Totoo nga mga Katutdoan—Diin Mo Ito Mabibilngan?

AN USA nga lalaki ha Tibet nagpapatuyok hin kaliding ha pag-ampo, usa nga bumbo nga nagsusulod hin sinurat nga mga pag-ampo. Natoo hiya nga an iya mga pag-ampo nauutro ha kada tuyok han ruyda. Ha usa nga haluag nga balay ha India, an usa nga gutiay nga kwarto ginagamit para la ha pagbuhat hin puja—pagsingba nga mahimo mag-upod han paghalad hin insenso, mga bukad, ngan iba nga mga butang ngadto ha mga imahen han magkalain-lain nga mga dios ngan diosa. Ha Italya, yinukot ka kilometro an kahirayo, usa nga babaye ha magarbo nga singbahan an naluhod ha atubangan han imahen ni Maria, an iroy ni Jesus, ngan nag-aampo samtang nakakapot hin rosaryohan.

Bangin personal nga nakikita mo an impluwensya han relihiyon ha kinabuhi han mga tawo. “An relihiyon . . . hadto ngan yana nagpapadayon ha pagkaada importante nga bahin ha mga sosiedad ha bug-os nga kalibotan,” siring han libro nga The World’s Religions—Understanding the Living Faiths. Ha libro nga God—A Brief History, an awtor nga hi John Bowker nakaobserba: “An pagtoo ha Dios bahin pirme han bisan ano nga sosiedad han tawo, kasagaran nga an pagdumara han Dios ha uniberso ngan an iya pagin Maglalarang. Totoo ito bisan ha mga sosiedad nga diri nag-aaghat hin pagtoo ha Dios.”

Oo, an relihiyon nakakaimpluwensya ha kinabuhi han minilyon nga mga tawo. Diri ba ini marig-on nga ebidensya nga an tawo may-ada panginahanglan ngan hingyap para ha espirituwal nga mga butang? Ha iya libro nga The Undiscovered Self, an bantogan nga sikologo nga hi Dr. Carl G. Jung naghisgot han panginahanglan han tawo ha pagsingba ha mas hitaas nga gahum ngan nagsiring nga “an mga pangirilal-an hito makikita ha bug-os nga kasaysayan han tawo.”

Kondi, damu nga mga tawo an nasiring nga diri hira natoo ha Dios o waray hira interes ha relihiyon.  An nangunguna nga hinungdan kon kay ano nga an iba nagruruhaduha o nagninigar nga naeksister an Dios, tungod kay an mga relihiyon nga pamilyar hira napakyas ha pagtagbaw han ira espirituwal nga panginahanglan. An relihiyon gintagan hin kahulogan sugad nga “debosyon ha usa nga prinsipyo; bug-os nga pagkamaunungon o pagkamatinumanon; pagsunod ha konsensya; hilarom o duok nga relasyon ha Dios.” Kon ibasar hini nga kahulogan, haros ngatanan nagpapakita hin usa nga porma han debosyon ha relihiyon ha iya kinabuhi. Upod pa ngani hito an mga ateyista.

Durante han yinukot ka tuig han kasaysayan han tawo, an mga pangalimbasog han mga tawo nga tagbawon an ira espirituwal nga panginahanglan nagtugway ha ira ha damu nga mga dalan. An resulta amo an damu hinduro kalain nga mga ideya mahitungod han relihiyon nga maoobserbahan ha bug-os nga kalibotan. Pananglitan, bisan kon haros ngatanan nga mga relihiyon nag-aaghat hin pagtoo ha mas hitaas nga gahum, magkalainlain an ira mga ideya mahitungod ha kon hin-o o kon ano ito. Ginpapabug-atan liwat han kadam-an nga mga relihiyon an pagkaimportante han kaluwasan o kagawasan. Kondi an ira mga katutdoan nagkakaiba-iba may kalabotan ha kon ano an kaluwasan ngan kon paonan-o makakab-ot ito. Tungod kay damu hinduro kalain an mga gintotoohan, paonan-o naton makikilala an totoo nga mga katutdoan nga nalilipayan han Dios?