Nahinunumdoman Mo Ba?

Nagpahimulos ka ba ha pagbasa han bag-o nga mga gowa han An Barantayan? Bueno, kitaa kon mababaton mo an masunod nga mga pakiana:

• Kay ano nga an siyahan nga sala—an pagtalapas ni Adan—maipapariho ha napanunod nga sakit?

Sugad ito hin sakit tungod kay naipasa ni Adan an sala ha iya mga anak. Salit aton napanunod an depekto han sala, sugad la nga an pipira nga mga anak nakakapanunod hin sakit tikang ha ira mga kag-anak.—8/15, pahina 5.

• Ano an nangunguna nga mga hinungdan han pag-uswag han kamadarahog yana?

Hi Satanas nangangalimbasog nga ipahirayo an katawohan tikang kan Jehova pinaagi ha pagsabwag hin espiritu han kamadarahog ha mga kasingkasing, pananglitan pinaagi han mga sine, musika, ngan mga uyag ha kompyuter nga nag-aaghat ha mga parauyag ha pag-abat nga sugad hin hira an aktuwal nga nakikigbahin ha kamadarahog ngan pamatay. An kamadarahog nga nakikita ha media nagin usa nga hinungdan han damu nga mga buhat han kamadarahog.—9/1, pahina 29.

• Hin-o hi Ponsio Pilato?

Usa hiya nga Romano nga noble ha haruhabubo nga ranggo nga posible nga kaapi hadto ha militar. Ginpili ni Emperador Tiberio han Roma hi Pilato nga magin gobernador han probinsya han Judea han 26 K.P. Ha pagbista kan Jesus, hinbatian ni Pilato an mga akusasyon nga ginhimo han Judio nga mga lider. Basi matagbaw an mga tawo, gin-uyonan niya an pagpatay kan Jesus.—9/15, pahina 10-12.

• Ano an “tigaman” nga gin-unabi ha Mateo 24:3 (NW)?

Ini nga tigaman ginkukompwesto hin pipira nga mga bahin nga ha kabug-osan nagkukompwesto hin pangirilal-an nga tigaman, o sinyales. An tigaman nag-uupod han girra, gutom, peste, ngan mga linog, ngan makakabulig ito ha mga sumurunod ni Jesus nga makilala an iya “presensya” sugad man an “kataposan hini nga sistema han mga butang.”—10/1, pahina 4-5.

• Ano an Diaspora, ngan ano nga mga lugar an nahiupod?

Ini nga termino naaplikar ha mga Judio nga nag-uukoy ha gawas han Palestina. Ha siyahan nga siglo, an nangunguna nga Judio nga mga sentro nakadto ha Sirya, Asia Minor, Babilonya, ngan Ehipto, ngan may-ada mas gudti nga mga komunidad ha Europa nga bahin han Romano nga Imperyo.—10/15, pahina 12.

• Makakagtipig ba an usa nga Kristiano hin maopay nga konsensya kon nakarawat hiya hin trabaho nga nag-oobligar ha iya nga magdinara-dara hin armas?

Personal nga desisyon an pagkarawat hin sekular nga trabaho nga nagkikinahanglan hin pagdinara-dara hin armas de puygo o iba nga hinganiban. Kondi, tungod han trabaho nga nag-oobligar han pagdinara-dara hin armas nagigin posible nga an usa magin salaan ha dugo kon gamiton niya ito ngan namimeligro liwat hiya nga madaot o mamatay tungod han pag-atake o pagbulos. An usa nga Kristiano nga nagdadara-dara hin sugad nga armas diri magigin kwalipikado ha bisan ano nga espesyal nga mga pribilehiyo ha kongregasyon. (1 Timoteo 3:3, 10)—11/1, pahina 31.

• Tungod kay an pulong nga “Armagedon” ginkuha ha mga pulong nga “Bukid han Megido,” an girra ba han Armagedon mahitatabo ha usa nga bukid ha Butnga Sinirangan?

Diri. Waray Bukid han Megido, may-ada la bungtod nga mas hitaas ha sapit nga walog nga kapatagan ha Israel. Gutiay hinduro ito para ha ngatanan nga “mga kahadian ha tuna, ngan [ha] ira mga kasundalohan.” An daku nga girra han Dios mahitatabo ha bug-os nga kalibotan, ngan tatapuson hito an ngatanan nga mga girra. (Pahayag 16:14, 16; 19:19; Salmo 46:8, 9)—12/1, pahina 4-7.