Maunungon nga Nag-aalagad kan Kristo nga Hadi

“Iginhatag ha iya an kagamhanan, ngan an himaya, ngan an usa nga ginhadian, nga an ngatanan nga mga katawohan, mga nasud, ngan mga yinaknan mag-alagad ha iya.”—DANIEL 7:14.

1, 2. Paonan-o kita nahibaro nga hi Kristo waray magmando hin bug-os ha Ginhadian han 33 K.P.?

 HIN-O nga magmarando an makakaghatag han iya kinabuhi para ha iya mga sakop kondi mabubuhi utro basi magmando sugad nga hadi? Hin-o nga hadi an makakag-ukoy dinhi ha tuna, basi parig-unon an pagsarig ngan pagkamaunungon han iya mga sakop, ngan magmamando tikang ha langit? An amo la nga persona nga makakahimo hini—ngan han damu nga mga butang—amo hi Jesu-Kristo. (Lukas 1:32, 33) Han Pentekostes 33 K.P., katapos ni Kristo mamatay, banhawon, ngan sumaka ha langit, ginpili hiya han Dios sugad nga “ulo han ngatanan nga mga bagay ha singbahan.” (Efeso 1:20-22; Buhat 2:32-36) Hini nga paagi nagtikang hi Kristo pagmando kondi ha limitado nga paagi. An iya siyahan nga mga sakop amo an dinihogan-han-espiritu nga mga Kristiano, nga nagkompwesto han espirituwal nga Israel, ‘an Israel han Dios.’—Galasia 6:16; Kolosas 1:13.

² Haros 30 ka tuig na katapos han Pentekostes 33 K.P., pinamatud-an ni apostol Pablo nga hi Kristo waray pa magmando hin bug-os ha Ginhadian, kondi hiya “naglingkod ha too nga kamot han Dios; tikang hadto hiya naghihinulat nga an iya mga kaaway himoon nga turumbanan han iya mga tiil.” (Hebreo 10:12, 13) Katapos hito, han hirani na matapos an siyahan nga siglo K.P., nakita ha bisyon han lagas na nga hi apostol Juan an Soberano han Uniberso, hi Jehova, nga nagpipili kan Kristo Jesus sugad nga Hadi han bag-o la nga naestablisar nga langitnon nga Ginhadian. (Pahayag 11:15; 12:1-5) Tikang ha aton panhunahuna hini nga panahon han kasaysayan, mahimo naton repasuhon an makakombinse nga ebidensya nga nagpapamatuod nga hi Kristo nagtikang na magmando ha langit sugad nga Mesianiko nga Hadi han 1914. a

 3. (a) Tikang han 1914, may-ada ano nga bag-o nga bahin an maopay nga sumat han Ginhadian? (b) Ano nga mga pakiana an mahimo naton ipakiana ha aton kalugaringon?

³ Oo, tikang han 1914 an maopay nga sumat han Ginhadian may-ada makalilipay nga bag-o nga bahin. Hi Kristo aktibo nga nagmamando na sugad nga Hadi ha langitnon nga Ginhadian han Dios, kondi “ha butnga han [iya] mga kaaway.” (Salmo 110:1, 2; Mateo 24:14; Pahayag 12:7-12) Dugang pa, ha bug-os nga tuna, an iya maunungon nga mga sakop madasigon gud nga nasunod ha iya pagmando pinaagi han pakigbahin ha bug-os-kalibotan nga programa han edukasyon ha Biblia nga waray kapariho ha bug-os nga kasaysayan han tawo. (Daniel 7:13, 14; Mateo 28:18) An dinihogan-han-espiritu nga mga Kristiano, nga “mga anak han ginhadian,” nag-aalagad sugad nga mga “embahador nga kasaliwan ni Kristo.” Maunungon nga sinusuportahan hira han nagtitikadamu nga panon han ‘iba nga mga karnero’ ni Kristo, nga nagbubuhat sugad nga mga representante han Ginhadian han Dios. (Mateo 13:38; 2 Korinto 5:20, NW; Juan 10:16) Kondi, kinahanglan usisahon naton kon kita ba, sugad nga mga indibiduwal, tinuod nga kinikilala naton an awtoridad ni Kristo. Kita ba marig-on gud nga maunungon ha iya? Paonan-o naton maipapakita an pagkamaunungon ha Hadi nga nagmamando ha langit? Kondi, aton anay paghisgotan kon ano an aton mga hinungdan han pagin maunungon kan Kristo.

Usa nga Hadi nga Nakakaaghat han Pagkamaunungon

 4. Ano an ginbuhat ni Jesus sugad nga Pinili-nga-Hadi durante han iya ministeryo ha tuna?

⁴ An aton pagkamaunungon kan Kristo iginbasar ha apresasyon ha iya ginbuhat sugad man ha iya maopay hinduro nga mga kalidad. (1 Pedro 1:8) Han  nakanhi pa hi Jesus ha tuna sugad nga Pinili-nga-Hadi, ipinakita niya ha limitado nga paagi kon ano an iya pagbubuhaton sugad nga nagmamando nga Hadi ha bug-os nga kalibotan ha itinanda nga panahon han Dios. Iya ginpakaon an mga nagugutom. Iya gintambal an mga magsakit, buta, baldado, bungol, ngan ngula. Iya pa ngani ginbanhaw an pipira nga namatay nga indibiduwal. (Mateo 15:30, 31; Lukas 7:11-16; Juan 6:5-13) Dugang pa, an pagkaada kahibaro mahitungod han kinabuhi ni Jesus dinhi ha tuna nabulig ha aton nga mahibaro han iya mga kalidad sugad nga tidaraon nga Magmarando ha tuna—labi na gud an iya nagsasakripisyo-ha-kalugaringon nga gugma. (Markos 1:40-45) May kalabotan hini, may-ada nagsumat nga hi Napoléon Bonaparte nagsiring: “Hi Alexander, Cesar, Carlomagno, ngan ako nag-establisar hin mga imperyo, kondi ha ano iginbasar namon an amon bantogan nga mga binuhat? Ha pwersa. Hi Jesu-Kristo la an nag-establisar han iya ginhadian pinaagi han gugma, ngan minilyon nga katawohan yana an andam mamatay para ha iya.”

 5. Kay ano nga makaruruyag hinduro an personalidad ni Jesus?

⁵ Tungod kay hi Jesus malumo ngan mapainubsanon ha kasingkasing, napakusog adton nanluluya tungod han mabug-at nga mga pag-ipit ngan narepreskohan han iya makaparig-on nga mga katutdoan ngan pagkabuotan. (Mateo 11:28-30) Komportable ha iya an kabataan. Nagin mga disipulo dayon niya an mapainubsanon ngan magsinabuton nga mga tawo. (Mateo 4:18-22; Markos 10:13-16) An iya pagin makonsiderasyon ngan pagin matinalahuron, nagpagios ha damu nga mahadlukon-ha-Dios nga kababayin-an nga magin maunungon ha iya, an kadam-an ha ira naghatag han ira panahon, kusog, ngan materyal nga mga panag-iya basi mangnoan hiya samtang nagbubuhat hiya ha ministeryo.—Lukas 8:1-3.

 6. Ano nga malumo nga mga pagbati an ipinakita ni Jesus han namatay hi Lasaro?

⁶ Ipinakita ni Jesus an iba han iya malumo hinduro nga mga pagbati han namatay an iya hinigugma nga sangkay nga hi Lasaro. Nabantad gud hiya han duro nga kasubo ni Maria ngan ni Marta salit waray hiya makapugong han duro nga kasubo, ngan “nagtuok” hiya. “Nasamok” hiya—nabaraka gud tungod han duro nga kasakit ha kasingkasing ngan kasub-anan—bisan kon maaram hiya nga babanhawon na niya hi Lasaro. Katapos, tungod kay napagios han gugma ngan kalooy, ginamit ni Jesus an iya hatag-han-Dios nga awtoridad ngan ginbanhaw hi Lasaro tikang ha mga patay.—Juan 11:11-15, 33-35, 38-44.

 7. Kay ano nga hi Jesus takos han aton pagkamaunungon? (Kitaa liwat an kahon ha pahina 31.)

⁷ May-ada kita matinalahuron nga kahadlok ha marig-on nga gugma ni Jesus ha kon ano an husto ngan ha iya kangalas ha pagkasalingkapaw ngan karaotan. Makaduha nga maisugon nga ginpaiwas niya ha templo an hakog nga mga negosyante. (Mateo 21:12, 13; Juan 2:14-17) Dugang pa, han nakanhi hiya ha tuna sugad nga tawo, nag-antos hiya han ngatanan nga klase hin kakurian, naeksperyensyahan niya mismo an mga pag-ipit ngan mga problema nga aton inaatubang. (Hebreo 5:7-9) Maaram liwat hi Jesus kon ano an inaabat han pagin biktima han kangalas ngan kawaray-hustisya. (Juan 5:15-18; 11:53, 54; 18:38–19:16) Ha kataposan, maisugon nga gin-ilob niya an mabangis nga kamatayon basi matuman an kaburut-on han iya Amay ngan hatagan an iya mga sakop hin kinabuhi nga waray kataposan. (Juan 3:16) Diri ka ba napapagios han sugad nga mga kalidad ni Kristo nga magpadayon ha maunungon nga pag-alagad ha iya? (Hebreo 13:8; Pahayag 5:6-10) Kondi ano an kinahanglan buhaton basi magin sakop ni Kristo nga Hadi?

Mga Kwalipikasyon han Pagin Usa nga Sakop ni Kristo nga Hadi

 8. Ano an ginkikinahanglan ha mga sakop ni Kristo?

⁸ Hunahunaa ini nga pagtanding: An pagin tuminungnong han iba nga nasud kasagaran nga nagkikinahanglan hin pakaabot ha importante nga mga kwalipikasyon. An magigin mga tuminungnong bangin pagkinahanglanon nga magin maopay an pamatasan ngan nasunod ha partikular nga mga surundon ha kahimsog. Sugad man, kinahanglan mamintinar han mga sakop ni Kristo an hitaas nga mga suruklan ha moral ngan an maopay nga kahimsog ha espirituwal.—1 Korinto 6:9-11; Galasia 5:19-23.

 9. Paonan-o naton maipapakita nga maunungon kita kan Kristo?

⁹ Husto liwat nga pagkinahanglanon ni Jesu-Kristo an iya mga sakop nga magin maunungon ha iya ngan ha iya Ginhadian. Ira ipinapakita ito nga pagkamaunungon pinaagi han pagkinabuhi uyon ha iya igintutdo han nakanhi hiya ha tuna sugad nga Pinili-nga-Hadi. Pananglitan, inuuna nira an mga buruhaton ha Ginhadian ngan an kaburut-on han  Dios kay ha materyal nga mga tinguha. (Mateo 6:31-34) Sinsero nga nangangalimbasog liwat hira nga ipakita an sugad-Kristo nga personalidad, bisan pa ha makuri hinduro nga mga kahimtang. (1 Pedro 2:21-23) Dugang pa, an mga sakop ni Kristo nasunod ha iya susbaranan pinaagi han pag-uná ha pagbuhat han maopay ha iba.—Mateo 7:12; Juan 13:3-17.

10. Paonan-o an pagkamaunungon kan Kristo maipapakita ha (a) pamilya ngan (b) kongregasyon?

¹⁰ Ipinapakita liwat han mga sumurunod ni Jesus an ira pagkamaunungon ha iya pinaagi han pagpakita han iya mga kalidad dida ha pamilya. Pananglitan, ipinapakita han mga bana an pagkamaunungon ha ira langitnon nga Hadi pinaagi han pagsubad kan Kristo ha ira paagi han pagtrato ha ira mga asawa ngan mga anak. (Efeso 5:25, 28-30; 6:4; 1 Pedro 3:7) Ipinapakita han mga asawa an pagkamaunungon kan Kristo pinaagi han putli nga paggawi ngan pagpakita hin “maaghop ngan mabuot nga espiritu.” (1 Pedro 3:1-4; Efeso 5:22-24) An kabataan maunungon kan Kristo kon ira sinusunod an iya susbaranan han pagkamasinugtanon. Sugad nga batan-on, hi Jesus nagpasakop pirme ha iya mga kag-anak, bisan kon hira diri-hingpit. (Lukas 2:51, 52; Efeso 6:1) An mga sakop ni Kristo maunungon nga nangangalimbasog pagsubad ha iya pinaagi han pagin “malolooyon, mga mahigugmaon sugad ha magburugto” ngan pagin “mapuanguron.” Nangangalimbasog hira nga magin pariho kan Kristo, ‘mapainubsanon, diri nabulos hin maraot ha maraot, o pasipara ha pasipara.’—1 Pedro 3:8, 9; 1 Korinto 11:1.

Mga Sakop nga Masinugtanon ha Balaud

11. Ha ano nga mga balaud nasunod an mga sakop ni Kristo?

¹¹ Sugad la nga adton naruruyag magin mga tuminungnong ha usa nga nasud nasugot ha mga balaud han ira bag-o nga nasud, sugad man an mga sakop ni Kristo nagpapasakop ha “balaud ni Kristo” pinaagi han pagkinabuhi uyon ha ngatanan nga igintutdo ngan iginsugo ni Jesus. (Galasia 6:2) Labi na gud nga maunungon nga nagkikinabuhi hira uyon ha “hadianon nga balaud” han gugma. (Jakobo 2:8) Ano an nahiuupod hini nga mga balaud?

12, 13. Paonan-o kita maunungon nga nagpapasakop ha “balaud ni Kristo”?

¹² An mga sakop ni Kristo diri-hingpit ngan may-ada mga kaluyahan. (Roma 3:23) Salit, kinahanglan padayon nga pauswagon nira an diri-salingkapaw nga “paghigugma ha mga kabugtoan” basi ‘maghigugmaay gud hira ha usa kag usa tikang ha kasingkasing.’ (1 Pedro 1:22) “Kon may-ada usa ka tawo nga may igsusumbong kontra ha iba,” maunungon nga igin-aaplikar han mga Kristiano an balaud ni Kristo pinaagi han ‘pag-inantusay ha usa kag usa, ngan pagpinasayloay ha usa kag usa.’ An pagsunod hini nga balaud nabulig ha ira nga padayon nga pasayloon an pagkadiri-hingpit ngan pamilngon an mga hinungdan han paghigugmaay ha usa kag usa. Diri mo ba inaapresyar nga kaupod ka han mga maunungon nga nagpapasakop ha aton mahigugmaon nga Hadi, nga tungod hito hira nanunul-ot han gugma, an ‘higot han hingpit’ nga pagkaurosa?—Kolosas 3:13, 14.

 ¹³ Dugang pa, hi Jesus nagsaysay nga an gugma nga iya ipinakita mas daku kay han gugma nga kasagaran nga ipinapakita han mga tawo ha usa kag usa. (Juan 13:34, 35) Kon an aton hinihigugma adto la nga nahigugma ha aton, diri kita nagbubuhat hin anoman nga “labi nga butang.” Ha sugad nga kahimtang an aton gugma magigin diri-bug-os ngan may-depekto. Hi Jesus nagsasagda ha aton nga subaron an gugma han iya Amay pinaagi han pagkaada may-prinsipyo nga gugma bisan ha mga kaaway nga nangangalas ngan nagpipersigir ha aton. (Mateo 5:46-48) Ini nga gugma nagpapagios liwat ha mga sakop han Ginhadian nga maunungon nga magpailob ha ira importante hinduro nga buruhaton. Ano ito?

Ginsasarihan an Pagkamaunungon

14. Kay ano nga importante hinduro an pagsangyaw nga buruhaton?

¹⁴ An mga sakop han Ginhadian may-ada yana importante hinduro nga buruhaton nga ‘pagpamatuod mahitungod han ginhadian han Dios.’ (Buhat 28:23) Importante gud an pagbuhat hito tungod kay an Mesianiko nga Ginhadian magbibindikar han kan Jehova pagkasoberano ha uniberso. (1 Korinto 15:24-28) Kon nagsasangyaw kita han maopay nga sumat, an mga namamati nagkakaada higayon nga magin mga sakop han Ginhadian han Dios. Dugang pa, an reaksyon han mga tawo hito nga mensahe nagigin basihan, o suruklan, han paghukom ha katawohan ni Kristo nga Hadi. (Mateo 24:14; 2 Tesalonika 1:6-10) Salit, an nangunguna nga paagi han aton pagpakita han pagkamaunungon kan Kristo amo an pagsugot ha iya sugo nga isumat ha iba an mahitungod han Ginhadian.—Mateo 28:18-20.

15. Kay ano nga ginsasarihan an pagkamaunungon han mga Kristiano?

¹⁵ Syempre, hi Satanas nakontra ha pagsangyaw nga buruhaton ha ngatanan nga paagi nga iya mahihimo, ngan diri kinikilala han mga tawo nga magmarando an hatag-han-Dios nga awtoridad ni Kristo. (Salmo 2:1-3, 6-8) Salit, hi Jesus nagpahamangno ha iya mga disipulo: “An surugoon diri darodaku han iya agaron. Kon ako ginbiling nira hin pagtimaraot amo man kamo pagbibilngon hin pagtimaraot.” (Juan 15:20) Salit, an mga sumurunod ni Kristo aada ha espirituwal nga pakig-away nga nagsasari han ira pagkamaunungon.—2 Korinto 10:3-5; Efeso 6:10-12.

16. Paonan-o an mga sakop han Ginhadian naghahatag ha ‘Dios han mga butang nga kanan Dios’?

¹⁶ Bisan pa hito, an mga sakop han Ginhadian han Dios nagpapabilin nga maunungon ha ira diri-nakikita nga Hadi kondi matinalahuron ha mga tawo nga may-awtoridad. (Tito 3:1, 2) Hi Jesus nagsiring: “Ihatag kan Cesar an mga butang ni Cesar, ngan ha Dios, an kanan Dios.” (Markos 12:13-17) Salit, an mga sakop ni Kristo nasugot ha mga balaud han gobyerno nga diri nasupak ha mga balaud han Dios. (Roma 13:1-7) Kondi, han an hitaas nga hukmanan han mga Judio kinontra ha mga balaud han Dios pinaagi han pagsugoa ha mga disipulo ni Jesus nga umundang ha pagsangyaw, marig-on kondi matinalahuron nga nagsiring hira nga kinahanglan nira ‘sugton an Dios sugad nga magmarando imbes nga an mga tawo.’—Buhat 1:8; 5:27-32, NW.

17. Kay ano nga mahihimo naton atubangon hin maisugon an mga pagsari ha pagkamaunungon?

¹⁷ Syempre, an mga sakop ni Kristo kinahanglan magmaisugon gud basi makapabilin nga maunungon ha ira Hadi kon naatubang hin persikusyon. Kondi, hi Jesus nagsiring: “Bulahan kamo, kon kamo pagdurugasan, ngan pagtitimarat-an ngan kon pagyayaknan ha ngatanan nga magraot hin buwa kontra ha iyo tungod ha akon. Magkalipay ngan maghimaya kamo, kay daku an iyo balos ha langit.” (Mateo 5:11, 12) An siyahan nga mga sumurunod ni Kristo nakaeksperyensya han pagkatotoo hito nga mga pulong. Bisan kon ginkastigo hira tungod ha pagpadayon ha pagsangyaw mahitungod han Ginhadian, nalipay hira tungod ‘kay naihap hira nga takos mag-antos han kaalohan tungod han iya ngaran. Ngan adlaw-adlaw waray hira ukoy ha panutdo, ngan pagwali, nga hi Jesus amo an Kristo, didto ha templo ngan ha balay-balay.’ (Buhat 5:41, 42) Takos kamo han kumendasyon, tungod han iyo pagpakita hin pariho hito nga disposisyon han pagkamaunungon kon nag-iilob kamo hin mga kakurian, sakit, kamatyi, o pagkontra.—Roma 5:3-5; Hebreo 13:6.

18. Ano an iginpapasabot han ginsiring ni Jesus kan Ponsio Pilato?

 ¹⁸ Han hi Jesus Pinili-nga-Hadi pa la hadto, iya iginsaysay ha Romano nga Gobernador nga hi Ponsio Pilato: “An akon ginhadian diri kanan hini nga kalibotan. Kon an akon ginhadian kanan hini nga kalibotan, an akon mga surugoon makikig-away, basi diri ako hitubyan ngadto ha mga Judio; kondi yana an akon ginhadian diri tikang dinhi.” (Juan 18:36) Salit, an mga sakop han langitnon nga Ginhadian diri nagamit hin armas kontra ha bisan hin-o o diri nadapig ha anoman nga araway han mga tawo. Sugad nga pagkamaunungon ha “Prinsipe han Pagdait,” nagpapabilin hira nga bug-os nga neutral ha may-dinadapigan nga mga buruhaton han kalibotan.—Isaias 2:2-4; 9:6, 7.

Waray Kataposan nga mga Balos ha Maunungon nga mga Sakop

19. Kay ano nga an mga sakop ni Kristo may-pagsarig nga nagpapamulat han tidaraon?

¹⁹ An maunungon nga mga sakop ni Kristo, an “Hadi han mga hadi,” may-pagsarig nga nagpapamulat han tidaraon. Ginpapamulat gud nira an iya tiarabot nga pagpakita han milagroso nga hadianon nga gahum. (Pahayag 19:11–20:3; Mateo 24:30) An mga nanhibilin han maunungon, dinihogan-han-espiritu nga “mga anak han ginhadian” naglalaom han ira presyoso nga panurundon sugad nga mga hadi kaupod ni Kristo ha langit. (Mateo 13:38; Lukas 12:32) Ginpapamulat gud han maunungon nga ‘iba nga mga karnero’ ni Kristo an pag-uyon han ira Hadi kon hiya magsiring: “Kadi kamo, mga pinakamaopay han akon Amay, panunda niyo an ginhadian, nga igin-andam ha iyo tikang han pagtindoga han kalibotan.” (Juan 10:16; Mateo 25:34) Salit, hinaot an ngatanan nga sakop han Ginhadian magin determinado ha pagpadayon ha maunungon nga pag-alagad kan Kristo nga Hadi.

[Footnote]

Maisasaysay Mo Ba?

• Kay ano nga hi Kristo takos han aton pagkamaunungon?

• Paonan-o ipinapakita han mga sakop ni Kristo an ira pagkamaunungon ha iya?

• Kay ano nga karuyag naton magin maunungon kan Kristo nga Hadi?

[Mga Pakiana]

[Kahon ha pahina 31]

IBA PA HAN MAG-OPAY GUD NGA MGA KALIDAD NI KRISTO

Waray ginpapasulabi—Juan 4:7-30.

Maloloy-on—Mateo 9:35-38; 12:18-21; Markos 6:30-34.

Nagsasakripisyo-ha-kalugaringon nga gugma—Juan 13:1; 15:12-15.

Maunungon—Mateo 4:1-11; 28:20; Markos 11:15-18.

Mapinairon—Markos 7:32-35; Lukas 7:11-15; Hebreo 4:15, 16.

Makatadunganon—Mateo 15:21-28.

[Retrato ha pahina 29]

Pinaagi han pagpakita hin gugma ha usa kag usa, maunungon nga nagpapasakop kita ha “balaud ni Kristo”

[Mga Retrato ha pahina 31]

Napapagios ka ba han mga kalidad ni Kristo nga maunungon nga mag-alagad ha iya?