“Ginpersigir Tungod han Iya Pagtoo”

AN BUNGTO han Cernobbio ha norte han Italya naghimo hin handumanan nga lugar ha lokal nga parke ha paghinumdom han mga nabiktima han pagtalapas ha mga katungod han tawo. Usa han mga plake nga inabrihan durante han ira pagsaurog, an iginpahinungod kan Narciso Riet. Igin-anak ha Alemanya han Italyano nga mga kag-anak, hi Riet nagin usa han mga Saksi ni Jehova han dekada han 1930. Durante han pagmando ni Hitler, ginpersigir an mga Saksi ni Jehova tungod kay nagdumiri hira nga mas magin labaw hi Hitler kay ha totoo nga Dios, hi Jehova.

Han hinbaroan han Gestapo nga nabulig hi Riet ha pagdara hin mga kopya han The Watchtower ngadto ha mga kampo nga prisohan, pinalagiw hiya ngadto ha Cernobbio. Ginhangyo hiya didto nga ighubad an The Watchtower ngadto ha Italyano nga yinaknan ngan ipanhatag ito ha iya mga igkasi-tumuroo nga hirani ha iya. Nadiskobrehan an iya pagin madasigon ha mga buruhaton. Usa nga opisyal han SS ngan han iya mga tawohan an tigda nga sinulod ha balay ni Riet, gin-aresto hiya, ngan ginkompiskar an ebidensya han pagin “kriminal” kuno—duha nga Biblia ngan pipira nga mga surat! Gindistyero hi Riet ngadto ha Alemanya, ginpriso ha kampo nga prisohan ha Dachau, ngan ginpatay antes matapos an Girra ha Kalibotan II. Hiya “ginpersigir tungod han iya pagtoo,” nasiring an plake han Cernobbio.

An pagtoo ni Narciso Riet ngan han ginatos nga iba pa nga mga Saksi nga ginpersigir han mga Nazi nagdadasig ha mga Kristiano yana nga magpabilin nga matinumanon kan Jehova, an amo la nga Persona ha uniberso nga takos han ira pagsingba. (Pahayag 4:11) Hi Jesus nagsiring: “Bulahan an mga gintitimaraot tungod han katadongan.” Hinunumdoman han Dios an ira mga buhat ngan babalosan hira tungod han ira maisugon nga buhat.—Mateo 5:10; Hebreo 6:10.