“Kinahanglan Sugton Namon an Dios Sugad nga Magmarando Imbes nga an mga Tawo”

“An Pakiaway kan Jehova”

DUHA nga magkaaway nga kasundalohan an nag-aatubang ha magkaatbang nga dapit han usa nga walog. Ha sulod hin 40 ka adlaw nagkakahadlok hinduro an kalalakin-an han Israel ngan padayon nga gin-iininsulto ni Goliat, an gikukusugi nga girriro han mga Pilisteohanon.—1 Samuel 17:1-4, 16.

Hi Goliat naggiginuliat ha pagpinangayat ha mga Israelita pinaagi hini nga mga pulong: “Pili kamo mausa ka tawo para ha iyo, ngan pakadia hiya ha akon. Kon hiya makahimo pakiaway ha akon, ngan patayon ako, dida hito kami maiiyo mga surugoon, kondi kon akon hiya madaog, ngan mamatay hiya, dida hito kamo maaamon mga surugoon, ngan mag-aalagad ha amon. . . . Inaayat ko an mga kasundalohan han Israel hini nga adlaw; tagi ako mausa ka tawo nga kami mag-aaway nga duha.”—1 Samuel 17:8-10.

Ha kadaan nga mga panahon, komon la para ha gikukusugi nga mga girriro nga mag-asdangay ha pagrepresentar han ira kasundalohan. An kadaogan nahingangadto ha grupo han girriro nga nagdaog. Kondi ini nga nangangayat han Israel diri ordinaryo nga sundalo. Hitaas hinduro hiya nga higante—usa nga mabangis ngan makaharadlok nga kaaway. Kondi, ha pagtamay han kasundalohan han katawohan ni Jehova, ginparig-on ni Goliat an iya diri na mababag-o nga dadangatan.

Diri ini usa nga ordinaryo nga kompetisyon ha militar. Butnga kan Jehova ngan han mga dios han mga Pilisteohanon an away. Imbes nga maisugon nga pangunahan an iya kasundalohan kontra ha mga kaaway han Dios, baga hin naparalisa hi Hadi Saul han Israel tungod ha kahadlok.—1 Samuel 17:11.

An Usa nga Batan-on Sinarig kan Jehova

Durante hini nga panahon, may batan-on nga gindihogan na nga magin hadi han Israel nga binisita ha iya kabugtoan ha kasundalohan ni Saul. Hiya hi David. Han hinbatian niya an ginsiring ni Goliat, hiya nagpakiana: “Hin-o ini nga diri sinirkumsisyonan nga Pilisteohanon nga hiya nag-aayat han mga kasundalohan han buhi nga Dios?” (1 Samuel 17:26) Para kan David, hi Goliat nagrirepresentar ha mga Pilisteohanon ngan ha ira mga dios. Tungod han iya matadong nga kasina, naghingyap hi David nga depensahan an ngaran ni Jehova ngan an Israel, ngan makig-away ha higante nga pagano. Kondi hi Hadi Saul nagsiring: ‘Diri ka takos ha pagkadto patok hini nga Pilisteohanon ha pakig-away ha iya, kay ikaw batan-on.’—1 Samuel 17:33.

Magkaiba gud an disposisyon ni Saul ngan ni David! Ginhuhunahuna la ni Saul hi David sugad nga batan-on nga karuyag makiaway ha mabangis nga higante. Kondi para kan David, tawo la hi Goliat nga nag-aayat ha Soberano nga Ginoo nga hi Jehova. An kaisog ni David iginbasar ha iya marig-on nga pagtoo nga diri tutugotan han Dios an Iya ngaran ngan an Iya katawohan nga tamayon nga diri masisirotan an nagbuhat hito. Samtang iginhahambog ni Goliat an iya kusog, nasarig hi David kan Jehova, gin-aanalisar an kahimtang ha punto de bista han Dios.

“Nakanhi Ako ha Imo ha Ngaran ni Jehova”

An pagtoo ni David may-ada marig-on nga basihan. Iya nahinunumdoman nga ginbuligan hiya han Dios nga luwason an iya kakarnerohan tikang ha oso ngan leon. Sigurado an batan-on nga magbarantay hin karnero nga bubuligan hiya yana ni Jehova nga makaato hinin makaharadlok nga Pilisteohanon nga kaaway. (1 Samuel 17:34-37) Hi David, nga labyog la an dara ngan lima nga mahamis nga bato, ginawas ha pag-ato kan Goliat.

Ginkarawat han batan-on nga hi David inin baga hin imposible nga ayat pinaagi ha pagsarig ha kusog nga iginhahatag ni Jehova. Maisugon nga iya ginsidngan an Pilisteohanon: “Nakanhi ka  ha akon nga may dara nga kampilan, ngan hin bangkaw, ngan hin budyak; kondi nakanhi ako ha imo ha ngaran ni Jehova han mga kasundalohan, an Dios han kasundalohan han Israel, nga imo pinangangayat. Hini nga adlaw itutubyan ka ni Jehova ha akon kamot . . . An bug-os nga kalibotan mahibaro nga may-ada usa nga Dios ha Israel. Ngan nga an bug-os nga katirokan mahibaro nga hi Jehova nagluluwas diri pinaagi hin kampilan ngan hin bangkaw: kay an pakiaway kan Jehova.”—1 Samuel 17:45-47.

Ano an resulta? An giniyahan nga asoy nasiring: “Nagdaog hi David patok ha Pilisteohanon pinaagi hin usa nga labyog ngan usa nga bato, ngan hinampak an Pilisteohanon, ngan pinatay hiya; kondi waray kampilan ha kamot ni David.” (1 Samuel 17:50) Waray hiya kinakaptan nga kampilan, kondi may-ada hiya han gamhanan nga suporta ni Jehova nga Dios. a

Nabindikar gud an pagtoo ni David kan Jehova dida hito nga away! Kon kinahanglan kita magpili butnga han kahadlok ha mga tawo ngan han pagsarig ha gahum ni Jehova ha pagluwas, matin-aw an pagpili: “Kinahanglan sugton namon an Dios sugad nga magmarando imbes nga an mga tawo.” (Buhat 5:29, NW) Dugang pa, kon ginhuhunahuna naton an magkuri nga mga kahimtang ha punto de bista ni Jehova nga Dios, nagkakaada kita timbang nga panhunahuna bisan ha magkuri hinduro nga mga problema.

[Footnote]

[Kahon/Retrato ha pahina 9]

MATIONAN-O KADAKU HI GOLIAT?

An asoy ha 1 Samuel 17:4-7 nagsusumat ha aton nga an kahitaas ni Goliat sobra unom ka siko—sobra siyam ka piye. An nagpapakita han kadaku ngan kusog ni Goliat amo an iya tumbaga nga kutamaya. May kabug-aton ito nga 57 kilo! An pulo han iya bangkaw pariho hin biga nga kahoy, ngan an puthaw nga tarom hito 7 kilo an kabug-at. Aw, posible gud nga an taming ni Goliat mas mabug-at pa ngani kay ha kan David mismo!