Sunda an Susbaranan ni Jesus Ngan Pagpaid ha mga Pobre

AN KAPOBREHAN ngan panalumpigos naeksister na haros tikang pa han pag-eksister han mga tawo. Bisan kon an Balaud han Dios ha Israel nangangalimbasog ha pagpanalipod ha mga pobre ngan pag-iban han ira pag-antos, agsob talapason ito nga Balaud. (Amos 2:6) Ginkondenar ni propeta Esekiel an paagi han pagtrato ha mga pobre. Hiya nagsiring: “An katawohan han tuna naggamit hin pagtalumpigos, ngan nagbuhat han panikas; oo, ira gin-urit [“ginmaltrato,” NW] an mga kablas ngan an mga runos, ngan gintalumpigos an humarapit ha maraot gud.”—Esekiel 22:29.

Pariho liwat hito an kahimtang han nakanhi hi Jesus ha tuna. An mga lider han relihiyon nagpakita hin bug-os nga kawaray pagtagad ha mga pobre ngan nagkukuri. Iginhulagway hira sugad nga “mahigugmaon han salapi” nga ‘naglamoy han mga balay han mga balo nga kababayin-an’ ngan mas nagtatagad ha pagtuman han ira mga tradisyon kay ha pag-ataman han mga lagas ngan mga pobre. (Lukas 16:14; 20:47; Mateo 15:5, 6) Makatirigamnan nga ha parabola ni Jesus mahitungod han maopay nga Samaritano, ginlabyan la han usa nga saserdote ngan usa nga Lebihanon ha kaluyo nga bahin han kalsada an ira nakita nga ginkastigo nga lalaki imbes nga dumaop basi buligan hiya.—Lukas 10:30-37.

Nagpakita hi Jesus hin Pagtagad ha mga Pobre

An mga asoy han Mga Ebanghelyo han kinabuhi ni Jesus nagpapakita nga bug-os nga hinsasabtan niya an mga kakurian han mga pobre ngan napaid gud ha ira mga panginahanglan. Bisan kon hi Jesus nag-ukoy ha langit, iya igin-ula an iya kalugaringon, nagpakatawo, ngan nagin ‘kablas tungod ha aton.’ (2 Korinto 8:9) Ha pakakita han  damu nga tawo, hi Jesus “nalooy ha ira; kay nanluluya [hira] ngan nagpapatlaag, sugad hin mga karnero nga waray magbarantay.” (Mateo 9:36) An asoy mahitungod han pobre nga balo nagpapakita nga nalipay hi Jesus, diri ha dagku nga regalo han mga riko, nga naghatag tikang ha “ira kahuraan,” kondi ha gutiay nga kontribusyon han pobre nga balo. An iya ginbuhat nakabantad han kasingkasing ni Jesus tungod kay hiya “ha iya kakablasan linabog [“naghulog,” NW] han ngatanan nga iya pinakabuhian.”—Lukas 21:4.

Diri la kay napaid hi Jesus ha mga pobre kondi may-ada liwat hiya personal nga interes ha ira mga panginahanglan. Hiya ngan an iya mga apostol may-ada komon nga pundo nga kinukuhaan han ira iharatag ha pobre nga mga Israelita. (Mateo 26:6-9; Juan 12:5-8; 13:29) Gindasig ni Jesus adton naruruyag magin iya mga sumurunod nga kilalahon an ira obligasyon ha pagbulig ha mga pobre. Iya ginsidngan an usa nga riko nga batan-on nga magmarando: “Ibaligya an ngatanan nga aada ha imo, ngan pagbahin-bahina ha mga kablas, ngan ikaw mamay manggad ha langit; ngan kadi, ngan sumunod ha akon.” An kamatuoran nga an lalaki waray maruyag ha pagbaya han iya mga tinatag-iya nagpakita nga an iya gugma ha mga karikohan labaw pa kay han iya gugma ha Dios ngan ha igkasi-tawo. Tungod hito, waray hiya han mga kalidad nga ginkikinahanglan basi magin disipulo ni Jesus.—Lukas 18:22, 23.

Nagtatagad ha mga Pobre an mga Sumurunod ni Kristo

Han namatay hi Jesus, an mga apostol ngan an iba nga sumurunod ni Kristo nagpadayon ha pagtagad ha ira kaupod nga mga pobre. Han mga 49 K.P., hi apostol Pablo nakigkita kan Jakobo, Pedro, ngan Juan ngan nakiistorya mahitungod han toka nga iya nakarawat tikang ha Ginoo nga hi Jesu-Kristo ha pagsangyaw han maopay nga sumat. Nagkauruyon hira nga hira Pablo ngan Bernabe sadang kumadto ha “mga Hentil,” ngan magsentro ha pagsangyaw ha ira. Kondi, ginsagda nira Jakobo ngan han iya mga kaupod hira Pablo ngan Bernabe nga “pagdumdumon . . . an mga kablas.” Ngan ito an iya ‘gintinguha gud pagbuhata.’—Galasia 2:7-10.

Durante han pagmando ni Emperador Klaudio, nagkaada duro nga gutom ha magkalain-lain nga bahin han Imperyo han Roma. Ha pagbuhat uyon han panginahanglan, an mga Kristiano ha Antiokia “naglarang pagpadara hin tambulig nga salapi ngadto ha mga kabugtoan, nga nangungukoy ha Judea. Amo man an ira binuhat, ngan ira iginsugo ha mga ansyano, pinaagi ha kamot ni Bernabe ngan ni Saulo.”—Buhat 11:28-30.

An totoo nga mga Kristiano yana maaram liwat nga an mga sumurunod ni Jesus kinahanglan magtagad ha mga pobre ngan nagkukuri, labi na hadton mga igkasi-tumuroo. (Galasia 6:10) Salit, nagpapakita hira hin totoo nga pagtagad ha materyal nga mga panginahanglan han mga nagkukuri. Pananglitan han 1998, usa nga duro nga huraw an nakadaot ha kadak-an nga bahin han norte-este nga Brazil. Gindaot hito an kahumayan, mga balatong, ngan kamaisan, nga nagresulta hin gutom ha damu nga lugar—an pinakagrabe ha sulod hin 15 ka tuig. Ha pipira nga lugar, nagkulang bisan an irinmon nga tubig. An mga Saksi ni Jehova ha iba nga bahin han nasud nag-organisa dayon hin mga komite ha pagbulig, ngan ha halipot nga panahon, nakatirok hira hin damu hinduro nga pagkaon ngan nakabayad han gastos han pagpadara han mga suplay.

An mga Saksi nga naghatag han kwarta ngan mga suplay nagsurat: “Nalilipay gud kami ha pakabulig ha amon kabugtoan, labi na kay nakakasiguro kami nga napalipay namon an kasingkasing  ni Jehova. Diri gud namon hingangalimtan an mga pulong han Jakobo 2:15, 16.” Ito nga mga bersikulo ha Biblia nasiring: “Kon an usa nga bugto nga lalaki o babaye mga hubo ngan kulang hin pagkaon ha adlaw-adlaw, ngan masiring ha ira an usa ha iyo; Lakat ha kamurayawan, magmapaso ngan mabusog kamo; kondi waray niyo hira hatagi han mga bagay nga kinahanglan han lawas; ano an kapulsanan hito?”

Ha usa han mga kongregasyon han mga Saksi ni Jehova ha syudad han São Paulo, may mapainubsanon ngan madasigon nga Saksi nga pobre nga pirme nangangalimbasog basi mabuhi man la. Hiya nasiring: “Bisan kon nagkikinabuhi ako ha kapobrehan, an mensahe han Biblia naghahatag hin totoo nga kahulogan ha akon kinabuhi. Diri ako maaram kon ano an mahitatabo ha akon kon waray ako buligi han akon mga igkasi-Saksi.” Han naglabay, kinahanglan maoperahan inin maduruto nga babaye kondi diri niya akos bayaran an operasyon. Hinin partikular nga kahimtang, an kabugtoan ha kongregasyon an nagbayad han pagpaopera. An paghatag hin bulig ha mga igkasi-tumuroo nga nagkukuri ginbubuhat han totoo nga mga Kristiano ha bug-os nga kalibotan.

Kondi, anoman kamakapabantad an sugad nga mga eksperyensya, matin-aw nga an sugad nga sinsero nga mga pangalimbasog diri makakapara han kapobrehan. An gamhanan nga mga gobyerno ngan dagku nga internasyonal nga mga ahensya ha pagbulig, bisan kon baga hin naglalampos, waray makapara han maiha na hinduro nga problema han kapobrehan. Salit, an pakiana nabangon, Ano an sigurado nga solusyon ha kapobrehan ngan ha iba nga mga problema nga nakakadaot ha katawohan?

An mga Katutdoan han Biblia Nagtatagana hin Nagpapadayon nga Bulig

An mga asoy han Mga Ebanghelyo nagsusumat nga hi Jesu-Kristo regular nga nagbubuhat hin maopay para ha mga pobre o may-ada iba nga mga panginahanglan. (Mateo 14:14-21) Kondi, ano nga buruhaton an iya gintagan hin prayoridad? Ha usa nga okasyon, katapos maggahin hin panahon ha pagbulig hadton nanginginahanglan, hi Jesus nagsiring ha iya mga disipulo: “Kadto kita ha mga bungto nga hirani, basi magwali man ako didto.” Kay ano nga gin-undang anay ni Jesus an iya binubuhat para ha mga masakit ngan mga pobre basi ipadayon an iya pagsangyaw? Hiya nagsaysay: “Tungod hini [karuyag sidngon, han pagsangyaw] kinanhi ako.” (Markos 1:38, 39; Lukas 4:43) Bisan kon an pagbuhat hin maopay para ha mga pobre importante kan Jesus, an pagsangyaw mahitungod han Ginhadian han Dios amo an iya siyahan nga misyon.—Markos 1:14.

Tungod kay ginsasagda han Biblia an mga Kristiano nga ‘sumunod ha mga pitad ni Jesus,’ an mga Kristiano yana may-ada matin-aw nga giya may kalabotan ha paghimo hin mga prayoridad ha ira mga pangalimbasog ha pagbulig ha iba. (1 Pedro 2:21) Pariho kan Jesus, binubuligan nira an mga tawo nga nanginginahanglan. Kondi, pariho liwat kan Jesus, an ira gud prayoridad amo an buruhaton nga pagtutdo han mensahe han Biblia mahitungod han maopay nga sumat han Ginhadian han Dios. (Mateo 5:14-16; 24:14; 28:19, 20) Pero kay ano nga an pagsangyaw han mensahe nga aada ha Pulong han Dios sadang magin mas importante kay ha iba nga klase han pagbulig?

An totoo ha kinabuhi nga mga eksperyensya ha bug-os nga kalibotan nagpapakita nga kon hinsasabtan ngan ginsusunod han mga tawo an praktikal nga sagdon han Biblia, mas nasasangkapan hira ha pag-atubang ha adlaw-adlaw nga mga  problema han kinabuhi, upod na an kapobrehan. Dugang pa, an mensahe han Biblia mahitungod han Ginhadian han Dios nga iginsasangyaw han mga Saksi ni Jehova yana naghahatag ha mga tawo hin paglaom para ha tidaraon—usa nga paglaom nga makakapalipay han kinabuhi, bisan durante han makuri hinduro nga mga kahimtang. (1 Timoteo 4:8) Ano nga paglaom ito?

An Pulong han Dios nagpapasarig ha aton may kalabotan han tidaraon: “Sumala ha [kanan Dios] saad, naghuhulat kita hin mga bag-o nga langit ngan bag-o nga tuna, diin mag-uukoy an katadongan.” (2 Pedro 3:13) Kon an Biblia naghihisgot mahitungod han “tuna,” usahay an ginhihisgotan hito amo an katawohan nga naukoy ha tuna. (Genesis 11:1) Salit an matadong nga “bag-o nga tuna” nga iginsaad nga maabot amo an usa nga sosiedad han mga tawo nga inuuyonan han Dios. An Pulong han Dios dugang nga nagsasaad nga ilarom han pagmando ni Kristo, adton may pag-uyon han Dios makarawat han balos nga kinabuhi nga waray kataposan ngan magkakaada makapatagbaw nga kinabuhi ha paraiso ha tuna. (Markos 10:30) Iton maopay hinduro nga tidaraon abrido para ha ngatanan, pati na ha mga pobre. Dida hiton “bag-o nga tuna,” an problema han kapobrehan mawawara na ha waray kataposan.

[Kahon/Retrato ha pahina 7]

PAONAN-O LULUWASON NI JESUS AN POBRE?—Salmo 72:12

HUSTISYA: “Paghuhukman niya an mga kablasanon ha mga tawo, pagluluwason niya an mga anak han mga makinurion, ngan iya pagtutugpakon an matalumpiguson.” (Salmo 72:4) Durante han pagmando ni Kristo ha tuna, magkakaada hustisya para ha ngatanan. Mawawaray na panlimbong, an usa nga karaotan nga nagdadara hin kapobrehan ha damu nga nasud nga mahimo unta magin riko.

KAMURAYAWAN: “Ha iya mga adlaw maburak an mga magtadong, ngan magkakaada kahuraan hin kamurayawan, ngadto ha diri pagsirang han bulan.” (Salmo 72:7) Kadak-an han kapobrehan ha kalibotan resulta han mga samok ngan girra han katawohan. Pahinanaboon ni Kristo an hingpit nga kamurayawan ha tuna, tungod hito mawawara na an usa han nangunguna nga mga hinungdan han kapobrehan.

PAGPAID: “Malolooy hiya ha mga kablasanon ngan makinurion, ngan an mga kalag han mga makinurion iya pagluluwason. Tutubson niya an ira mga kalag tikang ha pagtalumpigos ngan paglugos; ngan marahalon an ira dugo ha iya mga mata.” (Salmo 72:12-14) An mga minos, pobre, ngan tinalumpigos magigin bahin han usa nga malipayon nga tawhanon nga pamilya, nga gin-urosa ilarom han pagmando ni Hadi Jesu-Kristo.

KAHURAAN: “Magkakaada kahuraan hin lugas ha tuna.” (Salmo 72:16) Durante han pagmando ni Kristo, magkakaada kahuraan ha materyal. An mga tawo diri mag-aantos han mga kakulangan hin pagkaon ngan kagutom nga agsob magin hinungdan han kapobrehan yana.

[Retrato ha pahina 4, 5]

Hi Jesus may-ada personal nga interes ha mga panginahanglan han mga pobre

[Retrato ha pahina 6]

An mensahe han Biblia nagdadara hin totoo nga paglaom