Pag-alagad ha Kongregasyon nga Iba an Yinaknan

“HINKIT-AN ko in lain nga anghel nga naglulupad-lupad ha ginkakatungaan han langit,” nagsurat hi apostol Juan, “nga may-ada waray kataposan nga maopay nga sumat nga igwawali ngadto hadton mga nag-uukoy ha tuna, ngan ha ngatanan nga nasud ngan panon, ngan yinaknan ngan katawohan.” (Pahayag 14:6) Sugad nga katumanan hinin matagnaon nga bisyon, an maopay nga sumat han Ginhadian han Dios iginsasangyaw ha iba-iba nga yinaknan, o linggwahe ha bug-os nga tuna. Damu hini nga mga linggwahe an ginagamit han mga dayo nga nag-uukoy hirayo ha ira natawohan nga mga nasud. Ini nga mga tawo liwat nakakabati han maopay nga sumat tikang ha madasigon nga mga Saksi ni Jehova nga nahibaro hin iba nga linggwahe.

Usa ka ba han mga Saksi nga nag-aalagad ha kongregasyon nga iba an yinaknan? O naghuhunahuna ka ba ha pagbuhat hito? Basi maglampos, nagkikinahanglan ka hin diri makikalugaringon nga motibo ngan husto nga disposisyon. Tungod kay an imo tumong amo an pagbulig ha iba nga mahibaro han kamatuoran tikang ha Pulong han Dios, may-ada ka han gimaopayi nga motibo—gugma ha Dios ngan ha igkasi-tawo. (Mateo 22:37-39; 1 Korinto 13:1) An hingyap ha pagbulig ha iba nga mahibaro mahitungod ha Dios naghahatag hin mas marig-on nga hinungdan kay ha pakabiling la hin kalipay ha asosasyon, pagkaon, ngan kultura han mga tawo nga iba an nasyonalidad o grupo. Mabug-at ba para ha imo an ideya han pagtoon hin iba nga yinaknan? Kon amo, makakabulig an pagkaada husto nga panlantaw. “Ayaw kahulop ha yinaknan,” siring ni James, nga nahibaro han Hinapon. An pakahibaro nga damu na an naglampos antes ha imo makakabulig ha imo nga makapadayon ngan makagtipig hin positibo nga disposisyon. Kon sugad, paonan-o ka mahibabaro hin bag-o nga yinaknan? Ano an mabulig ha imo nga makapahiuyon ha kongregasyon diin ginagamit ito nga yinaknan? Ngan ano an kinahanglan mo buhaton basi makapabilin nga marig-on ha espirituwal?

Pangalimbasugi nga Hibaroan an Yinaknan

Damu an paagi ha paghibaro hin yinaknan. Iba-iba an paagi nga karuyag han mga estudyante ngan mga magturutdo. Kondi, para ha kadam-an nga mga estudyante, an pagtambong ha pipira nga klase nga gintututdoan hin kwalipikado nga magturutdo nakakahimo han pag-aram nga mas malaksi ngan mas masayon. An pagbasa han Biblia ngan mga publikasyon nga iginbasar ha Biblia ha imo bag-o nga yinaknan ngan pagpamati ha bisan ano nga mga nakarekord mabulig ha imo nga magdamu an imo bokabularyo ngan mag-uswag an imo kahibaro ha teokratiko nga mga termino. An mag-opay nga mga programa ha radyo, TV, ngan video makakabulig liwat ha imo nga magin pamilyar ha yinaknan ngan kultura. May kalabotan ha kahilawig han mga sesyon ha pag-aram, an diri tag-iha nga pag-aram kada adlaw agsob nga mas epektibo kay han higlaba hinduro kondi panalagsa la nga mga sesyon.

An pag-aram hin yinaknan pariho ha pag-aram ha paglangoy. Diri ka mahibabaro paglangoy pinaagi la ha pagbinasa hin libro. Kinahanglan ka kumadto ha tubig ngan maglangoy-langoy dida hito. Pariho liwat hito an pag-aram hin yinaknan. Makuri ito kon mag-inaram ka la. Kinahanglan mo makigkomunikar ha mga tawo ha kada posible nga panahon—pamatii an ira pagyakan, pakig-upod ha  ira, ngan pagyakan gud! An Kristiano nga mga buruhaton nagtatagana hin maopay nga higayon para hini. Agsob nga maiaaplikar mo dayon an imo hinbaroan ha ministeryo ha kanataran. “Baga hin makakurulba ito,” siring ni Midori, nga nag-aaram hin Inintsik, “kondi nakikita han mga tagbalay nga kita nga mga Saksi nangangalimbasog gud. Nakakaaghat ini ha ira nga mamati ha amon. An amon la kinahanglan isiring ha ira yinaknan amo ini, ‘Nalilipay ako nga makilala ka,’ ngan makikita mo an kalipay ha ira mga nawong!”

Daku liwat nga bulig an Kristiano nga mga katirok. Ha kada katirok, pangalimbasog ha pagkomento bisan la makausa. Anoman kamakakurulba ito paghunahunaon ha tinikangan, ayaw kabaraka. Karuyag han kongregasyon nga maglampos ka! Hi Monifa, nga nag-aaram han yinaknan han Korea, nasiring: “Mapasalamaton gud ako ha bugto nga babaye nga nasapit ha akon durante han mga katirok, ngan iya iginsusurat an kahulogan han espisipiko nga mga pulong para ha akon. Nakakabulig gud ha akon an iya mahigugmaon ngan pasensyoso nga suporta.” Samtang nag-uuswag an imo bokabularyo, makakagtikang ka ha paghunahuna nga gamit an bag-o nga yinaknan—iginkakaw-ing an mga pulong ha kon ano gud an ginrirepresentaran hito imbes nga hubaron an kada pulong ha imo hunahuna.

An imo siyahan nga tumong amo an ‘pakayakan hin yinaknan nga masayon hisabtan.’ (1 Korinto 14:8-11) Bisan kon bangin pasensyoso an mga tawo, an mga sayop o naiiba nga tono mahimo makaulang ha ira pagpamati ha imo mensahe. An paghatag hin atensyon ha husto nga pagluwas ngan gramatika tikang ha tinikangan makakapugong ha imo ha pagkaada maraot nga mga nabatasan ha pagyakan nga makuri na mawara. Hi Mark, nga nag-aram hin Swahili, nagsuhestyon: “Hangyoa adton nakakayakan hin maopay han linggwahe nga tadungon an imo pinakagrabe nga mga sayop, ngan katapos pasalamati hira ha pagbuhat hito!” Syempre, magin matinagaron ha panahon ngan kusog hadton nabulig ha imo. Bisan kon bangin may hangyoon ka ha pag-usisa han imo ginhimo, pangalimbasog ha pag-andam han imo mga pahayag ngan mga komento nga ginagamit an mga pulong nga hinbabaroan o ginkita mo na. Nagpapalaksi ini han proseso han pag-aram ngan nabulig ha imo nga makayakan nga may kompyansa.

Magpadayon ha Pag-uswag

“An pag-aram hin iba nga linggwahe amo an pinakamakuri nga akon nabuhat,” siring ni Monifa. “May mga panahon nga karuyag ko na umundang. Kondi nahinunumdoman ko nga naruruyag gud an estudyante ha Biblia ha pagpamati hin higlarom nga espirituwal nga kamatuoran ha akon simple nga pagyakan hin Koreano ngan an kalipay nga ipinapakita han kabugtoan kon nag-uuswag ako bisan gutiay la.” An punto amo ini, ayaw undang dayon. An imo tumong amo an pakagtutdo ha iba han nagluluwas han kinabuhi nga mga kamatuoran tikang ha Kasuratan. (1 Korinto 2:10) Salit, an paghibaro ha pagtutdo han Biblia ha iba nga yinaknan nagkikinahanglan hin nakasentro ngan maiha nga pangalimbasog. Samtang nag-uuswag ka, likayi an pagsukol han imo pag-uswag pinaagi han negatibo nga pagtanding han imo kalugaringon ha iba. An mga nag-aaram hin bag-o nga yinaknan nag-uuswag ha iba-iba nga kalaksi ngan ha iba-iba nga paagi. Kondi, mapulsanon nga mahibaro han imo kalugaringon nga pag-uswag. (Galasia 6:4) “An pag-aram hin yinaknan pariho hin pagsaka ha hagdanan,” siring ni Joon nga nag-aaram hin Inintsik. “Ha panahon nga inaabat mo nga diri ka nag-uuswag, dida mo nasasantop nga nag-uswag ka na ngay-an.”

 An pag-aram hin bag-o nga yinaknan bug-os-kinabuhi nga buruhaton. Salit, malipay ha pagbuhat hito, ngan ayaw paglaom hin kahingpitan. (Salmo 100:2) Diri nalilikyan an mga pagsayop. Bahin ito han proseso han pag-aram. Han nagtikang an usa nga Kristiano ha pagsangyaw nga gamit an Italyano nga yinaknan, iya ginpakianhan an tagbalay, “Maaram ka ba han silhig han kinabuhi?” An iya unta karuyag ipasabot amo an “katuyoan han kinabuhi.” Gindapit han usa nga Saksi nga nag-aaram han Polako nga yinaknan an kongregasyon nga kantahon an ayam imbes an kanta. Ngan tungod la hin gutiay nga pagbag-o han tono, gindasig han usa nga nag-aaram hin Inintsik an iya mga mamarati nga magtoo ha estante han libro ni Jesus imbes nga ha iya lukat. An kapulsanan han mga sayop amo nga an nahibabaroan nga husto nga mga termino tungod hito, diri na gud hinngangalimtan.

Pagbuhat Upod han Kongregasyon

An pagkaiba-iba han yinaknan diri la amo an nakakabahin han mga tawo. An pagkaiba-iba han kultura, rasa, ngan nasud agsob nga nagbabahin pa gud han katawohan. Kondi, malalamposan ini nga mga ulang. Usa nga eskolar nga nag-aaram han mga grupo han relihiyon ha Europa nga nagamit hin Inintsik an nakaobserba nga an mga Saksi ni Jehova “diri apektado han nasyonalidad.” Ha mga Saksi, hiya nagsiring, “diri importante an gintikangan, ngan an yinaknan usa la nga instrumento basi hisabtan an pulong han Dios.” Oo, an pag-aplikar han mga prinsipyo han Biblia amo an nakakabulig ha totoo nga mga Kristiano nga malamposan an pagkaiba-iba han mga nasud. Para hadton ‘nanunul-ot han bag-o nga pagkatawo, waray Gresyahanon o Judio, o dumuruong.’—Kolosas 3:10, 11.

Salit, an ngatanan ha kongregasyon sadang mangalimbasog ha pag-aghat hin pagkaurosa. Nagkikinahanglan ini nga magin disidido an usa ha pagkarawat hin bag-o nga mga paagi han paghunahuna, pag-abat, ngan pagbuhat han mga butang. Mapupugngan mo an mga pagkaiba-iba nga magin hinungdan han mga pagkabahin-bahin pinaagi ha diri paghatag hin sobra nga atensyon ha personal nga mga karuyag. (1 Korinto 1:10; 9:19-23) Mahibaro ha pagpahimulos han gimaopayi nga mga bahin han ngatanan nga kultura. Hinumdumi, an diri-hakugnon nga gugma amo an yawi ha maopay nga mga relasyon ngan totoo nga pagkaurosa.

Kadam-an han mga kongregasyon nga iba an yinaknan nagtitikang sugad nga gudtiay nga mga grupo, nga an kadam-an han mga membro amo adton nag-aaram han bag-o nga yinaknan, upod han pipira nga bag-o pa la nga nag-aaram han mga prinsipyo ha Biblia. Tungod hito, mas posible magkaada hin diri pagsinabtanay ha sugad nga mga grupo kay ha daku ngan establisado na nga kongregasyon. Salit, an hamtong nga mga Kristiano sadang mangalimbasog nga magin nakakaparig-on ha kongregasyon. An pagpakita hin gugma ngan pagkabuotan ha mga pulong ngan mga buhat nakakabulig ha pagkaada maopay nga palibot diin an mga bag-ohan makakatubo ha espirituwal.

Adton nagbuboluntaryo ha pagbulig ha kongregasyon nga iba an yinaknan kinahanglan liwat magin timbang ha ira mga ginlalaoman ha iba. Hi Rick, nga tigurang ha sugad nga kongregasyon, nagsaysay: “An pipira nga bag-ohan nga mga Saksi bangin diri pa gud sugad ka nabansay hin maopay ha mga kaabtik ha pag-organisa pariho han aadto ha establisado na nga mga kongregasyon ha lokal nga yinaknan. Kondi an kakulangan nira ha abilidad, agsob nga ira ginbabawi ha gugma ngan kadasig. Ngan damu nga interesado an nasulod ha kamatuoran.” Pinaagi han regular nga pagtambong ha mga katirok ngan ha iba nga buruhaton han kongregasyon ngan pinaagi ha paghatag han imo kalugaringon ha bisan ano nga imo mahihimo, magigin mapulsanon ka gud ha kongregasyon, bisan samtang nag-aaram ka pa la han yinaknan. Kon urosa nga magbubuhat, an ngatanan makakabulig ha espirituwal nga kauswagan han kongregasyon.

Pagtipig han Espirituwal nga Kusog

An usa nga bugto nga bag-ohan pa la ha kongregasyon nga iba an yinaknan nakabati hin nanay nga nabulig ha iya anak ha pag-andam hin komento. “Pero Nay, diri ba ito puydi pahaliputon pa?” an hangyo han anak. “Diri na anak,” baton han nanay. “An mga nag-aaram na la han aton pinulongan an aton pabatunon hin halipot.”

Para ha usa nga adulto, an diri pakaistorya hin maopay ha sulod hin mga bulan o mga tuig pa ngani mahimo makapanluya ha hunahuna, emosyon, ngan espirituwalidad. “Masayon ako masubo tungod han akon mga limitasyon,” nahinumdom hi Janet, nga maopay na yana mag-Kinatsila. Hi Hiroko, nga nag-aram hin Iningles, nahinumdom nga  hiya naghuhunahuna hadto: ‘Mas damu pa nga Iningles an hinsasabtan han mga ayam ngan mga misay ha amon teritoryo kay ha akon.’ Ngan hi Kathie nasiring: “Hadto may-ada ako mga estudyante ha Biblia ngan notbuk nga puno hin mga baralikon utro, pero nawara ito, han bumalhin ako ha Espanyol nga kongregasyon. Inabat ko nga waray ako nahihimo.”

Ginkikinahanglan hini an positibo nga disposisyon. Han nanluya hi Hiroko, hiya nangatadongan: “Kon nahihimo ito han iba, mahihimo ko man liwat ito.” Hi Kathie nagsiring: “Ginhunahuna ko an akon bana, nga nag-uuswag gud ngan daku an nabubuhat ha kongregasyon. Nakabulig ito ha akon nga malamposan an kakurian ha tinikangan basi padayon ako nga mag-uswag. Nangangalimbasog la gihapon ako hinduro tubtob yana, kondi hinay-hinay nga nagkakaada na ako hin abilidad ha pagsangyaw ngan pagtutdo, ngan nakakalipay ito ha akon.” An iya bana, hi Jeff, nagdugang: “Nakakapanluya an diri pakasabot ha ngatanan nga ginsisiring ha mga pahibaro ngan ha mga katirok han mga tigurang. Kinahanglan ko magin tangkod ngan mapainubsanon ngan magpakiana han mga detalye, kondi an kabugtoan nalilipay ha pagbulig.”

Basi malikyan an espirituwal nga pagkakapoy samtang nag-aalagad ha kongregasyon nga iba an yinaknan, kinahanglan diri ka mapakyas ha pag-una han imo espirituwal nga kahimsog. (Mateo 5:3) Hi Kazuyuki, nga damu na ka tuig nga nag-aalagad ha teritoryo nga Portuges an yinaknan, nagsiring: “Importante nga makakuha kami hin supisyente nga espirituwal nga pagkaon. Salit sugad nga pamilya, nag-aaram ngan nag-aandam kami para ha mga katirok ha amon kalugaringon nga yinaknan sugad man ha Portuges.” Ha pana-panahon, an pipira natambong ha mga katirok ha ira kalugaringon nga yinaknan. Dugang pa, importante an pagkaada igo nga pahuway.—Markos 6:31.

Pag-usisa ha Pangalimbasog nga Pagkikinahanglanon

Kon naghuhunahuna ka pagbalhin ha kongregasyon nga iba an yinaknan, kinahanglan usisahon mo an pangalimbasog nga pagkikinahanglanon ha pagbuhat hito. (Lukas 14:28) May kalabotan hini, an pinakaimportante nga mga bahin nga angay tagdon amo an imo espirituwalidad ngan an imo relasyon kan Jehova. Iampo an imo kahimtang. Tagda an imo padis ngan mga anak. Pakianhi an imo kalugaringon, ‘Aada ba ako ha kahimtang, ngan may-ada ba ako han ginkikinahanglan nga espirituwal ngan emosyonal nga kusog basi buhaton an sugad nga maiha nga proyekto?’ Maaramon an pagbuhat han gimaopayi para ha imo ngan ha imo pamilya ha espirituwal nga paagi. Damu an kinahanglan buhaton ngan daku nga kalipay an imo maieksperyensyahan diin ka man mag-alagad sugad nga parasamwak han Ginhadian.

Para hadton makakag-alagad ha kongregasyon nga iba an yinaknan, may-ada daku nga mga balos. “Usa ini han pinakamakalilipay nga mga eksperyensya han akon kinabuhi,” siring ni Barbara, nga binalhin ha Espanyol nga kongregasyon upod han iya bana. “Pariho ito hin pag-aram utro han kamatuoran. Mapasalamaton gud ako han higayon, labi na tungod kay diri kami mahimo magin mga misyonero ha iba nga nasud.”

Ha bug-os nga kalibotan, kinakarawat han yinukot nga ordinaryo nga katawohan nga iba-iba an pangidaron an ayat han pag-aram hin iba nga yinaknan basi maipasamwak an maopay nga sumat. Kon usa ka ha ira, tipigi nga putli an imo motibo ngan positibo an imo disposisyon. Labaw ha ngatanan, sarig kan Jehova ha pagbendisyon han imo mga pangalimbasog.—2 Korinto 4:7.

[Retrato ha pahina 18]

An pagtambong ha mga klase ha yinaknan nga gintututdoan hin kwalipikado nga magturutdo nakakahimo han pag-aram nga mas malaksi ngan mas masayon

[Retrato ha pahina 20]

Diri sadang ibutang ha peligro an imo espirituwal nga kahimsog samtang nag-aaram kan hin iba nga yinaknan