Armagedon—Usa ba nga Makabungkag nga Kataposan?

ARMAGEDON! Para ha imo, ini ba nga termino naghuhulagway hin kamatay han damu hinduro nga mga tawo o kasunog han uniberso? Ha damu nga bahin han kalibotan, gutiay la nga mga termino ha Biblia an agsob gamiton ha adlaw-adlaw nga pakiistorya sugad han pulong nga “Armagedon.” Kalyap na nga ginagamit ito ha paghulagway han madulom nga kabubuwason han mga tawo. An industriya han sine ngan telebisyon nagpupuno ha imahinasyon han tawo hin makangingirhat nga mga hulagway han tiarabot nga “Armagedon.” An termino sugad hin natatabonan hin misteryo ngan sayop nga mga ideya. Bisan kon damu an mga ideya mahitungod han kahulogan hito, an kadam-an hito diri nauyon ha igintututdo han Biblia—an gintikangan han termino—mahitungod han Armagedon.

Tungod kay iginkakaw-ing han Biblia an Armagedon ha “kataposan han kalibotan,” diri ka ba mauyon nga importante an pagkaada matin-aw nga pagsabot mahitungod han iginpapasabot gud hito nga termino? (Mateo 24:3) Ngan diri ba makatadunganon nga usisahon an ultimo nga surok han kamatuoran, an Pulong han Dios, basi makabiling hin mga baton mahitungod ha kon ano an Armagedon ngan kon paonan-o ito makakaapekto ha imo ngan ha imo pamilya?

Ipapakita han sugad nga pag-usisa nga imbes han pagpahinabo hin makabungkag nga kataposan, an Armagedon magpapahinabo hin makalilipay nga tinikangan para ha mga tawo nga naghihingyap nga makaukoy ngan mabuhi ha matadong nga bag-o nga kalibotan. Babalosan ka hin matin-aw nga pagsabot mahitungod hinin importante nga kamatuoran ha Kasuratan samtang imo gin-uusisa an paghisgot han totoo nga kahulogan han Armagedon ha sunod nga artikulo.

[Kahon/Retrato ha pahina 3]

ANO AN ARMAGEDON PARA HA IMO?

• Nukleyar nga makamaratay nga kalamidad

• Kataragman han palibot

• Pagbunggo han tuna ha usa nga butang ha langit

• Pagbungkag han Dios ha mga magraot