‘Padayon nga Magbantay’—Inabot Na an Oras han Paghukom!
‘Padayon nga Magbantay’—Inabot Na an Oras han Paghukom!
An impormasyon hini nga aradman nga artikulo iginbasar ha brosyur nga Padayon nga Magbantay! nga iginpagowa ha distrito nga mga kombensyon ha bug-os nga kalibotan durante han 2004/05.
“Magbantay kamo, kay diri kamo maaram kon ano nga adlaw an pagkanhi han iyo Ginoo.”—MATEO 24:42.
1, 2. Angayan nga iginpariho ni Jesus ha ano an iya pagkanhi?
ANO an imo bubuhaton kon maaram ka nga an usa nga kawatan hilom nga nagpipinamiling hin higayon ha pangawat, ha pagsulod ha mga balay han imo mga amyaw? Basi mapanalipdan an imo mga hinigugma ngan an imo birilhon nga mga butang, padayon nga magigin alerto ka, mabinantayon. Syempre, kinahanglan alerto ka pirme, tungod kay an kawatan diri nagpapadara hin surat nga nagpapahibaro kon san-o hiya maabot. Ha kabaliktaran, naabot hiya nga hilom ngan diri-ginlalaoman.
2 Ha pipira nga okasyon, ginamit ni Jesus an mga paagi han kawatan sugad nga ilustrasyon. (Lukas 10:30; Juan 10:10) Mahitungod han mga panhitabo nga mahitatabo durante han panahon han kataposan ngan antes han iya pagkanhi ha pagpadapat han paghukom, hi Jesus naghatag hini nga pahamangno: “Busa [padayon nga] magbantay kamo, kay diri kamo maaram kon ano nga adlaw an pagkanhi han iyo Ginoo. Kondi kilalaha ini, nga kon an agaron han balay mahibaro kon ha ano nga agma han kagab-ihon an pag-abot han kawatan, hiya mag-aagma kunta, ngan diri pinababay-an an iya balay nga mabungkag.” (Mateo 24:42, 43) Salit iginpariho ni Jesus an iya pagkanhi ha pag-abot han usa nga kawatan—diri-ginlalaoman.
3, 4. (a) Ano an nahiuupod ha pagsunod ha pahamangno ni Jesus mahitungod han iya pagkanhi? (b) Ano nga mga pakiana an nabangon?
3 Angayan an ilustrasyon, tungod kay diri hibabaroan an eksakto nga petsa han pagkanhi ni Jesus. Una pa dida hito mismo nga tagna, hi Jesus nagsiring: “Mahitungod hito nga adlaw ngan oras waray usa nga maaram, bisan an mga anghel ha mga langit bisan an Anak, kondi an Amay la.” (Mateo 24:36, NW) Salit, ginsagda ni Jesus an iya mga mamarati: “Mag-andam man kamo.” (Mateo 24:44) Adton nasunod ha pahamangno ni Jesus magigin andam, nanggagawi hin husto, san-o man hiya umabot ha pagpadapat han paghukom ni Jehova.
4 Nabangon an pipira nga importante nga mga pakiana: An pahamangno ba ni Jesus para la ha mga tawo ha kalibotan, o an totoo nga mga Kristiano liwat kinahanglan ‘padayon nga magbantay’? Kay ano nga kinahanglan ‘padayon nga magbantay,’ ngan ano an nahiuupod hini?
Pahamangno Para kan Kanay?
5. Paonan-o kita nahibabaro nga an pahamangno nga ‘padayon nga magbantay’ naaplikar ha totoo nga mga Kristiano?
5 Totoo gud nga an pagkanhi han Ginoo magigin diri-ginlalaoman, sugad hin kawatan ha mga tawo ha kalibotan, nga nagbabalewaray han pahamangno mahitungod han tiarabot nga kalamidad. (2 Pedro 3:3-7) Kondi, kumusta man an totoo nga mga Kristiano? Hi apostol Pablo nagsurat ha mga igkasi-tumuroo: “Kamo ngahaw mag-aram na gud nga an adlaw han Ginoo maabot sugad hin usa nga kawatan ha kagab-ihon.” (1 Tesalonika 5:2) Waray ruhaduha ha aton mga hunahuna nga ‘an adlaw ni Jehova maabot.’ Kondi nag-iiban ba ito han panginahanglan nga padayon kita nga magbantay? Tigamni nga ha iya mga disipulo hi Jesus nagsiring: “An Anak han tawo makanhi ha oras nga diri niyo ginhuhunahuna.” (Mateo 24:44) Antes pa hito, han ginsasagda ni Jesus an iya mga disipulo nga padayon nga pamilngon an Ginhadian, hiya nagpahamangno: “Mag-andam man kamo, kay an Anak han tawo makanhi ha oras nga diri niyo ginhuhunahuna.” (Lukas 12:31, 40) Diri ba klaro nga nahunahuna ni Jesus an iya mga sumurunod han hiya nagpahamangno: ‘Padayon nga magbantay’?
6. Kay ano nga kita kinahanglan ‘padayon nga magbantay’?
6 Kay ano nga kinahanglan ‘padayon nga magbantay’ kita ngan ‘padayon nga mag-andam’? Hi Jesus nagsaysay: “May duha ka tawo ha uma: an usa kukuhaon, ngan an usa ibibilin. May duha nga babaye, nga maggigiling ha gilingan: an usa kukuhaon ngan an usa ibibilin.” (Mateo 24:40, 41) Adton mapapamatud-an nga andam, “kukuhaon,” o luluwason, kon bungkagon na an diri-diosnon nga kalibotan. An iba “ibibilin” ha kabungkagan tungod kay hakugnon nga iginpapadayon nira an ira kalugaringon nga paagi han pagkinabuhi. Posible nga mahiupod hini an mga indibiduwal nga nalamragan na hadto kondi waray magpadayon ha pagbantay.
7. An aton pagin diri maaram kon san-o maabot an kataposan, naghahatag ha aton hin higayon nga buhaton an ano?
7 An aton pagin diri maaram han eksakto nga adlaw han kataposan hini nga sistema han mga butang naghahatag ha aton hin higayon nga ipakita nga nag-aalagad kita ha Dios tungod han aton putli nga motibo. Kay ano nga masisiring naton ito? Bangin tungod kay an kataposan baga hin maiha pa umabot. Makasurubo, an iba nga mga Kristiano nga sugad hini an inaabat nagtugot nga magtugnaw an ira kadasig ha pag-alagad kan Jehova. Kondi, pinaagi han aton dedikasyon, kinaburut-on nga iginpresenta naton an aton kalugaringon kan Jehova nga mag-aalagad kita ha iya. Nasasabtan hadton nakilala kan Jehova nga an pagpakita hin kadasig ha ultimo na nga minuto diri maruruyagan niya. Nakikita niya kon ano an aada ha kasingkasing.—1 Samuel 16:7.
8. Paonan-o an gugma kan Jehova nagpapagios ha aton nga padayon nga magbantay?
8 Tungod kay totoo nga nahigugma kita kan Jehova, nagkakaada kita gidadakui nga kalipay ha pagbuhat han iya kaburut-on. (Salmo 40:8; Mateo 26:39) Ngan karuyag naton mag-alagad kan Jehova ha kadayonan. Diri naiibanan an pagkapresyoso hito nga paglaom tungod la kay kinahanglan maghulat kita hin maiha-iha kay ha aton ginlalaoman. Labaw ha ngatanan, padayon kita nga nagbabantay tungod kay madasigon nga ginpapamulat naton kon ano an magigin kahulogan han adlaw ni Jehova ha katumanan han iya katuyoan. An aton sinsero nga hingyap nga lipayon an Dios nagpapagios ha aton nga sundon an sagdon han iya Pulong ngan magin siyahan ha aton kinabuhi an iya Ginhadian. (Mateo 6:33; 1 Juan 5:3) Aton paghisgotan kon paonan-o an padayon nga pagbantay sadang makaimpluwensya ha mga desisyon nga ginhihimo naton ngan ha paagi han aton pagkinabuhi kada adlaw.
Ano an Dadangatan han Imo Kinabuhi?
9. Kay ano nga apurado gud an panginahanglan nga masabtan han mga tawo ha kalibotan an kahulogan han aton mga panahon?
9 Kinikilala han damu nga mga tawo yana nga nahitatabo kada adlaw an seryoso nga mga problema ngan makalilisang nga mga panhitabo, ngan bangin diri hira malipay ha dadangatan han ira kinabuhi. Kondi, maaram ba hira han totoo nga kahulogan han mga kahimtang ha kalibotan? Nasasantop ba nira nga nagkikinabuhi na kita ha “kataposan han kalibotan”? (Mateo 24:3) Kinikilala ba nira nga an kalyap nga hakugnon, madarahog, diri-diosnon pa ngani nga mga disposisyon nagtitigaman hini nga mga panahon sugad nga an “kataposan nga mga adlaw”? (2 Timoteo 3:1-5) Apurado gud an panginahanglan nga masabtan nira an kahulogan hini ngatanan ngan tagdon an dadangatan han ira pagkinabuhi.
10. Ano an kinahanglan buhaton naton basi masiguro nga kita padayon nga nagbabantay?
10 Kumusta man kita? Kada adlaw nagdidesisyon kita may kalabotan ha aton trabaho, kahimsog, pamilya, ngan ha aton pagsingba. Maaram kita han ginsisiring han Biblia, ngan nangangalimbasog kita nga iaplikar ito. Salit, sadang pakianhan naton an aton kalugaringon: ‘Tinutugotan ko ba an mga kabaraka ha kinabuhi nga makaulang han akon espirituwal nga mga tumong? Tinutugotan ko ba an mga pilosopiya han kalibotan, mga ideya hito, nga makaimpluwensya ha akon mga pagpili?’ (Lukas 21:34-36; Kolosas 2:8) Kinahanglan padayon nga ipakita naton nga bug-os-kasingkasing nga nasarig kita kan Jehova ngan diri nasarig ha aton kalugaringon nga pagsabot. (Proberbios 3:5) Hito nga paagi, magpapadayon kita ha ‘pagdakop han totoo nga kinabuhi’—an kinabuhi nga waray kataposan ha bag-o nga kalibotan han Dios.—1 Timoteo 6:12, 19.
11-13. Ano an mahibabaroan naton tikang ha mga ehemplo nga nahitabo (a) ha panahon ni Noe? (b) ha panahon ni Lot?
11 An Biblia may-ada damu nga nagpapahamangno nga mga ehemplo nga makakabulig ha aton nga padayon nga magbantay. Tagda an nahitabo ha panahon ni Noe. Maiha na antes pa gumios an Dios, ginsiguro Niya nga maihatag an pahamangno. Kondi gawas kan Noe ngan ha iya pamilya, an mga tawo waray pamati. (2 Pedro 2:5) Mahitungod hini, hi Jesus nagsiring: “Sugad han mga adlaw ni Noe amo man an pagkanhi han Anak han tawo. Kay sugad nga, ha mga adlaw han waray pa an paglunop, nga hira nagpipinangaon ngan nagpipinanginom, nga nangangasawa ngan napapangasal, tubtob ha pagsulod ni Noe ha arka; ngan hira waray hibaro [“mamati,” NW] tubtob ha pag-abot han paglunop ngan igin-anod hira ngatanan, maaamo man an pagkanhi han Anak han tawo.” (Mateo 24:37-39) Ano an mahibabaroan naton tikang hito? Kon tinutugotan han bisan hin-o ha aton an kalibotanon nga mga kabaraka—bisan an normal nga mga buruhaton ha kinabuhi—nga makaulang han espirituwal nga mga buruhaton nga iginsasagda ha aton han Dios nga unahon pirme ha aton kinabuhi, kinahanglan hunahunaon naton hin seryoso an aton paagi han pagkinabuhi.—Roma 14:17.
12 Hunahunaa liwat an mahitungod han mga panahon ni Lot. An syudad han Sodoma, nga inukyan ni Lot ngan han iya pamilya, mainuswagon ha materyal, kondi maraot an moral. Sinugo ni Jehova an iya mga anghel basi bungkagon ito nga lugar. Ginsagda han mga anghel hi Lot ngan an iya pamilya nga pumalagiw tikang ha Sodoma ngan diri gud lumingi. Tungod kay nadasig han mga anghel, binaya hira ha syudad. Kondi, an asawa ni Lot, matin-aw nga waray makapugong ha padayon nga paghunahuna han iya balay ha Sodoma. Matinalapason nga liningi hiya, ngan tungod hini nawad-an hiya han iya kinabuhi. (Genesis 19:15-26) Mahitungod han aton tidaraon, hi Jesus nagpahamangno: ‘Hinumdumi an asawa ni Lot.’ Nagios ba kita uyon hito nga pahamangno?—Lukas 17:32.
13 Naluwas adton sinugot ha mga pahamangno han Dios. Ito an nahitabo kan Noe ngan ha iya pamilya ngan kan Lot ngan ha iya mga anak nga babaye. (2 Pedro 2:9) Samtang pinamamalandong naton an pahamangno hini nga mga ehemplo, nadadasig liwat kita han kaupod hito nga mensahe han kaluwasan para ha mga mahigugmaon han katadongan. Pinaagi hito nasarig gud an aton kasingkasing ha sigurado nga paglaom ha katumanan han saad han Dios nga ‘bag-o nga mga langit ngan bag-o nga tuna’ diin “mag-uukoy an katadongan.”—2 Pedro 3:13.
Inabot Na ‘an Oras han Paghukom’!
14, 15. (a) Ano an nahiuupod ha “oras” han paghukom? (b) Ano an nahiuupod ha ‘kahadlok ha Dios ngan paghatag ha iya hin himaya’?
14 Samtang padayon kita nga nagbabantay, ano an malalaoman naton? Iginsasaysay han libro nga Pahayag an mainuswagon nga mga pitad ha katumanan han katuyoan han Dios. Importante an pagbuhat han ginsisiring hito kon karuyag naton pamatud-an nga andam kita. Matin-aw nga iginsasaysay han tagna an mga panhitabo nga mahitatabo ha “adlaw han Ginoo,” nga nagtikang han hi Kristo nahitrono ha langit han 1914. (Pahayag 1:10) An Pahayag nagdadani han aton atensyon ngadto ha usa nga anghel nga gintaporan han “waray kataposan nga maopay nga sumat nga igwawali.” Hiya nagpapasamwak ha daku nga tingog: “Kahadluki niyo an Dios, ngan tagi hiya niyo hin himaya; kay an oras han iya paghukom iini na.” (Pahayag 14:6, 7) Ito nga “oras” han paghukom usa ka halipot nga peryodo; nag-uupod ito han pagpasamwak ngan han pagpadapat han mga paghukom nga iginsasaysay dida hito nga tagna. Nagkikinabuhi na kita yana hito nga peryodo.
15 Yana, antes matapos an oras han paghukom, ginsasagda kita: “Kahadluki niyo an Dios, ngan tagi hiya niyo hin himaya.” Ano an nahiuupod hini? An husto nga kahadlok ha Dios sadang magpagios ha aton nga magpahirayo ha karaotan. (Proberbios 8:13) Kon ginpapasidunggan naton an Dios, mamamati kita ha iya nga may-ada hilarom nga pagtahod. Diri naton tutugotan nga magin okupado kita hinduro ha iba nga mga buruhaton nga tungod hito mapapasibay-an na naton an regular nga pagbasa han iya Pulong, an Biblia. Diri naton igbabalewaray an iya sagdon nga tumambong ha Kristiano nga mga katirok. (Hebreo 10:24, 25) Pabibilhan naton an pribilehiyo ha pagpasamwak han maopay nga sumat han Mesianiko nga Ginhadian han Dios ngan madasigon nga bubuhaton ito. Bug-os-kasingkasing nga masarig kita kan Jehova ha ngatanan nga panahon. (Salmo 62:8) Tungod kay kinikilala naton nga hi Jehova an Soberano ha Uniberso, aton ginpapasidunggan hiya pinaagi han kinaburut-on nga pagpasakop ha iya sugad nga Soberano han aton kinabuhi. Tinuod gud ba nga nahahadlok ka ha Dios ngan naghahatag ha iya hin himaya ha sugad nga mga paagi?
16. Kay ano nga masisiring naton nga natuman na an paghukom kontra ha Babilonya nga Daku nga iginsaysay ha Pahayag 14:8?
16 An Pahayag kapitulo 14 nagpapadayon ha pagsaysay han dugang nga mga panhitabo nga mahitatabo ha oras han paghukom. An Babilonya nga Daku, an imperyo han palso nga relihiyon ha kalibotan, amo an siyahan nga gin-unabi: ‘Sinunod an ikaduha nga anghel, nga nasiring: Napukan na, napukan na an Babilonya nga Daku’! (Pahayag 14:8) Oo, ha panhunahuna han Dios, napukan na an Babilonya nga Daku. Han 1919, an dinihogan nga mga surugoon ni Jehova gintalwas tikang ha pagkauripon ha Babiloniko nga mga doktrina ngan mga buhat, nga nag-uuripon ha mga tawo ngan mga nasud ha sulod hin mga milenyo na. (Pahayag 17:1, 15) Tikang hadto padayon, nagin okupado na hira ha pagpasarang han totoo nga pagsingba. Tikang hito nga panahon, ginbubuhat na an bug-os-kalibotan nga pagsangyaw han maopay nga sumat han Ginhadian han Dios.—Mateo 24:14.
17. Ano an kinahanglan buhaton naton basi makagawas tikang ha Babilonya nga Daku?
17 May-ada dugang pa nga mga bahin han paghukom han Dios kontra ha Babilonya nga Daku. Hirani na umabot an iya ultimo nga kabungkagan. (Pahayag 18:21) May maopay nga rason nga an Biblia nagsasagda ha mga tawo ha bisan diin: “Gawas kamo . . . tikang ha iya [Babilonya nga Daku], basi nga diri kamo makaangbit ha iya mga sala.” (Pahayag 18:4, 5) Paonan-o kita magawas tikang ha Babilonya nga Daku? Nag-uupod ini hin labaw pa kay ha pag-undang la ha bisan ano nga pakig-upod ha palso nga relihiyon. An Babiloniko nga impluwensya nakikita ha damu nga popular nga mga selebrasyon ngan mga kustomre, ha pagkarawat han kalibotan ha seksuwal nga imoralidad, ha mas nagigin popular nga kaliawan nga nag-uupod hin espiritismo, ngan damu pa. Basi padayon nga nagbabantay, importante nga ha aton mga buhat ngan ha mga hingyap han aton kasingkasing, ipinapakita naton nga kita totoo nga bulag tikang ha Babilonya nga Daku ha ngatanan nga paagi.
18. Mahitungod han iginsasaysay ha Pahayag 14:9, 10, an alerto nga mga Kristiano maikmat nga naglilikay han ano?
18 Ha Pahayag 14:9, 10, iginsasaysay an dugang pa nga bahin han ‘oras han paghukom.’ Usa pa nga anghel an nasiring: “Kon hin-o an magsingba ha mananap ngan ha iya ladawan, ngan nakakarawat hin tigaman ha iya agtang, o ha iya kamot, mainom man hiya han alaksiw han kasina han Dios.” Kay ano? ‘An mananap ngan an ladawan hito’ mga simbolo han tawhanon nga mga magmarando, nga diri nakilala han pagkasoberano ni Jehova. An alerto nga mga Kristiano nag-iikmat nga diri hira maimpluwensyahan o mamarkahan, ha disposisyon man o ha buhat, sugad nga nagsiserbi hadton nagdudumiri ha pagkilala ha supremo nga pagkasoberano han totoo nga Dios, hi Jehova. Maaram an mga Kristiano nga natukod na an Ginhadian han Dios ha langit, nga tatapuson hito an ngatanan nga tawhanon nga mga pagmando, ngan matindog ito ha kadayonan.—Daniel 2:44.
Ayaw Tuguti nga Mawara an Imo Pag-abat hin Pagkaapurado!
19, 20. (a) Samtang nagtitikahirani na kita ha ultimo nga bahin han kataposan nga mga adlaw, makakasiguro kita nga bubuhaton ni Satanas an ano? (b) Sadang magin determinado kita nga buhaton an ano?
19 Samtang nagtitikahirani na kita ha ultimo nga bahin han kataposan nga mga adlaw, magtitikadugang gud la an mga pag-ipit ngan mga pagsulay. Samtang nagkikinabuhi kita dinhi hinin daan nga sistema ngan nag-aantos han aton mismo pagkadiri-hingpit, apektado kita han mga kahimtang sugad han maluya nga panlawas, kalagas, kamatay han mga hinigugma, kabidoan, kapakyasan ha atubangan han kawaray interes ha aton mga pangalimbasog ha pagsangyaw han Pulong han Dios, ngan damu pa. Ayaw gud hingalimti nga karuyag salingabuton ni Satanas an mga pag-ipit nga inaatubang naton nga magpaluya ha aton—basi umundang ha pagsangyaw han maopay nga sumat o diri na magkinabuhi uyon ha mga suruklan han Dios. (Efeso 6:11-13) Diri ini an panahon nga mawara an aton pag-abat hin pagkaapurado may kalabotan han mga panahon nga aton kinabubuhian!
20 Maaram hi Jesus nga makakaeksperyensya kita hin duro nga pag-ipit nga umundang na, salit hiya nagsagdon ha aton: ‘Padayon nga magbantay kamo, kay diri kamo maaram kon ano nga adlaw an pagkanhi han iyo Ginoo.’ (Mateo 24:42) Salit, magpadayon kita nga alerto pirme kon hain na kita ha agos han panahon. Magbantay kita kontra han mga lit-ag ni Satanas nga makakapaluya o makakapaundang ha aton ha kamatuoran. Magin determinado kita nga isangyaw an maopay nga sumat han Ginhadian han Dios nga may labaw pa gud nga kadasig ngan determinasyon. Oo, tipigan naton an aton pag-abat hin pagkaapurado samtang ginsusunod naton an pahamangno ni Jesus: ‘Padayon nga magbantay.’ Ha pagbuhat hito, mapapasidunggan naton hi Jehova ngan magigin kaupod kita hadton may-ada paglaom han iya waray kataposan nga mga bendisyon.
Paonan-o Mo Babatunon?
• Paonan-o kita nahibabaro nga an pahamangno ni Jesus nga ‘padayon nga magbantay’ naaplikar ha totoo nga mga Kristiano?
• Ano nga nagpapahamangno nga mga ehemplo ha Biblia an makakabulig ha aton nga ‘padayon nga magbantay’?
• Ano an oras han paghukom, ngan ginsasagda kita nga buhaton an ano antes ito matapos?
[Mga Pakiana]
[Retrato ha pahina 23]
Iginpariho ni Jesus an iya pagkanhi ha pag-abot han usa nga kawatan
[Retrato ha pahina 24]
Hirani na an kabungkagan han Babilonya nga Daku
[Mga Retrato ha pahina 25]
Magin determinado kita nga magsangyaw nga may dugang pa nga kadasig ngan determinasyon