Mga Kag-anak, Itagana an mga Panginahanglan han Iyo Pamilya

“Kon may-ada diri magpatigayon ha iya kalugaringon, . . . naglirong na hiya han pagtoo.”—1 TIMOTEO 5:8.

1, 2. (a) Kay ano nga makapadasig kitaon an mga pamilya nga urupod nga natambong ha Kristiano nga mga katirok? (b) Ano an mga ayat nga inaatubang han mga pamilya basi makaabot ha mga katirok ha husto nga oras?

 KON kikitaon mo an Kristiano nga kongregasyon antes magtikang an katirok, makikita mo an limpyo ngan desente an bado nga kabataan nga nalingkod sapit han ira mga kag-anak. Diri ba makaruruyag pagkit-on an gugma nga nakikita ha sugad nga mga pamilya—an gugma kan Jehova ngan ha usa kag usa? Kondi, masayon hingalimtan kon mationan-o kadaku nga pangalimbasog an ginkikinahanglan basi makaabot an pamilya ha nakaeskedyol nga oras han mga katirok.

² Kasagaran, okupado hinduro an mga kag-anak ha bug-os nga adlaw, ngan ha mga gab-i nga may katirok, nagigin mas okupado pa gud an mga pamilya. Kinahanglan iandam an pagkaon, buhaton an mga trabaho, tapuson an homework. An mga kag-anak an nagpapas-an han pinakamabug-at nga trabaho, ira sinisiguro nga an kada usa limpyo, nakákaón, ngan andam na pag-abot han oras. Syempre, mahimo mahitabo an diri-linalaoman nga mga problema ha kabataan ha ultimo nga takna. Nagisi an bado han suhag samtang nag-uuyag hiya. Natakbo han putó an iya pagkaon. An kabataan nagtitikang maglantugi. (Proberbios 22:15) Ano an resulta? Bisan kon nagplano hin maopay an mga kag-anak para hito nga gab-i, bangin diri ito matuman. Bisan pa hito, an pamilya kasagaran nga naabot pirme ha Kingdom Hall antes magtikang an katirok. Makapadasig gud nga makita hira kada semana, ha paglabay han kada tuig, samtang an kabataan nagtutubo ha pag-alagad kan Jehova!

 3. Paonan-o kita nahibabaro nga pinabibilhan gud ni Jehova an mga pamilya?

³ Bisan kon usahay makuri an imo trabaho sugad nga kag-anak, makapoy pa ngani, makakasarig ka nga pinabibilhan gud ni Jehova an imo mga pangalimbasog. Hi Jehova an Nagpatikang han kahikayan han pamilya. Salit an iya Pulong nasiring nga ‘utang han ngatanan nga pamilya an ngaran hito’—an pag-eksister mismo hito—kan Jehova. (Efeso 3:14, 15, NW) Salit kon kamo nga mga kag-anak nangangalimbasog ha pagtuman han iyo mga obligasyon ha pamilya ha husto nga paagi, iyo ginpapasidunggan an Soberano nga Ginoo han uniberso. (1 Korinto 10:31) Diri ba daku ito nga pribilehiyo? Angayan, kon sugad, nga aton paghisgotan an toka nga iginhatag ni Jehova ha mga kag-anak. Dinhi hini nga artikulo, aton huhunahunaon ito may kalabotan ha pagtagana para han pamilya. Aton repasuhon an tulo nga paagi nga ginlalaoman han Dios nga itatagana han mga kag-anak.

Pagtagana hin Materyal

 4. Ha pamilya, ano nga mga kahikayan an ginhimo ni Jehova ha pagtagana han mga panginahanglan han mga anak?

⁴ Hi apostol Pablo nagsurat: “Kon may-ada [“bisan hin-o,” NW] diri magpatigayon ha iya kalugaringon, labi na gud ha iya panimalay, naglirong na hiya han pagtoo, ngan mamaraot pa ha diri matinoohon.” (1 Timoteo 5:8) Han gin-unabi dinhi ni Pablo an “bisan hin-o,” hin-o an nahunahuna niya? An ulo han pamilya, kasagaran na nga an amay. An Dios  naghahatag liwat ha babaye hin dungganon nga buruhaton sugad nga kabulig han iya bana. (Genesis 2:18) An kababayin-an ha mga panahon han Biblia agsob nga nabulig ha ira mga bana ha pagtagana para han pamilya. (Proberbios 31:13, 14, 16) Yana nga panahon, mas nagtitikadamu an mga pamilya nga solo an kag-anak. a Darayawon an ginbubuhat han damu nga solo nga Kristiano nga mga kag-anak ha pagtagana para ha ira pamilya. Syempre, maopay para ha pamilya an pagkaada hin mga kag-anak, nga an amay an nangunguna.

5, 6. (a) Ano an pipira han mga kakurian nga inaatubang hadton nangangalimbasog ha pagtagana hin materyal para han ira kalugaringon nga pamilya? (b) An pagtipig hin ano nga panhunahuna ha sekular nga trabaho mabulig ha Kristiano nga mga kag-anak nga magpailob?

⁵ Ha 1 Timoteo 5:8, ano nga klase hin pagtagana an nahunahuna ni Pablo? An konteksto nagpapasabot nga direkta nga gin-uunabi niya an mahitungod han materyal nga mga panginahanglan han pamilya. Ha kalibotan yana, damu nga mga kakurian an bangin inaatubang han ulo han pamilya basi magkaada han materyal nga mga butang nga ginkikinahanglan han pamilya. Kalyap an mga kakurian ha pinansyal ha bug-os nga kalibotan, sugad han katangtang ha trabaho, pagdamu han mga waray trabaho, ngan pagtikadaku han mga kagarastohan. Ano an makakabulig ha kag-anak nga makailob kon naatubang ha sugad nga mga kakurian?

⁶ Sadang hinumdoman han kag-anak nga nagbubuhat hiya hin toka tikang kan Jehova. An giniyahan nga mga pulong ni Pablo nagpapakita nga an tawo nga may kapas ha pagsugot hini nga sugo kondi nagdudumiri ha pagbuhat hito maipapariho ha usa nga ‘naglirong na han pagtoo.’ Bubuhaton han usa nga Kristiano an bug-os nga mahihimo niya basi malikyan an sugad nga reputasyon ha atubangan han iya Dios. Kondi, makasurubo, damu nga mga tawo ha kalibotan yana an “waray gugma nga kinaiya.” (2 Timoteo 3:1, 3) Oo, damu nga mga amay an diri nagbubuhat han ira responsabilidad, ginpapabay-an an ira pamilya nga waray suporta. An Kristiano nga mga bana waray hiton matig-a nga kasingkasing, ngan mapasibay-on nga pagtagad ha pagtagana para ha ira kalugaringon nga pamilya. Diri pariho ha damu han ira mga katrabaho, ginhuhunahuna han Kristiano nga mga kag-anak bisan an pinakaminos nga mga trabaho sugad nga dungganon ngan importante, usa nga paagi ha pagpalipay kan Jehova nga Dios, kay tungod hito nakakagtagana hira para han ira mga hinigugma.

 7. Kay ano nga angayan nga pamalandungon han mga kag-anak an susbaranan ni Jesus?

⁷ Bangin makita liwat han mga ulo han pamilya nga nakakabulig gud an pamalandong han hingpit nga susbaranan ni Jesus. Hinumdumi, matagnaon nga tinatawag han Biblia hi Jesus sugad nga aton ‘Amay ha Kadayonan.’ (Isaias 9:6, 7) Sugad nga “an kataposan nga Adan,” epektibo nga sinaliwnan ni Jesus “an siyahan nga tawo nga amo hi Adan” sugad nga amay han katawohan nga nagpapakita hin pagtoo. (1 Korinto 15:45) Diri pariho kan Adan, nga nagin hakog nga amay, nga nagtatagana la para ha iya kalugaringon, hi Jesus amo an susbaranan nga amay. An Biblia nasiring mahitungod ha iya: “Tikang hini hinbaroan ta an gugma, kay iginhatag niya an iya kinabuhi tungod ha aton.” (1 Juan 3:16) Oo, kinaburut-on nga iginhalad ni Jesus an iya mismo kinabuhi para ha iba. Kondi, inuna liwat niya ha kada adlaw an mga panginahanglan han iba kay ha iya kalugaringon nga mga panginahanglan nga diri importante hinduro. Magpapahimulos kamo nga mga kag-anak ngan an iyo mga pamilya kon iyo subaron iton nagsasakripisyo-ha-kalugaringon nga disposisyon.

8, 9. (a) Ano an mahimo mahibaroan han mga kag-anak tikang ha mga tamsi mahitungod han diri-hakugnon nga pagtagana para ha ira kapisoan? (b) Paonan-o ipinapakita han damu nga Kristiano nga mga kag-anak an pagsakripisyo ha kalugaringon?

⁸ Mahibabaro hin damu an mga kag-anak mahitungod han diri-hakugnon nga gugma tikang ha mga pulong ni Jesus ha matinalapason nga katawohan han Dios: “Makapira nga buot ko pagtirukon an imo mga anak, sugad han usa nga ugang nga nagtitirok han iya mga kapisoan ha sirong han iya mga pako”! (Mateo 23:37) Matin-aw nga iginhuhulagway dinhi ni Jesus an mahitungod han usa nga ugang nga nagpapanalipod han iya kapisoan pinaagi han iya mga pako. Oo, damu gud an mahibabaroan han mga kag-anak tikang ha nagpapanalipod nga mga kinaiya han iroy nga tamsi, nga andam mameligro basi mapanalipdan an iya kapisoan tikang ha kadaot. Kondi, an ginbubuhat han iroy nga mga tamsi ha kada adlaw, makatirigamnan liwat kitaon. Naglulupad-lupad hira pirme ha palibot han ira salag ngan ha pamiling han ira pagkaon. Bisan kon nakakapoy  na, ira iginhuhulog an pagkaon ngada ha nakanganga nga mga tuka han ira kapisoan, nga nagtutulon hito ngan kasagaran nga nag-aaringasa para hin dugang pa. Damu han mga linarang ni Jehova an may “kinaiya nga kinaadman” ha paagi han ira pagmangno ha mga panginahanglan han ira mga gudtiay.—Proberbios 30:24, NW.

⁹ Ha pariho nga paagi, an Kristiano nga mga kag-anak ha bug-os nga kalibotan nagpapakita hin darayawon nga pagsakripisyo ha kalugaringon. Mas karuyag niyo nga kamo mismo an mag-antos imbes nga an iyo mga anak. Dugang pa, kinaburut-on nga nagsasakripisyo kamo ha kada adlaw basi makagtagana ha iyo pamilya. Damu ha iyo an temprano nga nabangon basi magtrabaho ha makapoy o maguol nga mga trabaho. Nagtatrabaho kamo hin maopay basi may maibutang nga masustansya nga pagkaon ha lamesa. Nangangalimbasog kamo ha pagsiguro nga an iyo mga anak may-ada limpyo nga bado, angayan nga urukyan, ngan husto nga edukasyon. Ngan padayon nga nangangalimbasog kamo pagtagana hito kada adlaw, kada tuig. Sigurado nga an sugad nga pagsakripisyo ha kalugaringon ngan pagpailob nakakalipay kan Jehova! (Hebreo 13:16) Kondi, ha pariho nga panahon, nahinunumdoman niyo nga may-ada mas importante nga mga paagi han pagtagana ha iyo kalugaringon nga pamilya.

Pagtagana ha Espirituwal

10, 11. Ano an pinakaimportante han mga panginahanglan han tawo, ngan ano an kinahanglan buhaton anay han Kristiano nga mga kag-anak basi maihatag ini nga panginahanglan han ira mga anak?

¹⁰ An mas importante pa gud kay ha pagtagana hin materyal amo an pagtagana ha espirituwal. Hi Jesus nagsiring: “Diri la an tinapay an nakakabuhi han tawo, kondi an ngatanan nga pulong, nga nagowa ha baba han Dios.” (Mateo 4:4; 5:3) Ano an mahihimo niyo, mga kag-anak, basi makagtagana ha espirituwal?

¹¹ Hini nga topiko, bangin mas agsob nga ginkukotar an Deuteronomio 6:5-7 kay ha iba nga mga bersikulo han Kasuratan. Alayon abriha an iyo Biblia ngan basaha ito nga mga bersikulo. Tigamni nga an mga kag-anak ginsidngan nga patuboon anay an ira mismo espirituwalidad, ginpaparig-on an gugma kan Jehova ngan ginsusunod an iya mga pulong. Oo, kinahanglan magin seryoso kamo nga mga estudyante han Pulong han Dios, regular nga nagbabasa han Biblia ngan namamalandong hito basi mapatubo niyo an totoo nga pagsabot ngan gugma ha mga dalan, mga prinsipyo, ngan mga balaud ni Jehova. Sugad nga resulta, an iyo kasingkasing mapupuno hin magpakaruruyag nga mga kamatuoran han Biblia nga magpapagios ha iyo nga umabat hin kalipay, pagtahod, ngan gugma kan Jehova. Mahuhura kamo han mag-opay nga mga butang nga maihahatag niyo ha iyo mga anak.—Lukas 6:45.

12. Paonan-o masusubad han mga kag-anak an susbaranan ni Jesus may kalabotan ha pagpasilsil han mga kamatuoran han Biblia ha ira mga anak?

¹² An marig-on ha espirituwal nga mga kag-anak andam ha pag-aplikar han sagdon ha Deuteronomio 6:7 (NW), nga “ipasilsil” an mga pulong ni Jehova ha ira mga anak ha ngatanan nga higayon. An ‘pagpasilsil’ nangangahulogan hin pagtutdo ngan pagpabug-at pinaagi han pag-utro. Hi Jehova maaram gud nga kita ngatanan—labi na an kabataan—nagkikinahanglan  hin pag-utro basi mahibaro. Salit, ginamit ni Jesus an pag-utro dida ha iya ministeryo. Pananglitan, han nagtututdo ha iya mga disipulo nga magin mapainubsanon imbes nga mapahitas-on ngan nagpapalabaw-labaw, naghimo hiya hin magkalainlain nga mga paagi ha pag-utro han usa nga prinsipyo. Nagtutdo hiya pinaagi han pangatadongan, pinaagi han ilustrasyon, pinaagi han pagpakita pa ngani ha buhat. (Mateo 18:1-4; 20:25-27; Juan 13:12-15) Kondi, makatirigamnan nga hi Jesus waray gud magpakita hin kawaray-pagpailob. Ha sugad man nga paagi, an mga kag-anak kinahanglan maghimo hin mga paagi ha pagtutdo han basihan nga mga kamatuoran ha ira mga anak, mapailubon nga gin-uutro an mga prinsipyo ni Jehova tubtob nga masabtan ngan maiaplikar ito han mga anak.

13, 14. Ano an pipira nga mga okasyon nga mahimo ipasilsil han mga kag-anak an mga kamatuoran han Biblia ha ira mga anak, ginagamit an ano nga mga publikasyon?

¹³ An mga sesyon ha pag-aram han pamilya maopay nga mga okasyon para ha sugad nga pagtutdo. Oo, an regular, makaparig-on, makalilipay nga pag-aram han pamilya ha Biblia amo an importante nga sangkap ha espirituwalidad han pamilya. An Kristiano nga mga pamilya ha bug-os nga kalibotan nalilipay ha sugad nga mga pag-aram, nga ginagamit an literatura nga igintagana pinaagi han organisasyon ni Jehova ngan iginpapahiuyon an pag-aram ha mga panginahanglan han mga anak. An libro nga Mahibaro Tikang ha Bantogan nga Magturutdo maopay gud nga regalo may kalabotan hini, sugad la han libro nga Questions Young People Ask—Answers That Work. b Kondi, an pag-aram han pamilya diri la amo an panahon ha pagtutdo ha mga anak.

¹⁴ Sugad han iginpapasabot han Deuteronomio 6:7, damu an mga okasyon nga mahimo niyo nga mga kag-anak ig-istorya an espirituwal nga mga butang ha iyo mga anak. Magkaupod man nga nagbibiyahe, magkaupod nga nagtatrabaho, o magkaupod nga nagpapahalibway, mahimo kamo makabiling hin mga higayon ha pagtagana han espirituwal nga mga panginahanglan han iyo mga anak. Syempre, diri kinahanglan nga pirme niyo “laygayan” an iyo mga anak mahitungod han mga kamatuoran han Biblia. Lugod, pangalimbasugi nga an iristorya han pamilya pirme makaparig-on, ngan mahitungod ha espirituwal. Pananglitan, an Awake! nga magasin may-ada damu nga mga artikulo nga naghihisgot han damu nga magkalainlain nga mga topiko. An sugad nga mga artikulo mahimo magin basihan han mga iristorya mahitungod han linarang ni Jehova nga mga hayop, han natural-an-kaanyag nga mga lugar ha bug-os nga kalibotan, ngan han urusahon nga mga klase han mga kultura han tawo ngan mga paagi han pagkinabuhi. An sugad nga mga iristorya mahimo magpagios ha mga batan-on nga magbasa hin dugang pa han literatura nga igintatagana han matinumanon ngan maaramon nga uripon nga klase.—Mateo 24:45-47.

15. Paonan-o mabubuligan han mga kag-anak an ira mga anak nga hunahunaon an Kristiano nga ministeryo sugad nga makapainteres ngan may balos?

¹⁵ An makaparig-on nga mga pakiistorya ha iyo mga anak mabulig ha iyo ha pagtagbaw han  usa pa nga espirituwal nga panginahanglan. Kinahanglan hibaroan han Kristiano nga mga anak an epektibo nga pagpaangbit han ira pagtoo ha iba. Samtang nag-iiristorya mahitungod han pipira nga punto nga makapainteres dida ha An Barantayan o Awake! mahimo niyo kitaon an mga higayon kon paonan-o magagamit an impormasyon ha ministeryo. Pananglitan, mahimo kamo magpakiana: “Diri ba makalilipay gud kon damu pa nga mga tawo an mahibaro hini mahitungod kan Jehova? Ha imo paghunahuna, paonan-o naton madadasig nga magkainteres hini nga topiko an usa ka tawo?” An sugad nga mga paghisgot mahimo makabulig ha mga batan-on nga mapatubo an dugang pa nga interes ha pagsumat ha iba mahitungod han ira hinbabaroan. Katapos, kon an iyo mga anak umupod ha iyo ha ministeryo, makikita nira ha aktuwal nga kahimtang an pag-aplikar han sugad nga mga iristorya. Bangin mahibaro liwat hira nga makapainteres ngan makalilipay ngay-an nga buruhaton an ministeryo, nga naghahatag hin daku nga katagbaw ngan kalipay.—Buhat 20:35.

16. Ano an mahimo mahibaroan han mga anak tikang ha pamati ha mga pag-ampo han ira mga kag-anak?

¹⁶ An mga kag-anak nagtatagana liwat han espirituwal nga mga panginahanglan han ira mga anak kon nag-aampo. Gintutdoan ni Jesus an iya mga disipulo kon paonan-o an pag-ampo, ngan nag-ampo hiya upod nira ha damu nga okasyon. (Lukas 11:1-13) Hunahunaa la kon mationan-o kadamu an ira hinbaroan pinaagi han pag-ampo kaupod han Anak mismo ni Jehova! Ha sugad man nga paagi, an iyo mga anak mahibabaro hin damu tikang ha iyo mga pag-ampo. Pananglitan, mahimo hira mahibaro nga karuyag ni Jehova nga diri kita mag-alang ha pakiistorya hin kinasingkasing ha iya, iginsusumat ha iya an bisan ano nga problema naton. Oo, an iyo mga pag-ampo makakabulig ha iyo mga anak nga mahibaro han usa nga importante nga espirituwal nga kamatuoran: Posible nga magkaada hira relasyon ha ira langitnon nga Amay.—1 Pedro 5:7.

Pagtagana ha Emosyon

17, 18. (a) Paonan-o iginpapahayag han Biblia an pagkaimportante han pagpakita hin gugma ha mga anak? (b) Paonan-o sadang subaron hi Jehova han mga amay ha pagpahayag hin gugma ha ira mga anak?

¹⁷ Syempre, an mga anak may-ada liwat importante nga mga panginahanglan ha emosyon. An Pulong han Dios nagsusumat ha mga kag-anak nga importante gud an pagtagana hini nga panginahanglan. Pananglitan, an batan-on nga kababayin-an ginsasagdonan nga ‘higugmaon an ira mga anak.’ An ira pagbuhat hito nakadepende ha paghiuli ha maopay nga pamurubuot han batan-on nga mga iroy. (Tito 2:4) Oo, makatadunganon an pagpahayag hin gugma ha anak. Nagtututdo ini ha anak nga maghigugma ngan bug-os-kinabuhi an mga kapulsanan hini. Ha luyo nga bahin, kalurongan an diri pagpahayag hin gugma ha anak. Nagigin hinungdan ito han duro nga kasakit ngan nagpapakita hin kapakyasan ha pagsubad kan Jehova, nga nagpapakita ha aton han daku hinduro nga gugma bisan pa han aton pagkadiri-hingpit.—Salmo 103:8-14.

¹⁸ Hi Jehova pa ngani an nag-una ha paghigugma ha iya tunan-on nga mga anak. Sugad han ginsisiring han 1 Juan 4:19, “una hiya [nga] naghigugma ha aton.” Kamo nga mga amay labi na, sadang subaron niyo an susbaranan ni Jehova, nga nag-uuna ha pagpatubo hin mahigugmaon nga bugkos ha iyo mga anak. An Biblia nagsasagda ha mga amay nga diri pag-aringiton an ira mga anak, ‘basi diri hira magturaw.’ (Kolosas 3:21) An usa han mas nakakapaaringit ha mga anak amo an impresyon nga an usa nga kag-anak diri nahigugma o diri nagpapabili ha ira. An susbaranan ni Jehova sadang hinumdoman han mga amay nga nag-aalang ha pagpahayag han ira mga pagbati. Hi Jehova nagyakan pa ngani tikang ha langit ha pagpahayag hin pag-uyon ngan gugma ha iya Anak. (Mateo 3:17; 17:5) Sigurado nga nagparig-on gud ito kan Jesus! Sugad man, an mga anak nakakakuha hin daku nga kusog ngan kaisog tikang ha tangkod nga mga kapahayagan han gugma ngan pag-uyon han ira mga kag-anak.

19. Kay ano nga importante an disiplina, ngan ano nga pagkatimbang an ginpapangalimbasogan han Kristiano nga mga kag-anak?

 ¹⁹ Syempre, an gugma han mga kag-anak ha ira mga anak iginpapahayag diri ha mga pulong la. An gugma iginpapahayag labi na ha buhat. Mahimo magin kapahayagan han gugma han kag-anak an pagtagana ha materyal ngan espirituwal, labi na kon ginbubuhat ito han mga kag-anak ha paagi nga nagpapakita nga gugma an siyahan nga motibo hito. Dugang pa, an disiplina importante gud nga kapahayagan han gugma han kag-anak. Oo, “an hinigugma ni Jehova dinidisiplina niya.” (Hebreo 12:6, NW) Ha luyo nga bahin, an kapakyas ha pagdisiplina amo an kapahayagan han kangalas han kag-anak! (Proberbios 13:24) Pirme gintitipigan ni Jehova an husto nga pagkatimbang, nagdidisiplina “ha husto nga paagi.” (Jeremias 46:28, NW) An sugad nga pagkatimbang diri gud masayon para ha diri-hingpit nga mga kag-anak. Kondi, an pagkab-ot hito nga pagkatimbang takos gud han ngatanan nga pangalimbasog. An marig-on, mahigugmaon nga disiplina nabulig ha usa nga bata nga magtubo nga may-ada malipayon, mabungahon nga kinabuhi. (Proberbios 22:6) Diri ba ito an karuyag han tagsa nga Kristiano nga kag-anak para ha iya anak?

20. Paonan-o maihahatag han mga kag-anak ha ira mga anak an gimaopayi gud nga higayon nga ‘pilion an kinabuhi’?

²⁰ Kon ginbubuhat niyo nga mga kag-anak an importante nga buruhaton nga igintoka ha iyo ni Jehova—pagtagana han materyal, espirituwal, ngan emosyonal nga mga panginahanglan han iyo mga anak—daku an mga balos. Hito nga paagi iginhahatag niyo ha iyo mga anak an gimaopayi gud nga higayon nga ‘pilion an kinabuhi’ ngan katapos hito padayon nga “mabuhi.” (Deuteronomio 30:19) Nakakalipay hinduro ha ira mga kag-anak adton mga anak nga nagdidesisyon ha pag-alagad kan Jehova ngan nagpapabilin dida ha dalan ngadto ha kinabuhi samtang nagigin hamtong hira. (Salmo 127:3-5) An sugad nga kalipay magpapadayon ha waray kataposan! Kondi, paonan-o mahimo dayawon han mga batan-on hi Jehova yana? An masunod nga artikulo an maghihisgot hito nga topiko.

[Mga footnote]

Paonan-o Mo Babatunon?

Ano an mahimo buhaton han mga kag-anak basi makagtagana ha ira mga anak

• ha materyal?

• ha espirituwal?

• ha emosyon?

[Mga Pakiana]

[Retrato ha pahina 18]

Damu nga katamsihan an waray pagkakapoy nga nagtatagana hin pagkaon ha ira kapisoan

[Retrato ha pahina 20]

Kinahanglan patuboon anay han mga kag-anak an ira mismo espirituwalidad

[Retrato ha pahina 20, 21]

An mga kag-anak makakabiling hin damu nga okasyon ha pagtutdo ha ira mga anak mahitungod han Maglalarang

[Retrato ha pahina 22]

An mga anak nakakakuha hin kusog ngan kaisog tikang ha pag-uyon han mga kag-anak