‘Pagwali hin Kaluwasan ha mga Bihag’

HA TINIKANGAN han ministeryo ni Jesus, hiya nagsiring nga bahin han sugo ha iya an ‘pagwali hin kaluwasan ha mga bihag.’ (Lukas 4:18) Ha pagsunod han susbaranan han ira Agaron, iginsasangyaw han totoo nga mga Kristiano an maopay nga sumat han Ginhadian ha “ngatanan nga [“klase hin,” NW] mga tawo,” gintatagan hira hin kagawasan tikang ha pagin bihag ha espirituwal ngan binubuligan hira nga mapauswag an ira kinabuhi.—1 Timoteo 2:4.

Yana nga panahon, ini nga buruhaton nag-uupod han pagsangyaw ha literal nga mga bihag—mga tawo nga priso tungod han magkalainlain nga mga krimen ngan mga nagpapabili ha espirituwal nga kagawasan. Hinaot makabiling ka hin kalipay hinin makapadasig nga report mahitungod han pagsangyaw nga mga buruhaton han mga Saksi ni Jehova ha mga prisohan han Ukraine ngan ha iba nga mga dapit ha Europa.

Tikang ha Pagin mga Giyan ha Droga Ngadto ha Pagin mga Kristiano

Ha 38 ka tuig han kinabuhi ni Serhii, a 20 hito an ginasto niya ha prisohan. Ha prisohan pa ngani niya natapos an iya pag-eskwela. Hiya nasiring: “Mga tuig na an naglabay, napriso ako tungod kay nakamatay ako, ngan may-ada pa ako tarapuson nga sentensya. Ha prisohan, nagios ako hadto sugad hin mayor, ngan an iba nga mga priso nahadlok ha akon.” Inabat ba niya nga nagkaada hiya hin kagawasan tungod hini? Waray. Ha sulod hin damu ka tuig, sugad hin uripon hi Serhii ha droga, alkohol, ngan tabako.

Katapos usa nga igkasi-priso an nag-istorya han kamatuoran han Biblia ha iya. Sugad adto hin sanag hin kapawa ha kasisidman. Ha sulod hin pipira la ka bulan, nalamposan niya an iya pagin giyan, nagin magsarangyaw han maopay nga sumat, ngan nabawtismohan. Yana, sagipo hi Serhii ha prisohan, ngan nag-aalagad hiya sugad nga bug-os-panahon nga ministro ni Jehova. Nakabulig hiya hin pito nga kriminal ha pagbag-o han ira mga paagi ngan ha pagin iya espirituwal nga kabugtoan. Unom ha ira an nakagawas na, kondi priso pa gihapon hi Serhii. Diri hiya nasusubo hini tungod kay malipayon hiya nga makakabulig hiya ha iba nga magkaada hin kagawasan ha espirituwal nga pagkabihag.—Buhat 20:35.

Usa han mga gindumarahan hin pag-aram ni Serhii ha prisohan amo hi Victor, usa nga parabaligya ngan giyan ha droga hadto. Han nakagawas hi Victor ha prisohan, nagpadayon hiya ha pag-uswag ha  espirituwal ngan ha kaurhian naggradwar ha Ministerial Training School ha Ukraine. Yana nag-aalagad hiya sugad nga espesyal payunir ha Moldova. Hi Victor nasiring: “Nagtikang ako pagsigarilyo han 8 anyos ako, sobra nga pag-ininom han 12, ngan paggamit hin droga han 14. Karuyag ko magbag-o, kondi napakyas an ngatanan ko nga pangalimbasog. Katapos, han 1995, han nagpaplano pa la kami nga mag-asawa nga magpahirayo na ha akon magraot nga mga kaupod, nabuno hiya hin homicidal maniac tubtob nga mamatay. Nagin miserable gud an akon kinabuhi. ‘Hain na yana an akon asawa? Ano an nahitatabo kon namamatay an usa ka tawo?’ Padayon nga nagpapakiana ako kondi waray ako nabibilngan nga mga baton. Nagtikaduro an akon paggamit hin droga basi madaog an akon pag-abat hin kawaray pulos. Naaresto ako tungod ha pagbaligya hin mga droga ngan ginsentensyahan hin lima ka tuig nga kaprisohan. Didto, ginbuligan ako ni Serhii nga mabilngan an mga baton. Damu ka beses na ako nangalimbasog nga umundang ha pagdroga, kondi yana la ako naglampos pinaagi han bulig tikang ha Biblia. Gamhanan gud an Pulong han Dios!”—Hebreo 4:12.

Nagbag-o an mga Kriminal nga Baga hin Diri Na Magbabag-o

Hi Vasyl diri gud nagamit hin droga, kondi waray hiya makalikay hin kaprisohan. “Giyan ako ha kickboxing,” siring niya. “Nagbansay ako ha pagkastigo hin mga tawo ha paagi nga waray bisan ano nga pangirilal-an nga nakastigo hiya.” Ginamit ni Vasyl an iya kamadarahog ha pagpanikas hin mga tawo. “Tulo ka beses nga napriso ako, ngan tungod hito gindiborsyo ako han akon asawa. Durante han ultimo nga lima ka tuig nga sentensya, nakabasa ako hin literatura han mga Saksi ni Jehova. Nagpagios ini ha akon nga basahon an Biblia, kondi ginbubuhat ko pa gihapon an akon gud naruruyagan—pakig-away nga waray surundon.

“Kondi, katapos hin unom ka bulan nga pagbasa han Biblia, may-ada nagbag-o ha akon disposisyon. Diri na ako natatagbaw ha pagdaog hin away, sugad han akon inabat hadto. Salit nagtikang ako pag-usisa han akon kalugaringon ha bulig han Isaias 2:4 ngan nasantop ko nga tubtob nga diri ko mabag-o an akon panhunahuna, magigin priso ako ha akon bug-os nga kinabuhi. Salit iginlabog ko an ngatanan ko nga gamit ha pakig-away ngan nagtikang ako pagpauswag han akon personalidad. Diri ito masayon, kondi an pagpamalandong ngan pag-ampo hinay-hinay nga nakabulig ha akon nga makaundang ha akon maraot nga mga binuhatan. Usahay, nagtatangis ako nga nakikimalooy kan Jehova nga tagan ako hin kusog nga malamposan an akon pagkagiyan. Ha kataposan, naglampos ako.

 “Han nakagawas na ako ha prisohan, nakaupod ko utro an akon pamilya. Yana, nagtatrabaho ako ha minahan hin karbon. Naghahatag ini ha akon hin igo nga panahon ha pakigbahin ha pagsangyaw nga buruhaton upod han akon asawa ngan ha pagtuman han akon mga responsabilidad ha kongregasyon.”

Hi Mykola ngan an iya kasangkayan nanikas na hin pipira nga bangko ha Ukraine. Tungod hini nasentensyahan hiya hin napulo ka tuig nga kaprisohan. Antes hiya mapriso, makausa pa la hiya makasulod hin singbahan—basi mangandam nga kawatan ito nga singbahan. Waray maglampos an plano, kondi tungod hito nahunahuna ni Mykola nga an Biblia sigurado nga puno hin nakakauyam nga mga istorya mahitungod han Ortodokso nga mga padi, mga kandila, ngan relihiyoso nga mga kapiyestahan. Hiya nasiring: “Diri gud ako maaram kon kay ano, kondi nagtikang ako pagbasa han Biblia. Nahipausa ako ha pakasabot nga iba gud ito ha akon ginhunahuna!” Naghangyo hiya hin pag-aram ha Biblia ngan nabawtismohan han 1999. Ha iya hitsura yana, makuri gud toohan nga inin mapainubsanon nga ministeryal nga surugoon usa nga maraot nga armado nga parapanikas hin bangko hadto!

Hi Vladimir ginsentensyahan hin kamatayon. Samtang naghuhulat han pagpataya ha iya, nag-ampo hiya ha Dios ngan nagsaad ha pag-alagad ha Iya kon diri ito madayon. Samtang hito nga panahon, nabag-o an balaud, ngan an iya sentensya nga kamatayon nagin bug-os-kinabuhi nga kaprisohan na la. Basi tumanon an iya saad, hi Vladimir nagtikang pagpamiling han totoo nga relihiyon. Kinuha hiya hin correspondence course ngan kinarawat hin diploma tikang ha usa nga denominasyon han Adbentista, pero waray hiya matagbaw.

Kondi, katapos basahon an Barantayan ngan Awake! nga mga magasin ha librarya han prisohan, nagsurat hi Vladimir ha sanga nga opisina han mga Saksi ni Jehova ha Ukraine, ngan naghangyo nga bisitahon. Han ginbisita hiya han kabugtoan hito nga lugar, gintatagad na niya an iya kalugaringon nga Saksi ngan nagsasangyaw na ha prisohan. Ginbuligan hiya nga magin kwalipikado sugad nga magwarali han Ginhadian. Ha panahon han ginsurat ini, hi Vladimir ngan an pito pa dida hito nga prisohan an naghuhulat nga mabawtismohan. Kondi may-ada hira problema. Tungod kay an mga priso nga ginsentensyahan hin bug-os-kinabuhi nga kaprisohan iginbubutang ha mga selda han mga priso nga parapriho an relihiyon, hi Vladimir ngan an iya mga kaupod ha selda parapriho an relihiyon. Salit hin-o an ira masasangyawan? Ira iginsasangyaw an maopay nga sumat ha mga gwardya han prisohan ngan pinaagi ha pagsurat.

Hi Nazar binalhin tikang ha Ukraine ngadto ha Republika han Czech, diin inapi hiya ha usa nga grupo han mga kawatan. Nagresulta ini ha tulo ngan tunga ka tuig nga kaprisohan. Samtang priso, kinarawat hiya han mga pagbisita han mga Saksi ni Jehova tikang ha syudad han Karlovy Vary, nahibaro han kamatuoran, ngan bug-os nga nagbag-o. Han makita ini nga pagbag-o, an usa han mga gwardya nagsiring ha mga kaupod ni Nazar ha selda: “Kon kamo ngatanan magin pariho hito nga taga-Ukraine, puydi na ako magbag-o hin trabaho.” An usa pa nagsiring: “Ini nga mga Saksi ni Jehova mga eksperto gud. An tawo nasulod ha prisohan sugad nga kriminal; nagawas sugad nga desente nga tawo.” Yana nakauli na hi Nazar. Nahibaro hiya ha pagpanday ngan nag-asawa, ngan hira nga mag-asawa aada ha bug-os-panahon nga ministeryo. Mapasalamaton gud hiya ha mga pagbisita han mga Saksi ni Jehova ha prisohan!

Pagkilala han mga Opisyal

Diri la mga priso an nagpapasalamat ha serbisyo han mga Saksi ni Jehova. Hi Miroslaw Kowalski, nga paragyakan para ha usa han mga prisohan ha Polandia, nagsiring: “Inaapresyar gud namon an ira mga pagbisita. An iba nga mga priso may-ada makasurubo nga mga eksperyensya ha kinabuhi. Bangin waray gud hira tratoha sugad nga mga tawo. . . . An bulig [han mga Saksi] birilhon gud tungod kay kulang kami hin mga empleyado ngan mga edukador.”

An nagdudumara han usa pa nga prisohan ha Polandia nagsurat ha sanga nga opisina, naghahangyo ha mga Saksi nga dugangan pa an ira mga buruhaton ha prisohan nga iya gindudumara. Kay ano? Hiya nagsaysay: “An mas agsob nga pagbisita han mga representante han Watchtower mahimo makabulig ha mga priso nga makapatubo hin makaruruyag nga mga kalidad, salit napupugngan hira ha pagin madarahog.”

Usa nga peryodiko ha Ukraine an nagreport mahitungod hin priso nga may depresyon nga nagsari ha pag-unay kondi nabuligan han mga Saksi ni Jehova. “Yana, nagtitikanormal na an emosyon hini nga lalaki,” siring han report. “Ginsusunod niya an rutina ha prisohan ngan usa nga susbaranan han iba nga mga priso.”

 Mga Kapulsanan nga Lahos Pa ha mga Prisohan

An mga kapulsanan han mga ginbubuhat han mga Saksi ni Jehova nalahos pa ha mga prisohan. Binubuligan pa gihapon han mga Saksi an mga priso ha ira pakagawas. Duha nga Kristiano, hira Brigitte ngan Renate, an nabulig ha kababayin-an nga priso ha sugad hini nga paagi ha sulod hin pipira na ka tuig. Usa nga peryodiko ha Alemanya, an Main-Echo Aschaffenburg, nagreport mahitungod ha ira: “Gin-aataman nira an mga priso ha sulod hin tulo tubtob lima ka bulan katapos nira makagawas, gindadasig hira nga magkaada katuyoan ha kinabuhi. . . . Kinikilala hira han mga awtoridad sugad nga boluntaryo nga mga probation officer. . . . May-ada liwat hira positibo ngan maopay nga mga pakig-upod ha mga empleyado han prisohan.” Sugad nga resulta hini nga klase hin bulig, damu nga mga tawo an nagdedikar han ira kinabuhi ngadto kan Jehova.

Bisan an mga opisyal han prisohan nagpapahimulos tikang ha pagtutdo han mga Saksi ni Jehova nga basado ha Biblia. Pananglitan, hi Roman usa nga medyor ha militar ngan sikologo ha usa nga prisohan ha Ukraine. Han binisita an mga Saksi ha iya balay, inuyon hiya nga dumarahan hin pag-aram ha Biblia. Katapos, hinbaroan niya nga ha iya gintatrabahoan, an mga Saksi diri tinutugotan nga makiistorya ha mga priso. Salit nagsarit hiya ha nagdudumara han prisohan ha paggamit han Biblia ha iya pakiistorya ha mga priso. Gintugotan hiya, ngan mga napulo nga priso an nagpakita hin interes. Regular nga iginsusumat ni Roman an iya nag-uuswag nga kahibaro ha Biblia ngada hini nga mga priso, ngan maopay gud an resulta han iya mga pangalimbasog. Han nakagawas na an pipira nga mga priso, nagpadayon hira ha pag-uswag ngan nagin bawtismado nga mga Kristiano. Tungod kay nakita ni Roman an gahum han Pulong han Dios, mas ginseryoso niya an iya pag-aram. Binaya hiya ha militar ngan nagpadayon han iya pagpanutdo mahitungod han Biblia. Yana nakikigbahin hiya ha pagsangyaw nga buruhaton kaupod hin usa nga priso hadto.

“Dinhi nabubuligan kami tungod han Biblia, mga publikasyon mahitungod han Biblia, ngan pag-aram han Biblia,” nagsurat an usa nga priso. Ini nga mga pulong naghuhulagway gud han panginahanglan hin mga literatura mahitungod han Biblia nga naeksister ha pipira nga prisohan. Usa nga kongregasyon ha Ukraine an nagreport mahitungod han buruhaton nga pagtutdo may kalabotan han Biblia ha usa nga lokal nga prisohan: “Mapasalamaton an administrasyon ha mga literatura nga amon igintatagana. Ginsusuplayan namon hira hin 60 nga kopya han kada gowa han An Barantayan ngan Awake!” Usa pa nga kongregasyon an nagsurat: “Nag-aataman kami hin prisohan nga may-ada 20 nga gudtiay nga librarya. An tagsa nga librarya ginbubutangan namon han aton nangunguna nga mga publikasyon, ngan 20 ka karton an kabug-osan hini.” Ha usa nga prisohan, an mga gwardya nagtitipig hin mga kopya han aton mga magasin ha librarya basi an mga priso makapahimulos ha tagsa nga gowa.

Han 2002, nag-establisar an sanga nga opisina ha Ukraine hin Prison Desk. Tubtob hini nga panahon, nakigkomunikar na ito ha mga 120 nga prisohan ngan nagtoka na hin mga kongregasyon ha pag-ataman hito. Kada bulan mga 50 nga surat an nakakarawat tikang ha mga priso, kadam-an hito an naghahangyo hin mga literatura o hin pag-aram ha Biblia. Ginpapadad-an hira han sanga nga opisina hin mga libro, magasin, ngan brosyur tubtob nga makaistorya hira han kabugtoan hito nga lugar.

“Hinumdumi niyo an mga binilanggo,” nagsurat hi apostol Pablo ha iya mga igkasi-Kristiano. (Hebreo 13:3) An iya ginhihisgotan amo adton napriso tungod han ira pagtoo. Yana, ginhihinumdoman han mga Saksi ni Jehova adton mga napriso, ginbibisita an mga prisohan, ‘ginwawalihan hin kaluwasan an mga bihag.’—Lukas 4:18.

[Footnote]

[Retrato ha pahina 9]

Pader han prisohan, L’viv, Ukraine

[Retrato ha pahina 10]

Mykola

[Retrato ha pahina 10]

Hi Vasyl ngan an iya asawa, hi Iryna

[Retrato ha pahina 10]

Victor