Ha Paggamit hin Awtoridad, Subara hi Kristo

PIPIRA na ka tuig an naglabay, an usa nga eksperimento mahitungod ha batasan han tawo nagkaada makapainteres nga mga resulta. Adton inapi hini nga eksperimento ginbahin ha duha nga grupo. An usa nga grupo igintoka sugad nga mga gwardya nga magbabantay ha usa nga grupo, nga igintoka sugad nga mga priso. Ano an nahitabo?

“Ha sulod hin pipira ka adlaw,” an report nasiring, “kadam-an [han mga gwardya] nagin abusado ngan nagin maraugdaog, pirme nagsisirot, samtang an mga priso nagin mapinasakupon nga mahadlukon ngan nangungurog ha pagsunod.” An nagin konklusyon han mga parasaliksik amo ini: Haros ngatanan mahimo mahulog ha lit-ag han sayop nga paggamit hin awtoridad.

Awtoridad—Husto Ngan Sayop nga Paggamit

Syempre, an husto nga paggamit han awtoridad mahimo magin maopay nga impluwensya. Mahimo ito magtagana hin kaangayan nga giya ngan magresulta hin kapulsanan ha pisikal, emosyon, ngan espirituwal. (Proberbios 1:5; Isaias 48:17, 18) Kondi, sugad han iginpakita han gin-unabi na nga eksperimento, pirme may-ada peligro nga sumobra ha makatadunganon nga paggamit han awtoridad. Gin-unabi han Biblia ini nga peligro ngan nasiring: “Kon an tawo nga maraot an nagdadara han kaladnganan, an katawohan nanhahayhay.”—Proberbios 29:2; Eklesiastes 8:9.

An pag-abuso han awtoridad nakakadaot, bisan kon ginbubuhat ito nga may-ada maopay nga motibo. Pananglitan, hinin bag-o la usa nga grupo nga nagtututdo hin relihiyon ha Ireland an nangaro hin pasaylo ha publiko tungod ha pag-abuso hin awtoridad han iba nga magturutdo ha kabataan nga igintapod ha ira. Waray ruhaduha nga maopay an katuyoan han damu hini nga magturutdo, kondi an paagi nga ginamit han iba ha ira nakakadaot hinduro. Usa nga pahayagan an nagreport nga “damu nga kabataan an nakaeksperyensya hin kasakit ha buot tungod han sobra nga kamadarahog ngan kabangis han mga pamaagi han damu nga ministro nga nagtututdo.” (The Irish Times) Paonan-o mo, kon sugad, magagamit an awtoridad basi mabuligan an iba nga mabuhat an ira pinakamaopay imbes nga maaghat hira nga masina ha imo tungod han imo ginyayakan o ginbubuhat?—Proberbios 12:18.

“An Ngatanan nga Kagamhanan” Iginhatag kan Jesu-Kristo

Tagda an susbaranan ni Jesu-Kristo. Antes han iya pagsaka ha langit, ginsidngan niya an iya mga disipulo: “Ngatanan nga kagamhanan iginhatag ha akon ha langit ngan ha tuna.” (Mateo 28:18) Ito ba nga mga pulong nakapahadlok ha iya mga disipulo? Ginhunahuna ba nira nga ipapakita na ni  Jesus an disposisyon nga pariho han mga Cesar han Roma, nga kilala ha paggamit hin pwersa ha pagbungkag han pagkontra o pagrebelde?

An rekord han Biblia marig-on nga nabaton hin diri! Ginagamit ni Jesu-Kristo an awtoridad ha paagi nga pariho han ginbubuhat han iya Amay. Bisan kon hi Jehova an may katungod sugad nga makagarahum-ha-ngatanan nga Soberano ha Uniberso, hingyap niya an kinaburut-on nga pag-alagad han iya mga sakop, diri an pagsunod nga diri-ginhuhunahuna, mahadlukon, o nangungurog. (Mateo 22:37) Diri gud gin-aabuso ni Jehova an iya awtoridad. Iginpapakita ini han makapainteres hinduro nga bisyon ni propeta Esekiel.

Hini nga bisyon, nakita ni Esekiel an upat nga anghel nga nasuporta han pagkasoberano han Dios. An kada usa ha ira may-ada upat nga nawong. “Mahitungod han pagkaparapriho han ira mga nawong,” nagsurat hi Esekiel, “hira may-ada nawong hin tawo; ngan hira nga upat may-ada nawong hin leon ha too nga kagiliran; ngan hira nga upat may-ada nawong hin todo nga baka ha wala nga kagiliran; hira nga upat may-ada liwat nawong hin agila.” (Esekiel 1:10) Ini nga upat nga nawong nagrirepresentar han upat nga nangunguna nga kalidad han Dios nga hingpit an pagkabalanse. Iginpapakilala ini ha Pulong han Dios sugad nga: gugma, ginrirepresentaran han nawong han tawo; hustisya, ginrirepresentaran han nawong han leon; ngan kinaadman, ginrirepresentaran han nawong han agila. Inin tulo nga kalidad nagios nga kauyon han ikaupat—gahum, sugad han ipinapakita han nawong han toro nga baka. Ano an iginpapasabot hini ngatanan? Ipinapakita han bisyon nga hi Jehova diri gud nagamit han iya waray-tubtoban nga gahum ngan awtoridad ha usa nga paagi nga diri uyon ha iya iba nga nangunguna nga mga kalidad.

Ha pagsubad ha iya Amay, pirme ginagamit ni Jesu-Kristo an iya awtoridad ha paagi nga hingpit nga nauyon ha gugma, kinaadman, ngan hustisya. Narirepreskohan gud an iya mga disipulo ha pag-alagad ilarom han awtoridad ni Jesus. (Mateo 11:28-30) Kon may-ada man kalidad nga amo an pangirilal-an ni Jehova nga Dios ngan ni Jesu-Kristo,  ito amo an gugma, diri an gahum o awtoridad!—1 Korinto 13:13; 1 Juan 4:8.

Paonan-o Mo Ginagamit an Awtoridad?

Kumusta ka man may kalabotan hini? Ha pamilya, pananglitan, imo ba ginagamit an imo awtoridad ha paagi nga imo na iginpipirit an imo personal nga mga karuyag o kapritso? An iba nga membro ba han imo pamilya nasunod ha imo mga desisyon tungod la han kahadlok o tungod han gugma? An imo ba mas daku nga kusog an hinungdan kon kay ano nga nasusunod ka? Ini an mga pakiana nga mahimo tagdon han mga ulo han pamilya nga an tumong amo an pagtipig han teokratiko nga kahapsay ha sulod han kahikayan han pamilya.—1 Korinto 11:3.

Kumusta man kon may-ada ka awtoridad ha Kristiano nga kongregasyon? Basi mausisa kon ginagamit mo ito ha husto nga paagi, usisaha an imo kalugaringon kon imo ba gin-aaplikar an masunod nga mga prinsipyo nga gin-giyahan ni Jehova nga Dios ngan ginpakita ni Jesu-Kristo sugad nga susbaranan.

‘An surugoon han Ginoo kinahanglan magin matalunoy ha ngatanan, maantuson, magsaway ha kaaghop ha mga nakontra.’—2 Timoteo 2:24, 25.

An iba nga mga indibiduwal ha siyahan nga Kristiano nga kongregasyon naggamit hin daku nga awtoridad. Pananglitan, hi Timoteo mahimo pa ngani ‘magsugo hin pira ka tawo nga diri magtutdo hin iba nga pagturon-an.’ (1 Timoteo 1:3) Kondi, makakasiguro kita nga hi Timoteo nagpakita hin diosnon nga mga kalidad ha ngatanan nga iya ginbuhat, tungod kay waray ruhaduha nga nagbuhat hiya uyon ha sagdon hi Pablo nga magtutdo “ha kaaghop” ngan “magin matalunoy ha ngatanan” ha pagdumara ha Kristiano nga kongregasyon. Tungod kay batan-on pa hi Timoteo, kinahanglan gumawi hiya pariho hin matinalahuron nga anak ha mga mas edaran ngan matinagaron nga bugto ha mga mas batan-on. (1 Timoteo 5:1, 2) Ilarom han sugad nga mahigugmaon nga pagmangno, makikita ha Kristiano nga kongregasyon an espiritu han mapaso, mahigugmaon nga pamilya, diri an espiritu han matugnaw ngan waray-pagbati nga korporasyon han negosyo.—1 Korinto 4:14; 1 Tesalonika 2:7, 8.

‘An mga magburuot han mga Hentil, nagpapakaagaron ha bawbaw nira, ngan an kadagkuan, may gahum ha bawbaw nira. Kondi diri angay ha iyo ini; kondi an bisan hin-o nga karuyag magin daku ha iyo amo lugod an paramangno [“magin surugoon,” NW] ha iyo.’—Mateo 20:25, 26.

An kalibotanon nga mga magmarando “nagpapakaagaron ha bawbaw” han iba pinaagi ha pagpirit han ira karuyag ngan pag-obligar nga buhaton an paagi nga ira karuyag, ngan nananarhog hin pagsirot kon diri hira sumunod. Kondi, ginpabug-atan ni Jesu-Kristo an pag-alagad ha iba ngan diri an pagpwersa ha ira. (Mateo 20:27, 28) Pirme niya gintatrato an iya mga disipulo ha mahigugmaon ngan matinagaron nga paagi. Kon imo ginsusunod an susbaranan ni Jesus, mas masayon gud para ha  iba nga makigkooperar ha imo. (Hebreo 13:7, 17) Nagigin mas masayon gud liwat para ha ira nga magpasakop ha imo awtoridad ngan buhaton pa ngani an sobra kay han ginhahangyo ha ira, ginbubuhat ito hin kinaburut-on ngan diri tungod kay napipiritan.—Mateo 5:41.

“Pasabsaba niyo an panon han Dios nga aada ha iyo, pagbantayan niyo, diri . . . mga agaron han mga igintubyan ha iyo, kondi nga magin susbaranan kamo ha panon.”—1 Pedro 5:2, 3.

Nasasabtan han mga paramangno yana nga may-ada hira baratunon ha Dios ha espirituwal nga kaopayan han ngatanan nga aada ha kongregasyon. Seryoso nga gintutuman nira ini nga responsabilidad. Ha pagmangno han panon han Dios, nangangalimbasog hira ha pagbuhat hito hin kinaburut-on, may kaikag, ngan ha mahigugmaon nga paagi. Pariho kan apostol Pablo, nangangalimbasog gud hira ha pagdasig ngan pagparig-on han pagtoo hadton ira ginmamangnoan, diri ha paggios sugad nga mga agaron han ira pagtoo.—2 Korinto 1:24.

Kon may-ada panginahanglan nga maghatag hin kaangayan nga sagdon, ginbubuhat ito han mga tigurang ha espiritu han kaaghop basi tadungon an nakasayop o buligan an igkasi-Kristiano nga mag-uswag ha espirituwal. Ira pirme ginhuhunahuna an pahinumdom ni apostol Pablo: “Mga kabugtoan, kon an usa ka tawo hiagian han iba nga nagtalapas, kamo nga mga espirituhanon, pabalikon unta hiya niyo ha espiritu ha kaaghop; pagtan-aw man ha imo kalugaringon, bangin ikaw naman an pagsulayon.”—Galasia 6:1; Hebreo 6:1, 9-12.

“Mag-inantusay kamo [ha] usa kag usa, ngan magpinasayloay kamo [ha] usa kag usa . . . Manul-ot kamo hin paghigugma, nga amo an higot han pagkahingpit.”—Kolosas 3:13, 14.

Paonan-o mo gintatagad an usa nga bangin mapakyas ha husto nga pagtuman han Kristiano nga mga suruklan? Kinikilala mo ba an ira pagin diri-hingpit, sugad han pagkilala ni Jehova ngan ni Jesu-Kristo? (Isaias 42:2-4) O iginpipirit mo an istrikto nga pag-aplikar han balaud han Dios ha kada kahimtang? (Salmo130:3) Hinumdumi, angayan la nga magpakita hin pagkamalumo kon posible ngan hin karig-on kon ginkikinahanglan la. An pagbuhat nga may gugma mabulig ha paghimo hin marig-on nga mga bugkos han pagsarig ha kada tagsa ngan pagtapod butnga ha imo ngan hadton sakop han imo awtoridad.

Kon gintaporan ka hin bisan ano nga klase hin awtoridad, pangalimbasugi nga subaron hi Jehova nga Dios ngan hi Jesu-Kristo ha paggamit hito. Hinumdumi an makaruruyag hinduro nga paghulagway han salmista mahitungod ha kan Jehova paagi han paggamit han iya awtoridad ha iya katawohan. Nagkanta hi David: “Hi Jehova amo an akon magbarantay; diri magkukulang ha akon. Iya ako ginpapahigda ha mga hilaw nga sabsaban; iya ako gintutugwayan ha ligid han mga maglinaw nga tubig. Ginpahiuli niya an akon kalag; tutugwayan niya ako ha mga dalan han katadongan tungod ha iya ngaran.” Ha pariho nga paagi, mahitungod kan Jesus aton mababasa: “Ako amo an maopay nga paramangno han mga karnero, ngan ako nakilala ha akon kalugaringon, ngan an akon kalugaringon nakilala ha akon; sugad gud an Amay nakilala ha akon ngan ako nakilala ha Amay. Ngan ako nahatag han akon kinabuhi tungod ha mga karnero.” May-ada pa ba kita mas maopay nga mga susbaranan ha mahigugmaon nga paggamit han awtoridad?—Salmo 23:1-3; Juan 10:14, 15.

[Blurb ha pahina 18]

An paggamit ni Jehova han iya gahum pirme hingpit nga nauyon ha iya hustisya, kinaadman, ngan gugma

[Retrato ha pahina 18]

Usahay, an mga tigurang kinahanglan maghatag hin mahigugmaon nga sagdon ha mga nakakasayop

[Retrato ha pahina 19]

Ginsagdonan ni Pablo hi Timoteo nga gumawi pariho hin matinalahuron nga anak ngan matinagaron nga bugto

[Retrato ha pahina 20]

Ginagamit ni Jesu-Kristo an iya awtoridad ha maaramon, makatadunganon, ngan mahigugmaon nga paagi