An Amo La nga Solusyon!

HI Lasaro ngan an iya kabugtoan nga hira Marta ngan Maria, naukoy ha Betania, usa nga bungto nga nahimumutang mga tulo ka kilometro ha gawas han Jerusalem. Usa ka adlaw han waray didto an ira sangkay nga hi Jesus, nagkasakit hin grabe hi Lasaro. Nabaraka hinduro an iya kabugtoan. Nagpadara hira hin mensahe kan Jesus. Duha ka adlaw katapos umabot an sumat, kinadto hiya basi usisahon hi Lasaro. Samtang nagbibiyahe, ginsidngan ni Jesus an iya mga disipulo nga tikadto hiya basi sangpiton hi Lasaro tikang ha pagkaturog. Ha siyahan, waray hiya hisabti han mga disipulo, kondi ginklaro ito ni Jesus ngan hiya siniring: “Hi Lasaro namatay.”—Juan 11:1-14.

Han inabot hi Jesus ha lubnganan ni Lasaro, iya anay iginpakuha an bato nga nakakatabon ha ganghaan hito. Katapos mag-ampo ha daku nga tingog, hiya nagsugo: “Lasaro, kadi gowa.” Ngan hi Lasaro ginowa. An tawo nga patay na ha sulod hin upat ka adlaw nabanhaw.—Juan 11:38-44.

An asoy may kalabotan kan Lasaro nagpapakita nga an pagkabanhaw amo an sigurado nga solusyon ha kamatayon. Kondi nahitabo gud ba an milagro han pagbanhaw kan Lasaro? An Biblia nasiring nga nahitabo ito. Basaha an asoy ha Juan 11:1-44, ngan makikita mo kon mationan-o katin-aw an mga detalye hito. Maininigar mo ba nga nahitabo ito? Kon nigaran mo ito, bangin kwestyunon mo liwat an pagkatotoo han ngatanan nga milagro nga nakarekord ha Biblia, upod na an pagkabanhaw ni Jesu-Kristo mismo. Ngan “kon hi Kristo waray mabanhaw,” siring han Biblia, “an iyo pagtoo waray kapulsanan.” (1 Korinto 15:17) An pagkabanhaw usa ka basihan nga Kasuratanhon nga katutdoan. (Hebreo 6:1, 2) Kondi, ano an kahulogan han pulong nga “pagkabanhaw”?

Ano an Kahulogan han “Pagkabanhaw”?

Ha Kristiano Griego nga Kasuratan, an pulong nga “pagkabanhaw” mababasa hin sobra 40 ka beses. Iginhubad ito tikang ha Griego nga pulong nga ha literal nangangahulogan hin “pagtindog utro.” An Hebreo nga pulong nga katugbang hito nangangahulogan hin “kahiuli han mga patay.” Kon namatay na an tawo, ano an babanhawon? Diri an lawas, nga nadudunot ngan nabalik ha tapotapo han tuna. An babanhawon diri an amo gihapon nga lawas kondi an amo gihapon nga persona nga namatay. Kon sugad, an pagkabanhaw nag-uupod han pagpahiuli han bug-os nga pagkatawo han indibiduwal—an iya batasan, an iya mga ginbuhat, ngan an ngatanan nga detalye han iya pangirilal-an.

Hi Jehova nga Dios, nga hingpit an memorya, waray problema ha paghinumdom han bug-os nga pagkatawo han mga namatay. (Isaias 40:26) Tungod kay hiya an Nagpatikang han kinabuhi, masayon ni Jehova banhawon an amo gihapon nga persona ha bag-o nga ginporma nga lawas. (Salmo 36:9) Dugang pa, an Biblia nasiring nga hi Jehova nga Dios ‘naghihingyap’—sinsero nga nag-uungara ngan naruruyag—ha pagbanhaw han mga patay. (Job 14:14, 15, NW) Malipayon gud kita nga hi Jehova nga Dios diri la kay nakakabanhaw han tawo kondi naruruyag liwat hiya nga buhaton ito!

Hi Jesu-Kristo liwat may-ada importante nga bahin ha pagbanhaw han mga patay. Sobrahay la hin usa ka tuig katapos niya tikangan an iya ministeryo, hi Jesus nagsiring: “Sugad man nga an Amay nagbabanhaw han mga minatay, ngan naghahatag ha ira hin kinabuhi, sugad man an Anak naghahatag hin kinabuhi hadton iya buot tagan.” (Juan 5:21) Diri ba an nahitabo kan Lasaro nagpapakita nga hi Jesu-Kristo may-ada gahum ngan hingyap ha pagbanhaw han mga patay?

Kumusta man an mahitungod han ideya nga may-ada butang ha sulod naton nga nagpapadayon nga buhi kon kita namamatay? An katutdoan han pagkabanhaw ngan an ideya han pagkadiri-mamaratyon han tawhanon nga kalag o espiritu, ha pagkamatuod, nagkakasumpaki. Kon may-ada usa nga butang ha aton sulod nga diri namamatay,  pagkikinahanglanon pa ba naton an pagkabanhaw? An bugto ni Lasaro nga hi Marta diri natoo nga han namatay an iya bugto, nagpadayon hiya pag-eksister ha lugar han mga espiritu. Natoo hiya ha pagkabanhaw. Han ginpasarig hiya ni Jesus: “An imo bugto mababanhaw,” hi Marta siniring: “Ako maaram, nga hiya mababanhaw ha pagkabanhaw ha kataposan nga adlaw.” (Juan 11:23, 24) Ngan han nabanhaw hi Lasaro, waray hiya mag-istorya hin bisan ano mahitungod han kinabuhi katapos han kamatayon. Patay hiya. “An mga patay diri maaram han bisan ano,” siring han Biblia. “Waray buruhaton, o paghunahuna, o hibaro, o kinaadman, didto ha Sheol [an komon nga lubnganan han katawohan], ngain ikaw kakadto.”—Eklesiastes 9:5, 10.

Kon sugad, sumala ha Biblia, pagkabanhaw la an solusyon ha kamatayon. Kondi ha ngatanan nga namatay, hin-o an babanhawon, ngan diin hira ibubutang?

Hin-o an Babanhawon?

‘Maabot an oras nga an ngatanan nga aadto ha [“handumanan nga,” NW] mga lubnganan, makakabati han tingog ni Jesus ngan man-gugowa,’ nagsiring hi Jesus. (Juan 5:28, 29) Sumala hini nga saad, babanhawon an aada ha handumanan nga mga lubnganan—an aada ha panumdoman ni Jehova. Salit an pakiana amo ini, Ha ngatanan nga namatay, hin-o gud an aada ha panumdoman han Dios nga naghuhulat hin pagkabanhaw?

Ha kapitulo 11 han libro nga Hebreo han Biblia, nakalista an mga ngaran han mga tawo nga matinumanon nga nag-alagad ha Dios. Babanhawon hira sugad man an maunungon nga mga surugoon han Dios nga namatay ha bag-o pa la nga mga tuig. Kumusta man an mga tawo nga napakyas ha pagsunod ha mga suruklan han Dios ha katadongan, bangin tungod han kakulang hin kahibaro? Aada ba liwat hira ha panumdoman han Dios? Oo, damu ha ira, tungod kay an Biblia nagsasaad: “May pagkabanhaw han mga minatay han mga magtadong ngan diri man magtadong.”—Buhat 24:15.

Kondi, may-ada mga tawo nga diri babanhawon. “Kon magpakasala kita hin tinuyo katapos ta makakarawat han kinaadman ha kamatuoran,” siring han Biblia, “waray na nabilin nga halad tungod ha mga sala. Kondi an usa nga makaharadlok nga paghulat ha paghukom.”  (Hebreo 10:26, 27) An iba nakabuhat hin mga sala nga waray na kapasayloan. Waray hira ha Hades (komon nga lubnganan han katawohan) kondi aadto ha Gehenna, usa nga simboliko nga lugar han waray kataposan nga kabungkagan. (Mateo 23:33, NW) Pero, kinahanglan kita magbantay nga diri maghukom kon an usa nga tawo babanhawon o diri. An Dios la an may-ada katungod ha sugad hini nga paghukom. Maaram hiya kon hin-o an aadto ha Hades ngan kon hin-o an aadto ha Gehenna. Mas maopay para ha aton nga magkinabuhi uyon ha kaburut-on han Dios.

Pagkabanhaw ha Kinabuhi ha Langit—Para kan Kanay?

An pinakamakatirigamnan nga pagkabanhaw amo an kan Jesu-Kristo. Hiya ‘ginpatay ha unod, kondi ginbuhi ha espiritu.’ (1 Pedro 3:18) Waray pa gud tawo nga nakaeksperyensya hin sugad nga pagkabanhaw antes hito. Hi Jesus mismo nagsiring: “Waray usa nga nakasaka ha langit, kon diri an linusad tikang ha langit, an Anak han tawo.” (Juan 3:13) Oo, an Anak han tawo an siyahan nga ginbanhaw sugad nga espiritu nga persona. (Buhat 26:23) Ngan may-ada iba pa nga ginbanhaw katapos ha iya. An Kasuratan nasiring: “An tagsa-tagsa ha iya kalugaringon nga pagsunod: Hi Kristo amo an siyahan nga bunga; ngan an ngatanan nga kan Kristo, ha iya pag-abot.”—1 Korinto 15:23.

An usa nga gutiay nga grupo han katawohan—“an ngatanan nga kan Kristo”—babanhawon ha kinabuhi ha langit para hin espesyal nga katuyoan. (Roma 6:5) Magmamando hira kaupod ni Kristo sugad nga ‘mga hadi ha tuna.’ (Pahayag 5:9, 10) Dugang pa, mag-aalagad hira sugad nga mga saserdote ha paagi nga magkakaada hira bahin ha pagpara han mga epekto han sala nga napanunod han katawohan tikang ha siyahan nga tawo, hi Adan. (Roma 5:12) Adton nagmamando upod ni Kristo sugad nga mga hadi ngan mga saserdote may kadamuon nga 144,000. (Pahayag 14:1, 3) Ano nga klase hin lawas an ira nakakarawat kon binabanhaw hira? “Lawas nga espirituhanon,” siring han Biblia. Tungod hini magigin posible para ha ira nga umukoy ha langit.—1 Korinto 15:35, 38, 42-45.

San-o an mga membro han 144,000 babanhawon ngadto ha langit? “Durante han [kan Jesus] presensya,” baton han 1 Korinto 15:23 (NW). An mga panhitabo ha kalibotan tikang han 1914 matin-aw nga nagpapakita nga an presensya ni Kristo ngan an “kataposan han kalibotan” nagtikang hito nga tuig. (Mateo 24:3-7) Salit makatadunganon an paghunahuna nga an pagkabanhaw han matinumanon nga mga Kristiano ngadto ha langit nagtikang na, bisan kon, syempre, diri nakikita han mga tawo. Nangangahulogan ito nga an mga apostol ngan an siyahan nga mga Kristiano ginbanhaw na ngadto ha langitnon nga kinabuhi. Kumusta man an mga Kristiano nga nabubuhi yana nga may-ada sigurado ngan hatag han Dios nga paglaom ha pagmando kaupod ni Kristo ha langit? Babanhawon hira “ha usa ka pagpirok,” nagpapasabot nga ha pagkamatay dayon nira. (1 Korinto 15:52) Tungod kay an pagkabanhaw hinin gutiay nga grupo han 144,000 nauuna ha pagkabanhaw han diri maihap nga kadamu han mga tawo nga babanhawon ha tuna, tinatawag ito nga “an nauna nga pagkabanhaw” ngan an “siyahan nga pagkabanhaw.”—Filipos 3:11, NW; Pahayag 20:6.

Hin-o an Babanhawon ha Kinabuhi Dinhi ha Tuna?

Sumala ha Kasuratan, an kadam-an han mga patay babanhawon dinhi ha tuna. (Salmo 37:29; Mateo 6:10) Ha paghulagway han iya makatarag-ob nga bisyon ha mga binanhaw, hi apostol Juan nagsurat: “Ihinatag han dagat an mga minatay nga nakada hito; ngan ihinatag han kamatayon ngan Hades an mga minatay nga nakada ha ira: ngan ginhukman an tagsa-tagsa ha ira sumala ha ira mga buhat. Ngan an kamatayon ngan Hades ipinanlabog ngadto ha linaw nga kalayo. Amo ini an ikaduha nga kamatayon, bisan an linaw nga kalayo.” (Pahayag 20:11-14) An aadto ha Hades, o Sheol—an komon nga lubnganan han katawohan—aada ha panumdoman han Dios. An kada tagsa ha ira babanhawon. (Salmo 16:10; Buhat 2:31) Ngan an tagsa huhukman uyon ha iya mga panggawi katapos hiya banhawon. Katapos hito, ano an mahitatabo ha kamatayon ngan ha Hades? Ilalabog hira ha “linaw nga kalayo.” Nangangahulogan ini nga an katawohan diri na gud maaapektohan  han kamatayon nga ira napanunod kan Adan.

An bisan hin-o nga namatayan hin hinigugma malilipay hinduro ha paghibaro mahitungod han saad han Dios nga pagkabanhaw! Han banhawon ni Jesus an bugtong nga anak nga lalaki han balo ha Nain, sigurado nga nalipay gud an balo! (Lukas 7:11-17) Ngan may kalabotan ha mga kag-anak han 12-anyos nga daragita nga ginbanhaw ni Jesus, an Biblia nasiring: “Hito dayon nga takna hira nalipay hinduro.” (Markos 5:21-24, 35-42, NW; Lukas 8:40-42, 49-56) Ha bag-o nga kalibotan nga iginsaad han Dios, magigin makalilipay an pag-abi-abi utro han mga hinigugma.

Ano an mahimo magin epekto ha aton yana han paghibaro han kamatuoran mahitungod han pagkabanhaw? “An kadam-an han mga tawo nahahadlok han kamatayon ngan nangangalimbasog paglikay ha paghunahuna hito,” siring han The World Book Encyclopedia. Kay ano? Tungod kay ha kadam-an nga tawo, an kamatayon usa nga misteryo—usa nga butang nga diri hinbabaroan ngan ginkakahadlokan. An paghibaro han kamatuoran mahitungod han kahimtang han mga patay ngan an pagkaada han paglaom ha pagkabanhaw makakahatag ha aton hin kaisog kon atubangon na naton ‘an kataposan nga kaaway, an kamatayon.’ (1 Korinto 15:26) Ini nga kahibaro nakakabulig liwat ha aton nga mas mailob an kasakit kon namamatayan kita hin sangkay o paryente.

San-o magtitikang an pagbanhaw dinhi ha tuna? An tuna yana puno hin kamadarahog, araway, pagpaagay hin dugo, ngan polusyon. Kon an mga patay babanhawon ha tuna nga sugad hito, sigurado nga magigin temporaryo la an kalipayan. Kondi, an Maglalarang nagsaad nga ha diri maiha bubungkagon na niya an presente nga kalibotan nga kontrolado ni Satanas. (Proberbios 2:21, 22; Daniel 2:44; 1 Juan 5:19) An katuyoan han Dios para ha tuna hirani na matuman. Katapos hito, ha mamurayawon nga bag-o nga kalibotan nga hinimo han Dios, babanhawon an binilyon nga patay na yana.

[Retrato ha pahina 7]

An kadam-an han mga patay babanhawon ha tuna