Hi Jehova an Aton Magbarantay

“Hi Jehova amo an akon Magbarantay; diri magkukulang ha akon.”—Salmo 23:1.

1-3. Kay ano nga diri urusahon nga igintanding ni David hi Jehova ha usa nga magbarantay han mga karnero?

 KON ipahulagway ha imo an paagi han pagmangno ni Jehova ha iya katawohan, ano an imo masisiring? Ha ano mo maipapariho an iya malumo nga pagmangno ha iya matinumanon nga mga surugoon? Sobra 3,000 ka tuig na an naglabay, iginsurat ni Hadi David an maopay hinduro nga paghulagway mahitungod kan Jehova, igintatanding ito ha trabaho ni David durante han iya pagkabatan-on.

² Han olitawohay pa hi David, usa hiya nga magbarantay han mga karnero, salit maaram hiya mahitungod han pagmangno ha mga karnero. Maaram gud hiya nga kon pasisibay-an an mga karnero, masayon la hira mawara ngan magin biktima han mga kawatan o magbangis nga mga hayop. (1 Samuel 17:34-36) Kon waray matinagaron nga magbarantay, bangin diri hira makabiling hin ira sabsaban ngan hin pagkaon. Ha urhi nga mga tuig ni David, sigurado nga nahinunumdoman niya an makalilipay nga mga panahon nga ginamit niya ha pagtugway, pagpanalipod, ngan pagpasabsab ha mga karnero.

³ Diri urusahon nga nahinumdoman ni David an trabaho han usa nga magbarantay han mga karnero han giniyahan hiya ha paghulagway han pagmangno ni Jehova ha iya katawohan. An ika-23 nga Salmo nga iginsurat ni David, nagtitikang ha mga pulong: “Hi Jehova amo an akon Magbarantay; diri magkukulang ha akon.” Aton paghisgotan kon kay ano nga angayan ini nga mga pulong. Katapos, pinaagi han bulig han Salmo 23, makikita naton kon ha ano nga mga paagi nagmamangno hi Jehova ha iya mga magsiringba sugad han pagmangno han magbarantay ha iya mga karnero.—1 Pedro 2:25.

Angayan nga Pagtanding

4, 5. Paonan-o iginhuhulagway han Biblia an mga kinaiya han mga karnero?

⁴ Damu an mga titulo ni Jehova dida ha Kasuratan, kondi an “Magbarantay” usa han malumo hinduro nga pagtawag ha iya. (Salmo 80:1) Basi masabtan hin mas maopay kon kay ano nga angayan nga tinatawag hi Jehova nga Magbarantay, makakabulig ha aton an paghibaro ha duha nga butang: siyahan, an kinaiya han mga karnero ngan ikaduha, an mga buruhaton ngan mga kalidad han maopay nga magbarantay.

⁵ Agsob nga gin-uunabi han Biblia an mga kinaiya han mga karnero, iginhuhulagway hira sugad nga madagmit gumios uyon ha gugma han magbarantay (2 Samuel 12:3), diri-agresibo (Isaias 53:7), ngan waray mahihimo ha pagdepensa. (Mika 5:8) Usa nga parasurat nga nagmangno hin mga karnero ha damu ka tuig an nagsiring: “Bangin ha paghunahuna han iba, an mga karnero diri gud ‘nakakagmangno ha ira kalugaringon.’ Mas nagkikinahanglan hira hin padayon nga atensyon ngan maopay hinduro nga pagmangno kay ha iba nga klase hin mga hayop.” Basi mabuhi, inin waray-mahihimo  nga mga linarang nagkikinahanglan hin matinagaron nga magbarantay.—Esekiel 34:5.

 6. Paonan-o iginsasaysay han usa nga diksyonaryo han Biblia an buruhaton ha ordinaryo nga adlaw han magbarantay han mga karnero ha kadaan nga panahon?

⁶ Ano an buruhaton ha ordinaryo nga adlaw han magbarantay han mga karnero ha kadaan nga panahon? Usa nga diksyonaryo han Biblia an nagsasaysay: “Temprano pa ha aga iya gintutugwayan an panon tikang ha toril, nag-uuna hiya ngadto ha lugar diin makakapanabsab hira. Dinhi hiya nagbabantay ha ira ha bug-os nga adlaw, ginsisiguro nga waray usa han mga karnero an nahimulag, ngan kon ha usa ka takna may-ada waray niya mabantayi ngan binulag ha panon, maduruto nga iya ginbibiling ito tubtob nga hiagian niya ngan ibalik ha panon. . . . Ha gab-i iya iginbabalik an panon ngadto ha toril, gin-iihap hira samtang nasulod hira ilarom han iya baston ha ganghaan basi masiguro nga waray kulang. . . . Kinahanglan bantayan niya an toril ha gab-i tikang ha pag-atake han magbangis nga mga hayop, o han malimbungon nga mga pagsari han maikmat nga naglilibot-libot nga kawatan.” a

 7. Kay ano nga an magbarantay usahay kinahanglan magpakita hin dugang nga pagpailob ngan pagkamalumo?

⁷ May mga panahon nga an mga karnero, labi na an mga burod ngan an mga nati, nagkikinahanglan hin dugang nga pagpailob ngan pagkamalumo. (Genesis 33:13) Usa nga reperensya han Biblia an nasiring: “An panganak dida ha panon agsob nga nahitatabo ha hirayo ha ligid han bukid. An magbarantay atentibo nga nagbabantay ha iroy durante han iya makuri nga mga takna ngan ginpupurot an nati nga karnero ngan gindadara ito ngadto ha toril. Ha sulod hin pipira ka adlaw katapos ipanganak, iya ginkukugos ito o iginsusulod ha haluag nga mga pilo han iya gawas nga panapton tubtob nga makalakat na ito.” (Isaias 40:10, 11) Matin-aw, an maopay nga magbarantay kinahanglan may-ada marig-on ngan malumo nga mga kalidad.

 8. Gin-uunabi ni David an ano nga mga hinungdan han iya pagsarig kan Jehova?

⁸ “Hi Jehova amo an akon Magbarantay”—diri ba angayan ito nga paghulagway mahitungod han aton langitnon nga Amay? Samtang aton gin-uusisa an Salmo 23, masasabtan naton kon paonan-o an Dios nagmamangno ha aton nga may-ada karig-on ngan pagkamalumo pariho han usa nga magbarantay han mga karnero. Ha bersikulo 1, iginpapahayag ni David an iya pagsarig nga hihimoon han Dios an ngatanan nga kinahanglanon nga mga tagana para ha Iya mga karnero basi hira ‘diri makulangan.’ Ha mga bersikulo nga nasunod, gin-uunabi ni David an tulo nga hinungdan hini nga pagsarig: Hi Jehova nagtutugway, nagpapanalipod, ngan nagpapasabsab ha Iya mga karnero. Aton paghisgotan an kada usa hini.

‘Iya Ako Gintutugwayan’

 9. Ano nga mamurayawon nga kahimtang an iginhuhulagway ni David, ngan paonan-o hingangada an mga karnero hiton mamurayawon nga kahimtang?

⁹ Siyahan, gintutugwayan ni Jehova an iya katawohan. Hi David nagsurat: “Iya ako ginpapahigda ha mga hilaw nga sabsaban; iya ako gintutugwayan ha ligid han mga maglinaw nga tubig. Ginpahiuli niya an akon kalag; tutugwayan niya ako ha mga dalan han katadongan tungod ha iya ngaran.” (Salmo 23:2, 3) An panon mamurayawon nga nahigda ha butnga han kahuraan—iginhuhulagway dinhi ni David an kahimtang nga may kakontento, karepresko, ngan seguridad. An Hebreo nga pulong nga iginhubad nga mga “sabsaban” mahimo mangahulogan hin “maopay nga lugar.” Posible nga kon maglulugaring la, an mga karnero diri makakabiling hin nakakarepresko nga lugar nga mamurayawon nga mahihigdaan. An ira magbarantay kinahanglan magtugway ha ira ngadto hito nga “maopay nga lugar.”

10. Paonan-o ipinapakita han Dios an iya pagtapod ha aton?

¹⁰ Paonan-o kita gintutugwayan ni Jehova yana? An usa nga paagi amo an iya susbaranan. An iya Pulong nagsasagda ha aton nga ‘magsubad ha Dios.’ (Efeso 5:1) An konteksto hito nga mga pulong nag-uunabi han pagpaid, pagpasaylo, ngan gugma. (Efeso 4:32; 5:2) Sigurado, hi Jehova nagpapakita hin gimaopayi nga susbaranan hito nga mag-opay nga mga kalidad. Diri-makatadunganon ba hiya ha paghangyo ha aton nga subaron hiya? Diri. Ito nga giniyahan nga sagdon ha tinuod usa ka urusahon nga kapahayagan han iya pagtapod ha aton. Ha ano nga paagi? Ginhimo kita ha dagway han Dios, nangangahulogan nga tinagan kita hin mga kalidad ha moral ngan abilidad para ha espirituwal.  (Genesis 1:26) Salit, maaram hi Jehova nga bisan pa han aton pagkadiri-hingpit, may-ada kita kinaiya nga abilidad ha pagpatubo hito nga mga kalidad nga ipinapakita niya. Hunahunaa la—an aton mahigugmaon nga Dios natapod nga mahimo kita magin pariho ha iya. Kon susundon naton an iya susbaranan, hiya magtutugway ha aton, siring pa, ngadto ha maopay nga pahuwayan. Ha butnga hinin madarahog nga kalibotan, kita ‘magpupuyo hin marig-on,’ nakakaeksperyensya hin kamurayawan tungod ha paghibaro nga inuuyonan kita han Dios.—Salmo 4:8; 29:11.

11. Ha pagtugway ni Jehova ha iya mga karnero, ano an iya gintatagad, ngan paonan-o ini ipinapakita ha iya ginhahangyo ha aton?

¹¹ Kon gintutugwayan kita ni Jehova, malumo ngan mapailubon hiya. Gintatagad han magbarantay an mga limitasyon han iya mga karnero, salit iya gintutugwayan hira “sumala ha pitad han gin-aataman nga kahayopan.” (Genesis 33:14, NW) Ha sugad man nga paagi, hi Jehova nagtutugway “sumala ha pitad” han iya mga karnero. Iya gintatagad an aton mga abilidad ngan mga kahimtang. Ha tinuod, hiya nagpapahiuyon ha aton, diri gud naghahangyo hin labaw han maihahatag naton. Ginhahangyo kita niya nga magin bug-os-kalag. (Kolosas 3:23) Kondi ano man kon lagas ka na ngan diri na makakahimo han nahihimo mo hadto? O ano man kon may-ada ka grabe nga sakit nga nakakapugong han imo mga buruhaton? Ilarom hini nga mga kahimtang labi nga nakakaliaw an pagin bug-os-kalag. Waray duha ka tawo nga eksakto nga magkapariho. An bug-os-kalag nga pag-alagad nangangahulogan hin paggamit han ngatanan nga imo kusog ngan enerhiya ha pinakabug-os nga sukol nga mahihimo mo ha pag-alagad ha Dios. Bisan pa han aton mga sakit nga mahimo makaapekto han aton pag-alagad, pinabibilhan gud ni Jehova an aton bug-os-kasingkasing nga pagsingba.—Markos 12:29, 30.

12. Ano nga ehemplo tikang ha Mosaiko nga Balaud an nagpapakita nga hi Jehova nagtutugway “sumala ha pitad” han iya mga karnero?

¹² Ha pag-ilustrar nga hi Jehova nagtutugway “sumala ha pitad” han iya mga karnero, tagda an ginsisiring mahitungod han mga halad para han sala nga gin-unabi ha Mosaiko nga Balaud. Hi Jehova nagkinahanglan hin mag-opay nga mga halad nga nagtikang ha mapasalamaton nga mga kasingkasing. Ha pariho nga panahon, an mga halad ginklasipikar sumala ha maaakos han naghahalad. An balaud nasiring: “Kon . . . diri hiya makahimo pagdara hin usa nga nati nga karnero, dida hito magdara hiya . . . hin duha nga sarapati, o duha nga pisô nga tukmo.” Ano man kon diri hiya makakaghalad hin duha nga sarapati? Niyan, puydi hiya magdara hin pino nga “harina.” (Lebitiko 5:7, 11) Ipinapakita hini nga an Dios waray magkinahanglan hin anoman nga diri maaakos han naghahalad. Tungod kay an Dios diri nagbabag-o, maliliaw kita ha paghibaro nga diri gud hiya naghahangyo hin labaw kay han aton maihahatag; lugod, nalilipay hiya ha pagkarawat han maihahatag naton. (Malakias 3:6) Makalilipay gud nga gintutugwayan kita hiton masinabuton nga Magbarantay!

‘Diri Ako Nahahadlok hin Bisan Ano nga Maraot, Kay Ikaw Upod Nakon’

13. Ha Salmo 23:4, paonan-o nagyayakan hi David nga may-ada mas duok nga pagbati, ngan kay ano nga diri ini urusahon?

¹³ Iginhahatag ni David an ikaduha nga hinungdan han iya pagsarig: Hi Jehova nagpapanalipod ha iya mga karnero. Aton mababasa: “Bisan ako maglakat ha patag han lambong han kamatayon, diri ako mahahadlok hin bisan ano nga maraot; kay ikaw upod nakon; an imo baston ngan an imo tungkod, nakakaliaw ha akon.” (Salmo 23:4) Nagyayakan yana hi David nga may-ada mas duok nga pagbati,  tinatawag hi Jehova ha pronombre nga “ikaw.” Diri ini urusahon, kay gin-uunabi ni David kon paonan-o ginbuligan hiya han Dios nga magpailob ha kakurian. Hi David nahingada ha peligroso nga mga kahimtang—mga panahon nga usahay nameligro an iya mismo kinabuhi. Kondi waray niya tuguti nga madaog hiya han kahadlok, kay inabat niya nga kaupod niya an Dios—dara an Iya “baston” ngan “tungkod” nga andam pirme. An paghibaro mahitungod hini nga panalipod nakaliaw kan David ngan sigurado nga nakadasig ha iya nga magin mas duok kan Jehova. b

14. Ano nga pasarig an iginhahatag ha aton han Biblia mahitungod han panalipod ni Jehova, kondi diri ini nangangahulogan hin ano?

¹⁴ Paonan-o ginpapanalipdan ni Jehova an iya mga karnero yana? An Biblia nagpapasarig ha aton nga waray mga parakontra—demonyo man o tawo—nga maglalampos ha pagpoo ha iya mga karnero dinhi ha tuna. Diri gud ito itutugot ni Jehova. (Isaias 54:17; 2 Pedro 2:9) Kondi, diri ini nangangahulogan nga an aton Magbarantay magpapanalipod ha aton tikang ha ngatanan nga kalamidad. Naieksperyensyahan naton an mga kakurian nga kasagaran nga nahitatabo ha mga tawo, ngan inaatubang naton an pagkontra nga nahitatabo ha ngatanan nga totoo nga mga Kristiano. (2 Timoteo 3:12; Jakobo 1:2) May mga panahon siring pa, nga mahimo kita “maglakat ha patag han lambong han kamatayon.” Pananglitan, bangin haros mamatay na kita tungod han persikusyon o mga sakit. O bangin hirani na mamatay an usa nga aton hinigugma o bangin namatay pa ngani. Durante han baga hin madulom hinduro nga mga takna, kaupod naton an aton Magbarantay, ngan pananalipdan kita niya. Paonan-o?

15, 16. (a) Ha ano nga mga paagi binubuligan kita ni Jehova nga malamposan an mga ulang nga bangin naieksperyensyahan naton? (b) Isaysay an usa nga eksperyensya nga nagpapakita kon paonan-o binubuligan kita ni Jehova ha mga panahon han kakurian.

¹⁵ Hi Jehova diri nagsasaad hin milagroso nga paghilabot. c Kondi makakasiguro kita hini: Bubuligan kita ni Jehova nga malamposan an anoman nga mga ulang nga bangin atubangon naton. Tatagan kita niya han kinaadman basi malamposan an “magkadirodilain nga panulay.” (Jakobo 1:2-5) Ginagamit han magbarantay han mga karnero an iya baston o tungkod diri la ha pagtabog ha natukob nga mga hayop kondi liwat ha pagtugway ha iya mga karnero ngadto ha husto nga direksyon. Hi Jehova makakagtugway ha aton, bangin pinaagi han usa nga aton igkasi-magsiringba, nga iaplikar an basado-ha-Biblia nga sagdon nga bangin makagbag-o gud han aton kahimtang. Dugang pa, hi Jehova makakahatag ha aton hin kusog basi makailob. (Filipos 4:13) Pinaagi han iya baraan nga espiritu, masasangkapan kita niya hin “kapin kaopay nga gahum.” (2 Korinto 4:7) An espiritu han Dios makakabulig ha aton nga makailob ha anoman nga pagsari nga bangin dad-on ni Satanas ha aton. (1 Korinto 10:13) Diri ba nakakaliaw hibaroan nga hi Jehova andam pirme ha pagbulig ha aton?

¹⁶ Oo, hingada man kita ha madulom hinduro nga walog, diri kita nag-uusahan ha paglakat dida. Kaupod naton an aton Magbarantay, nabulig ha aton ha mga paagi nga ha siyahan bangin diri naton masabtan hin bug-os. Tagda an eksperyensya han usa nga Kristiano nga tigurang nga may-ada grabe nga tumor ha utok. “Kinakarawat ko nga ha siyahan naghunahuna ako nga bangin nasisina hi Jehova o bangin diri ngani hiya nahigugma ha akon. Kondi determinado ako nga diri magpahirayo kan Jehova. Lugod, iginsumat ko ha iya an akon mga kabaraka. Ngan binuligan ako ni Jehova, agsob nga ginliliaw ako pinaagi han akon Kristiano nga kabugtoan. Damu an naghatag hin makakabulig nga mga impormasyon sumala han ira kalugaringon nga eksperyensya ha paglampos han grabe nga sakit. An ira timbang nga mga opinyon nagpahinumdom ha akon nga diri talagsahon an akon gin-aantos. An praktikal nga bulig, upod na an makapabantad nga pagkabuotan, nagpasarig utro ha akon nga hi Jehova diri nasisina ha akon. Syempre, kinahanglan padayon nga ilubon ko an akon sakit, ngan diri ako maaram kon ano an mahitatabo. Kondi kombinsido ako nga kaupod ko hi Jehova ngan magpapadayon hiya ha pagbulig ha akon ha paglampos hini nga kakurian.”

“Nag-aandam Ka hin Akon Pagkaon”

17. Paonan-o iginhuhulagway ni David hi Jehova ha Salmo 23:5, ngan kay ano nga diri ini nasumpaki ha ilustrasyon mahitungod han usa nga magbarantay?

¹⁷ Gin-uunabi yana ni David an ikatulo nga  hinungdan han iya pagsarig ha iya Magbarantay: Ginpapasabsab ni Jehova an iya mga karnero, ngan ginbubuhat niya ini ha duro nga kahuraan. Hi David nagsurat: “Nag-aandam ka hin akon pagkaon ha atubangan han akon mga kaaway; ginhirogan mo an akon ulo hin lana; an akon tagayan nag-aawas.” (Salmo 23:5) Dinhi hini nga bersikulo, iginhuhulagway ni David an iya Magbarantay sugad nga mahinatagon nga nananagtawo nga nagtatagana hin hura nga pagkaon ngan irinmon. An duha nga ilustrasyon—usa nga matinagaron nga magbarantay ngan usa nga mahinatagon nga nananagtawo—diri nagkakasumpaki. Syempre, an maopay nga magbarantay maaram gud kon diin makakabiling hin marabong nga sabsaban ngan hin igo nga irinmon nga tubig basi an iya panon ‘diri makulangan.’—Salmo 23:1, 2.

18. Ano an nagpapakita nga hi Jehova usa nga mahinatagon nga nananagtawo?

¹⁸ Mahinatagon ba liwat nga nananagtawo an aton Magbarantay? Sigurado gud! Hunahunaa la an kalidad, kadamu, ngan magkalainlain nga klase han espirituwal nga pagkaon nga aton napapahimulosan yana. Pinaagi han matinumanon ngan maaramon nga uripon nga klase, hi Jehova nagtatagana ha aton hin makakabulig nga mga publikasyon ngan nagtututdo nga mga programa ha mga katirok, mga asembleya, ngan mga kombensyon—ini ngatanan nagtatagbaw han aton espirituwal nga mga panginahanglan. (Mateo 24:45-47, NW) Waray gud kakulangan han espirituwal nga pagkaon. “An matinumanon ngan maaramon nga uripon” naghihimo hin minilyon nga mga Biblia ngan mga bulig ha pag-aram ha Biblia, ngan an sugad nga mga publikasyon makukuha na yana ha 413 nga yinaknan. Hi Jehova nagtatagana hin magkalainlain nga klase han espirituwal nga pagkaon—tikang ha “gatas,” an basihan nga mga katutdoan han Biblia, tubtob ha “mabaskog nga kakaunon,” an mas higlarom nga mga katutdoan. (Hebreo 5:11-14) Sugad nga resulta, kon naatubang kita ha mga problema o mga desisyon, kasagaran nga nakakarawat naton an eksakto gud nga ginkikinahanglan naton. Ano an mahitatabo ha aton kon waray hito nga espirituwal nga pagkaon? An aton Magbarantay tinuod nga usa ka mahinatagon hinduro nga paratagana!—Isaias 25:6; 65:13.

“Mag-uukoy Ako ha Balay ni Jehova”

19, 20. (a) Ha Salmo 23:6, ano nga pagsarig an iginpapahayag ni David, ngan paonan-o kita magkakaada hito nga pagsarig? (b) Ano an paghihisgotan ha masunod nga artikulo?

¹⁹ Katapos pamalandungon ni David an mga paagi han iya Magbarantay ngan Paratagana, hiya nagsiring: “Ha pagkamatuod an kaopayan ngan kalooy masunod ha akon ha ngatanan nga adlaw han akon kinabuhi; ngan mag-uukoy ako ha balay ni Jehova ha mga katuigan nga waray kataposan.” (Salmo 23:6) Hi David nagyayakan tikang ha kasingkasing nga puno hin pagpasalamat ngan pagtoo—pagpasalamat ha paghinumdom han naglabay ngan pagtoo ha paglaom ha tidaraon. Ini nga magbarantay han mga karnero hadto, may-ada seguridad, tungod kay maaram hiya nga tubtob nga nagpapabilin hiya nga duok ha iya langitnon nga Magbarantay, nga baga hin naukoy ha Iya balay, makakarawat niya pirme an mahigugmaon nga pagmangno ni Jehova.

²⁰ Mapasalamaton gud kita tungod hinin matahom nga mga pulong nga iginsurat ha ika-23 nga Salmo! Nahibaroan ni David an mas angayan nga paagi ha paghulagway kon paonan-o hi Jehova nagtutugway, nagpapanalipod, ngan nagpapasabsab ha iya mga karnero. An makaruruyag nga mga pulong ni David gintipigan dida ha Biblia basi maghatag ha aton hin pasarig nga kita liwat makakalaom kan Jehova sugad nga aton Magbarantay. Oo, tubtob nga nagpapabilin kita nga duok kan Jehova, magmamangno hiya ha aton sugad nga mahigugmaon nga Magbarantay “ha mga katuigan nga waray kataposan,” ha kadayonan pa ngani. Kondi, sugad nga iya mga karnero, responsabilidad naton an paglakat kaupod han aton harangdon nga Magbarantay, hi Jehova. Paghihisgotan ha masunod nga artikulo kon ano an nahiuupod hini.

[Mga footnote]

Nahinunumdoman Mo Ba?

• Kay ano nga angayan nga igintanding ni David hi Jehova ha usa nga magbarantay han mga karnero?

• Paonan-o hi Jehova nagtutugway ha aton nga may pagsabot?

• Ha ano nga mga paagi binubuligan kita ni Jehova nga magpailob ha mga kakurian?

• Ano an nagpapakita nga hi Jehova usa nga mahinatagon nga nananagtawo?

[Mga Pakiana]

[Retrato ha pahina 18]

Pariho han magbarantay han mga karnero ha Israel, hi Jehova nagtutugway ha Iya mga karnero