Dios o Tawo?

“AKO amo an kalamrag han kalibotan: an nasunod ha akon, diri maglalakat ha kasisidman, kondi may kalamragan han kinabuhi.” (Juan 8:12) Ini nga mga pulong iginyakan ni Jesu-Kristo. Usa nga edukado nga tawo han siyahan nga siglo an nagsurat mahitungod ha iya: “Ha iya aada natago an ngatanan nga mga bahandi han kinaadman ngan paghibaro.” (Kolosas 2:3) Dugang pa, an Biblia nasiring: “Ini amo an kinabuhi nga waray kataposan, nga hira kumilala ha imo, nga amo la an matuod nga Dios, ngan hi Jesu-Kristo nga imo ginpakanhi.” (Juan 17:3) Ginkikinahanglan an husto nga kahibaro mahitungod kan Jesus basi matagbaw an aton espirituwal nga panginahanglan.

An mga tawo ha bug-os nga kalibotan nakabati na mahitungod kan Jesu-Kristo. An iya impluwensya ha kasaysayan han katawohan diri gud maninigaran. Ha pagkamatuod, an kalendaryo nga ginagamit ha kadam-an nga mga bahin han kalibotan iginbasar ha tuig nga ginhuhunahuna nga iya natawohan. “Gintatawag han damu nga mga tawo an mga petsa antes hito nga tuig sugad nga B.C., o before Christ,” nagsaysay an The World Book Encyclopedia. “Ira ginagamit an A.D., o anno Domini (ha tuig han aton Ginoo), para ha mga petsa katapos hito nga tuig.”

Kondi, may-ada nagkakasumpaki nga mga ideya mahitungod ha kon hin-o hi Jesus. Para ha pipira, usa la hiya nga maopay hinduro nga tawo nga nagbilin hin makatirigamnan nga rekord ha kasaysayan. Kondi, ginsisingba hiya han iba sugad nga Dios nga Makagarahum-ha-ngatanan. Iginpapariho han pipira nga mga Hindu hi Jesu-Kristo ha Hindu nga dios nga hi Krishna, nga ginsisiring han damu nga usa nga nagpakatawo nga dios. Tawo la ba hi Jesus, o usa ba hiya nga angay singbahon? Hin-o gud ba hiya? Diin hiya nagtikang? Ano nga klase hin persona hiya? Ngan hain na hiya yana? Sugad han aton hibabaroan ha masunod nga artikulo, an libro nga may-ada damu nga maisisiring mahitungod kan Jesus naghahatag hin totoo nga mga baton ngada hini nga mga pakiana.