Maglalakat Kita ha Ngaran ni Jehova nga Aton Dios
Maglalakat Kita ha Ngaran ni Jehova nga Aton Dios
“Kita maglalakat ha ngaran ni Jehova nga aton Dios ha kagihaponan.”—MIKA 4:5.
1. Mahitungod han moralidad, ano an kahimtang ha panahon ni Noe, ngan paonan-o hiya naiiba?
AN SIYAHAN nga lalaki nga gin-unabi ha Biblia nga naglakat kaupod han Dios amo hi Enok. An ikaduha amo hi Noe. An rekord nagsusumat ha aton: “Hi Noe matadong nga tawo, ngan putli ha iya katulinan. Hi Noe naglakat upod han Dios.” (Genesis 6:9) Ha panahon ni Noe, an katawohan ha kabug-osan binaya ha putli nga pagsingba. An maraot nga kahimtang mas nagraot pa gud tungod han diri-matinumanon nga mga anghel nga diri-natural nga nakig-asawa ha kababayin-an ngan nanganak hin tinatawag nga mga Nepilim, “an mga kusganon,” o “an mga tawo nga bantogan,” hadto nga mga panahon. Diri urusahon nga an tuna napuno hin kamadarahog! (Genesis 6:2, 4, 11) Kondi, pinamatud-an ni Noe nga hiya waray kasaypanan ngan “parawali han katadongan.” (2 Pedro 2:5) Han ginsugo hiya han Dios nga maghimo hin arka para ha kaluwasan han kinabuhi, hi Noe masinugtanon nga ‘nagbuhat han ngatanan nga kanan Dios iginsugo ha iya, iya ginbuhat.’ (Genesis 6:22) Tinuod, hi Noe naglakat kaupod han Dios.
2, 3. Ano nga maopay nga susbaranan an ipinakita ni Noe para ha aton yana?
2 Igin-upod ni Pablo hi Noe ha iya lista han matinumanon nga mga saksi han hiya nagsurat: “Tungod ha pagtoo, hi Noe, nga gintutdoan han Dios mahitungod han mga bagay nga waray pa hikit-i, ha matinalahuron nga kahadlok, ginhimo niya an arka ha pagluwas ha iya panimalay; pinaagi han pagtoo ginhukman niya hin sirot an kalibotan, ngan nagmanurunod hiya han katadongan nga uyon ha pagtoo.” (Hebreo 11:7) Pagkamaopay nga susbaranan! Tungod kay sinarig gud hi Noe nga matutuman an mga pulong ni Jehova, ginamit niya an panahon, kusog, ngan mga katigayonan ha pagtuman han mga sugo han Dios. Ha pariho nga paagi, damu yana an nagdudumiri han sekular nga mga higayon hini nga kalibotan ngan nagamit han ira panahon, kusog, ngan mga katigayonan ha pagsugot ha mga sugo ni Jehova. Darayawon gud an ira pagtoo ngan magriresulta ito ha ira kaluwasan sugad man han iba.—Lukas 16:9; 1 Timoteo 4:16.
3 An pagbuhat hin pagtoo sigurado nga makuri para kan Noe ngan ha iya pamilya sugad la nga makuri ito para kan Enok, an kaapoy-apoyan ni Noe, nga ginhisgotan ha nauna nga artikulo. Ha panahon ni Noe sugad han ha panahon ni Enok, an totoo nga mga magsiringba usa ka gutiay la nga grupo—walo la ka tawo an nagmatinumanon ngan naluwas ha Baha. Hi Noe nagwali han katadongan ha madarahog ngan imoral nga kalibotan. Dugang pa, hiya ngan an iya pamilya naghimo hin daku nga arka nga kahoy ha pangandam para ha bug-os-kalibotan nga baha, bisan kon waray pa usa nga nakakita hadto hin sugad hito nga baha. Sigurado nga baga hin urusahon ito para hadton nagkikita ha ira.
4. Ano nga sayop han mga kadungan-dungan ni Noe an iginpatin-aw ni Jesus?
4 Makapainteres, han gin-unabi ni Jesus an mga panahon ni Noe, waray niya unabiha an kamadarahog, an palso nga relihiyon, o an imoralidad—nga maraot gud hadto nga panahon. An sayop nga iginpatin-aw ni Jesus amo an pagdumiri han mga tawo ha pagpamati ha pahamangno nga iginhatag. Hiya nagsiring nga hira “nagpipinangaon ngan nagpipinanginom, nga nangangasawa ngan napapangasal, tubtob ha pagsulod ni Noe ha arka.” An pangaon, panginom, pangasawa, ngan pangasal—ano an sayop hito? “Normal” la ito nga ira pagkinabuhi! Kondi tiarabot an baha, ngan hi Noe nagsasangyaw han katadongan. An iya mga pulong ngan paggawi nagin pahamangno na unta ha ira. Kondi, hira waray pamati “tubtob ha pag-abot han paglunop ngan igin-anod hira ngatanan.”—Mateo 24:38, 39.
5. Ano nga mga kalidad an ginkinahanglan ni Noe ngan han iya pamilya?
5 Kon babalikon naton adto nga mga panahon, makikita naton an kinaadman han paagi han pagkinabuhi ni Noe. Kondi, ha panahon antes han Baha, ginkinahanglan an kaisog basi magin naiiba tikang ha iba nga mga tawo. Nagkinahanglan hin marig-on nga pagtoo hi Noe ngan an iya pamilya ha paghimo han daku nga arka ngan pun-on ito hin mga magpadis han tagsa nga klase han mga hayop. An iba ba hadton pipira nga matinumanon nga mga tawo usahay naghandom nga diri hira magin prominente ngan magkinabuhi la hin “normal”? Bisan kon nahunahuna nira ito, waray manluya hira ha ira integridad. Katapos han damu nga mga tuig—nga mas hilawig kay ha maiilob han bisan hin-o ha aton dinhi hini nga sistema han mga butang—an pagtoo ni Noe nagresulta ha iya kaluwasan ha Baha. Kondi, iginpadapat ni Jehova an paghukom ha ngatanan hadton “normal” nga nagkinabuhi ngan nagbalewaray ha kahulogan han mga panahon nga ira kinabubuhian.
An Kamadarahog Nagdadaot Na Liwat ha Katawohan
6. Katapos han Baha, ano pa gihapon an kahimtang?
6 Han hinubas na an katubigan han Baha, an katawohan nagkaada bag-o nga tinikangan. Kondi, an mga tawo diri pa gihapon hingpit, ngan “an panhunahuna han kanan tawo kasingkasing” padayon nga nagin “maraot tikang ha iya kabata.” (Genesis 8:21) Gawas pa, bisan kon an mga demonyo diri na mahimo magsul-ot hin tawhanon nga mga lawas, aktibo hinduro pa gihapon hira. An kalibotan han katawohan nga diri matinahuron ha Dios nagpakita nga “ilarom [ito] han gahum han usa nga maraot,” ngan sugad la yana, an totoo nga mga magsiringba kinahanglan makig-away ha “mga limbong han Yawa.”—1 Juan 5:19, NW; Efeso 6:11, 12.
7. Paonan-o nagdugang an kamadarahog ha kalibotan katapos han Baha?
7 Tikang ha panahon ni Nimrod, an tuna katapos han Baha napuno na liwat han madarahog nga mga buhat han mga tawo. Sugad nga resulta han nagdadamu nga populasyon ngan pag-uswag han teknolohiya, nagdudugang an kamadarahog ha paglabay han panahon. Ha naglabay nga mga panahon, may-ada espada, bangkaw, bawog ngan pana, ngan karomata. Ha mas bag-o la nga naglabay nga mga panahon, nagkaada na basuka ngan kanyon, riple, ngan iba pa nga mas moderno nga mga hinganiban han ika-20 ka siglo. An Girra ha Kalibotan I nagtikang paggamit han mas makaharadlok nga mga hinganiban sugad han eruplano, tangke de girra, submarino, ngan nakakahilo nga gas. Hito nga girra, ini nga mga hinganiban nakamatay hin minilyon nga mga tawo. Diri ginlalaoman ba ito? Diri.
8. Paonan-o natutuman an Pahayag 6:1-4?
8 Han tuig 1914, nahitrono hi Jesus sugad nga Hadi han langitnon nga Ginhadian han Dios, ngan nagtikang “an adlaw han Ginoo.” (Pahayag 1:10) Ha usa nga bisyon nga iginsumat ha libro nga Pahayag, nakikita hi Jesus sugad nga Hadi nga madaugon nga nasakay ha busag nga kabayo. An iba nga mga nangangabayo nasunod ha iya, an kada usa nagrirepresentar hin magkalainlain nga peste ha katawohan. An usa ha ira nasakay ha pula nga kabayo, ngan ha iya iginhatag an awtoridad “ha pag-agaw han kamurayawan ha tuna, ngan basi nga magpinatayay hira; ngan tinagan hiya hin daku nga kampilan.” (Pahayag 6:1-4) Ini nga kabayo ngan an nasakay hito naglaladawan han girra, ngan an daku nga kampilan nagrirepresentar han waray gud kapariho nga makabungkag nga epekto han moderno nga girra tungod han moderno nga mga hinganiban hito. Ito nga mga hinganiban yana nag-uupod han mga armas nuklear, nga an kada usa hito makakabungkag hin napuplo ka yukot nga mga tawo; mga raket nga makakagdara hito nga mga hinganiban ngadto ha ginpupuntirya nga yinukot ka milya an kahirayo; sugad man han moderno nga kemikal ngan biolohikal nga mga hinganiban nga makakabungkag hin damu nga mga tawo.
Namamati Kita ha mga Pahamangno ni Jehova
9. Mationan-o an kalibotan yana kon itanding ha kahimtang antes han Baha?
9 Ha panahon ni Noe, ginbungkag ni Jehova an katawohan tungod han sobra nga kamadarahog han magraot nga mga tawo nga gin-aghat han mga Nepilim. Kumusta man yana? Mas gutiay ba an kamadarahog ha tuna yana kay ha panahon ni Noe? Sigurado nga diri. Dugang pa, sugad la ha panahon ni Noe, an mga tawo yana nagpapadayon ha ira adlaw-adlaw nga mga buruhaton, nangangalimbasog nga magkinabuhi hin “normal,” diri namamati ha mga pahamangno nga iginpapasamwak. (Lukas 17:26, 27) Salit, may-ada ba rason nga magruhaduha nga bubungkagon na liwat ni Jehova an katawohan? Waray.
10. (a) Ano nga pahamangno an pauro-utro nga iginhahatag ha tagna han Biblia? (b) Ano la an maaramon nga paagi han pagkinabuhi yana?
10 Ginatos ka tuig antes han Baha, igintagna ni Enok an kabungkagan nga mahitatabo gud ha aton panahon. (Judas 14, 15) Gin-unabi liwat ni Jesus an mahitungod han tiarabot nga “daku nga kagol-anan.” (Mateo 24:21) An iba nga mga propeta nagpahamangno mahitungod hito nga panahon. (Esekiel 38:18-23; Daniel 12:1; Joel 2:31, 32) Ngan ha libro nga Pahayag, mababasa naton an matin-aw nga paghulagway hiton ultimo nga kabungkagan. (Pahayag 19:11-21) Sugad nga mga indibiduwal, ginsusubad naton hi Noe ngan aktibo kita sugad nga mga parasangyaw han katadongan. Namamati kita ha mga pahamangno ni Jehova ngan mahigugmaon nga binubuligan an aton mga igkasi-tawo nga magbuhat liwat hito. Salit, pariho kan Noe, naglalakat kita kaupod han Dios. Tinuod, importante nga an bisan hin-o nga naghihingyap hin kinabuhi kinahanglan magpadayon ha paglakat kaupod han Dios. Paonan-o naton mahihimo ito bisan pa han mga pag-ipit nga inaatubang naton kada adlaw? Kinahanglan patuboon naton an marig-on nga pagtoo ha katumanan han katuyoan han Dios.—Hebreo 11:6.
Padayon nga Maglakat Kaupod han Dios ha Masamok nga mga Panahon
11. Ha ano nga paagi ginsusubad naton an siyahan-siglo nga mga Kristiano?
11 Ha siyahan nga siglo, an dinihogan nga mga Kristiano tinawag sugad nga kaapi han “Dalan.” (Buhat 9:2) An ira bug-os nga paagi han pagkinabuhi nakasentro ha pagtoo kan Jehova ngan kan Jesu-Kristo. Naglakat hira ha dalan nga ginlaktan han ira Agaron. Yana, ginbubuhat liwat ito han matinumanon nga mga Kristiano.
12. Ano an nahitabo katapos han milagroso nga ginpakaon ni Jesus an damu hinduro nga mga tawo?
12 An pagkaimportante han pagtoo nakikita ha nahitabo durante han ministeryo ni Jesus. Ha usa nga okasyon, milagroso nga ginpakaon ni Jesus an mga 5,000 ka tawo. An mga tawo nahipausa ngan nalipay. Kondi, tigamni an sunod nga nahitabo. Aton mababasa: “Ha pakakita han mga tawo han katingalahan, nga iya ginbuhat, [hira] siniring: Ini amo an matuod nga manaragna, nga nakanhi ha kalibotan. Busa hi Jesus, han pakakilala, nga hira nananaraon paglugos ha iya ha pagbuhat ha iya nga hadi, binalik hiya ngahaw ha bukid nga nag-usahan la.” (Juan 6:10-15) Hiton nga gab-i nagpakadto hiya ha iba nga lugar. An pagdumiri ni Jesus nga magin hadi posible nga nakapasubo ha damu nga tawo. Diri ini urusahon tungod kay ipinakita niya nga maaramon gud hiya salit angayan hiya nga magin hadi ngan may-ada hiya gahum ha pagtagbaw han mga panginahanglan han mga tawo. Kondi, diri pa ito an panahon ni Jehova para kan Jesus nga magmando sugad nga Hadi. Gawas pa, an Ginhadian ni Jesus magigin langitnon, diri tunan-on.
13, 14. Ano nga panhunahuna an iginpahayag han damu nga mga tawo, ngan paonan-o nasarihan an ira pagtoo?
13 Bisan pa hito, damu nga mga tawo an determinado nga sinunod kan Jesus ngan hin-agian hiya, sugad han siring ni Juan, ‘ha tabok han dagat.’ Kay ano nga sinunod hira ha iya katapos niya magdumiri nga himoon hiya nga hadi? Damu an nagpakita hin kalibotanon nga panhunahuna, ginpabug-atan gud ha ira mga istorya an materyal nga mga tagana ni Jehova ha kamingawan ha panahon ni Moises. Iginpapasabot hito nga hi Jesus sadang magpadayon ha pagtagana hin materyal para ha ira. Han masabtan ni Jesus an ira sayop nga mga motibo, nagtikang hiya magtutdo ha ira han espirituwal nga mga kamatuoran nga makakagbag-o han ira panhunahuna. (Juan 6:17, 24, 25, 30, 31, 35-40) Ha pagbaton, an iba nagngurutob kontra ha iya, labi na han iginsaysay niya ini nga ilustrasyon: “Matuod, ako nasiring ha iyo: Kon diri kamo kumaon han unod han Anak han tawo, ngan uminom han iya dugo, waray kamo kinabuhi ha iyo ngahaw. An nakaon han akon unod ngan nainom han akon dugo, may-ada kinabuhi nga waray kataposan; ngan akon babanhawon hiya ha kataposan nga adlaw.”—Juan 6:53, 54.
14 An mga ilustrasyon ni Jesus agsob nga nagpapagios ha mga tawo nga ipakita kon karuyag gud ba nira maglakat kaupod han Dios. Sugad man ini nga ilustrasyon. Nakaaghat ito hin makusog nga mga reaksyon. Aton mababasa: “Kadam-an han iya mga tinon-an nga nagpakabati, siniring: Makuri ini nga pulong, hin-o ba an makakahimo pakabati hito?” Hi Jesus nagpadayon ha pagsaysay nga sadang masabtan nira an espirituwal nga kahulogan han iya mga pulong. Hiya nagsiring: “An espiritu amo an naghahatag han kinabuhi; an unod waray kapulsanan; an mga pulong nga akon iginyakan ha iyo amo an espiritu ngan kinabuhi.” Pero, damu an waray mamati, ngan an asoy nasiring: “Tikang hini nga panahon damu han iya mga tinon-an an namulag, ngan waray na pagkalakat upod ha iya.”—Juan 6:60, 63, 66.
15. May-ada ano nga husto nga panhunahuna an iba han mga sumurunod ni Jesus?
15 Kondi, diri ngatanan nga mga disipulo ni Jesus nagpakita hin sugad hito nga reaksyon. Oo, waray gud masabti hin bug-os han maunungon nga mga disipulo an ginsiring ni Jesus. Kondi, nagpabilin nga marig-on hinduro an ira pagsarig ha iya. Hi Pedro, usa hiton maunungon nga mga disipulo, nagpahayag han mga pagbati han ngatanan nga nagpabilin han hiya nagsiring: “Ginoo, hin-o an amon kakadtoan pa? Ikaw an may mga pulong han kinabuhi nga waray kataposan.” (Juan 6:68) Pagkamaopay nga disposisyon, ngan maopay gud ito nga susbaranan!
16. Paonan-o kita mahimo sarihan, ngan ano nga husto nga panhunahuna an sadang patuboon naton?
16 Yana mahimo masarihan kita pariho hadton siyahan nga mga sumurunod ni Jesus. Ha aton kahimtang, bangin masubo kita nga an mga saad ni Jehova diri natutuman dayon sugad han aton karuyag. Bangin umabat kita nga makuri masabtan an mga pagsaysay mahitungod han Kasuratan ha aton basado-ha-Biblia nga mga publikasyon. Bangin mahiubos kita ha paggawi han usa nga igkasi-Kristiano. Husto ba an pag-undang ha paglakat kaupod han Dios tungod hini o pariho nga mga hinungdan? Syempre diri! An mga disipulo nga binulag kan Jesus nagpakita hin kalibotanon nga panhunahuna. Kinahanglan likyan naton an pagbuhat hin pariho hito.
“Diri Kita Upod ha Ira nga mga Nangingisol”
17. Paonan-o kita mabubuligan nga magpadayon ha paglakat kaupod han Dios?
17 Hi apostol Pablo nagsurat: ‘An ngatanan nga mga Baraan nga Surat ginpakaaghat han Dios.’ (2 Timoteo 3:16) Pinaagi han mga pahina han Biblia, hi Jehova matin-aw nga nagsusumat ha aton: “Amo ini an dalan, maglakat kamo dida hini.” (Isaias 30:21) An pagsugot ha Pulong han Dios nabulig ha aton nga ‘tan-awon hin maopay kon mationan-o iton aton panggawi.’ (Efeso 5:15) An pag-aram ha Biblia ngan pamalandong ha aton hinbabaroan nabulig ha aton nga ‘magpadayon ha paglakat ha kamatuoran.’ (3 Juan 3, NW) Oo, sugad han ginsiring ni Jesus, ‘an espiritu naghahatag hin kinabuhi; an unod waray kapulsanan.’ An masasarigan la nga maggigiya ha aton mga pitad amo an espirituwal nga giya, pinaagi han Pulong ni Jehova, han iya espiritu, ngan han iya organisasyon.
18. (a) Ano an diri-maaramon nga ginbubuhat han iba? (b) Ano nga klase hin pagtoo an ginpapatubo naton?
18 Yana, adton nagigin diri-kontento tungod han kalibotanon nga panhunahuna o tungod kay waray-matuman an ira mga ginlalaoman, agsob nga nagsasalingabot hin bug-os ha igintatanyag hini nga kalibotan. Tungod kay nawara na an ira pag-abat hin pagkaapurado, ha ira pagsabot diri na kinahanglan nga padayon nga “magbantay,” ngan ginpipili nira an pagtinguha hin hakugnon nga mga tumong imbes nga unahon an mga buruhaton han Ginhadian. (Mateo 24:42) An paglakat dida hito nga dalan diri gud maaramon. Tigamni an mga pulong ni apostol Pablo: “Diri kita upod ha ira nga mga nangingisol ngadto ha pagkawara; kondi upod kita hadton mga may pagtoo ngadto ha kaluwasan han kalag.” (Hebreo 10:39) Pariho kan Enok ngan kan Noe, nagkikinabuhi kita ha masamok nga mga panahon, kondi pariho ha ira, pribilehiyo naton nga maglakat kaupod han Dios. Ha pagbuhat hito, marig-on nga ginlalaoman naton nga makikita naton nga natuman an mga katuyoan ni Jehova, nga nabungkag an karaotan, ngan naipahamutang an matadong, bag-o nga kalibotan. Pagkaurusahon nga paglaom!
19. Paonan-o iginhuhulagway ni Mika an paagi han pagkinabuhi han totoo nga mga magsiringba?
19 Gin-unabi han giniyahan nga propeta nga hi Mika an mahitungod han katawohan han kalibotan nga ‘an tagsa-tagsa maglalakat ha ngaran han iya dios.’ Katapos, gin-unabi niya an mahitungod han iya kalugaringon ngan han iba nga matinumanon nga mga magsiringba ngan nagsiring: “Kita maglalakat ha ngaran ni Jehova nga aton Dios ha kagihaponan.” (Mika 4:5) Kon an imo determinasyon pariho han kan Mika, magpabilin ka nga duok kan Jehova mationan-o man kasamok an mga panahon. (Jakobo 4:8) Hinaot magin kinasingkasing nga hingyap han kada usa ha aton nga maglakat kaupod ni Jehova nga aton Dios yana ngan ha waray kataposan, ha kadayonan!
Paonan-o Mo Babatunon?
• Ano an mga kaparihoan han panahon ni Noe ngan han yana?
• Ano nga paagi han pagkinabuhi an ginsunod ni Noe ngan han iya pamilya, ngan paonan-o naton masusubad an ira pagtoo?
• Ano nga sayop nga panhunahuna an iginpahayag han iba han mga sumurunod ni Jesus?
• Determinado an totoo nga mga Kristiano nga buhaton an ano?
[Mga Pakiana]
[Mga Retrato ha pahina 20]
Sugad la ha panahon ni Noe, an mga tawo yana okupado hinduro ha ira adlaw-adlaw nga mga buruhaton
[Retrato ha pahina 21]
Sugad nga mga parasangyaw han Ginhadian, “diri kita upod ha ira nga mga nangingisol”