Ano an Katuyoan han Dios Para ha Tuna?

KAY ano nga naruruyag ka ha paglinakat-lakat ha parke o pagpamasyada ha kapatagan nga may-ada maghamot nga mga bukad? Kay ano nga nagrarayhak ka kon nakita ka hin makaruruyag nga danaw o hin kabukiran nga an mga pungkay natatabonan hin dampog? Kay ano nga naundang ka basi mamati ha makalilipay nga huni han katamsihan samtang aadto hira ha tarimpongayan han mga kahoy? Ngan kay ano nga makaruruyag gud an pagkita hin elegante nga bugsok nga naglulukso-lukso o hin panon han kakarnerohan nga nananabsab ha kapatagan?

May-ada usa nga baton hini ngatanan nga pakiana. Ginlarang kita basi umukoy ha Paraiso! Dida hito nagtikang magkinabuhi an aton siyahan nga mga kag-anak, hira Adan ngan Eva. Nakuha naton ha ira an aton hingyap ha pag-ukoy ha Paraiso, ngan nakuha nira ito tikang ha ira Maglalarang, hi Jehova nga Dios. Maaram hiya nga kita nga mga tawo magigin malipayon ha Paraiso tungod kay ginlarang niya kita nga may-ada mga kalidad nga ginkikinahanglan basi malipay hinin maopay hinduro nga urukyan nga tuna.

Kay ano nga ginlarang ni Jehova an tuna? Iya ‘ginhitsura ito basi pag-ukyan’ han katawohan. (Isaias 45:18) Gintagan han ‘Naghimo han tuna’ hira Adan ngan Eva hin makaruruyag nga paraiso nga urukyan, an hardin han Eden. (Jeremias 10:12; Genesis 2:7-9, 15, 21, 22) Sigurado nga nalipay gud hira ha mga salog, mga bukad, ngan kakahoyan hito! An magpakaruruyag nga katamsihan mahimo makita ha kalangitan, ngan an magkalain-lain nga hayop naglalakat-lakat ha tuna—waray hito an nakakapeligro ha mga tawo. An isda ngan iba nga linarang naglalangoy-langoy ha matin-aw ngan malimpyo nga katubigan han tuna. Labaw ha ngatanan, magkaupod hira Adan ngan Eva. Mahimo hira manganak ngan magpahaluag han ira urukyan nga Paraiso samtang malipayon nga nakikig-upod ha ira nagdadaku nga pamilya.

Bisan kon an tuna diri paraiso yana, maipapariho ito ha maopay hinduro nga balay hin malipayon nga pamilya. An bug-os-tuna nga urukyan nga hatag han Dios ha aton may-ada han aton ginkikinahanglan—kapawa, kapaso, tubig, ngan pagkaon. Inaapresyar gud naton an kapawa ngan kapaso han adlaw ngan an makaruruyag nga kahayag han bulan ha gab-i!  (Genesis 1:14-18) Ha ilarom han tuna may-ada mga surok han enerhiya, sugad han karbon ngan asyete, nga aton magagamit ha paghatag hin kapaso. Tungod han sikolo han tubig ngan han sistema han mga salog, danaw, ngan kadagatan ha tuna, may-ada kita tubig. Ngan sugad hin alpombra, an tuna napuputos liwat hin berde nga banwa.

Sugad la nga an pagkaon mahimo tipigan ha balay, may-ada hura nga suplay hin pagkaon ha tuna. ‘Gintatagan kita ni Jehova hin mga panahon nga mauswagon, ngan ginpupuno an aton mga kasingkasing hin kalipay,’ pinaagi han mga tanom ha kaumhan ngan mga prutas ha mga taranman. (Buhat 14:16, 17) Tungod kay an tuna maopay na gud nga urukyan, handurawa la kon magigin ano pa gud ito kon himoon na ito nga paraiso han “malipayon nga Dios,” hi Jehova!—1 Timoteo 1:11, NW.

 [Ginkuhaan han mga Retrato ha pahina 2]

KOBRE: Earth: NASA photo; Stars: NASA, ESA and AURA/Caltech