An Katawohan “Tikang ha Ngatanan nga Yinaknan” Nakakabati han Maopay nga Sumat

‘Napulo ka tawo tikang ha ngatanan nga yinaknan han mga nasud an masiring: Kami maupod ha iyo, kay kami nakabati nga an Dios aada kaupod niyo.’—SAKARIAS 8:23.

 1. Paonan-o hi Jehova nagtagana han gimaopayi nga okasyon ngan kahimtang para ha pagtikang han pagsangyaw ha mga tawo nga magkalainlain an yinaknan ngan nasyonalidad?

 MAOPAY gud an okasyon ngan kahimtang. Adlaw adto han Pentekostes 33 K.P. Mga semana antes pa, an mga Judio ngan mga nakombirte tikang ha minos la 15 nga rehiyon han haluag nga Imperyo han Roma, nagkatirok ha Jerusalem basi igsaurog an Paskua. Hito nga adlaw, yinukot ha ira an namati—diri ha kasamokan, sugad han nahitabo ha kadaan nga Babel, kondi nga may pagsabot—ha ordinaryo nga mga tawo nga napuno han baraan nga espiritu nga nagpapasamwak han maopay nga sumat ha damu nga pinulongan nga ginyayakan ha imperyo. (Buhat 2:1-12) Ito nga okasyon nagtigaman han kaorganisa han Kristiano nga kongregasyon ngan han tinikangan han pagtutdo nga buruhaton ha magkalainlain nga yinaknan, nga nagpapadayon tubtob yana.

 2. Han Pentekostes 33 K.P., kay ano nga ‘nanhipausa’ ha mga disipulo ni Jesus an magkalainlain nga mga mamarati?

² An mga disipulo ni Jesus posible nga nakakayakan han komon nga Griego, an popular nga yinaknan hito nga panahon. Ginamit liwat nira an Hebreo, an yinaknan ha templo. Kondi, hito nga adlaw han Pentekostes, ‘nanhipausa’ an ira magkalainlain nga mga mamarati tungod ha pagyakan ha kalugaringon nga mga yinaknan hito nga mga tawo. Ano an resulta? An mga kasingkasing han mga mamarati nabantad han importante nga mga kamatuoran nga ira hinbatian ha ira kalugaringon nga yinaknan. Ha kataposan hito nga adlaw, an gutiay nga grupo han mga disipulo nagin daku nga grupo han sobra 3,000!—Buhat 2:37-42.

3, 4. Paonan-o nag-uswag an pagsangyaw nga buruhaton han an mga disipulo binalhin tikang ha Jerusalem, Judea, ngan Galilea?

³ Waray pag-iha katapos hiton urusahon nga hitabo, nagtikang an persikusyon ha Jerusalem, ngan “an mga nagpatlaag, nagkarokalakat, ngan nanwali han pulong.” (Buhat 8:1-4) Pananglitan, aton mababasa ha Buhat kapitulo 8 an mahitungod kan Felipe, usa nga ebanghelisador nga nagyayakan hin Griego. Hi Felipe nagsangyaw ha mga Samaritano. Nagsangyaw liwat hiya ha usa nga Etiopiahanon nga opisyal nga nagkarawat han mensahe mahitungod kan Kristo.—Buhat 6:1-5; 8:5-13, 26-40; 21:8, 9.

⁴ Han an mga Kristiano binalhin ngan namiling hin mga lugar nga ira uukyan ha gawas han katunaan han Jerusalem, Judea, ngan Galilea, nakaeksperyensya hira hin mga problema ha komunikasyon tungod han bag-o nga kultura ngan yinaknan. An iba ha ira bangin nagsangyaw ha mga Judio la. Kondi an disipulo nga hi Lukas nagsusumat: “An iba ha ira mga tawo ha Kipre, ngan ha Sirene, nga ha pagsulod ha Antiokia nagyakan man ha mga Gresyahanon, ngan nagwali han maopay nga sumat han Ginoo nga amo hi Jesus.”—Buhat 11:19-21.

An Diri-nagpapasulabi nga Dios May-ada Mensahe Para ha Ngatanan

 5. Paonan-o nakikita an diri pagpasulabi ni Jehova may kalabotan ha maopay nga sumat?

⁵ An sugad nga mga hitabo nauyon ha mga paagi han Dios; hiya diri nagpapasulabi. Katapos buligan ni Jehova hi apostol Pedro nga bag-ohon an iya panhunahuna mahitungod ha mga tawo han mga nasud, mapasalamaton hiya nga nagsiring: “Matuod, akon nakita nga an Dios waray ginpapasulabi han mga tawo; kondi tikang ha ngatanan nga mga nasud hiya nga nahahadlok ha iya, ngan nagbubuhat hin  matadong, naruruyagan niya.” (Buhat 10:34, 35; Salmo 145:9) Han hi apostol Pablo nga persigidor hadto ha mga Kristiano, nagpahayag nga ‘buot han Dios nga an ngatanan nga mga tawo maluwas,’ iya pinamatud-an utro nga an Dios diri nagpapasulabi. (1 Timoteo 2:4) Nakikita an diri pagpasulabi han Maglalarang tungod kay an paglaom ha Ginhadian abrido ha mga tawo, lalaki man o babaye, anoman an rasa, nasyonalidad, o yinaknan.

6, 7. Ano nga mga tagna han Biblia an nagtagna mahitungod han pagpasamwak han maopay nga sumat ha magkalainlain nga yinaknan?

⁶ Inin bug-os-kalibotan nga pag-uswag igintagna mga siglo na an naglabay. Sumala ha tagna ni Daniel, “iginhatag ha iya [Jesus] an kagamhanan, ngan an himaya, ngan an usa nga ginhadian, nga an ngatanan nga mga katawohan, mga nasud, ngan mga yinaknan mag-alagad ha iya.” (Daniel 7:14) An kamatuoran nga ini nga magasin iginpupublikar ha 151 nga yinaknan ngan iginpapanaltag ha bug-os nga kalibotan, nga nakakabulig ha imo nga mabasa an mahitungod han Ginhadian ni Jehova, nagpapakita han katumanan hito nga tagna han Biblia.

⁷ An Biblia nagtagna han panahon nga an mga tawo nga magkalainlain an yinaknan makakabati han naghahatag-kinabuhi nga mensahe hito. Ha paghulagway kon paonan-o an totoo nga pagsingba makakadani hin damu nga tawo, hi Sakarias nagtagna: “Hadto nga mga adlaw mahinanabo, nga an napulo ka tawo tikang ha ngatanan nga yinaknan han mga nasud magunit, hira magunit ha saya niya nga usa nga Judio [dinihogan-han-espiritu nga mga Kristiano, nga bahin han ‘Israel han Dios’], ha pagsiring: Kami maupod ha iyo, kay kami nakabati nga an Dios aada kaupod niyo.” (Sakarias 8:23; Galasia 6:16) Ngan ha pagsaysay han iya hinkit-an ha bisyon, hi apostol Juan nagsiring: “Kitaa, an kadam-an nga mga tawo, nga waray tawo nga sadang makaihap, tikang ha tagsa-tagsa nga nasud ngan ha ngatanan nga mga panon, ngan mga katawohan ngan mga yinaknan, nga nagkakatukdaw ha atubangan han hadianon nga lingkuranan, ngan han Kordero.” (Pahayag 7:9) Nakikita naton nga natutuman ito nga mga tagna!

 Pagsangyaw ha Ngatanan nga Klase han mga Tawo

 8. Ano an nahitatabo ha moderno nga panahon nga nagkikinahanglan hin mga pagbag-o ha aton pagsangyaw nga buruhaton?

⁸ Yana, nagtitikadamu nga mga tawo an nabalhin ha iba nga mga lugar. An globalisasyon nag-aabri hin bag-o nga panahon han pagbalhin ha iba nga mga lugar. Damu hinduro nga mga tawo tikang ha mga lugar nga may-ada girra ngan makuri an kahimtang ha ekonomiya an nabalhin ha mas may-seguridad nga mga lugar, namimiling hin paagi han pagkinabuhi nga may-kasigurohan ha materyal. Ha damu nga mga nasud, an pag-abot han mga dayo ngan mga kalagiw nagresulta ha kaorganisa han mga grupo nga langyaw an yinaknan. Pananglitan, ha Finland may-ada sobra 120 nga yinaknan; ha Australia sobra 200. Ha usa la nga syudad ha Estados Unidos—ha San Diego—sobra 100 nga yinaknan an mababatian!

 9. Paonan-o naton sadang tagdon an mga tawo ha aton teritoryo nga nagyayakan hin magkalainlain nga yinaknan?

⁹ Sugad nga Kristiano nga mga ministro, gintatagad ba naton an presensya hito nga mga tawo nga magkalainlain an yinaknan sugad nga ulang ha aton ministeryo? Diri gud! Lugod, gintatagad naton ini sugad nga makalilipay nga pag-uswag han aton teritoryo ha ministeryo—‘an mga kapatagan magbusag na para ha pagbari.’ (Juan 4:35) Nangangalimbasog kita ha pagbulig ha mga tawo nga mahunahunaon ha ira espirituwal nga panginahanglan, anoman an ira nasyonalidad o yinaknan. (Mateo 5:3) Sugad nga resulta, kada tuig nagtitikadamu nga mga tawo han ‘ngatanan nga yinaknan’ an nagigin mga disipulo ni Kristo. (Pahayag 14:6) Pananglitan, han Agosto 2004, an pagsangyaw nga buruhaton ha Alemanya ginbuhat ha mga 40 nga yinaknan. Ha pariho nga panahon, an maopay nga sumat iginsangyaw ha Australia ha haros 30 nga yinaknan, nga nagtikang ha 18 han naglabay nga napulo la ka tuig. Ha Gresya, an mga Saksi ni Jehova nakasangyaw ha mga tawo ha haros 20 nga magkalainlain nga yinaknan. Ha bug-os nga kalibotan, mga 80 porsyento han mga Saksi ni Jehova an nagyayakan hin iba nga pinulongan gawas han Ingles, an komon nga internasyonal nga yinaknan.

10. Ano an bahin han tagsa nga magwarali ha paghimo hin mga disipulo han mga tawo ha “ngatanan nga mga nasud”?

¹⁰ Tinuod, an sugo ni Jesus nga ‘manhimo hin mga tinon-an ha ngatanan nga mga nasud’ ginbubuhat  yana! (Mateo 28:19) Tungod kay disidido ha pagbuhat hito nga sugo, an mga Saksi ni Jehova aktibo ha 235 nga nasud, nananaltag hin mga literatura ha sobra 400 nga yinaknan. Samtang an organisasyon ni Jehova nagtatagana han mga literatura nga ginkikinahanglan basi madangat an mga tawo, an tagsa nga magwarali han Ginhadian kinahanglan gumios ha pagsumat han mensahe han Biblia ha “ngatanan” nga klase han mga tawo ha yinaknan nga ira masasabtan hin maopay. (Juan 1:7) Inin nagkakaurosa nga pangalimbasog nakakabulig ha minilyon nga mga tawo nga magkalainlain an yinaknan nga magpahimulos han maopay nga sumat. (Roma 10:14, 15) Oo, an kada usa ha aton may-ada importante nga bahin!

Paglampos ha Ayat

11, 12. (a) Ano nga mga ayat an kinahanglan malamposan naton, ngan paonan-o nabulig an baraan nga espiritu? (b) Kay ano nga kasagaran nga nakakabulig an pagsangyaw ha mga tawo ha ira yinaknan?

¹¹ Yana, damu nga magwarali han Ginhadian an naruruyag mahibaro hin iba nga yinaknan, kondi waray hira milagroso nga mga regalo han espiritu han Dios ha pagyakan hin iba nga yinaknan. (1 Korinto 13:8) Daku nga trabaho an pag-aram hin bag-o nga yinaknan. Bisan adton nagyayakan na hin ikaduha nga yinaknan bangin kinahanglan magpahiuyon han ira panhunahuna ngan paagi basi an mensahe han Biblia magin makaruruyag ha mga tawo nga nagyayakan hito nga yinaknan kondi may-ada iba nga mga gintikangan ngan mga kultura. Ngan an bag-o nga mga dayo liwat kasagaran nga awdanon; nagkikinahanglan hin daku nga pangalimbasog basi masabtan an ira panhunahuna.

¹² Kondi, an baraan nga espiritu nagios pa gihapon ha mga surugoon ni Jehova ha ira mga pangalimbasog basi makabulig ha mga tawo nga nagyayakan hin iba nga mga yinaknan. (Lukas 11:13) Imbes nga maghatag hin milagroso nga mga abilidad ha pagyakan hin damu nga yinaknan, an baraan nga espiritu makakadugang han aton hingyap nga makigkomunikar ha mga tawo nga diri nagyayakan han aton yinaknan. (Salmo 143:10) An pagsangyaw o pagtutdo han mensahe han Biblia ha mga tawo nga an yinaknan diri pamilyar ha ira mahimo makabantad han ira hunahuna. Kondi, basi mabantad an kasingkasing han aton mga mamarati, agsob nga mas maopay an paggamit han ira kalugaringon nga yinaknan—an yinaknan nga nagpapahayag han ira gihilarumi nga mga hingyap, mga motibo, ngan mga paglaom.—Lukas 24:32.

13, 14. (a) Ano an nagpapagios ha iba nga makigbahin ha ministeryo ha iba nga yinaknan? (b) Paonan-o nakikita an espiritu han pagsakripisyo-ha-kalugaringon?

¹³ Damu nga magwarali han Ginhadian an nagbuhat han ministeryo ha teritoryo nga langyaw an yinaknan han naobserbahan nira an maopay nga pagkarawat han kamatuoran han Biblia. An iba napaparig-on kon an ira pag-alagad nagigin mas makuri ngan makapainteres. “Damu hadton tikang ha Este nga Europa an nauuhaw han kamatuoran,” siring han sanga nga opisina han mga Saksi ni Jehova ha sur nga Europa. Makapatagbaw gud an pagbulig ha sugad nga makinarawaton nga mga indibiduwal!—Isaias 55:1, 2.

¹⁴ Kondi, basi magin epektibo hini nga buruhaton, ginkikinahanglan naton an determinasyon ngan pagsakripisyo-ha-kalugaringon. (Salmo 110:3) Pananglitan, damu nga Saksi nga mga pamilya ha Japan an binaya ha komportable nga mga balay ha dagku nga mga syudad ngan binalhin ngadto ha hirayo nga mga lugar basi buligan an mga grupo han Intsik nga mga dayo basi makasabot han Biblia. Ha weste nga baybayon han Estados Unidos, an mga magwarali regular nga nagdadrayb ha sulod hin usa tubtob duha ka oras basi magdumara hin mga pag-aram ha Biblia ha mga Pilipino didto. Ha Norway, usa nga mag-asawa an nagdudumara hin pag-aram ha usa nga pamilya tikang ha Afghanistan. Ginagamit han mag-asawa nga Saksi an Ingles ngan Norwego nga mga edisyon han brosyur nga Ano an Ginkikinahanglan ha Aton han Dios? a Binabasa han  pamilya an mga parapo ha Persiano, an yinaknan nga haros pariho ha ira yinaknan nga Dari. Ingles ngan Norwego an ginagamit nira ha pag-istorya. Ito nga espiritu han pagsakripisyo-ha-kalugaringon ngan pagpauyon-uyon hura nga ginbabalosan kon an mga langyawanon nakarawat han maopay nga sumat. b

15. Paonan-o kita ngatanan mahimo makigbahin ha pangalimbasog ha pagsangyaw ha magkalainlain nga yinaknan?

¹⁵ Mahimo ka ba makigbahin hini nga buruhaton nga pagsangyaw ha magkalainlain nga yinaknan? Kay ano nga diri magtikang pinaagi han pag-usisa kon ano nga langyaw nga mga yinaknan an kasagaran nga ginyayakan ha iyo teritoryo? Katapos, mahimo ka magdara hin pipira nga mga tract o mga brosyur hito nga mga yinaknan. An bokleta nga Good News for People of All Nations, nga iginpagowa han 2004, nakakabulig na ha pagpasamwak han paglaom ha Ginhadian pinaagi han simple, positibo nga mensahe hito ha damu nga yinaknan.—Kitaa an artikulo nga “Good News for People of All Nations,” ha pahina 32.

‘Paghigugma ha Humarapit’

16. Paonan-o maipapakita han responsable nga kabugtoan nga kalalakin-an an nagsasakripisyo-ha-kalugaringon nga interes ha pagbulig ha mga tawo nga langyaw an yinaknan?

¹⁶ Maaram man kita hin iba nga yinaknan o diri, makakabulig kita ngatanan ha espirituwal nga edukasyon han mga langyawanon ha aton lugar. Hi Jehova nagsugo ha iya katawohan nga ‘higugmaon an humarapit.’ (Deuteronomio 10:18, 19) Pananglitan, ha usa nga daku nga syudad ha Amerika del Norte, lima nga kongregasyon an nagkakatirok ha usa la nga Kingdom Hall. Sugad han ginbubuhat ha damu nga mga katirokan, may-ada tinuig nga pagsurusaliwan han mga oras han katirok nga tungod hito an Intsik nga mga katirok mahiuurhi na ha Domingo. Kondi, mangangahulogan ini nga damu han mga dayo nga nagtatrabaho ha mga restawran an diri makakatambong. An mga tigurang ha iba nga mga kongregasyon may pagkabuotan nga naghimo hin mga pagbag-o basi an Intsik nga mga katirok mahimo pagdumarahon hin mas temprano ha Domingo.

17. Ano an sadang naton abaton kon an iba nagdidesisyon nga bumalhin ha iba nga lugar basi buligan an grupo nga iba an yinaknan?

¹⁷ An mahigugmaon nga mga paramangno naghahatag kumendasyon ha kwalipikado ngan maabtik nga kabugtoan nga naruruyag bumalhin ha iba nga lugar basi buligan an mga grupo nga iba an yinaknan. Ito nga eksperyensyado nga mga magturutdo han Biblia bangin mawara ha ira lokal nga mga kongregasyon, kondi inaabat han mga paramangno an inabat han mga tigurang ha Listra ngan Ikonio. Waray pugngi hito nga mga tigurang hi Timoteo ha pagbiyahe kaupod ni Pablo, bisan kon hi Timoteo usa ka daku nga bulig ha ira mga kongregasyon. (Buhat 16:1-4) Dugang pa, adton nangunguna ha pagsangyaw nga buruhaton diri napupugngan han iba-iba nga disposisyon, mga kustomre, o mga batasan han mga langyawanon. Lugod, kinakarawat nira an pagkaiba-iba ngan namimiling hin mga paagi nga mapauswag an maopay nga mga relasyon tungod ha maopay nga sumat.—1 Korinto 9:22, 23.

18. Ano nga daku nga purtahan han buruhaton an abrido ha ngatanan?

¹⁸ Sugad han igintagna, an maopay nga sumat iginsasangyaw na ha “ngatanan nga yinaknan han mga nasud.” Daku pa gihapon an potensyal han pag-uswag ha mga teritoryo nga langyaw an yinaknan. Yinukot han maaram maghimo hin mga paagi nga mga magwarali an sinulod hinin “daku nga purtahan ngadto ha buruhaton.” (1 Korinto 16:9, NW) Kondi, dugang pa an ginkikinahanglan basi makultibar an sugad nga mga teritoryo, sugad han ipapakita han masunod nga artikulo.

[Mga footnote]

Maisasaysay Mo Ba?

• Paonan-o naton masusubad hi Jehova ha pagpakita hin diri pagpasulabi ha ngatanan nga tawo?

• Mationan-o naton sadang tagdon an mga tawo ha aton teritoryo nga diri nagyayakan han aton yinaknan?

• Kay ano nga makakabulig an pagsangyaw ha mga tawo nga ginagamit an ira yinaknan?

• Paonan-o naton maipapakita an pagtagad ha mga langyawanon ha aton teritoryo?

[Mga Pakiana]

[Mapa/Retrato ha pahina 23]

(Para ha aktuwal nga format, kitaa an publikasyon)

Roma

KRETA

ASIA

PREGIA

PAMPELIA

PONTUS

KAPADOSIA

MESOPOTAMIA

MEDIA

PARTIA

ELAM

ARABIA

LIBYA

EHIPTO

JUDEA

Jerusalem

[Kadagatan]

Dagat Mediteranyo

Itom nga Dagat

Dagat nga Pula

Gulpo han Persia

[Retrato]

Ha Pentekostes 33 K.P., an mga tawo tikang ha 15 nga rehiyon han Romano nga Imperyo nakabati han maopay nga sumat ha ira yinaknan

[Mga Retrato ha pahina 24]

Damu nga mga langyawanon an kinasingkasing nga nagkarawat han kamatuoran han Biblia

[Retrato ha pahina 25]

Karatola han Kingdom Hall ha lima nga yinaknan