Kapobrehan—An Kahimtang Yana

HI Vicente a agsob makita nga nagguguyod hin puno hinduro nga kariton ha kakalsadahan han São Paulo, Brazil. Namumurot hiya hin karton, labog nga metal, ngan plastik. Kon nagtitikasirom na, nagbabanig hiya hin karton ha ilarom han iya kariton ngan dida na nakaturog. Baga hin diri hiya nadidisturbo ha aringasa han damu nga awto ngan bus ha kalsada nga iya kinakaturogan. Hadto may-ada hiya trabaho, balay, ngan pamilya—kondi waray na ito ngatanan. Yana nangangalimbasog hiya mabuhi ha kakalsadahan.

Makasurubo, minilyon han mga tawo ha bug-os nga kalibotan, pariho kan Vicente, an nagkikinabuhi ha duro nga kapobrehan. Ha nagkukuri nga mga nasud, damu an napipiritan nga magkinabuhi ha kakalsadahan o ha mga iskwater. An mga makililimos— mga may depekto, mga buta, kababayin-an nga nagpapasuso han ira mga minasus-an—komon la nga nakikita. Ha mga poste han sugâ han trapiko, nandadadlagan an kabataan ha butnga han nakaprino nga mga awto, nangangalimbasog ha pagbaligya hin mga dulse ha paglaom nga magkaada bisan gutiay la nga kwarta.

Makuri maisaysay kon kay ano nga an sugad nga kapobrehan tinutugotan nga umiksister. An The Economist nga magasin han Britanya nagkomento: “Yana pa gud la nga an katawohan nagin mas riko, o may-ada mas hitaas nga kahibaro ha medisina, kaabtik ha teknolohiya, ngan intelihensya nga ginkikinahanglan ha paglampos han kapobrehan.” Sigurado nga damu an nagpapahimulos tikang hini nga kahibaro. An kakalsadahan han dagku nga syudad ha damu nga nagkukuri nga nasud puno hin nag-iiringgat nga bag-o nga awto. An mga shopping mall puno han pinakamoderno nga mga garamiton, ngan damu pirme an naruruyag ha pagpalit hito. Duha nga sentro nga paralitan ha Brazil an nagkaada espesyal nga promosyon. Waray hira pagsara ha bug-os nga gab-i tikang han Disyembre 23 tubtob 24, 2004. Usa han mga sentro an nagkuha hin mga parasayaw han samba basi liawon an mga mamaralit. Nakadani ito hin haros 500,000 nga mamaralit!

Kondi, damu hinduro nga tawo an diri nakakapahimulos han bahandi nga napapahimulosan han iba. An daku hinduro nga kaibahan han riko ngan han pobre nakaaghat ha damu nga  maghunahuna nga kinahanglan gud pangalimbasogan nga wad-on an kapobrehan. An magasin nga Veja han Brazil nagsiring: “Yana nga tuig [2005] an paglampos ha kakablas amo an pinakaimportante nga isyu nga angay paghisgotan han mga lider han kalibotan.” Nagreport liwat an Veja mahitungod han suhestyon hin bag-o nga Marshall Plan nga an tumong amo an pagbulig ha pinakapobre nga mga nasud, labi na an Aprika. b Kondi, bisan kon an sugad nga mga suhestyon naghahatag hin impresyon hin pag-uswag, ito nga magasin nagdugang: “Damu liwat an mga hinungdan ha pagruhaduha han mga resulta hito. Kon an kadam-an han mga nasud nag-aalang ha paghatag, tungod ito kay an pundo talagsa la dumangat ha mga tawo nga angay unta kumarawat hito.” Makasurubo, tungod han panlimbong ngan han sobra kakomplikado nga pamaagi han burokrasya, an daku nga bahin han pundo nga iginhatag han mga gobyerno, internasyonal nga mga ahensya, ngan mga indibiduwal diri gud nadangat ha mga tawo nga nanginginahanglan gud hito.

Maaram hi Jesus nga an kapobrehan magigin nagpapadayon nga problema. Hiya nagsiring: “An mga kablas kaupod niyo gihapon.” (Mateo 26:11) Nangangahulogan ba ini nga pirme magkakaada kapobrehan ha kalibotan? Waray ba mahihimo basi mapauswag an kahimtang? Ano an mahihimo han indibiduwal nga Kristiano basi mabuligan an mga pobre?

[Mga footnote]