“An Akon Tambulig Natikang kan Jehova”

Solo Ngan Kontento ha Pag-alagad kan Jehova

“DAMU hinduro ha amon an bug-os nga malipayon bisan kon diri kami inasaw-an,” siring han usa nga Kristiano nga babaye ha Espanya. Ano an hinungdan han iya pagkakontento? “Nalilipay kami ha pagin waray damu nga ginkakabarak-an basi mas damu an amon mahimo ha pag-alagad ha aton Dios, hi Jehova.”

An sugad nga mga pagbati nauyon ha ginsiring ha Pulong han Dios mahitungod ha pagin solo. Han ginhisgotan ni apostol Pablo an mga butang nga may kalabotan ha pag-asawa, iya iginhatag inin giniyahan han Dios nga obserbasyon: “Nasiring ako ha mga waray pa asawa ngan ha mga balo nga babaye; maopay na la ha ira kon magpapadayon hira sugad ha akon.” Hi Pablo mismo waray asawa. Kondi ano an hinungdan nga iya iginrekomenda an pagin solo? Iya ginpabug-atan nga an inasaw-an nga tawo nababahin, samtang an nagsusolo nga lalaki o babaye “maminangnoon ha mga butang han Ginoo.” (1 Korinto 7:8, 32-34) An pag-alagad kan Jehova amo an nangunguna nga hinungdan nga an solo nga tawo nagigin malipayon ngan kontento.

Pagin Solo nga May Dungganon nga Katuyoan

An mga komento ni Pablo bangin diri masabtan ha mga lugar nga nagpapabug-at han pagkaimportante han pag-asawa ngan pagkaada hin pamilya. Kondi, hi Jesu-Kristo—nga diri inasaw-an pero malipayon ngan kontento—nag-unabi hin dungganon nga katuyoan para ha mga Kristiano nga solo. Hiya nagsiring: “May mga kapon [“yunuko,” NW] nga nagkapon ha ira la ngahaw tungod han ginhadian han langit. An makahimo pagkarawat hini, kumarawat hiya.”—Mateo 19:12.

Uyon hito nga mga pulong, naobserbahan han damu nga tungod kay solo hira nakakag-alagad hira ha Dios nga waray han ulang nga komon ha mga inasaw-an. (1 Korinto 7:35) Yinukot han mga Kristiano an malipayon nga nagsisingba kan Jehova nga waray asawa, ngan nakakaeksperyensya hira hin kalipay ha aktibo nga pagbulig ha iba. a

Nasasantop han damu nga nagsusolo nga mga Kristiano nga diri la an mga inasaw-an an malipayon nga mga tawo ngan diri ngatanan nga solo nga mga indibiduwal an nakakaeksperyensya hin kasubo. Ha mga inasaw-an ngan mga solo, an pipira usahay nakakaeksperyensya hin kalipay sugad man hin kasubo. Ha pagkamatuod, an Biblia reyalistiko nga nasiring nga an pag-asawa mismo nagdadara hin “kagol-anan ha unod.”—1 Korinto 7:28.

Solo Tungod han Kahimtang

Damu an solo diri tungod kay karuyag nira kondi tungod han ira mga kahimtang. Bangin hingyapon nira an kapaso, pagkaada hin kaupod, ngan gugma nga maieksperyensyahan ha sulod han kahikayan han pag-asawa. Kondi, para ha pipira, an pinansyal o iba pa nga mga problema bangin magin hinungdan nga diri hira makaasawa ha presente nga panahon. An pipira nga mga Kristiano—damu ha ira an hinigugma nga kabugtoan nga kababayin-an—nagpapabilin nga solo tungod kay determinado hira nga sundon an Biblia nga mag-asawa ‘ha Ginoo la.’ (1 Korinto 7:39) Maunungon nga namimiling hira hin maarasawa dida la ha dedikado, bawtismado nga mga magsiringba ni Jehova.

 Usahay, namimingaw an iba hini nga mga indibiduwal. Katapos niya karawaton nga ini an iya inaabat, usa nga nagsusolo nga Kristiano an nasiring: “Maaram kami han balaud ni Jehova ngan diri namon karuyag nga mapasubo hi Jehova ha anoman nga paagi. Bangin hingyapon namon an pagkaada asawa nga makakaupod, kondi bisan kon makadamu kami itugpo han kalibotanon nga mga tawo, determinado la gihapon kami nga magpabilin nga solo. Diri ngani kami naruruyag ha pakig-upod ha diri-matinoohon nga kalalakin-an ngan kababayin-an.” An sugad nga mga Kristiano angay kumendasyonan ha pag-aplikar han sagdon ha Biblia ngan ha pagtipig hin hitaas nga mga suruklan ha moral basi mapalipay hi Jehova bisan pa han anoman nga problema ha emosyon nga bangin nira maeksperyensyahan.

Hura nga Bulig Tikang ha Dios

Hi Jehova maunungon ngada hadton nagpapakita han ira pagkamaunungon ha iya ha mga isyu sugad ha pagdumiri ha pag-asawa ha mga diri nag-aalagad ha iya. Tikang ha personal nga eksperyensya ni David, hiya makakapamatuod: “Ha maunungon magios ka [Jehova] nga maunungon.” (Salmo 18:25, NW) Ngan ha mga tawo nga matinumanon nga nasunod ha iya, an Dios nagsaad: “Diri ko gud ikaw bibilinan, ngan diri ko gud ikaw babayaan.” (Hebreo 13:5) Ha pagsubad kan Jehova, makakahatag kita hin hura nga kumendasyon ha solo nga mga Kristiano nga matinumanon nga nasunod ha Pulong han Dios anoman an ira edad. Mahimo liwat kita mag-ampo nga parig-unon hira ni Jehova basi maatubang an ira mga problema.—Hukom 11:30-40.

Damu nga solo nga mga Kristiano an nakakaobserba nga an bug-os nga pakigbahin ha buruhaton nga pagtutdo ha Biblia naghahatag hin daku nga katuyoan ha ira kinabuhi. Pananglitan, tagda hi Patricia, usa nga diri inasaw-an nga babaye nga sobra 30 anyos an pangidaron nga payunir, o bug-os-panahon nga ebanghelisador. Hiya nasiring: “Bisan kon damu an mga problema ha pagin solo, nakahatag ito ha akon han higayon nga magregular payunir. Tungod kay solo ako, masayon burubag-ohon an akon eskedyol, nga naghahatag ha akon hin mas daku nga panahon ha pag-aram. Nahibaro liwat ako nga labaw nga sumarig kan Jehova, labi na ha makuri nga mga panahon.”

Ito nga mga pagbati ginbasar ha nagpapasarig nga saad han Biblia: “Itubyan mo kan Jehova an imo agian; sarig liwat ha iya, ngan iya iton pagbubuhaton.” (Salmo 37:5) Oo, an ngatanan nga matinumanon nga mga magsiringba ni Jehova, inasaw-an man o solo, makakakuha hin pagliaw ngan kusog ha giniyahan nga mga pulong: “An akon tambulig natikang kan Jehova.”—Salmo 121:1.

[Footnote]

[Blurb ha pahina 9]

“An waray asawa maminangnoon ha mga butang han Ginoo, kon oonan-on niya an paglipaya ha Ginoo.”—1 KORINTO 7:32

[Kahon ha pahina 8]

AN MAHIHIMO HAN USA BASI MAPAHIMULOSAN AN PAGIN SOLO

Hi Jesus, nga waray gud mag-asawa, nagsiring: “An akon karan-on amo an pagbuhat han kaburut-on han nagpakanhi ha akon, ngan paghuman han iya buhat.”—Juan 4:34.

An upat nga diri inasaw-an nga anak nga kababayin-an ni Felipe sagipo ha ‘pagpanagna.’—Buhat 21:8, 9.

An solo nga Kristiano nga kababayin-an nga nagpapasamwak han mensahe han Ginhadian bahin han damu hinduro nga “mga babaye nga nagpapahayag han sumat.”—Salmo 68:11.