Mga Pakiana Tikang ha mga Magbarasa

Ha kadaan nga Israel, ano an iginpasabot han milagroso nga kapawa nga usahay tinatawag nga Sekina nga makikita ha Pinakabaraan han tabernakulo ngan han templo?

Hi Jehova, an mahigugmaon nga Amay ngan Parapanalipod han iya katawohan, nagpaabat gud han iya presensya ha Israel. An usa nga paagi nga iya ginhimo ito amo an pinaagi han masilaw nga dampog nga may kalabotan gud ha lugar han pagsingba ha iya.

Iton masilaw nga kapawa nagrepresentar han diri-nakikita nga presensya ni Jehova. Nakita ito ha Pinakabaraan han tabernakulo ngan han templo nga gintukod ni Salomon. Iton milagroso nga kapawa waray magpasabot nga hi Jehova pisikal nga presente didto. An Dios diri mahisusulod ha bisan ano nga tinukod nga hinimo han mga tawo. (2 Kronikas 6:18; Buhat 17:24) Inin urusahon hinduro nga kapawa ha santuaryo han Dios makakapasarig ha hitaas nga saserdote ngan pinaagi ha iya ha ngatanan nga mga Israelita nga an nagpapanalipod nga presensya ni Jehova nag-aataman ha ira ngan ha ira mga panginahanglan.

Katapos han peryodo han pagsurat han Biblia, ini nga kapawa gintawag ha Aramaiko nga yinaknan nga Sekina (shekhi·nahʹ), usa nga pulong nga nangangahulogan “an naukoy” o “an urukyan.” Ini nga termino waray ha Biblia, kondi aada ha Aramaiko nga mga hubad han Hebreo nga Kasuratan, nga kilala liwat sugad nga an mga Targum.

Han maghatag hi Jehova hin mga instruksyon para ha pagtukod han tabernakulo, nagsiring hiya kan Moises: “Ibutang mo an lingkuranan-ha-kalooy [“takop,” NW] ha bawbaw han arka: ngan ha sakob han arka ibutang mo an pagpamatuod nga akon ihahatag ha imo. Ngan didto ako makikigkita ha imo, ngan tikang ha igbaw han lingkuranan-ha-kalooy [“takop,” NW] ako makikighimangraw ha imo, tikang ha butnga han duha nga kerubin nga aada ha bawbaw han arka.” (Eksodo 25:21, 22) An Arka nga gin-unabi usa nga baul nga pinutos hin bulawan ha Pinakabaraan. May-ada duha nga bulawan nga kerubin ha takop han Arka.

Hain hi Jehova kon magyayakan hiya? Iya ginbaton ito nga pakiana han magsiring hiya kan Moises: “Ako mapakita ha sulod han dampog ha bawbaw han lingkuranan-ha kalooy [“takop,” NW].” (Lebitiko 16:2) Ini nga dampog nalutaw ha igbaw han sagrado nga Arka butnga han duha nga kerubin. Waray isumat han Biblia kon mationan-o kahitaas ito nga dampog o mationan-o kahirayo ito ha igbaw han mga kerubin.

Inin masilaw nga dampog naghatag hin kapawa ha Pinakabaraan. Ha pagkamatuod, ito la an surok han kapawa hito nga kwarto. Tungod hito nga kapawa, an hitaas nga saserdote nakakakita kon nasulod hiya ha gisusuluri nga kwarto ha Adlaw han Pagbayad han Sala. Natindog hiya ha presensya ni Jehova.

May kahulogan ba ini nga milagroso nga kapawa ha mga Kristiano? Nakita ni apostol Juan ha bisyon an usa nga syudad diin “didto waray hin gab-i.” An syudad amo an Bag-o nga Jerusalem, nga ginkukompwesto han dinihogan nga mga Kristiano nga ginbanhaw basi magmando upod kan Jesus. An kapawa hinin simboliko nga syudad diri tikang ha adlaw o ha bulan. An himaya ni Jehova nga Dios direkta nga naghahatag hin kapawa hini nga organisasyon, sugad la nga an dampog nga Sekina naghatag hin kapawa ha Pinakabaraan. Sugad man, an Kordero, hi Jesu-Kristo, amo an “lamparahan” han syudad. Tungod hito, ini nga syudad naghahatag han espirituwal nga kahayag ngan bendisyon hito ha tinubos nga katawohan han ngatanan nga mga nasud ha paggiya ha ira.—Pahayag 21:22-25.

Tungod kay an mga magsiringba ni Jehova nakarawat han sugad nga hura nga mga bendisyon tikang ha Dios, makakasiguro hira nga hi Jehova an ira nagpapanalipod nga Paramangno ngan mahigugmaon nga Amay.