Nakikilala Mo ba an Tigaman han Presensya ni Jesus?

WARAY usa nga naruruyag nga magkasakit hin grabe o mabiktima hin kalamidad. Basi makalikay ha sugad nga mga kalamidad, an maaramon nga tawo alerto ha mga tigaman nga nagpapasabot hin peligro ngan nagios uyon hito. Naghulagway hi Jesu-Kristo hin usa nga partikular nga tigaman nga kinahanglan naton makilala. An iya ginhihisgotan magkakaada daku hinduro nga epekto ha bug-os nga kalibotan ngan makakaapekto ha ngatanan nga katawohan. Nag-uupod ito ha imo ngan ha imo pamilya.

Hi Jesus naghisgot mahitungod han Ginhadian han Dios, nga magwawara han karaotan ngan maghihimo han tuna nga paraiso. An iya mga disipulo interesado gud mahitungod hini ngan naruyag ha paghibaro kon san-o maabot ito nga Ginhadian. Hira nagpakiana: “Ano an tigaman han imo pagkanhi, ngan ha kataposan han kalibotan?”—Mateo 24:3.

Maaram hi Jesus nga katapos han pagpataya ngan pagbanhawa ha iya, malabay anay an mga siglo antes hiya mahitrono ha langit sugad nga an Mesianiko nga Hadi nga magmamando ha katawohan. Tungod kay an iya kahitrono diri makikita han mga tawo, naghatag hi Jesus hin tigaman nga makakabulig ha iya mga sumurunod nga makilala an iya presensya o “pagkanhi” sugad man an “kataposan han kalibotan.” Ini nga tigaman ginkukompwesto hin pipira nga mga bahin, nga ha kabug-osan nagkukompwesto hin pangirilal-an nga tigaman, o sinyales—an tigaman han presensya ni Jesus.

An mga parasurat han Mga Ebanghelyo nga hira Mateo, Markos, ngan Lukas mabinantayon nga nagrekord han baton ni Jesus. (Mateo, kapitulo 24 ngan 25; Markos, kapitulo 13; Lukas, kapitulo 21) An iba nga mga parasurat han Biblia nagdugang hin mga detalye ha tigaman. (2 Timoteo 3:1-5; 2 Pedro 3:3, 4; Pahayag 6:1-8; 11:18) Limitado hinduro an espasyo dinhi hini nga artikulo salit diri naton mauusisa an ngatanan nga mga detalye, kondi aton paghihisgotan an lima nga importante nga mga elemento nga nagkukompwesto han tigaman nga ginhisgotan ni Jesus. Hibabaroan mo nga an paghisgot hini nga tigaman angayan ngan importante ha imo mismo.—Kitaa an kahon ha pahina 6.

“Usa nga Pagbag-o nga Nagpatikang hin Bag-o nga Panahon”

“An nasud matindog kontra ha nasud, ngan an ginhadian kontra ha ginhadian.” (Mateo 24:7) An magasin ha Alemanya nga Der Spiegel nag-aasoy nga antes han 1914, an mga tawo “natoo ha maopay hinduro nga tidaraon nga may-ada mas  daku nga kagawasan, pag-uswag, ngan kahuraan.” Katapos nagbag-o an ngatanan. “An girra nga nagtikang han Agosto 1914 ngan natapos han Nobyembre 1918 makatirigamnan hinduro nga hitabo. Nakapahinabo ito hin tigda nga pagbag-o ha kasaysayan han katawohan, ginbubulag an daan ha bag-o,” siring han magasin nga GEO. Sobra 60 milyon nga kasundalohan tikang ha lima nga kontinente an nakigbahin ha mabangis nga araway. Ha aberids, mga 6,000 nga sundalo an namamatay kada adlaw. Tikang hito nga panahon, gintatagad na han mga historyador han tagsa nga henerasyon ngan han ngatanan nga politikal nga grupo “an mga tuig han 1914 tubtob han 1918 sugad nga usa nga pagbag-o nga nagpatikang hin bag-o nga panahon.”

An Girra ha Kalibotan I nagpahinabo hin diri-maibabalik nga mga pagbag-o ha sosiedad han tawo ngan sugad hin nagduso ha katawohan ngadto ha kataposan nga mga adlaw hini nga sistema han mga butang. An nahibibilin pa nga mga tuig hito nga siglo natigamnan hin damu pa nga mga girra, armado nga mga araway, ngan terorismo. Waray maghingaopay an kahimtang ha temprano nga mga tuig hini nga siglo. Gawas han girra, nakikita an iba pa nga mga bahin han tigaman.

Gutom, Peste, Ngan mga Linog

“Mamamay-ada mga kagutom.” (Mateo 24:7) Nagkaada gutom ha Europa durante han siyahan nga girra ha kalibotan, ngan tikang hito nga panahon padayon, ginpipeste na han gutom an katawohan. An historyador nga hi Alan Bullock nagsurat nga ha Russia ngan Ukraine han 1933, “damu hinduro han mga nagugutom an nagpatlaag ha kabaryohan . . . An mga patay gintambak ha mga ligid han kakalsadahan.” Han 1943, nakita han peryodista nga hi T. H. White an gutom ha probinsya han Henan ha Tsina. Hiya nagsurat: “Ha usa nga gutom, haros ngatanan puydi makaon ngan mahimo pinuhon, kaunon ngan himoon nga enerhiya han lawas han tawo. Kondi, makakahunahuna la an usa ha pagkaon hin diri-makaraon kon namimeligro hiya nga mamatay.” Makasurubo, an gutom ha Aprika nagin haros komon na durante han naglabay pa la nga mga dekada. Bisan kon an tuna nagtatagana hin igo nga pagkaon para ha ngatanan, an UN Food and Agriculture Organization nagbanabana nga 840 milyon nga mga tawo ha bug-os nga kalibotan an may-ada gutiay la hinduro nga pagkaon.

“Ha iba-iba nga mga lugar mga peste.” (Lukas 21:11, NW) “Ginbabanabana nga butnga han 20 ka milyon ngan 50 ka milyon nga mga tawo an namatay tungod han trangkaso Espanyola han 1918, mas damu kay han namatay durante han epidemya han black death o han siyahan nga girra ha kalibotan,” nagreport an Süddeutsche Zeitung. Tikang hito nga panahon, damu hinduro an nagkaada hin mga sakit sugad han malaria, pandok, tuberkulosis, polio, ngan kolera. Ngan naaalarma gud an kalibotan samtang an AIDS diri-mapugngan nga nagsasarang. Nakakagupong an aton kahimtang yana tungod kay nagpapadayon la gihapon an mga sakit bisan pa kon urusahon an pag-uswag han medisina. Ini nga pagkasumpaki, nga tubtob yana diri masabtan han katawohan, matin-aw nga nagpapakita nga nagkikinabuhi na kita ha naiiba gud nga mga panahon.

 “Mga linog.” (Mateo 24:7) Durante han naglabay nga 100 ka tuig, ginatos ka yukot an namatay tungod han mga linog. Sumala ha usa nga surok, tikang han 1914, may aberids nga 18 nga mga linog kada tuig an may-ada igo nga kakusog ha pagruba hin mga tinukod ngan pagbuka han tuna. An mas makamaratay nga mga linog nga makusog hinduro nga makakarumpag hin mga tinukod nahitatabo hin haros makausa ha usa ka tuig. Bisan pa han mga pag-uswag ha teknolohiya, damu la gihapon an namamatay tungod kay damu nga syudad nga madagmit nga nagtitikadaku an populasyon an nahimumutang ha mga dapit diin agsob luminog.

Makalilipay nga Sumat!

Nakakaguol an kadam-an nga mga bahin han tigaman han kataposan nga mga adlaw. Kondi naghisgot liwat hi Jesus hin makalilipay nga sumat.

“Ini nga maopay nga sumat han ginhadian igwawali ha bug-os nga kalibotan ha pagpamatuod ha ngatanan nga mga nasud.” (Mateo 24:14) An buruhaton nga gintikangan mismo ni Jesus—pagsangyaw han maopay nga sumat han Ginhadian—maabot ha pungkay durante han kataposan nga mga adlaw. Nahitatabo gud ini. An mga Saksi ni Jehova nagsasangyaw han mensahe han Biblia ngan nagtututdo ha disidido nga mga tawo ha pag-aplikar han ira hinbabaroan ha adlaw-adlaw nga kinabuhi. Yana, sobra unom ka milyon nga mga Saksi an nagsasangyaw ha 235 nga katunaan ngan ha sobra 400 nga yinaknan.

Tigamni nga hi Jesus waray magsiring nga maundang an ngatanan nga mga buruhaton tungod han nakakaguol nga mga kahimtang ha kalibotan. Waray liwat hiya magsiring nga an bug-os nga kalibotan maaapektohan han usa la nga bahin han tigaman. Kondi nagtagna gud hiya hin damu hinduro nga mga hitabo nga ha kabug-osan magkukompuwesto hin usa nga tigaman nga mahibabaroan ha ngatanan nga dapit ha tuna.

Imbes nga magsentro ha bulag nga mga panhitabo o partikular nga mga insidente, may nakikita ka ba nga sistema han panhitabo, usa nga tigaman nga ginkukompwesto hin damu nga bahin nga nakakaapekto ha bug-os nga kalibotan? An nahitatabo ha tuna nakakaapekto ha imo ngan ha imo pamilya. Kondi kay ano, bangin kita magpakiana, nga pipira la nga mga tawo an nagtatagad hito?

 Mas Importante an Personal nga mga Interes

“No Swimming,” “High Voltage,” “Reduce Speed.” Pipira la ini han mga tigaman ngan mga pahamangno nga aton nakikita kondi agsob nga ginbabalewaray. Kay ano? Tungod kay masayon kita maapektohan han aton ginhuhunahuna nga makakaopay ha aton. Pananglitan, bangin umabat kita han panginahanglan nga magmaneho hin malaksi kay han igintutugot han balaud, o bangin maruyag gud kita ha paglangoy ha lugar diin igindidiri ito. Kondi diri maaramon an pagbalewaray han mga tigaman.

Pananglitan, usahay an mga pagtimpag hin yelo ha kabukiran nga Alps han Austria, Fransia, Italya, ngan Switzerland nagigin hinungdan han kamatay han mga turista nga nagbabalewaray ha mga pahamangno nga mag-ski o mag-snowboard la ha talwas nga mga aragian. Sumala ha Süddeutsche Zeitung, damu nga mga turista nga nagbabalewaray han sugad nga mga pahamangno an nagkikinabuhi uyon han surundon han paggawi nga, Kon waray peligro, waray karisyo. Makabibido, an pagbalewaray han mga pahamangno mahimo magkaada makasurubo nga mga resulta.

Ano an mga hinungdan han mga tawo ha pagbalewaray han tigaman nga iginhulagway ni Jesus? Bangin nabutahan hira tungod han hingyap nga magriko, nawarayan pagbati tungod han kawaray interes, nawarayan mahihimo tungod han pagruhaduha, nabug-atan gud tungod han rutina, o nadaog han kahadlok nga mawad-an hin kadungganan. Posible ba nga nagigin hinungdan an bisan hain hini nga balewarayon mo an tigaman han presensya ni Jesus? Diri ba mas maaramon nga kilalahon an tigaman ngan gumios uyon hito?

Kinabuhi ha Paraiso nga Tuna

Nagtitikadamu nga mga tawo an nagtatagad han tigaman han presensya ni Jesus. Hi Kristian, usa nga batan-on nga inasaw-an nga lalaki ha Alemanya, nagsurat: “Madulom ini nga mga panahon. Waray ruhaduha nga nagkikinabuhi na kita ha ‘kataposan nga mga adlaw.’ ” Hiya ngan an iya asawa nagasto hin daku nga panahon ha pakiistorya ha iba mahitungod han Mesianiko nga Ginhadian. Hi Frank naukoy liwat hito nga nasud. Gindadasig nira nga mag-asawa an iba pinaagi han maopay nga sumat tikang ha Biblia. Hi Frank nasiring: “Tungod han kahimtang ha kalibotan, damu nga mga tawo yana an nababaraka mahitungod han tidaraon. Nangangalimbasog kami ha pagdasig ha ira pinaagi han mga tagna han Biblia mahitungod han paraiso nga tuna.” Hito nga paagi, hira Kristian ngan Frank nabulig ha pagtuman han usa nga bahin han tigaman ni Jesus—an pagsangyaw han maopay nga sumat han Ginhadian.—Mateo 24:14.

Ha pag-abot ha pungkay han kataposan nga mga adlaw, paparaon ni Jesus inin daan nga sistema ngan bubungkagon an mga tawo nga nasuporta hito. Hito nga panahon, pagdudumarahon han Mesianiko nga Ginhadian an mga buruhaton ha tuna, nga hihimoon nga Paraiso uyon ha igintagna. Matatalwas na an katawohan tikang ha sakit ngan kamatayon, ngan babanhawon an mga patay ha kinabuhi dinhi ha tuna. Ini an makalilipay nga mga paglaom nga naghuhulat hadton nakilala han tigaman han mga panahon. Diri ba maaramon an paghibaro hin dugang pa mahitungod han tigaman ngan kon ano an kinahanglan buhaton han usa basi maluwas ha kataposan hini nga sistema? Sigurado nga sadang magin apurado gud an ngatanan mahitungod hini nga butang.—Juan 17:3.

[Blurb ha pahina 4]

Nagtagna hi Jesus hin damu hinduro nga mga hitabo nga ha kabug-osan magkukompuwesto hin usa nga tigaman nga mahibabaroan ha ngatanan nga dapit ha tuna

[Blurb ha pahina 6]

May nakikita ka ba nga sistema han panhitabo, usa nga tigaman nga ginkukompwesto hin damu nga bahin nga nakakaapekto ha bug-os nga kalibotan?

[Kahon/Mga Retrato ha pahina 6]

PANGIRILAL-AN NGA MGA TIGAMAN HAN KATAPOSAN NGA MGA ADLAW

Waray kapariho nga girra.—Mateo 24:7; Pahayag 6:4

Gutom.—Mateo 24:7; Pahayag 6:5, 6, 8

Mga peste.—Lukas 21:11; Pahayag 6:8, NW

Pag-uswag han karaotan.—Mateo 24:12

Mga linog.—Mateo 24:7

Magpakalilisang nga mga panahon nga makuri pakibagayan.—2 Timoteo 3:1

Sobra nga gugma ha kwarta.—2 Timoteo 3:2

Pagkadiri-masinugtanon ha mga kag-anak.—2 Timoteo 3:2

Kawaray gugma nga kinaiya.—2 Timoteo 3:3

Paghigugma ha kalipayan kay ha Dios.—2 Timoteo 3:4

Kawaray pagpugong ha kalugaringon.—2 Timoteo 3:3

Waray gugma ha kaopayan.—2 Timoteo 3:3

Diri pagtagad han tiarabot nga peligro.—Mateo 24:39

Ginbabalewaray han mga parayubit an ebidensya han kataposan nga mga adlaw.—2 Pedro 3:3, 4

Pagsangyaw han Ginhadian han Dios ha bug-os nga kalibotan.—Mateo 24:14

[Ginkuhaan han mga Retrato ha pahina 5]

WWI nga mga sundalo: Tikang ha libro nga The World War—A Pictorial History, 1919; pobre nga pamilya: AP Photo/Aijaz Rahi; biktima han polio: © WHO/P. Virot