“An Akon Tambulig Natikang kan Jehova”

Damu Hinduro nga mga Tawo an Nakarawat han Pagsingba kan Jehova

AN MGA tagna ha Biblia may kalabotan ha aton panahon nagtagna nga an mga tawo tikang ha ngatanan nga mga nasud madangop ha hitaas nga pagsingba kan Jehova. Pananglitan, pinaagi kan propeta Hagay, hi Jehova nga Dios nagpasamwak: “Akon babay-ugon an ngatanan nga nasud, ngan an birilhon nga mga butang han ngatanan nga nasud mahinganganhi; ngan akon pupun-on ini nga balay hin himaya.” (Hagay 2:7) Hira Isaias ngan Mika nagtagna nga durante han aton panahon—“[an] urhi nga mga adlaw”—an mga nasud ngan an mga katawohan magsisingba kan Jehova ha paagi nga kinakarawat niya.—Isaias 2:2-4; Mika 4:1-4.

Natutuman na gud ba an sugad nga mga tagna yana? Aton usisahon an mga panhitabo. Durante han naglabay nga napulo ka tuig la, sobra 3,110,000 nga bag-ohan an nagdedikar han ira kalugaringon kan Jehova ha sobra 230 nga nasud. Ha pagkamatuod, 6 ha kada 10 nga mga Saksi ni Jehova nga nag-aalagad yana ha bug-os nga kalibotan an nabawtismohan durante han naglabay nga dekada. Han 2004, ha aberids, usa nga bag-o nga dedikado nga surugoon han Dios an nahidugang ha Kristiano nga kongregasyon kada duha ka minuto! a

Sugad han ha siyahan nga siglo, yana nga panahon ‘damu na an natoo, ngan nakabig ngadto ha Ginoo.’ Bisan kon an pagdamu diri ebidensya mismo han bendisyon han Dios, nagpapamatuod ito nga “an kamot han Ginoo” aada ha iya katawohan. (Buhat 11:21) Ano an nag-aaghat ha minilyon ha pagsingba kan Jehova? Ngan paonan-o ka personal nga naaapektohan hini nga panhitabo?

Nadadani an mga Tawo nga May-ada Husto nga Kasingkasing

Ha direkta nga pagkayakan, hi Jesus nagsiring: “Waray usa nga sadang makakanhi ha akon, kon diri pagdad-on han Amay nga nagpakanhi ha akon.” (Juan 6:44) Salit, labaw ha ngatanan, hi Jehova an responsable ha pagdani ha mga tawo nga husto nga nakahilig o “tinunguran han kinabuhi nga waray kataposan.” (Buhat 13:48) An espiritu han Dios makakabulig ha mga tawo nga mahunahuna an ira espirituwal nga panginahanglan. (Mateo 5:3) An naguguol nga konsensya, an desperado nga pamiling hin paglaom, o an duro nga kakurian mahimo makaaghat ha pipira nga pamilngon an Dios ngan tungod hito mahibaro mahitungod han iya katuyoan para ha katawohan.—Markos 7:26-30; Lukas 19:2-10.

Damu nga mga indibiduwal an nadadani ha pagsingba kan Jehova tungod kay an programa han pagtutdo mahitungod han Biblia han Kristiano nga kongregasyon nabulig ha ira nga makakuha hin mga baton ha mga pakiana nga nakakawurok ha ira.

“Kon may-ada Dios, kay ano nga an mga tawo padayon nga nag-aantos hin kawaray hustisya?” Ito an pakiana nga nakagupong kan Davide, usa nga parabaligya hin droga ha Italya. Diri hiya interesado ha relihiyon, salit iya iginbangon inin makuri nga pakiana basi la makilantugi. “Kahuna ko nga diri ako makakakarawat hin makatadunganon ngan makakombinse nga baton,” hiya nasiring. “Kondi an Saksi nga nakiistorya ha akon pasensyoso hinduro ngan iya ginsuportahan hin mga teksto tikang ha Biblia an iya ginsisiring. Ito nga pag-istorya nagkaada hilarom nga epekto ha akon.” Yana, natadong na ni Davide an iya kinabuhi ngan nag-aalagad kan Jehova.

 Natugwayan an iba ha tunan-on nga bahin han organisasyon ni Jehova sugad nga resulta han ira pagpamiling hin kahulogan ngan katuyoan. Tungod han iya pagpamiling hin solusyon para han iya kalugaringon nga mga problema ha emosyon, ginbisita han usa nga sikayatrista ha Zagreb, Croatia an usa nga kilala gud nga sangkay. Nahipausa hiya han ihatag ha iya han doktor an numero han telepono han sanga nga opisina han mga Saksi ni Jehova ha Zagreb, sugad man an ngaran han usa nga Saksi nga iya kilala. “Para ha akon,” siring niya, “mabubuligan ka hini nga mga tawo. Kon pakakadtoon ko ikaw ha singbahan, waray-kinabuhi nga mga rebulto la an imo hikikit-an didto—waray may nagyayakan, ngan an ngatanan aada ha espirituwal nga kasisidman. Para ha akon, diri makakabulig ha imo an singbahan. May ginpakadto na ako nga iba nga mga pasyente ha mga Saksi ni Jehova, ngan para ha akon ito liwat an gimaopayi para ha imo.” Mabinuligon nga ginbisita hiya han mga Saksi ngan waray pag-iha nagtikang ha pagdumara hin pag-aram ha Biblia ha iya. Ha pipira la ka semana, ito nga sikayatrista malipayon nga nagsiring nga an kahibaro mahitungod han katuyoan han Dios naghatag hin kahulogan ha iya kinabuhi.—Eklesiastes 12:13.

Kon naabot an personal nga problema, nasasantop han damu nga mga tawo nga an kamatuoran la ha Biblia an makakahatag hin totoo nga pagliaw. Ha Gresya, usa nga syete-anyos nga bata nga lalaki an nahulog tikang ha atop han iya eskwelahan ngan namatay. Paglabay hin pipira ka bulan, duha nga Saksi nga kababayin-an an nakiistorya ha iya nanay ngan nangalimbasog ha pagliaw ha iya pinaagi ha pag-istorya mahitungod han paglaom ha pagkabanhaw. (Juan 5:28, 29) Tungod hito, nagtangis an babaye. An kabugtoan nagpakiana: “Kon karuyag mo mahibaro hin dugang pa mahitungod han Biblia, san-o kami puydi bumisita ha imo?” “Yana dayon,” nagbaton hiya. Igin-upod hira han babaye ha iya balay, ngan gintikangan an pag-aram ha Biblia. Yana, an iya bug-os nga pamilya nag-aalagad na kan Jehova.

Nakikigbahin Ka ba?

An sugad nga mga eksperyensya naghuhulagway han nahitatabo ha bug-os nga kalibotan. Gintitirok ngan ginbabansay ni Jehova an damu hinduro nga totoo nga mga magsiringba nga iba-iba an nasyonalidad. Ini nga grupo nga tikang ha iba-iba nga nasud may-ada makalilipay nga paglaom nga maluwas ha tiarabot nga kataposan hinin maraot nga sistema han mga butang ngan padayon nga mabuhi ngadto ha matadong nga bag-o nga kalibotan.—2 Pedro 3:13.

Sugad nga resulta han bendisyon ni Jehova, inin waray-kapariho nga buruhaton han pagtirok diri-mapugngan nga nagpapadayon ngadto ha malampuson nga katumanan hito. (Isaias 55:10, 11; Mateo 24:3, 14) Madasigon nga nakikigbahin ka ba ha buruhaton nga pagsangyaw han Ginhadian? Kon oo, makakasarig ka ha bulig han Dios ngan masisiring mo liwat ini nga mga pulong han salmista: “An akon tambulig natikang kan Jehova.”—Salmo 121:2.

[Footnote]

[Blurb ha pahina 9]

“Waray usa nga sadang makakanhi ha akon, kon diri pagdad-on han Amay nga nagpakanhi ha akon.”—JUAN 6:44

[Kahon ha pahina 8]

HIN-O AN AADA HA LUYO HINI NGA PAG-USWAG?

‘Kon hi Jehova diri magtutukod han balay, kawang la an pagbuhat han mga nagtindog hito.’—Salmo 127:1.

“An Dios an nagpatubo. Busa bisan hiya nga nagtatanom, bisan hiya nga nagbibisibis waray bisan ano [ha ira]; kondi an Dios nga naghahatag ha pagtubo.”—1 Korinto 3:6, 7.