An Panahon han Selebrasyon—Matatagbaw ba Hito an Imo mga Ginlalaoman?

“Nagsugo hi Pedro [nga Bantogan] nga magkaada hin espesyal nga mga misa para ha Bag-o nga Tuig ha ngatanan nga singbahan ha Enero 1. Dugang pa, nagsugo hiya nga an mga sanga han evergreen nga naangay ha selebrasyon gamiton ha pag-adorno han mga poste han purtahan ha sulod han kabalayan ngan an ngatanan nga tuminungnong han Moscow ‘magpakita han ira kalipay pinaagi han maaringasa nga pag-abi-abi’ ha usa kag usa ha Bag-o nga Tuig.”—Peter the Great—His Life and World.

ANO an imo ginlalaoman durante han tinatawag han damu nga panahon han selebrasyon? An mga tawo ha bug-os nga kalibotan nasiring nga ini nga kapanahonan nakasentro ha Pasko, an tradisyonal nga adlaw han katawo ni Kristo, kondi nag-uupod liwat ito han pagsaurog han Bag-o nga Tuig. Salit ginpahilawig ito nga kapiyestahan. Bangin bakasyon hini nga panahon an mga kag-anak ngan mga anak, salit baga hin maopay ini nga okasyon para ha mga pamilya nga magkaurosa. Kondi, gintatawag han iba ini nga kapanahonan nga “an Kapaskohan,” tungod kay karuyag nira pasidunggan hi Kristo hini nga panahon han tuig. Bangin inaabat mo liwat nga ini an pinakaimportante nga bahin han okasyon.

Pagpasidungog man ito kan Kristo, pagpahimulos hin panahon upod han pamilya, o ito nga duha, minilyon nga mga bana, asawa, ngan anak ha bug-os nga kalibotan an nagpapamulat gud hini. Kumusta man hini nga tuig? Magigin espesyal ba ito nga panahon para ha pamilya, ngan espesyal ba ito para ha Dios? Kon may-ada pagkatitirok han pamilya, magtatagbaw ba ito han imo mga ginlalaoman, o magpapakyas ba ito ha imo?

Damu nga nagpapamulat han relihiyoso nga bahin an nakakaobserba nga an Pasko ngan Bag-o nga Tuig agsob nga ginsasaurog nga diri nakasentro kan Kristo. Lugod, an panahon han selebrasyon nagigin panahon la ha pagkarawat hin mga regalo, usa nga pasangilan para hin panagtawo nga mahimo mag-upod hin panggawi nga nagpapasipara kan Kristo, o usa nga nangunguna nga hinungdan para hin pagkatitirok han pamilya. Damu ka beses nga an sugad nga pagkatitirok nadadaot tungod hin usa o sobra pa nga mga membro han pamilya nga nagpapatakas ha mga pagkaon ngan ha mga de-alkohol nga irinmon, nga nagpapatikang hin mga paglantugi nga agsob gud mag-aghat hin kamadarahog ha pamilya. Bangin naobserbahan mo na ito, o bangin naeksperyensyahan mo pa ngani ito.

Kon amo, bangin masantop mo nga gutiay la hinduro an nagbag-o tikang ha panahon ni Emperador Pedro nga Bantogan han Russia, nga iginhulagway ha tinikangan. Tungod kay nagugupong ha mga panhitabo, damu yana an naghahandom nga an panahon han selebrasyon magin panahon unta para han hilarom nga pagpamalandong mahitungod ha Dios ngan han maopay nga pagkatitirok han pamilya. Nagkakampanya pa ngani an iba para hin pagbag-o, nga nagamit hin mga puplunganon sugad han, Hi Jesus an hinungdan han selebrasyon. Kondi may pagbag-o ba nga mapapahinabo? Ngan magpapasidungog gud ba ini kan Kristo? May-ada ba mga hinungdan ha pagkaada hin iba nga panlantaw mahitungod ha panahon han selebrasyon?

Basi makabiling hin makapatagbaw nga mga baton, aton tagdon an kahimtang pinaagi ha panlantaw han mga tawo han usa nga nasud nga sadang magkaada hin espesyal nga hinungdan ha pag-apresyar hini nga panahon han tuig.