Ano nga Klase hin Edukasyon an Makakahimo han Imo Kinabuhi nga Malampuson?

NAAPEKTOHAN ka na gud ba hin mga problema nga inabat mo nga sugad hin nalulunod ka ha liro? Handurawa la kon mationan-o kadaku nga pag-antos an mahimo magin resulta kon magsayop ka ha pag-atubang ha usa o sobra pa hito nga mga problema! Waray usa nga natawo an may abilidad ha pagsulbad han ngatanan nga mga problema ha malampuson nga paagi, nga nakakahimo hin husto nga mga desisyon ha ngatanan nga panahon. Ini an hinungdan kon kay ano nga importante an edukasyon. Diin ka makakakuha hin edukasyon nga makakaandam ha imo ha paglampos han mga problema ha kinabuhi?

Damu nga mga tawo, batan-on ngan kalagasan, an nasiring nga importante hinduro an edukasyon ha eskwelahan. Nasiring pa ngani an iba nga mga eksperto nga “natoo gud [hira] nga diri ka gud magkakaada [desente nga] trabaho kon diri ka makagradwar ha kolehiyo.” Kondi, may-ada mga kinahanglanon an tawo nga diri maihahatag han materyal la nga mga kalamposan. Pananglitan, mabubuligan ka ba han hitaas nga edukasyon nga magin maopay nga kag-anak, padis, o sangkay? Ha totoo la, an mga tawo nga gindadayaw tungod han ira kalamposan ha eskwelahan mahimo makapatubo hin diri maopay nga mga batasan, mapakyas ha ira kinabuhi ha pamilya, o ha kaurhian mag-unay pa ngani.

An iba nasarig ha relihiyon para hin giya, sugad nga surok han edukasyon, kondi nanluluya tungod ha diri pakakarawat hin praktikal nga bulig ha pag-atubang han mga kakurian ha kinabuhi. Ha pag-ilustrar hini, hi Emilia a nga taga-Mexico nasiring: “Kinse ka tuig na an naglabay han inabat ko nga diri na gud kami mahimo maglungon pa nga mag-asawa. Pirme kami naglalantugi. Diri ko hiya mapaundang ha pag-ininom. Agsob nga kinahanglan ko bayaan an amon gudtiay nga mga anak nga waray upod samtang ginbibiniling ko an akon bana. Nakapoy na an akon kasingkasing. Makadamu ka beses nga napakadto ako ha singbahan ha pagpamiling hin usa nga butang nga bangin makabulig ha akon nga makabiling hin solusyon. Bisan kon ginagamit an Biblia ha panapanahon, waray gud ako hinbatian nga sagdon nga espisipiko nga may kalabotan ha akon kahimtang; waray man liwat nakiistorya ha akon basi sumatan ako kon ano an akon bubuhaton. Waray ako matagbaw ha pagliningkod ha singbahan hin madaliay ngan pag-inutro hin mga pag-ampo.” An iba bangin manluya kon makita nira nga an ira espirituwal nga mga lider diri nagkikinabuhi ha maopay nga paagi. Sugad nga resulta, damu an nawawarayan hin pagsarig ha relihiyon sugad nga surok han pagbansay o edukasyon basi maglampos ha kinabuhi.

Salit, bangin ka magpakiana ha imo kalugaringon, ‘Ano nga klase hin edukasyon an kinahanglan ko makuha basi maglampos ha kinabuhi?’ Binabaton ba han totoo nga Kristianidad inin importante nga pakiana? Paghihisgotan ini ha masunod nga artikulo.

[Footnote]