An Nagkakasumpaki nga mga Ideya May Kalabotan ha Trabaho

“Pagtrabaho—pagtrabaho! Daku gud nga kalipay an paghibaro nga may-ada pa kita matatrabaho.”—Katherine Mansfield, awtor (1888-1923).

NAUYON ka ba ha hitaas nga panlantaw ha trabaho nga iginpahayag ha mga pulong ha igbaw? Mationan-o mo ginhuhunahuna an trabaho? Posible ba nga abaton mo nga an trabaho usa nga hilawig, diri makalilipay nga butang nga angay antuson ha butnga han relaks nga mga kataposan han semana? O sobra na ba an imo pagkaruyag hito nga haros magin giyan ka na?

Para ha kadam-an nga mga tawo, an gidadakui nga bahin han ira panahon igin-gagahin ha trabaho. Mahimo magdepende ha aton trabaho kon diin kita naukoy ngan kon ano nga klase hin estilo an aton pagkinabuhi. Tikang ha batan-on nga pagkaadulto tubtob ha pagretiro, naoobserbahan han damu nga an trabaho an amo la nga pangalimbasog nga nakakaimpluwensya gud han ira mga kinabuhi. An pipira ha aton nakakakuha hin daku nga personal nga katagbaw tikang ha aton pangalimbasog. Ginsusukol han iba an bili han trabaho pinaagi han kita o posisyon, samtang an iba pa naghuhunahuna nga an trabaho panpuno la han ira panahon o pagkarag hin panahon pa ngani.

May-ada mga tawo nga nagtatrabaho basi mabuhi ngan mga tawo nga nabubuhi basi magtrabaho; an iba namamatay ha trabaho o namamatay tungod hito. Pananglitan, sumala ha usa nga bag-o la nga report han Nagkakaurosa nga mga Nasud, trabaho an hinungdan han mas damu nga kasakit ngan mas damu nga kamatay “kay han gintarampo nga kadamu nga epekto han mga girra o han pag-abuso ha droga ngan de-alkohol nga mga irinmon.” Ha pagkomento mahitungod hini, an The Guardian nga peryodiko han Londres nagreport: “Kada tuig, sobra duha ka milyon nga mga tawo an namamatay tungod ha mga aksidente o mga sakit nga may kalabotan ha trabaho . . . An kaapektohi pirme han tapotapo, mga kemikal, aringasa, ngan radyasyon nagriresulta hin kanser, sakit ha kasingkasing ngan istrok.” An pagpatrabaho ha kabataan ngan pinirit nga pagpatrabaho duha la han iba pa nga maraot nga mga kahimtang yana.

Dugang pa, aada liwat an gintatawag han sikologo nga hi Steven Berglas nga “nakakadaot nga sobra nga kakapoy.” Iya ginhuhulagway an maduruto nga trabahante nga nakakab-ot na han pungkay han iya karera kondi ha urhi naabat la lugod hin “nagpapadayon nga kahadlok, duro nga kaguol, kahulop o depresyon tungod ha pagtoo nga sugad hin nahigotan na hiya ha usa nga trabaho, o karera, nga diri niya puydi bayaan kondi diri liwat nakakahatag ha iya hin katagbaw ha hunahuna.”

Maduruto nga Pagtrabaho Kontra ha Pagin Giyan ha Pagtrinabaho

Ha kalibotan diin damu an nagtatrabaho ha sulod hin hilawig nga mga oras, mapulsanon an paghibaro han kaibahan butnga han maduruto nga mga trabahante ngan han mga giyan ha pagtrinabaho. Damu nga mga giyan ha pagtrinabaho an naghuhunahuna nga an trabahoan usa nga lugar han seguridad ha peligroso, pabag-o-bag-o nga kalibotan; gintatagad han  mga maduruto an trabaho sugad nga importante ngan usahay makapatagbaw nga obligasyon. An mga giyan ha pagtrinabaho nagtutugot ha trabaho nga makaapekto ha ngatanan iba nga mga bahin han kinabuhi; an maduruto nga mga trabahante maaram kon san-o maundang ha pagtrabaho, ibahon an direksyon han ira panhunahuna, ngan magin presente, pananglitan, ha pagsaurog han anibersaryo han ira kasal. An mga giyan ha pagtrinabaho natatagbaw ha sobra nga pagtrinabaho ngan nahihilig gud hito; an maduruto nga mga trabahante diri sugad hito.

Makuri na yana hibaroan an kaibahan hito nga duha tungod kay igin-aaghat han moderno nga sosiedad an sobra nga pagtrinabaho. Tungod han mga modem, selyular nga mga telepono, ngan mga pager, haros diri na hinbabaroan an kaibahan han lugar han trabaho ngan han balay. Kon an bisan diin nga lugar mahimo na magin lugar han trabaho ngan an bisan ano nga oras mahimo na magin panahon han trabaho, an pipira magtitrinabaho hin ura-ura, bisan kon nadadaot na nira an ira kalugaringon.

Ano an reaksyon han pipira nga mga tawo ha sugad nga diri maopay nga disposisyon? Nasantop han mga sosyologo an usa nga hilig han mga tawo nga sobra an trabaho ngan sobra an tensyon nga dad-on an espirituwalidad ha lugar nga ira gintatrabahoan ngan pag-usahon an relihiyon ngan an ira propesyon. Nagreport an San Francisco Examiner nga “an pagtampo han espirituwalidad ngan trabaho nagin makatirigamnan nga hitabo ha publiko.”

May kalabotan ha Silicon Valley, usa nga importante nga sentro han pagpauswag han teknolohiya ha Estados Unidos, nasiring an usa ka bag-o nga report: “Samtang nagtitikagutiay an mga naparada ha lugar nga trabahoan tungod han pagtikadamu han ginpapaiwas ha trabaho, nagtitikakulang liwat an mga mapaparadahan ha mga lugar han mga pag-aram ha Biblia ha gab-i.” Anoman an iginpapasabot hito, damu nga tawo ha bug-os nga kalibotan an nakaobserba nga an Biblia may-ada positibo nga impluwensya ha ira panhunahuna ha trabaho, nga nagriresulta hin mas timbang nga paagi han pagkinabuhi.

Paonan-o an Biblia makakabulig ha aton nga magkaada timbang nga panhunahuna ha trabaho? May-ada ba Kasuratanhon nga mga prinsipyo nga makakabulig ha aton nga maatubang an mga problema ha moderno nga mga trabahoan ha malampuson nga paagi? Ini nga mga pakiana paghihisgotan ha masunod nga artikulo.