Ginbabansay ni Jehova an mga Magbarantay Para ha Iya Panon

“Hi Jehova nahatag hin kinaadman; tikang ha iya baba nagawas an hibaro ngan an sarabotan.”—PROBERBIOS 2:6.

1, 2. Kay ano nga nangangalimbasog an bawtismado nga kalalakin-an para han dugang nga responsabilidad ha kongregasyon?

 “MALIPAYON gud ako han ginpili ako sugad nga tigurang,” siring ni Nick, nga pito ka tuig na nga nag-aalagad sugad nga tigurang. “Gintagad ko ini sugad nga talagsahon nga higayon ha pagpauswag han akon pag-alagad kan Jehova. Inabat ko nga utang ko ha iya an ngatanan nga ginbuhat niya para ha akon. Karuyag ko liwat buligan an mga membro han kongregasyon ha bug-os gud nga mahihimo, basi buligan hira ha pariho nga paagi han pagbulig ha akon han iba nga mga tigurang.” Kondi, bisan kon malipayon hi Nick, may-ada liwat hiya mga kabaraka. “Tungod kay waray pa ako mag-30 han ginpili ako,” nagsiring pa hi Nick, “nabaraka ako nga kulang ako han ginkikinahanglan nga mga kaabtik—an husto nga pagturutimbang ngan kinaadman—ha epektibo nga pagmangno ha kongregasyon.”

² Adton pinipili ni Jehova ha pagmangno ha iya panon may-ada damu nga hinungdan nga magin malipayon. Ginpahinumdom ni apostol Pablo an mga tigurang ha Efeso han usa nga hinungdan, han ginkukotar an mga pulong ni Jesus, hiya nagsiring: ‘Burobulahan pa an paghatag kay ha pagkarawat.’ (Buhat 20:35) An pag-alagad sugad nga ministeryal nga surugoon o tigurang naghahatag hin higayon ha bawtismado nga kalalakin-an nga magkaada dugang nga mga paagi ha paghatag kan Jehova ngan ha kongregasyon. Pananglitan, an ministeryal nga mga surugoon nabulig ha mga tigurang. Ini nga ministeryal nga mga surugoon nagbubuhat liwat hin damu nga iba pa nga nakakaubos-hin-panahon kondi importante nga mga buruhaton. Ito nga kabugtoan napapagios tungod han gugma ha Dios ngan ha igkasi-tawo ha pagbuhat hin birilhon nga pag-alagad.—Markos 12:30, 31.

 3. Kay ano nga an iba bangin nag-aalang ha pagkab-ot hin mga pribilehiyo ha kongregasyon?

³ Kumusta man an Kristiano nga lalaki nga bangin nag-aalang ha pagkab-ot hin pribilehiyo nga magin ministeryal nga surugoon ngan ha urhi magin tigurang tungod kay inaabat niya nga hiya diri-takos? Pariho kan Nick, bangin nababaraka hiya nga waray hiya han ginkikinahanglan nga mga kaabtik basi magin epektibo nga magbarantay. Sugad nga bawtismado nga lalaki, usa ka ba hadton naabat hin sugad hini? Diri husto an sugad nga mga kabaraka. Ginsumatan ni Jehova an pinili nga mga magbarantay nga may baratunon hira ha paagi han ira pagtrato ha panon. Hi Jesus nagsiring: “Kon hin-o an tinagan hin damu, damu an pangingitaon ha iya, ngan kon hin-o an damu an igintapod, labi pa an ira pangangaroon ha iya.”—Lukas 12:48.

 4. Paonan-o binubuligan ni Jehova adton iya pinipili ha pagmangno ha iya mga karnero?

⁴ Ginlalaoman ba ni Jehova adton iya ginpipili sugad nga ministeryal nga mga surugoon ngan mga tigurang ha pagdumara han ira mga responsabilidad nga waray han bulig? Diri, naghahatag hiya hin praktikal nga bulig diri la ha pagdumara kondi basi maglampos liwat. Sugad han ginhisgotan han nahiuna nga artikulo, hi Jehova naghahatag ha ira han iya baraan nga espiritu, nga an mga bunga hito nabulig ha ira ha mahigugmaon nga pagmangno ha iya mga karnero. (Buhat 20:28; Galasia 5:22, 23) Dugang pa, hi Jehova naghahatag hin kinaadman, kahibaro, ngan husto nga pagturutimbang. (Proberbios 2:6) Paonan-o niya ginbubuhat ini? Aton paghisgotan an tulo nga paagi diin ginbabansay ni Jehova an mga indibiduwal nga iya ginpipili ha pagmangno ha iya mga karnero.

Ginbansay han Eksperyensyado nga mga Magbarantay

 5. Kay ano nga epektibo nga mga magbarantay hira Pedro ngan Juan?

⁵ Han inatubang hira apostol Pedro ngan Juan ha Sanhedrin, gintagad hira han maaramon ha kalibotan nga mga hukom hito nga korte sugad nga “waray  hibabroan ngan waray sarabotan.” Syempre, nakakabasa ngan nakakasurat hira, kondi waray hira makakarawat hin pagbansay ha bisan ano nga rabiniko nga pag-aram ha Kasuratan. Bisan pa hito, pinamatud-an nira Pedro ngan Juan upod an iba pa nga mga disipulo nga epektibo gud hira nga mga magturutdo, napapagios an bisan hin-o hadton namamati ha ira nga magin mga tumuroo. Paonan-o inin ordinaryo nga kalalakin-an nagin maopay hinduro nga mga magturutdo? Katapos mamati kan Pedro ngan Juan, an hukmanan ‘nakakilala nga kaupod-upod hira ni Jesus.’ (Buhat 4:1-4, 13) Oo, kinarawat hira han baraan nga espiritu. (Buhat 1:8) Kondi, matin-aw liwat—bisan adton mga hukom nga diri nasabot ha espirituwal nga mga butang—nga hi Jesus an nagbansay hito nga kalalakin-an. Han kaupod pa niya hira dinhi ha tuna, gintutdoan ni Jesus an iya mga apostol diri la ha pagtirok han sugad-karnero nga mga tawo kondi liwat kon paonan-o mamangnoan hira kon magin bahin na hira han kongregasyon.—Mateo 11:29; 20:24-28; 1 Pedro 5:4.

 6. Ano nga ehemplo han pagbansay ha iba an ipinakita ni Jesus ngan ni Pablo?

⁶ Katapos banhawon hi Jesus, nagpadayon hiya ha pagbansay hadton iya pinili sugad nga mga magbarantay. (Pahayag 1:1; 2:1–3:22) Pananglitan, personal nga pinili niya hi Pablo ngan ginbansay hiya. (Buhat 22:6-10) Ginpabilhan ni Pablo an pagbansay nga iya nakarawat ngan iginpasa ha iba nga mga tigurang an iya hinbaroan. (Buhat 20:17-35) Pananglitan, daku nga panahon ngan kusog an iya ginamit ha pagbansay kan Timoteo nga magin “magburuhat” ha pag-alagad ha Dios, ‘nga waray iginkakaawod.’ (2 Timoteo 2:15) Nagin duok nga magsangkay hira. Una pa hito, hi Pablo nagsurat kan Timoteo: “Sugad ha usa nga bata nga nag-aalagad ha amay, sugad man hiya nag-aalagad upod ha akon ha pagpasarang han Maopay nga Sumat.” (Filipos 2:22) Waray mangalimbasog hi Pablo nga himoon hi Timoteo o an iba nga tawo nga magin iya disipulo. Lugod, iya gindasig an mga igkasi-tumuroo nga magin mga ‘magsurubad ha iya, sugad nga hiya nasubad kan Kristo.’—1 Korinto 11:1.

7, 8. (a) Ano an ipinapakita han eksperyensya nga maopay an mga resulta kon ginsusubad han mga tigurang hi Jesus ngan hi Pablo? (b) San-o sadang magtikang pagbansay an mga tigurang ha magigin ministeryal nga mga surugoon ngan mga tigurang?

⁷ Ha pagsubad kan Jesus ngan kan Pablo, an eksperyensyado nga mga magbarantay nag-uuna ha pagbansay ha bawtismado nga kalalakin-an, nga may-ada pariho nga mag-opay nga mga resulta. Tagda an eksperyensya ni Chad. Nagtubo hiya ha panimalay nga iba an relihiyon kondi bag-o la nga napili sugad nga tigurang. Hiya nagsiring: “Ha paglabay han mga katuigan, ginbuligan ako han pipira nga mga tigurang nga mag-uswag ha espirituwal. Tungod kay diri-tumuroo an akon amay, ipinakita hito nga mga tigurang an espesyal nga pagtagad ha akon ngan nagin sugad hira hin espirituwal nga mga amay ko. Naggahin hira hin panahon ha pagbansay ha akon ha ministeryo, ngan ha urhi, usa nga tigurang an labi nga nagbansay ha akon ha pagbuhat han mga toka nga akon nakarawat ha kongregasyon.”

⁸ Sugad han ipinapakita han eksperyensya ni Chad, an masinabuton nga mga magbarantay nagtitikang magbansay ha magigin ministeryal nga mga surugoon ngan mga tigurang antes pa gud hira mag-uswag ha igo nga kwalipikasyon ha sugad nga mga responsabilidad. Kay ano nga kinahanglanon ini? Tungod kay an Biblia nagsusugo nga an ministeryal nga mga surugoon ngan mga tigurang kinahanglan makadangat han hitaas nga surundon ha moral ngan espirituwal antes pilion hira ha pag-alagad. Kinahanglan “proybahan” anay hira.—1 Timoteo 3:1-10.

 9. Ano an responsabilidad han hamtong nga mga magbarantay, ngan kay ano?

⁹ Basi maproybahan an bawtismado nga kalalakin-an, angayan la nga bansayon anay hira. Ha pag-ilustrar: Kon an estudyante ha eskwelahan hatagan hin makuri nga eksaminasyon nga waray hatagi hiya han mga magturutdo hin espisipiko nga pagbansay, makakapasar ba ha eksamin an estudyante? Sigurado nga diri. Salit, ginkikinahanglan an pagbansay. Kondi, an maopay nga mga magturutdo nagbabansay ha mga estudyante diri la ha pagbulig nga makapasar ha eksamin kondi ha pagbulig liwat ha ira kon paonan-o gagamiton an kahibaro nga ira nakakarawat. Ha pariho nga paagi, an maduruto nga mga tigurang nabulig ha bawtismado nga kalalakin-an ha pagpatubo han mga kalidad nga ginkikinahanglan ha pinili nga lalaki pinaagi han paghatag ha ira hin espisipiko nga pagbansay. Ginbubuhat nira ito diri la basi buligan ini nga kabugtoan nga mapili ha pag-alagad kondi basi buligan liwat hira nga makagmangno hin maopay ha panon. (2 Timoteo 2:2) Syempre, an bawtismado nga kalalakin-an  kinahanglan mangalimbasog nga makab-ot an mga kwalipikasyon nga ginkikinahanglan han usa nga ministeryal nga surugoon o tigurang. (Tito 1:5-9) Salit, pinaagi han kinaburut-on nga pagbansay ha ira nga nangangalimbasog ha pagkab-ot hin responsabilidad ha kongregasyon, an eksperyensyado nga mga magbarantay makakabulig ha ira basi mag-uswag hin madagmit.

10, 11. Paonan-o an mga magbarantay makakagbansay ha iba para ha dugang nga mga pribilehiyo?

¹⁰ Paonan-o labi na an eksperyensyado nga mga magbarantay makakagbansay ha iba ha pagtuman han mga buruhaton ha kongregasyon? Siyahan ha ngatanan, sadang magpakita hin interes an mga magbarantay ha kabugtoan ha kongregasyon—regular nga nakikig-upod ha ira ha ministeryo ha kanataran ngan binubuligan hira nga mag-uswag an ira abilidad ha ‘paggamit hin maopay han pulong nga kamatuoran.’ (2 Timoteo 2:15) Iginsusumat han hamtong nga mga magbarantay ha kabugtoan an kalipay nga nakakarawat ha pagserbi ha iba ngan katagbaw nga nakakarawat nira ha pagkaada ngan pagkab-ot han espirituwal nga mga tumong. Mahimo liwat hira maghatag hin espisipiko nga mga suhestyon kon paonan-o mag-uuswag an bugto nga magin ‘susbaranan ha panon.’—1 Pedro 5:3, 5.

¹¹ Kon napili na an bugto sugad nga ministeryal nga surugoon, an maaramon nga mga magbarantay padayon nga nagbabansay ha iya. Hi Bruce, nga nag-aalagad sugad nga tigurang hin haros 50 ka tuig na, nasiring: “Karuyag ko makiistorya ha bag-o la nga pinili nga ministeryal nga surugoon ngan repasuhon ha iya an mga instruksyon nga iginpublikar han matinumanon ngan maaramon nga uripon. Amon liwat binabasa an bisan ano nga mga giya mahitungod han iya espisipiko nga toka, ngan katapos karuyag ko magbuhat kaupod niya tubtob nga magin pamilyar na hiya ha iya mga buruhaton.” Samtang nagkakaada hin eksperyensya an ministeryal nga surugoon, mahimo liwat hiya bansayon ha pagmangno nga buruhaton. “Kon igin-uupod ko an usa nga ministeryal nga surugoon ha pagmangno nga pagbisita,” nagsiring pa hi Bruce, “binubuligan ko hiya ha pagpili hin espisipiko nga mga teksto nga makakadasig ngan makakapagios ha indibiduwal o ha pamilya nga amon binibisita. Importante an paghibaro ha paggamit han Kasuratan ha paagi nga nakakapagios han kasingkasing, basi an ministeryal nga surugoon magin epektibo nga magbarantay.”—Hebreo 4:12; 5:14.

12. Paonan-o makakagbansay an eksperyensyado nga mga magbarantay ha bag-o la nga pinili nga mga tigurang?

¹² An bag-o la nga pinili nga mga magbarantay makakapahimulos liwat han dugang nga pagbansay. Hi Nick nga gin-unabi kanina, nasiring: “An pagbansay nga akon nakarawat labi na tikang ha duha nga mas edaran nga paramangno mapulsanon hinduro. Kasagaran nga hinsasabtan hini nga kabugtoan kon paonan-o pagdudumarahon an pipira nga mga butang. Mapailubon pirme hira nga namamati ha akon ngan sinsero nga gintatagad an akon punto de bista—bisan kon diri hira nauyon hito. Damu an akon hinbaroan tikang ha pag-obserba ha mapainubsanon ngan matinalahuron nga paagi han ira pagtrato ha mga kabugtoan ha kongregasyon. Ini nga mga tigurang nagpagios ha akon nga gamiton hin maopay an Biblia kon nagdudumara hin mga problema o kon nag-aaghat ha iba.”

Nabansay han Pulong han Dios

13. (a) Ano an ginkikinahanglan han usa nga bugto basi magin epektibo nga magbarantay? (b) Kay ano nga hi Jesus nagsiring: ‘An akon igintututdo diri akon’?

¹³ Oo, an Pulong han Dios, an Biblia, may-ada mga balaud, mga prinsipyo, ngan mga susbaranan nga ginkikinahanglan han mga magbarantay basi “mahingpit, ngan maandam tungod ha ngatanan nga maopay nga buhat.” (2 Timoteo 3:16, 17) An usa nga bugto bangin may-ada maopay nga sekular nga edukasyon, kondi an iya kahibaro ha Kasuratan ngan an iya pag-aplikar hito an mabulig ha iya nga magin epektibo nga magbarantay. Tagda an susbaranan ni Jesus. Hiya an pinakaintelihente, masinabuton hinduro, ngan pinakamaaramon nga espirituwal  nga magbarantay nga nabuhi ha tuna; kondi, waray gud hiya sumarig ha iya kalugaringon nga kinaadman kon nagtututdo ha mga karnero ni Jehova. Hiya nagsiring: “An akon pagtutdo, diri akon, kondi kanan han nagpakanhi ha akon.” Kay ano nga iginhahatag ni Jesus an dungog ha iya langitnon nga Amay? Hiya nagsaysay: “An nagyayakan nga tikang ha iya ngahaw, nagbibiling han kalugaringon niya nga himaya.”—Juan 7:16, 18.

14. Kay ano nga an mga magbarantay diri namimiling han ira kalugaringon nga himaya?

¹⁴ An maunungon nga mga magbarantay diri namimiling han ira kalugaringon nga himaya. Iginbabasar nira an ira sagdon ngan pagdasig, diri ha ira kalugaringon nga kinaadman, kondi ha Pulong han Dios. Nasasabtan nira nga an buruhaton han mga magbarantay amo an pagbulig ha mga karnero nga magkaada han ‘panhunahuna ni Kristo,’ diri han panhunahuna han mga tigurang. (1 Korinto 2:14-16) Pananglitan, ano man kon an tigurang nga nabulig ha mag-asawa nga masulbad an mga problema ha pag-asawa iginbabasar an iya sagdon ha iya kalugaringon nga eksperyensya imbes nga ha mga prinsipyo han Biblia ngan ha impormasyon nga iginpublikar han “matinumanon ngan maaramon nga uripon”? (Mateo 24:45, NW) Bangin mas maimpluwensyahan an iya sagdon han lokal nga mga kostumre ngan malimitihan han iya gutiay nga kahibaro. Oo, diri maraot an iba nga mga kostumre, ngan bangin may-ada eksperyensya ha kinabuhi an tigurang. Kondi, labi nga makakapahimulos an mga karnero kon an mga magbarantay nagdadasig ha ira nga mamati han tingog ni Jesus ngan han mga pulong ni Jehova imbes han mga panhunahuna han mga tawo o mga prinsipyo han lokal nga kostumre.—Salmo 12:6; Proberbios 3:5, 6.

Nabansay han “Matinumanon Ngan Maaramon nga Uripon”

15. Ano nga buruhaton an iginhatag ni Jesus ha “matinumanon ngan maaramon nga uripon,” ngan ano an usa nga hinungdan han kalamposan han uripon nga klase?

¹⁵ An mga magbarantay sugad kan apostol Pedro, Juan, ngan Pablo, hira ngatanan mga membro han grupo nga iginhulagway ni Jesus sugad nga “an matinumanon ngan maaramon nga uripon.” Inin uripon nga klase nagkukompwesto han dinihogan-ha-espiritu nga kabugtoan ni Jesus ha tuna, nga an paglaom amo an pagmando upod ni Kristo ha langit. (Pahayag 5:9, 10) Durante hinin kataposan nga mga adlaw hini nga sistema, an kadamu han kabugtoan ni Kristo nga nahibibilin pa ha tuna padayon nga nagtitikaguti, sugad han ginlalaoman. Kondi, an buruhaton nga iginpapatuman ni Jesus ha ira—an pagsangyaw han maopay nga sumat han Ginhadian antes umabot an kataposan—mas nag-uuswag yana kay ha kan-o pa man. Bisan pa hito, malampuson gud an uripon nga klase! Kay ano? Ha pipira nga paagi, tungod kay ira ginbabansay an mga membro han ‘iba nga mga karnero’ ha pagbulig ha ira ha pagsangyaw ngan pagtutdo nga buruhaton. (Juan 10:16, NW; Mateo 24:14; 25:40) Yana, an kadak-an nga bahin han buruhaton ginbubuhat hinin maunungon nga grupo.

16. Paonan-o ginbabansay han uripon nga klase an pinili nga mga lalaki?

¹⁶ Paonan-o igintatagana han uripon nga klase ini  nga pagbansay? Ha siyahan nga siglo, an mga representante han uripon nga klase awtorisado ha pagbansay ngan pagpili hin mga paramangno ha mga kongregasyon, ngan an mga paramangno liwat, nagbabansay han mga membro han kongregasyon. (1 Korinto 4:17) Sugad man liwat yana. An Nagmamando nga Lawas—an gutiay nga grupo han dinihogan nga mga tigurang nga nagrirepresentar han uripon nga klase—naghahatag hin awtoridad ha mga representante hito ha pagbansay ngan pagpili hin ministeryal nga mga surugoon ngan mga tigurang ha napuplo ka yukot nga mga kongregasyon ha bug-os nga kalibotan. Dugang pa, an Nagmamando nga Lawas nag-oorganisa hin mga eskwelahan ha pagbansay ha mga membro han Komite han Sanga, nagbibiyahe nga mga paramangno, mga tigurang, ngan ministeryal nga mga surugoon kon paonan-o mamangnoan an mga karnero ha pinakamaopay nga paagi. Iginhahatag an dugang nga mga giya pinaagi han mga surat, mga artikulo nga iginpupublikar ha An Barantayan, ngan pinaagi han iba pa nga mga publikasyon, sugad han Organisado ha Pagbuhat han Kaburut-on ni Jehova. a

17. (a) Paonan-o ipinapakita ni Jesus an iya pagsarig ha uripon nga klase? (b) Paonan-o maipapakita han espirituwal nga mga magbarantay nga hira nasarig ha uripon nga klase?

¹⁷ Daku gud an pagsarig ni Jesus ha uripon nga klase nga iya gintokahan han “ngatanan niya nga panag-iya”—an ngatanan niya nga espirituwal nga mga butang ha tuna. (Mateo 24:47, NW) Pinamamatud-an han pinili nga mga magbarantay nga hira liwat nasarig ha uripon nga klase pinaagi han pag-aplikar han mga giya nga ira nakakarawat tikang ha Nagmamando nga Lawas hito. Oo, kon an mga magbarantay nagbabansay ha iba, kon gintutugotan nira an ira kalugaringon nga mabansay han Pulong han Dios, ngan kon igin-aaplikar nira an igintatagana nga pagbansay han uripon nga klase, mapapauswag nira an pagkaurosa dida ha panon. Mapasalamaton gud kita nga hi Jehova nagbabansay hin kalalakin-an nga kinasingkasing nga nagmamangno han tagsa nga membro han Kristiano nga kongregasyon!

[Footnote]

Paonan-o Mo Babatunon?

• Paonan-o ginbabansay han hamtong ha espirituwal nga mga magbarantay an iba?

• Kay ano nga an mga magbarantay diri nagtututdo hin ira kalugaringon nga panhunahuna?

• Paonan-o ngan kay ano nga an mga magbarantay nagpapakita hin pagsarig ha uripon nga klase?

[Mga Pakiana]

[Mga Retrato ha pahina 24, 25]

Ginbabansay han Kristiano nga mga tigurang an batan-on nga kalalakin-an ha kongregasyon

[Mga Retrato ha pahina 26]

An “matinumanon ngan maaramon nga uripon” nagtatagana hin hura nga pagbansay ha mga tigurang