Malalamposan Naton an Bisan Ano nga Pagsari!

NAG-AANTOS ka ba yana hin pagsari ha imo kinabuhi? Nawawad-an ka na ba paglaom, ngan diri nakakalampos hito? Inaabat mo pa ba ngani usahay nga ikaw la an may-ada sugad hito nga problema ngan waray solusyon hito? Kon amo, ayaw kahulop! Anoman nga pagsari an bangin atubangon naton, ginpapasarig kita han Biblia nga mabubuligan kita han Dios nga mailob ito ha malampuson nga paagi.

An Biblia nasiring nga an mga surugoon han Dios ‘maatubang hin magkadirodilain nga mga pagsari.’ (Jakobo 1:2, NW) Tigamni an pulong nga “magkadirodilain” (Griego poi·kiʹlos). Sumala ha kadaan nga paggamit, an orihinal nga pulong nangangahulogan hin “damu ngan magkadirodilain” o “damu an kolor” ngan nagpapabug-at han “pagkadirodilain han mga pagsari.” Kon sugad, an “magkadirodilain nga mga pagsari” amo an mga pagsari nga magkadirodilain an mga kolor, siring pa. Bisan pa hito, binubuligan kita ni Jehova basi maantos naton an kada usa hito. Kay ano nga makakasiguro kita hito?

An “Diri-takos nga Pagkabuotan han Dios nga Iginpapahayag ha Magkadirodilain nga Paagi”

Hi apostol Pedro nagsiring nga an mga Kristiano ‘napapasubo ha magkadirodilain nga mga pagsulay.’ (1 Pedro 1:6) Ha urhi nga bahin han iya giniyahan nga surat, hiya nagsiring nga an “diri-takos nga pagkabuotan han Dios” “iginpapahayag ha magkadirodilain nga paagi.” (1 Pedro 4:10, NW) Dida ha mga pulong nga “ha magkadirodilain nga paagi” aada an usa nga porma han amo gihapon nga orihinal nga Griego nga pulong. Ha pagkomento mahitungod hini nga mga pulong, an usa nga eskolar han Biblia nagsiring: “Makatirigamnan gud ini nga punto. . . . An paghisgot mahitungod han grasya [o, diri-takos nga pagkabuotan] han Dios sugad nga poikilos nangangahulogan nga waray kolor, siring pa, ha kahimtang han tawo nga diri matutugbangan han grasya han Dios.” Hiya dugang nga nagsiring: “Waray mga kahimtang ngan mga krisis nga aton mahahanduraw, kasuruk-an o apurado nga panginahanglan nga diri mabibilngan han grasya han Dios hin paagi ha pagsulbad, ngan nga diri masusolusyonan ngan malalamposan han grasya han Dios. Inin naghuhulagway nga pulong nga poikilos matin-aw nga nagpapahinumdom ha aton hiton damu-an-kolor nga grasya han Dios nga igo gud ha pagbulig ha aton nga malamposan an ngatanan nga mga butang.”

An Diri-Takos nga Pagkabuotan han Dios Makakabulig ha Aton nga Malamposan an mga Pagsari

Sumala kan Pedro, an usa nga paagi nga iginpapahayag an diri-takos nga pagkabuotan han Dios amo an pinaagi ha magkalain-lain nga mga tawo nga nagkukompwesto han Kristiano nga kongregasyon. (1 Pedro 4:11) An tagsa nga surugoon han Dios may-ada espirituwal nga mga regalo, o abilidad, nga mahimo magin surok han pagdasig ngada hadton naatubang hin mga pagsari. (Roma 12:6-8) Pananglitan, may mga membro han kongregasyon nga mag-opay gud nga mga magturutdo han Biblia. An ira maaramon nga mga pulong nag-aaghat ngan nagpapagios ha iba nga makaantos. (Nehemia 8:1-4, 8, 12) An iba naghihimo hin regular nga nagmamangno nga mga pagbisita ha mga balay hadton nanginginahanglan hin bulig. An sugad nga mga pagbisita mga okasyon para ha pagdasig, ha ‘pagpalipay han mga kasingkasing.’ (Kolosas 2:2) Kon an mga paramangno naghihimo han sugad  nga nakakaparig-on-ha-pagtoo nga mga pagbisita, nagpapaangbit hira hin espirituwal nga regalo. (Juan 21:16) Aada pa ngani adton iba ha kongregasyon nga kilala tungod han ira gugma, pagpaid, ngan pagkamalumo ha pakig-upod ha mga igkasi-tumuroo nga nasusubo tungod han mga pagsari. (Buhat 4:36; Roma 12:10; Kolosas 3:10) An empatiya ngan maduruto nga pagbulig nga iginpapakita han sugad nga mahigugmaon nga kabugtoan makatirigamnan gud nga kapahayagan, o “kolor,” han diri-takos nga pagkabuotan han Dios.—Proberbios 17:17.

“An Dios han Ngatanan nga Pagliaw”

Labaw ha ngatanan, nagtatagana hi Jehova hin pagliaw. Hiya “an Dios han ngatanan nga pagliaw, nga nagliliaw ha [aton] ha ngatanan [naton] nga kagol-anan.” (2 Korinto 1:3, 4, NW) An kinaadman ha giniyahan nga Pulong han Dios ngan an kusog nga igintatagana han iya baraan nga espiritu amo an nangunguna nga mga paagi nga ginbabaton ni Jehova an aton mga pag-ampo para hin bulig. (Isaias 30:18, 21; Lukas 11:13; Juan 14:16) Mahimo kita madasig han giniyahan nga saad ni apostol Pablo. Hiya nagsiring: “An Dios matinumanon, nga diri matugot nga pagsulayon kamo labaw ha iyo kasadangan; kondi upod ha pagsulay mahatag liwat hiya hin katigayonan ha paglikay, basi nga kamo makahimo ha pag-antos.”—1 Korinto 10:13.

Oo, anoman an “kolor,” o klase, han pagsari ha aton, magkakaada gud pirme “kolor,” o kapahayagan, han diri-takos nga pagkabuotan han Dios nga katugbang hito. (Jakobo 1:17) An napapanahon ngan angayan nga suporta nga igintatagana ni Jehova ha iya mga surugoon—anoman kamagkadirodilain an ira mga pagsulay o mga ayat—usa la nga ebidensya han “magkadirodilain nga mga kinaadman han Dios.” (Efeso 3:10) Diri ba nauyon ka hito?

[Mga Retrato ha pahina 31]

Binubuligan kita ni Jehova nga maantos an mga pagsari ha aton