha aton kasadangan,’ nga “mahatag liwat hiya [pirme] hin katigayonan ha paglikay.” (1 Korinto 10:13) Kon nasarig kita kan Jehova,  bisan kon tarhugon kita hin kamatayon, maaatubang naton ito nga maisugon.—2 Korinto 1:8, 9.

Magpadayon ha pag-ampo. Importante an kinasingkasing nga pag-ampo. (Roma 12:12) An sinsero nga pag-ampo amo an usa han mga paagi nga naduok kita kan Jehova. (Jakobo 4:8) Pinaagi han personal nga eksperyensya, nahibabaro kita nga “kon mangaro kita hin bisan ano nga bagay . . . , mamamati hiya ha aton.” (1 Juan 5:14) Kon tinutugotan ni Jehova an aton problema nga magpadayon ha pagsari han aton integridad, nag-aampo kita para han iya bulig basi makailob. (Lukas 22:41-43) An pag-ampo nagtututdo ha aton nga diri gud kita nag-uusahan, nga kon kaupod naton hi Jehova, ha kataposan pirme kita magigin madaugon.—Roma 8:31, 37.

An Maopay nga mga Buhat—Hinungdan han ‘Pagdayeg Ngan Kadungganan’

Ha pana-panahon, an ngatanan nga mga Kristiano ‘napapasubo han magkadirodilain nga mga pagsulay.’ Kondi, kinahanglan “diri kita manluya ha pagbuhat han maopay.” Kon nakakaeksperyensya hin tensyon, kuha hin kusog ha kahibaro nga an imo pagkamatinumanon ha kataposan magigin hinungdan han “pagdayeg ngan kahimayaan ngan kadungganan.” (1 Pedro 1:6, 7) Bug-os nga pahimulusi an ngatanan nga espirituwal nga mga tagana tikang kan Jehova ha pagparig-on ha imo. Kon nagkikinahanglan ka hin personal nga atensyon, kadto ha mga nag-aalagad sugad nga mga magbarantay, magturutdo, ngan magsaragdon ha Kristiano nga kongregasyon. (Buhat 20:28) Magin regular ha pagtambong ha ngatanan nga mga katirok han kongregasyon, nga ‘nag-aaghat ha aton ha gugma ngan ha mga mag-opay nga buhat.’ (Hebreo 10:24) An programa han adlaw-adlaw nga pagbasa han Biblia ngan personal nga pag-aram mabulig ha imo nga magpabilin nga alerto ngan marig-on ha espirituwal; sugad man an regular nga pakigbahin ha Kristiano nga ministeryo.—Salmo 1:1-3; Mateo 24:14.

Kon mas naieksperyensyahan mo an gugma ngan pagpaid ni Jehova, mas maghihingyap ka ha pagin madasigon ha “mga mag-opay nga buhat.” (Tito 2:14) Hinumdumi, “an magpadayon tubtob ha kataposan, ini amo an maluluwas.” (Mateo 24:13) Oo, magin determinado nga ‘diri manluya ha pagbuhat han maopay’!

[Blurb ha pahina 29]

Kinahanglan magkaada kita bug-os nga pagsarig nga diri tutugotan ni Jehova nga an bisan ano nga pagsari magin ‘labaw ha aton kasadangan,’ nga “mahatag liwat hiya [pirme] hin katigayonan ha paglikay”

[Mga Retrato ha pahina 30]

An pagpabilin nga sagipo ha teokratiko nga mga buruhaton makakabulig ha aton nga magin andam ha pag-atubang hin mga pagsari