An Pagsabot han mga Tigaman Usa nga Seryoso nga Butang!

“Ha tinikangan kahuna ko nga malipong la an ulo han amon anak nga lalaki nga hi Andreas. Kondi nawara an iya gana ha pagkaon ngan nagkaada hitaas nga hiranat. Nagtikagrabe an ul-ol han iya ulo, ngan nabaraka na ako. Han makauli an akon bana, gindara namon hi Andreas ha doktor. Gin-usisa niya an mga sintomas ngan nagsiring nga ipaospital dayon hi Andreas. An problema diri la ngay-an ordinaryo nga ul-ol ha ulo. May-ada meningitis hi Andreas. Gintambal hiya ngan waray pag-iha nagin mahimsog na liwat.”—Gertrud, usa nga iroy ha Alemanya.

AN EKSPERYENSYA ni Gertrud bangin komon la ha damu nga mga kag-anak. Nakakaobserba hira hin mga pangirilal-an nga nagpapakita nga posible nga may-ada sakit an ira anak. Bisan kon diri grabe an ngatanan nga sakit, diri puydi balewarayon han mga kag-anak an mga sintomas han maluya nga kahimsog han ira mga anak. An pag-obserba han mga tigaman ngan pagbuhat hin angayan mahimo magkaada daku nga epekto ha kahimtang. Seryoso ito nga butang.

Sugad liwat hito kaimportante an pagkilala han mga tigaman may kalabotan ha mga butang gawas pa ha kahimsog. An usa nga angayan nga ehemplo amo an tsunami han Disyembre 2004 ha mga lugar nga nakapalibot ha Indian Ocean. Hinbaroan na han mga ahensya han gobyerno ha mga lugar sugad han Australia ngan Hawaii an makusog nga linog ha norte nga Sumatra ngan abanse nga nasantop nira an posible nga peligro han magigin resulta hito. Kondi, waray paagi nga mapahamangnoan ngan makagios uyon hito an mga tawo ha namimeligro nga mga lugar. Sugad nga resulta, sobra 220,000 an namatay.

Mga Tigaman nga Mas Importante Gud

Han nakanhi hi Jesu-Kristo ha tuna, gintagan niya an iya mga mamarati hin usa nga leksyon ha pag-obserba han mga tigaman ngan paggios uyon hito. Naghihisgot hiya mahitungod hin usa nga butang nga importante gud. An Biblia nasiring: “An mga Pariseo ngan an mga Saduseo nangabot ngan han pagsulaya ha iya, nangaro ha iya hin pagkita hin usa nga tigaman tikang ha langit. Kondi hiya binaton, ngan siniring ha ira: Kon kulop na, sumiring kamo: Magmamaopay nga panahon, kay an langit mapula. Ngan ha aga: Mabagyo niyan nga adlaw, kay an langit mapula ngan madalumdom. Mga salingkapaw! Maaram kamo magbanabana han bayhon han langit, kondi diri kamo maaram magbanabana han mga tigaman han mga panahon.”—Mateo 16:1-3.

 Ha pag-unabi han “mga tigaman han mga panahon,” iginpasabot ni Jesus nga sadang unta hibaroan han iya siyahan-siglo nga Judio nga mga mamarati an pagkaapurado han mga panahon diin hira nabubuhi. An Judio nga sistema han mga butang diri na gud maiha nga makakaeksperyensya hin kalamidad nga makakaapekto ha ira ngatanan. Mga pipira ka adlaw antes hi Jesus mamatay, nag-istorya hiya ha iya mga disipulo mahitungod hin usa pa nga tigaman—an tigaman han iya presensya. An iya ginsiring dida hito nga okasyon importante hinduro ha ngatanan yana nga panahon.