Pagdayaw kan Jehova ha Eskwelahan

HA BUG-OS nga kalibotan, an batan-on nga mga Saksi ni Jehova nakakabiling hin mga paagi ha pagdayaw ha Dios ha eskwelahan—pinaagi han ira pagyakan ngan paggawi. Tigamni an pipira nga mga eksperyensya nga nag-iilustrar han ira kadasig sugad nga kabataan.

An usa nga batan-on nga Saksi ha Gresya gintokahan ha pagsurat hin report mahitungod ha polusyon ha atmospera han tuna. Katapos usisahon an Watch Tower Publications Index, nakabiling hiya hin mapulsanon nga artikulo ha Awake! nga magasin, ngan gin-unabi ito sugad nga an iya reperensya ha kataposan han iya report. Ginsidngan hiya han iya magturutdo nga usa ito han gimaopayi nga mga report nga iya nabasa. Ha urhi, gin-gamit han maestra an impormasyon ha usa nga seminar, ngan nagkaada ito maopay nga mga resulta. Tungod hito, an batan-on nga bugto nga babaye nagdesisyon nga tanyagan an magturutdo hin dugang pa nga mga gowa han Awake! upod na an gowa nga nagsusulod han serye nga “Teachers—What Would We Do Without Them?” Ha urhi, gindayaw han magturutdo an Awake! nga magasin ha klase, ngan may iba nga mga estudyante nga nagtikang mangaro hin mga kopya. Ginkinahanglan han bugto nga magdara hin mga kopya han magasin ha eskwelahan basi mabasa nira an iba pa nga mga gowa.

Ha Benin, Aprika, usa nga Kristiano nga tinedyer an inatubang hin talagsahon nga klase han pag-ipit. Sumala han nahiaraan, nag-uurosa an mga kag-anak han damu nga mga estudyante ha iya eskwelahan ha pagkuha hin mga magturutdo ha magkuri nga mga aradman basi iandam an ira mga anak para ha mga eksamin. Kondi, ginpili han mga magturutdo an mga aga han Sabado para ha mga sesyon. Nagdumiri an batan-on nga Saksi: “An aga han Sabado an panahon nga ginagamit han bug-os nga kongregasyon para han urosa nga pagsangyaw. Para ha akon, ito an pinakamakalilipay nga adlaw han semana, ngan diri ko ito ibabalyo ha bisan ano!” Inuyon hito an iya amay, nga nagsusolo nga kag-anak ngan Saksi liwat, ngan nangalimbasog hiya ha pag-aghat han usa nga grupo han mga kag-anak ngan mga magturutdo nga bag-ohon an eskedyol. Kondi, nagdumiri hira ngatanan. Nagdesisyon an batan-on nga babaye nga diri na la magpatutdo. Lugod, nakigbahin hiya ha pagsangyaw kaupod han iya kongregasyon. Gin-inintremisan hiya han iya mga kaklase, ginsasagda hiya nga umundang na ha pagsinangyawon ngan diri na mag-alagad ha iya Dios. Baga hin sigurado gud hira nga diri hiya mapasar ha mga eksamin. Kondi, an nahitabo lugod, waray makapasar iton grupo han gintutdoan nga mga estudyante, samtang nakapasar an aton batan-on nga bugto. Diri na kinahanglan sidngon pa, pero inundang an pag-inintremis. Yana an mga estudyante nagsisiniring ha iya, “Sadang ka magpadayon ha pag-alagad ha imo Dios.”

Ha Republika han Czech, usa nga 12 anyos nga bata nga babaye an kinahanglan maghimo hin report mahitungod han usa nga libro. Ginsagda hiya han iya iroy nga gamiton an libro nga The Greatest Man Who Ever Lived. Gintikangan niya an iya report pinaagi han mga pakiana: “Ano ha imo hunahuna? Hin-o an pinakabantogan nga tawo nga nabuhi?” Iya ginhulagway hi Jesus, an iya kinabuhi ha tuna, ngan an iya mga katutdoan. Katapos iya ginhisgotan an kapitulo nga may ulohan nga “A Lesson in Forgiveness.” An iya maestra malipayon nga nagsiring, “Ito an pinakamaopay nga report nga akon hinbatian ha imo!” ngan mapasalamaton nga kinarawat hin kopya han libro. Naruyag liwat an pipira nga mga igkasi-estudyante hin kopya. Kinabuwasan, nalipay an bata ha pagpanaltag hin 18 nga kopya.

An sugad nga kabataan nakakabiling hin daku nga kalipay ha pagdayaw kan Jehova ha eskwelahan. Sadang naton ngatanan subaron an ira kadasig sugad nga kabataan.