An Katuyoan han Dios Para ha Tuna—Hirani Na Matuman

HAN hira Adan ngan Eva nakadto pa ha Paraiso, kinarawat hira hinin hatag han Dios nga sugo: “Magmabungahon kamo ngan magdamu ngan pun-on niyo an tuna, ngan pagtag-iyaha niyo ito: ngan paghadian niyo an kaisdaan han dagat, ngan an katamsihan ha mga langit, ngan an ngatanan nga mga mananap nga nabantad ha bawbaw han tuna.”—Genesis 1:28.

An pagtag-iya o pagsakop han tuna nangangahulogan hin labaw pa kay ha pagkultibar o pag-ataman hin gutiay la nga bahin hito. Pahahaluagon nira Adan ngan Eva ngan han ira mga anak an Paraiso tubtob nga malukop hito an bug-os nga globo. Kondi, an siyahan nga mag-asawa nga tawo nakasala ngan ginpagawas ha hardin han Eden. (Genesis 3:23, 24) Kondi diri ito nangangahulogan nga an tuna diri gud masasakop.

Tungod kay bibendisyonan han Dios an masinugtanon nga katawohan, masasakop nira an tuna. Han an katawohan han kadaan nga Israel nakarawat pa han bendisyon han Dios, mag-opay an abot han ira kaumhan ngan an ira kakahoyan nagbubunga hin mag-opay hinduro nga prutas. An pariho nga mga kahimtang maeksister samtang an aton globo hinay-hinay nga magigin paraiso. Sugad han iginsaad ha giniyahan nga Pulong han Dios, an Biblia, “an tuna [maghahatag] han iya bunga: an Dios, an aton kalugaringon nga Dios [magbibendisyon]  ha aton.” (Salmo 67:6) Ha iba nga pagkayakan, an pasabsaban ngan kabukiran han tuna, an kakahoyan ngan mga bukad hito, an mga salog ngan sapa hito magrarayhak. (Salmo 96:11-13; 98:7-9) An aton globo mapupuno hin marampag nga mga tanom, de-kolor nga mga tamsi, magpakaruruyag nga mga hayop, ngan mahigugmaon nga mga tawo.

Hirani Na an Bag-o nga Kalibotan!

Hirani na naton maeksperyensyahan an bag-o nga kalibotan nga iginsaad ni Jehova nga Dios. “Sumala ha iya saad, naghuhulat kita hin mga bag-o nga langit ngan bag-o nga tuna,” nagsurat hi apostol Pedro, “diin mag-uukoy an katadongan.” (2 Pedro 3:13) Katapos mabasa ito nga mga pulong ni Pedro, bangin hunahunaon han pipira nga ini nga planeta diri gud magigin paraiso. Bangin hunahunaon nira nga sasaliwnan an pisikal nga mga langit ngan tuna. Posible ba ito?

Ano an ‘bag-o nga mga langit’? Diri ito an pisikal nga mga langit nga ginlarang han Dios. (Salmo 19:1, 2) Ha nauna nga mga bersikulo, ginhisgotan ni Pedro an simboliko nga “mga langit”—mga gobyerno han katawohan nga ginpahitaas o ginpalabaw ha ira mga nasasakopan. (2 Pedro 3:10-12) Ini nga “mga langit” napakyas ha pagmando ha katawohan ngan mawawara. (Jeremias 10:23; Daniel 2:44) An ‘bag-o nga mga langit’ nga masaliwan hito amo an Ginhadian han Dios nga ginkukompwesto han Hadi nga hi Jesu-Kristo ngan han iya 144,000 nga igkasi-manurunod nga ginbanhaw ha langitnon nga kinabuhi.—Roma 8:16, 17; Pahayag 5:9, 10; 14:1, 3.

An “bag-o nga tuna” nga gin-unabi ni Pedro diri usa ka bag-o nga planeta. Ginhimo ni Jehova an tuna nga angayan para ha waray kataposan nga pagkinabuhi han tawo. (Salmo 104:5) Usahay, ginagamit han Biblia an pulong nga “tuna” ha paghisgot ha mga tawo. (Genesis 11:1) An tuna nga hirani na bungkagon ginkukompwesto han mga tawo nga bahin hinin maraot hinduro nga kalibotan. Ha pariho nga paagi, an usa nga kalibotan han diri diosnon nga mga tawo nakaeksperyensya hin kabungkagan ha Baha han panahon ni Noe. (2 Pedro 3:5-7) Ano, kon sugad, an “bag-o nga tuna”? Usa ito nga bag-o nga sosiedad han mga tawo—an totoo nga mga magsiringba han Dios, nga ‘magtul-id an kasingkasing.’ (Salmo 125:4; 1 Juan 2:17) An ngatanan nga balaud para ha “bag-o nga tuna” magtitikang ha “mga bag-o nga langit.” Sisiguruhon han matinumanon nga kalalakin-an ha tuna nga masusunod ini nga mga instruksyon.

Mga Butang nga Bag-o Ngan Urusahon!

Gintagan gud kita ni Jehova hin maopay hinduro nga urukyan han gin-andam niya an tuna para ha tawo. Hiya mismo nagsiring nga an ngatanan nga iya ginbuhat ha tuna “duro hin kaopay.” (Genesis 1:31) Gin-aghat ni Satanas nga Yawa hira Adan ngan Eva nga magrebelde. (Genesis 3:1-5; Pahayag 12:9) Kondi, hirani na gumios an Dios basi an magtadong magkaada han “kinabuhi nga totoo.” Ini nangangahulogan hin “kinabuhi nga waray kataposan” ha hingpit nga mga kahimtang ha Paraiso. (1 Timoteo 6:12, 19) Paghisgotan naton an pipira han bendisyon nga mapapahimulosan hito nga panahon.

Durante han Usa ka Yukot ka Tuig nga Pagmando ni Kristo, pupugngan hi Satanas ngan diri makakabuhat hin maraot ha katawohan. Hi apostol Juan nasiring: “Hinkit-an ko an usa nga anghel [an arkanghel nga hi Miguel, o Jesu-Kristo] nga nalusad tikang ha langit, nga may-ada han yawi han atabay nga waray sag-od, ngan in daku nga talikara dida ha iya kamot. Ngan gindakop niya an Dragon, an daan nga halas, nga amo an Yawa ngan Satanas, ngan gin-gapos hiya hin usa ka yukot ka tuig, ngan ilinabog niya hiya ngadto ha atabay nga waray sag-od, ngan sadhan ito, ngan selyohan ito ha bawbaw niya, basi nga diri na niya paglimbongan an mga nasud, ngada ha katapos han usa ka yukot ka tuig.” (Pahayag 20:1-3; 12:12) Gawas pa han kagawasan tikang ha impluwensya ni Satanas samtang aadto hiya ha atabay nga waray sag-od, damu  an magigin hinungdan han mga tawo nga maglipay ilarom han pagmando han Ginhadian.

An karaotan, kamadarahog, ngan girra magigin mga butang han naglabay. An Biblia nagsasaad: “Diri mag-iiha, ngan an mga magraot pagwawad-on: ngan imo pagsususihon hin maopay an iya kahimurutangan, ngan an maraot waray dida. Kondi an maaghop makakapanunod han tuna, ngan maglilipay hira tungod han kahuraan han kamurayaw. An mga magtadong makakapanunod han tuna, ngan maukoy hira dida hin waray kataposan.” (Salmo 37:10, 11, 29) Hi Jehova nga Dios ‘magpapaukoy han mga araway tubtob ha kataposan han tuna.’ (Salmo 46:9) Urusahon gud ito nga mga pasarig han seguridad ngan kamurayawan!

Magkakaada hura nga masustansya ngan magrasa nga pagkaon. “Magkakaada kahuraan hin lugas ha tuna ha bawbaw han mga bukid,” nagkanta an salmista. (Salmo 72:16) Hito nga panahon, waray usa nga kinahanglan mag-ilob hin duro nga gutom.

Waray mag-aantos hin balatian ngan sakit. Oo, “an umurukoy diri masiring: Ako masakit.” (Isaias 33:24; 35:5, 6) Han nakanhi hi Jesu-Kristo ha tuna, iya gintambal an mga sanlahon ngan ginpaopay an mga piol ngan mga buta. (Mateo 9:35; Markos 1:40-42; Juan 5:5-9) Handurawa la an iya pagbubuhaton ha bag-o nga kalibotan! Hunahunaa an kalipayan kon matambal na an mga buta, bungol, piol, ngan ngula.

Samtang an mga masinugtanon nagtitikahingpit, mababag-o an nakakadaot nga mga epekto han kalagas. Mawawara na an mga antiyuhos, tungkod, crutches, lingkoran nga de-kaliding, hospital, ngan medisina. Daku gud an mga pagbag-o samtang nabalik an aton kusog han pagkabatan-on! (Job 33:25) Kada aga, magmamata kita tikang ha maopay nga pagkaturog ha gab-i nga narepreskohan ngan andam ha pagtikang hin usa pa nga adlaw han mga buruhaton nga aton nalilipayan.

An pagkabanhaw han mga hinigugma ngan han iba magpapalipay ha aton kasingkasing. (Juan 5:28, 29; Buhat 24:15) Magigin makalilipay gud an pag-abi-abi kanda Abel, Noe, Abraham, Sara, Job, Moises, Rut, David, Elias, Ester, ngan ha damu pa hinduro! Minilyon nga iba pa an babanhawon liwat. Kadam-an ha ira an waray pa gud kahibaro mahitungod kan Jehova, kondi aabi-abihon hira han mga naiikag ha pagtutdo ha ira mahitungod ha Dios, han iya mga katuyoan, ngan han iya Anak, hi Jesu-Kristo. Samtang nakikilala han mga binanhaw an ira Maglalarang, an kahibaro mahitungod kan Jehova maglulukop gud ha tuna.

Labaw ha ngatanan, masisingba naton an amo la totoo nga Dios tubtob ha waray kataposan. Makakapribilehiyo kita ha “pag-alagad upod an kalipay kan Jehova,” ngan mamurayawon nga magbuburublig kita samtang nagtutukod kita hin mag-opay nga mga balay, nagkukultibar han tuna ngan ha kataposan nagsasakop han bug-os nga tuna. (Salmo 100:1-3; Isaias 65:21-24) Magigin makalilipay gud nga mabuhi ha waray kataposan ha mabungahon, mamurayawon, ngan makaruruyag nga paraiso nga nagpapasidungog ha baraan nga ngaran ni Jehova!—Salmo 145:21; Juan 17:3.

Ultimo nga Pagsari ha Katawohan

Durante han Usa ka Yukot ka Tuig nga Pagmando ni Jesus, iya iaaplikar an kapulsanan han iya halad lukat ha tagsa nga masinugtanon. Ha kaurhian, wawad-on an ngatanan nga sala, ngan ipapahitaas an katawohan ha kahingpitan. (1 Juan 2:2; Pahayag 21:1-4) Tungod kay an mga epekto han sala ni Adan bug-os nga nawara na, maaabot na han hingpit nga katawohan an mga suruklan han Dios ha pisikal, mental, moral, ngan espirituwal. Salit hira ‘magkakabubuhi’ ha bug-os nga kahulogan kon maabot nira an waray-sala  nga kahingpitan. (Pahayag 20:5) Paghihimayaon gud hini ngan han Paraiso nga tuna hi Jehova!

Ha sulod hin halipot nga panahon katapos han Usa ka Yukot ka Tuig nga Pagmando ni Kristo, hi Satanas nga Yawa ngan an iya mga demonyo, o magraot nga mga anghel, pagagawson tikang ha atabay nga waray sag-od diin hira iginlabog mga napulo ka siglo antes pa hito. (Pahayag 20:1-3) Tutugotan hira ha paghimo hin ultimo nga pangalimbasog ha pag-aghat ha mga tawo nga tumalikod ha Dios. Bisan kon an pipira magpadara ha sayop nga mga hingyap, mapapakyas ini nga pagrebelde. Papatayon ni Jehova an mga hakog upod kan Satanas ngan han ngatanan nga iya demonyo. Mawawaray na gud karaotan. An ngatanan nga magburuhat hin sayop mawawara na ha waray kataposan, ngan an magtadong makarawat hin kinabuhi nga waray kataposan.—Pahayag 20:7-10.

Aadto Ka ba?

An mga nahigugma kan Jehova naglalaom hin dayon nga kalipayan. Waray magigin nakakauyam mahitungod ha kinabuhi nga waray kataposan ha Paraiso. Ha pagkamatuod, magigin mas makapainteres an kinabuhi ha paglabay han panahon, tungod kay waray tubtoban ha kahibaro ni Jehova nga Dios. (Roma 11:33) Pirme ka may-ada bag-o nga hibabaroan, ngan magkakaada ka damu nga panahon ha pagkuha hin kahibaro. Kay ano? Tungod kay mabubuhi ka, diri la ha sulod hin 70 o 80 ka tuig, kondi ha waray kataposan.—Salmo 22:26; 90:10; Eklesiastes 3:11.

Kon nahigugma ka ha Dios, magigin malipayon ka gud pirme ha pagbuhat han iya kaburut-on. Hi apostol Juan nagsurat: “Ini an gugma han Dios, nga pagtumanon ta an iya mga sugo; ngan an iya mga sugo diri magbug-at.” (1 Juan 5:3) Salit ayaw gud pagpaulang may kalabotan ha pagpalipay kan Jehova nga Dios pinaagi ha pagbuhat han matadong. Hunahunaa pirme an urusahon nga paglaom nga igintatagana ha imo han Pulong han Dios, an Biblia. Magin determinado ha pagbuhat han kaburut-on ni Jehova, ngan ayaw gud simang tikang hito. Niyan aadto ka kon an katuyoan han Dios para ha tuna matutuman na ngan an aton bug-os-globo nga urukyan magigin paraiso tubtob ha waray kataposan.

[Retrato ha pahina 4]

Tungod han bendisyon han Dios, hura an nagin abot han kaumhan han Israel

[Retrato ha pahina 7]

Ano nga mga bendisyon an ginlalaoman mo nga mapahimulosan ha Paraiso?