Pagbulig ha mga Intsik ha Mexico

“AN NAPULO ka tawo tikang ha ngatanan nga yinaknan han mga nasud magunit, hira magunit han saya niya nga usa nga Judio, ha pagsiring: Kami maupod ha iyo, kay kami nakabati nga an Dios aada kaupod niyo.” (Sakarias 8:23) Yana nga panahon, inin makaruruyag nga tagna natutuman ha bug-os nga kalibotan. An katawohan “tikang ha ngatanan nga yinaknan han mga nasud” sugad hin nagunit ha espirituwal nga mga Israelita basi magsingba kan Jehova nga Dios. An mga Saksi ni Jehova interesado gud ha katumanan hini nga tagna. Damu ha ira an nag-aaram hin lain nga pinulongan basi makigbahin ha bug-os-kalibotan nga pagsangyaw nga buruhaton.

Sugad hito an ginbubuhat han mga Saksi ni Jehova ha Mexico. Ginbabanabana nga 30,000 nga mga tawo nga nagyayakan hin Inintsik an nag-uukoy didto. Han 2003, 15 ha ira an tinambong ha Memoryal han kamatayon ni Kristo nga gindumara ha Mexico City. Tungod hito nakita han mga Saksi ha Mexico an potensyal para ha espirituwal nga pag-uswag ha Intsik nga kanataran. Basi magkaada hin dugang pa nga mga magsarangyaw nga mag-aataman ha katawohan nga nagyayakan hin Inintsik, gin-organisa an tulo-ka-bulan nga kurso basi tutdoan an Mexicano nga mga Saksi hin simple nga mga presentasyon ha Mandarin nga Inintsik. Ha kabug-osan, 25 nga mga Saksi an nag-eskwela. Ha pagtapos hito, usa nga opisyal tikang ha nagyayakan-hin-Mandarin nga komunidad ha Mexico City an tinambong ha gradwasyon, ngan nagpakita han makatirigamnan nga epekto han klase ngada ha komunidad nga nagyayakan hin Inintsik. An usa nga lokal nga institusyon han mga Intsik nagtanyag ha tulo han mga estudyante nga magin mga eskolar ngan ipadara ha iba nga nasud basi mapauswag an ira pagyakan hin Inintsik.

Upod ha pag-aram han kurso ha linggwahe an praktikal nga pagbansay. Katapos adman an pipira nga simple hinduro nga mga pulong, an mga estudyante nagtikang dayon pagsangyaw ha mga Intsik ha komersyal nga lugar han Mexico City. An madasigon nga mga estudyante nakagtikang hin 21 nga mga pag-aram ha Biblia. Nakabulig gud hin daku an brosyur nga Ano an Ginkikinahanglan ha Aton han Dios? ha Inintsik nga pinulongan nga iginsurat ha Romano nga alpabeto, nga tinatawag nga Pinyin.

Paonan-o an mga Saksi nga nagtikang pa la hini nga kurso nagdumara hin mga pag-aram ha Biblia? Ha siyahan, “Qing Du [Alayon basaha]” la an ira nayayakan ngan gintutudlok an usa nga parapo ngan katapos an pakiana. Katapos bumasa ngan bumaton an tawo ha Inintsik nga pinulongan, nasiring hira, “Shei shei [Salamat]” ngan, “Hen Hao [Maopay gud].”

An sugad nga pag-aram ha Biblia natikangan ha usa nga babaye nga Kristiano ha ngaran la. Katapos han ikatulo nga pag-aram, naghunahuna an Saksi kon nakakasabot gud ba an babaye han impormasyon. Salit igin-upod han Saksi an usa nga bugto nga lalaki nga Inintsik gud an pinulongan. Han  ginpakianhan han bugto an babaye kon may-ada ba hiya mga pakiana, nagpakiana an babaye: “Basi mabawtismohan, kinahanglan ba nga maaram ako lumangoy?”

Waray pag-iha, usa nga Pag-aram ha Libro han Kongregasyon an naestablisar, nga may-ada aberids han natambong nga 9 nga tawo nga nagyayakan hin Inintsik ngan 23 nga Mexicano nga mga Saksi. Usa hadton natambong amo an usa nga Intsik nga doktor, nga nakakarawat hin Barantayan ngan Awake! nga mga magasin nga Kinatsila tikang ha usa han iya mga pasyente. Tungod kay diri hiya nakakasabot han Kinatsila, iginpapahubad niya an pipira nga mga pulong ha usa nga tawo. Tungod kay nasantop niya nga an mga magasin naghihisgot mahitungod han Biblia, ginpakianhan niya an pasyente kon makakakuha ba hiya hin mga magasin ha Inintsik nga pinulongan. Nakakuha hiya, ngan pinaagi han sanga nga opisina han mga Saksi ni Jehova ha Mexico, ginhimo an mga kahikayan nga an doktor bisitahon han usa nga Saksi nga nagyayakan hin Inintsik. An iya nanay ha Tsina may-ada Biblia, ngan an doktor nalipay ha pagbinasa hito. Han nagdesisyon hiya pagkadto ha Mexico, ginsidngan hiya han iya nanay nga diri umundang ha pagbasa han Biblia. Salit nag-iinampoon hiya nga may-ada unta usa nga makabulig ha iya nga mahibaroan an dugang pa mahitungod ha Dios han Biblia. Nagsiring hiya: “Pinamatian han Dios an akon pag-ampo!”

Natambong liwat ha pag-aram han libro an usa nga Intsik nga pamilya nga naplite hin mga kwarto ha balay han usa nga Mexicana nga nag-aaram han Biblia ha mga Saksi ni Jehova. Bisan kon an Intsik nga pamilya nakakasabot hin gutiay la nga Kinatsila, naapi hira ha mga paghisgot mahitungod han Biblia. Inabot an panahon nga an pamilya nagpakiana ha Saksi nga nagdudumara han pag-aram kon may-ada ba hiya mga publikasyon ha Inintsik nga pinulongan. Paglabay hin halipot nga panahon, gindumarahan hira hin pag-aram ha Biblia ha Inintsik nga pinulongan. Waray pag-iha, an pamilya nagpahayag hin hingyap ha pagsangyaw ha ira mga igkasi-tuminungnong ngan ha pagdedikar han ira kinabuhi ngadto kan Jehova.

Ha pagkatinuod, makuri pag-adman an Inintsik nga pinulongan. Kondi, sugad han aton nahibaroan ha ginhisgotan na nga mga eksperyensya, ha bulig ni Jehova an katawohan tikang ha damu nga mga yinaknan, upod na an Inintsik, nahibabaro han kaburut-on han Dios ha Mexico, sugad man ha iba nga mga dapit han kalibotan.

[Retrato ha pahina 17]

Usa nga klase ha Inintsik nga pinulongan ha Mexico City

[Retrato ha pahina 18]

Usa nga Mexicana nga Saksi nga nagdudumara hin pag-aram ha Biblia ha Inintsik nga pinulongan

[Retrato ha pahina 18]

Pagbalay-balay nga ministeryo ha Inintsik nga pinulongan ha Mexico City