Usa nga Ebidensya han Gugma, Pagtoo, Ngan Pagkamasinugtanon

HA AGA han Mayo 16, 2005, mahayahay ngan masirak ha Watchtower Farms ha Wallkill, New York. An inarutan hin maopay nga mga bermuda ngan mga bukad nag-iiringgat tungod han uran han kaagahon. An usa nga itik upod han walo nga kapisoan hito mamingaw nga nalangoy ha malinaw nga tubig hirani ha ligid han gutiay nga danaw. An mga bisita nanhipausa ha kahusay han lugar. Nag-iristorya hira nga mahinay la an ira tingog, nga baga hin diri naruruyag nga madisturbo an kahimyang han aga.

An mga bisita, mga Saksi ni Jehova tikang ha 48 nga nasud ha kalibotan. Kondi diri an maopay nga palibot an ira ginkadto. Interesado hira ha nahitatabo ha sulod han haluag nga istraktura nga ginbutangan hin pula nga baldosa, an gibabag-ohi nga naidugang ha pasilidad han Bethel han Estados Unidos ha Wallkill. Ha sulod hito, nahipausa na liwat hira, bisan kon an buruhaton ha sulod han istraktura maaringasa ngan diri-mamingaw.

Tikang ha usa nga mesanin, nakikita han mga bisita an komplikado nga han-ay han makinarya ha ubos. Lima nga dagku hinduro nga makina para ha pag-imprinta an nakada ha mahamis ngan sementado nga salog nga mas haluag kay ha siyam nga football field. Dinhi gin-iimprinta an mga Biblia, mga libro, ngan mga magasin. An dagku nga mga rolyo hin papel, nga may kabug-aton nga 1,700 kilos an kada usa, natuyok pariho hin mga kaliding han malaksi nga nadalagan nga trak. An kada 23-kilometros nga rolyo han papel nabubuklad ngan naagi ha makinarya ha sulod la hin 25 minutos. Durante hito nga mga minuto, ginbubutang ngan ginpapamara han makina an tinta ngan ginpapatugnaw an papel basi mapilo ito ngan magin mga magasin nga malaksi nga gindadara han mga konbeyor ha igbaw basi maikarton ngan maipadara ha mga kongregasyon. An iba nga makinarya sagipo ha pag-imprinta hin halapad nga mga papel nga hihimoon nga libro, nga madagmit hinduro nga ginbabalhin ha usa nga  bodega nga tikang ha salog tubtob ha alkuba an kahitaas ngada nga ikadto ito ha hirimoan hin libro. Tukma hinduro an proseso nga ginkukontrol hin kompyuter.

Pagbaya han mga bisita ha imprintahan, ginlibot nira an hirimoan hin libro. Dinhi an makinarya naghihimo hin matig-a an kobre nga mga libro ngan deluxe nga mga Biblia nga naabot hin 50,000 nga kopya kada adlaw. An mga pahina han libro ginsusunod-sunod, gintatahi, ngan gin-uutdan an mga ligid, ngan katapos ginbubutangan hin mga kobre. Ginkakarton an human na nga mga libro. An mga karton awtomatiko nga ginsasadhan, ginmamarkahan, ngan ginkakarga ha palita. Dugang pa, an usa nga grupo hin makinarya naghihimo hin libro nga an kobre madakmol nga papel ngan nagkakarton hin mga 100,000 nga libro kada adlaw. Ginkukompwesto liwat ini hin damu nga makinarya—diri maihap nga mga motor, mga konbeyor, mga gear, ngan mga paha—an ngatanan nadalagan ha urusahon nga kalaksi basi makahimo hin mga literatura ha Biblia.

An malaksi hinduro, pinakabag-o nga makinarya han imprintahan nga nadalagan nga may katukma nga sugad ha maopay-an-kahimo nga relo, usa nga urusahon nga produkto han moderno nga teknolohiya. Sugad han aton makikita, usa liwat ito nga ebidensya han gugma, pagtoo, ngan pagkamasinugtanon han katawohan han Dios. Kondi, kay ano nga ginbalhin an mga buruhaton ha pag-imprinta tikang ha Brooklyn, New York, ngadto ha Wallkill?

Usa nga nangunguna nga hinungdan amo an pagpasimple han pag-imprinta ngan pagpadara pinaagi han pag-urosa han mga proseso ha usa nga lugar. Ha sulod hin mga dekada, an mga libro gin-iimprinta ngan ginpapadara tikang ha Brooklyn, ngan an mga magasin gin-iimprinta ngan ginpapadara tikang ha Wallkill. Pinaagi han pagtampo han mga buruhaton maiibanan an mga boluntaryo ngan magagamit hin mas maopay an mga kontribusyon nga igindedikar para ha pag-alagad ha Dios. Dugang pa, tungod kay nagtitikadaan na an mga imprintahan ha Brooklyn, duha nga bag-o nga MAN Roland Lithoman nga makina an gin-order tikang ha Alemanya. Daku hinduro ini salit diri maigo ha imprintahan ha Brooklyn.

Hi Jehova an Aada ha Luyo han Buruhaton

Tikang pa hadto, katuyoan han pag-imprinta nga maipadangat ha mas damu pa an maopay nga sumat han Ginhadian han Dios. Matin-aw nga ginbibendisyonan ni Jehova an buruhaton tikang ha tinikangan. Tikang han 1879 tubtob 1922, an mga libro iginpapaimprinta ha komersyal nga mga imprintahan. Han 1922, nagplite hin unom-ka-andana nga istraktura ha 18 Concord Street ha Brooklyn ngan nagpalit hin garamiton ha pag-imprinta hin mga libro. Hito nga panahon, nagruhaduha an pipira kon maaakos ba han kabugtoan an buruhaton.

Usa han mga nagruhaduha amo an presidente han kompanya nga nag-imprinta han kadam-an han aton mga libro. Ha iya pagbisita ha Concord Street, hiya nagsiring: “Maopay hinduro an kalidad han iyo imprintahan, kondi waray ha iyo maaram ha pagpadalagan hito. Ha sulod hin unom ka bulan maguguba ini nga makinarya; ngan masasantop niyo nga an angayan nga mga tawo ha pag-imprinta para ha iyo amo adton nagbubuhat na hito, ngan mga propesyonal na ha pag-imprinta.”

An paramangno han imprintahan hito nga panahon, hi Robert J. Martin, nagsiring: “Baga hin may punto ito nga pangatadongan, kondi waray hito tagda an Ginoo; ngan pirme gud hiya upod ha amon. . . . Waray pag-iha katapos hito naghihimo na kami hin mga libro.” Durante han sumunod nga 80 ka tuig, an mga Saksi ni Jehova nag-imprinta hin binilyon nga literatura ha ira kalugaringon nga makinarya.

Katapos, han Oktubre 5, 2002, ha tinuig nga katirok han Watch Tower Bible and Tract Society of Pennsylvania, iginpahibaro nga gin-aprobahan han Nagmamando nga Lawas an pagbalhin han pag-imprinta ha sanga han Estados Unidos ngadto ha Wallkill. Duha nga bag-o nga makinarya an gin-order, nga igindul-ong han Pebrero 2004. Kinahanglan disenyuhon ngan padakuon han kabugtoan an imprintahan ngan magin andam ha pagkarawat han bag-o nga makinarya nga diri malahos hin 15 ka bulan. Katapos, an pag-instalar han mga  operasyon han bag-o nga hirimoan han libro ngan han pagpadara kinahanglan makompleto ha sulod han masunod nga siyam ka bulan. An pipira bangin nagruhaduha han hinbaroan nira an eskedyol—baga hin imposible an toka. Kondi, maaram an kabugtoan nga ha bendisyon ni Jehova, mahihimo ito.

‘Malipayon nga Espiritu han Kooperasyon’

Tungod kay maaram nga an katawohan ni Jehova kinaburut-on nga maghahatag han ira kalugaringon, gintikangan han kabugtoan an proyekto. (Salmo 110:3) An kadaku hito nagkinahanglan hin mas damu nga boluntaryo kay han aada ha mga departamento han konstruksyon han Bethel. Sobra 1,000 nga kabugtoan nga may-ada mga kapas ha konstruksyon tikang ha Estados Unidos ngan Canada an nagboluntaryo ha pagtrabaho hin usa ka semana tubtob hin tulo ka bulan sugad nga bahin han programa han temporaryo nga pagboluntaryo. An iba nga tikang ha mga programa han internasyonal nga surugoon ngan internasyonal nga boluntaryo gin-imbitar nga makigbahin ha proyekto. Daku liwat an naibulig han mga Regional Building Committee.

Para ha damu, an pagboluntaryo ha proyekto ha Wallkill nangahulogan hin daku gud nga gasto ha pagbiyahe ngan hin panahon nga diri hira makakatrabaho. Kondi, malipayon nga nagsakripisyo hira. An paghatag hin akomodasyon ngan pagkaon hinin damu nga dugang nga boluntaryo naghatag hin mga higayon para ha pamilya han Bethel nga mangalimbasog ha pagsuporta ha proyekto. Sobra 535 nga membro han pamilya han Bethel tikang ha Brooklyn, Patterson, ngan Wallkill an nagboluntaryo nga magtrabaho ha proyekto ha mga Sabado, dugang pa ha ira mga toka ha sulod han semana. An sobra kadaku nga suporta nga iginhatag han katawohan han Dios ngada hinin makasaysayan nga buruhaton nagin posible la tungod kay hi Jehova an aada ha luyo han proyekto.

An iba naghatag hin pinansyal nga bulig. Pananglitan, an kabugtoan nakakarawat hin surat tikang ha noybe-anyos nga hi Abby. Nagsurat hiya: “Mapasalamaton gud ako ha ngatanan nga iyo ginbubuhat—an paghimo han ngatanan nga maopay nga mga libro. Bangin bumisita ako ha iyo ha diri maiha. Nasiring hi Tatay nga makada kami sunod nga tuig! Magsusul-ot ako hin I.D. basi makilal-an niyo ako. Adi an 20 dolyares para ha bag-o nga makina! Balon ko ini, pero karuyag ko nga ihatag ini ha iyo.”

Usa nga bugto nga babaye an nagsurat: “Alayon karawata an akon regalo nga ginansilyo nga mga kalo nga ginhimo han akon minos nga mga kamot. Karuyag ko nga ihatag ini ha mga boluntaryo nga nagtatrabaho ha proyekto ha Wallkill. An usa nga almanake nagsiring nga magigin mahagkot hinduro an panahon han katugnaw. Husto man o diri an nagpublikar hito, diri ako maaram. Kondi maaram ako nga damu han buruhaton ha Wallkill an hihimoon ha gawas, ngan karuyag ko siguruhon nga diri mahahagkotan an ulo han akon kabugtoan. Waray ako han mga kaabtik nga ginbibiling han kabugtoan, pero nakakaggansilyo ako, salit nagdesisyon ako nga gamiton ini nga kaabtik ha pagbulig ha paagi nga akon maaakos.” Lakip hini an 106 nga ginansilyo nga kalo!

An imprintahan natapos uyon ha eskedyol. Hi John Larson, an paramangno han imprintahan, nagsiring: “May-ada malipayon gud nga espiritu han kooperasyon. Hin-o an makakagruhaduha nga  ginbibendisyonan ni Jehova an buruhaton? Madagmit hinduro nga nagpadayon an proyekto. Nahinunumdoman ko nga natindog ako ha lapok han Mayo 2003 ngan nagkikita ha kabugtoan nga nagbubutang han pundasyon han istraktura. Waray pa mag-usa ka tuig, natindog na liwat ako hito nga dapit ngan nagkikita ha usa nga makina ha pag-imprinta nga naandar.”

Programa han Dedikasyon

An programa ha pagdedikar han bag-o nga imprintahan, upod han tulo nga istraktura nga urukyan, gindumara ha Wallkill han Lunes, Mayo 16, 2005. An mga pasilidad han Bethel ha Patterson ngan Brooklyn, sugad man an Bethel ha Canada, konektado pinaagi han video. Ha kabug-osan, 6,049 an tinambong ha programa. Hi Theodore Jaracz, usa nga membro han Nagmamando nga Lawas han mga Saksi ni Jehova, amo an tsirman ngan naghatag hin halipot nga sumaryo han kasaysayan han buruhaton ha pag-imprinta. Pinaagi han mga interbyu ngan mga video, ginrepaso han mga membro han Komite han Sanga nga hira John Larson ngan John Kikot an kasaysayan han proyekto han pagtukod ngan han mga buruhaton ha pag-imprinta ha Estados Unidos. Hi John Barr han Nagmamando nga Lawas an naghatag han kataposan nga pahayag, gindedikar an bag-o nga imprintahan ngan an tulo nga residensya ngadto kan Jehova nga Dios.

Durante han sumunod nga semana, an mga Bethelite han Patterson ngan Brooklyn gintagan hin higayon nga malibot an bag-o nga mga pasilidad. Ha kabug-osan, 5,920 an binisita durante hito nga semana.

Paonan-o Naton Gintatagad an Imprintahan?

Ha pahayag han dedikasyon, ginpahinumdoman ni Bugto Barr an iya mga mamarati nga an imprintahan, bisan kon makatarag-ob, diri nagpapabug-at han makinarya. An ginpapabug-atan amo an mga tawo. An literatura nga aton gin-iimprinta may-ada daku hinduro nga epekto ha kinabuhi han mga tawo.

An tagsa han bag-o nga makinarya nakakaimprinta hin usa ka milyon nga tract ha sulod la hin sobra usa ka oras! Kondi, an usa nga tract mahimo magkaada hin daku hinduro nga epekto ha kinabuhi han usa. Pananglitan,  han 1921 an usa nga grupo han kalalakin-an nga nagmimintinar han riles ha Aprika del Sur nagtrabaho dida hito. Usa ha ira, an lalaki nga hi Christiaan, nakakita hin usa nga papel nga naipit ha ilarom han riles. Usa ito han aton mga tract. Ginbasa ito ni Christiaan nga may-ada daku nga interes. Dinalagan hiya basi tapoon an iya umagad nga lalaki ngan malipayon nga nagpahibaro: “Yana nabilngan ko an kamatuoran!” Waray pag-iha, nagsurat hira para hin dugang nga impormasyon. Nagpadara an sanga han Aprika del Sur hin dugang pa nga literatura ha Biblia. An duha nga lalaki nag-aram, nagpabawtismo, ngan nagpaangbit han kamatuoran ha Biblia ngadto ha iba. Sugad nga resulta, damu an kinarawat han kamatuoran. Ha pagkamatuod, temprano han dekada han 1990, sobra usa ka gatos han ira pamilya an mga Saksi ni Jehova—an ngatanan tungod han pakakita han usa nga lalaki hin tract ha riles!

An mga literatura nga aton gin-iimprinta, siring ni Bugto Barr, nagtutugway ha mga tawo ha kamatuoran, nabulig ha ira nga magpabilin ha kamatuoran, nagpapagios ha ira nga magin mas madasigon, ngan naghihiusa han kabugtoan. Ngan labaw ha ngatanan, an mga literatura, nga kita ngatanan may-ada bahin ha pagpanaltag, naghihimaya ha aton Dios, hi Jehova!

Paonan-o Gintatagad ni Jehova an Imprintahan?

Ginhangyo liwat ni Bugto Barr an mga mamarati nga tagdon kon ano an panlantaw ni Jehova ha imprintahan. Sigurado gud nga diri hiya nadepende hito. Masusugo niya an mga bato nga magsangyaw han maopay nga sumat! (Lukas 19:40) Dugang pa, diri hiya apektado han kakomplikado, kadaku, kalaksi, o mga mahihimo han makinarya. Aw, hiya an naglarang han uniberso! (Salmo 147:10, 11) Maaram hi Jehova hin mas abanse nga mga paagi ha paghimo hin mga literatura, mga paagi nga waray pa mahimo o bisan mahanduraw han mga tawo. Kon sugad, ano an nakikita ni Jehova nga iya gud ginpapabilhan? Sigurado nga nakikita niya dida hini nga imprintahan an presyoso nga mga kalidad han iya katawohan—an ira gugma, pagtoo, ngan pagkamasinugtanon.

Naghatag hi Bugto Barr hin ilustrasyon ha pagpakita kon paonan-o nahiuupod an gugma. Usa nga bata nga babaye an naghimo hin keyk para ha iya mga kag-anak. Posible nga malilipay an mga kag-anak. Oo, magin anoman an keyk, an makakapalipay ha mga kag-anak amo an gugma han ira anak, nga iginpakita han iya mahinatagon nga buhat. Ha pariho nga paagi, kon ginkikita ni Jehova ini nga bag-o nga imprintahan, nakikita niya an lahos pa han istraktura ngan makinarya. Labaw ha ngatanan, gintatagad niya ito sugad nga kapahayagan han gugma para ha iya ngaran.—Hebreo 6:10.

Dugang pa, sugad la nga gintagad ni Jehova an arka sugad nga kapahayagan han pagtoo ni Noe, gintatagad niya ini nga imprintahan sugad nga nakikita nga ebidensya han aton pagtoo. Pagtoo ha ano? Natoo hi Noe nga matutuman an igintagna ni Jehova. Natoo kita nga nagkikinabuhi kita ha kataposan nga mga adlaw, nga an maopay nga sumat amo an pinakaimportante nga mensahe nga ginpapasamwak ha tuna, ngan importante nga mabatian ito han mga tawo. Maaram kita nga an mensahe han Biblia makakaluwas hin mga kinabuhi.—Roma 10:13, 14.

Waray ruhaduha, nakikita liwat ni Jehova hini nga imprintahan an kapahayagan han aton pagkamasinugtanon. Sugad han aton hinbabaroan, kaburut-on niya nga an maopay nga sumat igsangyaw ha bug-os nga kalibotan antes umabot an kataposan. (Mateo 24:14) Ini nga imprintahan, kaupod hadton ha iba nga mga rehiyon ha globo, magkakaada bahin ha pagtuman hito nga sugo.

Oo, an gugma, pagtoo, ngan pagkamasinugtanon nga iginpakita ha pagtirok han ginkikinahanglan nga mga pundo, pagtukod, ngan pagpalakat hini nga mga pasilidad nakikita liwat ha madasigon nga buruhaton han katawohan ni Jehova ha ngatanan nga dapit samtang nagpapadayon hira ha pagpasamwak han kamatuoran ha ngatanan nga andam mamati.

[Kahon/Mga Retrato ha pahina 11]

PAGHALUAG HAN PAG-IMPRINTA HA ESTADOS UNIDOS

1920: An mga magasin gin-imprinta ha siyahan nga rotary press, ha 35 Myrtle Avenue, Brooklyn.

1922: Ginbalhin an imprintahan ha unom-ka-andana nga istraktura ha 18 Concord Street. Tikang hito nga panahon, nag-imprinta na hin mga libro.

1927: An imprintahan iginbalhin ha bag-o nga istraktura nga gintukod ha 117 Adams Street.

1949: An dugang nga siyam ka andana nagdoble han kadaku han imprintahan.

1956: An imprintahan ha Adams Street nadoble utro han an bag-o nga istraktura gintukod ha 77 Sands Street.

1967: Gintukod an napulo-ka-andana nga istraktura, salit nagin posible an surumpay nga imprintahan nga mas daku hin napulo ka pilo kay ha orihinal nga istraktura.

1973: Gintukod an sanga nga imprintahan ha Wallkill, labi na para ha paghimo hin mga magasin.

2004: Gintarampo ha Wallkill an ngatanan nga operasyon ha Estados Unidos may kalabotan ha pag-imprinta, paghimo hin libro, ngan pagpadara.