Mga Pakiana Tikang ha mga Magbarasa

Ano an basihan ha pagsiring nga an mga pulong sugad han “an amo la nga nagtatag-iya hin pagkadiri-mamaratyon” ngan an usa nga “waray usa man han mga tawo an nakakita o makakakita” nagtutudlok kan Jesus imbes nga kan Jehova?

Hi apostol Pablo nagsurat: “Ini nga pagpahayag ipapakita han malipayon ngan amo la nga Makagarahum nga Magmarando ha iya itinanda nga panahon, hiya nga Hadi hadton nagmamando sugad nga mga hadi ngan Ginoo hadton nagmamando sugad nga mga ginoo, an amo la nga nagtatag-iya hin pagkadiri-mamaratyon, nga nag-uukoy ha diri mahiranian nga kapawa, nga waray usa man han mga tawo an nakakita o makakakita.”—1 Timoteo 6:15, 16, NW.

Ha kabug-osan, an mga komentarista ha Biblia nangangatadongan: ‘Paonan-o an mga pulong sugad han “an amo la nga nagtatag-iya hin pagkadiri-mamaratyon,” an “amo la nga Makagarahum nga Magmarando,” ngan an usa nga “waray usa man han mga tawo an nakakita o makakakita” makakagtudlok ha iba nga persona gawas ha Makagarahum-ha-ngatanan?’ Oo, ito nga mga termino mahimo gamiton ha paghulagway kan Jehova. Kondi, an konteksto nagpapasabot nga ha 1 Timoteo 6:15, 16, hi Pablo espisipiko nga naghihisgot kan Jesus.

Ha kataposan nga bahin han bersikulo 14, hi Pablo nag-uunabi “han pagpahayag han aton Ginoo nga hi Jesu-Kristo.” (1 Timoteo 6:14, NW) Salit, han nagsurat hi Pablo ha bersikulo 15 nga “ini nga pagpahayag ipapakita han malipayon ngan amo la nga Makagarahum nga Magmarando ha iya itinanda nga panahon,” an iya ginhihisgotan amo an pagpahayag ni Jesus, diri ni Jehova. Hin-o, kon sugad, an “amo la nga Makagarahum nga Magmarando”? Baga hin makatadunganon an pagsiring nga hi Jesus an Makagarahum nga Magmarando nga ginhisgotan ni Pablo. Kay ano? Tungod kay matin-aw ha konteksto nga igintatanding ni Pablo hi Jesus ha tawhanon nga mga magmarando. Sugad han iginsurat ni Pablo, hi Jesus amo gud an “Hadi hadton [mga tawo nga] nagmamando sugad nga mga hadi ngan Ginoo hadton [mga tawo nga] nagmamando sugad nga mga ginoo.” a Oo, kon itanding ha ira, hi Jesus an “amo la nga Makagarahum nga Magmarando.” Gintagan hi Jesus hin ‘kagamhanan ngan himaya ngan ginhadian, nga an ngatanan nga mga katawohan, mga nasud, ngan mga yinaknan mag-aalagad ha iya.’ (Daniel 7:14) Waray tawo nga magmarando an makakasiring nga sugad hiya hito!

Kumusta man an mga pulong nga “an amo la nga nagtatag-iya hin pagkadiri-mamaratyon?” Usa na liwat ini nga pagtanding butnga kan Jesus ngan han tawhanon nga mga hadi. Waray mga magmarando ha tuna nga makakasiring nga gintagan hira hin pagkadiri-mamaratyon, kondi hi Jesus la. Hi Pablo nagsurat: “Hinbaroan ta nga hi Kristo, ha pagkabanhaw tikang ha mga minatay, diri na gud liwat hiya mamatay: an kamatayon waray na magahum ha iya.” (Roma 6:9) Tungod hito, hi Jesus an siyahan nga iginhulagway ha Biblia nga kinarawat han regalo han pagkadiri-mamaratyon. Ha pagkatinuod, ha panahon nga nagsurat hi Pablo, hi Jesus la an usa nga gintagan hin diri mabubungkag nga kinabuhi.

Sadang liwat hinumdoman nga magigin sayop para kan Pablo nga sumiring nga hi Jehova nga Dios la an nagtatag-iya hin pagkadiri-mamaratyon, tungod kay diri liwat mamaratyon hi Jesus han iginsurat ni Pablo ito nga mga pulong. Kondi makakasiring hi Pablo nga hi Jesus la an diri-mamaratyon kon itanding ha tunan-on nga mga magmarando.

Dugang pa, totoo gud nga katapos han pagkabanhaw ngan pagsaka ni Jesus ha langit, maihuhulagway hiya sugad nga usa nga “waray usa man han mga tawo an nakakita o makakakita.” Totoo, an dinihogan nga mga disipulo ni Jesus makakakita ha iya kon mamatay na hira ngan katapos, banhawon ngadto ha langit sugad nga espiritu nga mga linarang. (Juan 17:24) Kondi waray tawo ha tuna an makakakita kan Jesus ha iya ginhimaya nga kahimtang. Salit, tangkod nga masisiring nga tikang han pagkabanhaw ngan pagsaka ni Jesus ha langit, “waray usa man han mga tawo” an aktuwal nga nakakita ha iya.

Oo, ha siyahan nga pagkita, baga hin an mga paghulagway ha 1 Timoteo 6:15, 16 mahimo iaplikar ha Dios. Kondi an konteksto han mga pulong ni Pablo—ngan an mga suporta han iba nga mga teksto—nagpapakita nga hi Jesus an ginhihisgotan ni Pablo.

[Footnote]