Mga Pakiana Tikang ha mga Magbarasa

Ano an aton mahibabaroan tikang ha pagdiri nga mababasa ha Eksodo 23:19: “Diri mo paglagaon an nati nga kanding ha gatas han iya iroy”?

Ini nga sugo han Mosaiko nga Balaud, nga mababasa hin tulo ka beses ha Biblia, makakabulig ha aton nga masabtan an gintatagad ni Jehova nga husto, an iya pagpaid, ngan an iya pagkamalumo. Ginpapabug-atan liwat hito an iya kangalas ha palso nga pagsingba.—Eksodo 34:26; Deuteronomio 14:21.

An paglaga hin nati nga kanding o iba nga hayop ha gatas han iroy hito magigin supak ha natural nga kahikayan ni Jehova ha mga butang. Igintagana han Dios an gatas han iroy basi ipasuso ha anak ngan makabulig ha pagtubo hito. An paglutoa han nati ha gatas han iroy mismo hito, sumala han mga pulong han usa nga eskolar, magpapakita hin “kawaray-pagtahod ha relasyon nga gin-establisar ngan ginpakabaraan han Dios ha butnga han iroy ngan han nati hito.”

Dugang pa, an iba nasiring nga an paglaga hin nati ha gatas han iroy hito bangin usa nga pagano nga rituwal nga ginhihimo basi umuran. Kon ito an kahimtang, an pagdiri nagpanalipod ha mga Israelita tikang ha waray pulos ngan madarahog nga mga rituwal ha relihiyon han mga nasud nga nakapalibot ha ira. Espisipiko nga gindid-an han Mosaiko nga Balaud an mga Israelita ha paglakat ha mga surundon hito nga mga nasud.—Lebitiko 20:23.

An ultimo nga punto, nakikita naton hinin partikular nga balaud an malumo nga pagpaid ni Jehova. Ha pagkamatuod, an Balaud may-ada damu nga kapariho nga mga sugo kontra ha pagkamadarahog ha mga hayop ngan mga panalipod kontra ha pagsupak ha balaud han kinaiya. Pananglitan, iginlakip ha Balaud an mga sugo nga nagdidiri han paghalad hin hayop nga waray pa magpito ka adlaw nga kaupod han iroy hito, han pagpatay han iroy ngan han nati hito ha pariho nga adlaw, ngan han pagkuha nga dungan han iroy ngan mga bonay o piyak tikang ha salag.—Lebitiko 22:27, 28; Deuteronomio 22:6, 7.

Matin-aw, an Balaud diri kay usa nga komplikado la nga lista han mga sugo ngan mga pagdiri. An usa han mga kapulsanan hito, an mga prinsipyo hito nabulig nga maipasilsil ha aton an hitaas nga pagtagad ha moral nga tinuod nga nagpapakita han makaruruyag nga mga kalidad ni Jehova.—Salmo 19:7-11.

[Ginkuhaan han Retrato ha pahina 31]

© Timothy O’Keefe/Index Stock Imagery