May-ada ka ba “Kagawasan ha Pagyakan”?

SOBRA unom ka milyon nga tawo ha 235 nga katunaan an nagpapahimulos han tinatawag han Biblia nga “kagawasan ha pagyakan.” An mga pulong mababasa hin 16 ka beses ha Kristiano Griego nga Kasuratan han New World Translation of the Holy Scriptures. (Filipos 1:20, NW; 1 Timoteo 3:13, NW; Hebreo 3:6, NW; 1 Juan 3:21, NW) Ano an iginpapasabot han “kagawasan ha pagyakan”? Ano an nabulig ha aton nga magkaada hito? Ha ano nga mga okasyon han komunikasyon nagtutugot ini nga kagawasan ha aton nga makagpahayag nga diri nauulangan?

Sumala ha Vine’s Expository Dictionary of Old and New Testament Words, an Griego nga termino para ha mga pulong nga “kagawasan ha pagyakan” nagpapasabot hin “libre nga pagyakan, diri pag-alang ha pagyakan, . . . an kawaray kahadlok ha pagyakan hin maisugon; salit, nangangahulogan ito hin kompyansa, malipayon nga kaisog, kawaray kahadlok, nga diri pirme may kalabotan ha pagyakan.” Kondi, an sugad nga kaprangka diri sadang sabuton nga pagin bastos o kawaray batasan. “An iyo pulong kinahanglan nga may maada grasya,” siring han Biblia. (Kolosas 4:6) An kagawasan ha pagyakan nag-uupod hin pagpabilin nga matinalahuron samtang diri tinutugotan an nakakapaguol nga mga kahimtang o an kahadlok ha tawo nga makapugong ha aton pagyakan.

An kagawasan ba ha pagyakan natural nga katungod naton? Tagda an ginsurat ni apostol Pablo ha mga Kristiano ha Efeso. Hiya nagsiring: “Ha akon, nga ubos han mga giuubusi ha ngatanan nga mga baraan, ini nga grasya iginhatag, ha pagwali ha mga Hentil an diri sadang matugkad nga mga manggad ni Kristo.” Nagdugang hi Pablo nga pinaagi kan Jesu-Kristo may-ada naton kagawasan ha pagyakan ngan ‘makakahirani nga may pagsarig, tungod ha aton pagtoo ha iya.’ (Efeso 3:8-12) Imbes ha pagin natural nga katungod naton, an kagawasan ha pagyakan resulta han aton relasyon kan Jehova nga Dios nga iginbasar ha pagtoo kan Jesu-Kristo. Aton kitaon kon ano an makakabulig ha aton nga magkaada hini nga kagawasan ngan kon paonan-o naton maipapakita ito kon kita nagsasangyaw, nagtututdo, ngan nag-aampo.

Ano an Nabulig ha Aton ha Pagsangyaw nga Waray Kahadlok?

Hi Jesu-Kristo an nangunguna nga susbaranan han usa nga may-ada kagawasan ha pagyakan. An iya kadasig nagpagios ha iya nga salingabuton an mga higayon ha pagsangyaw. Napahuway man, nakaon ha kanan iba balay, o naglalakat ha dalan, waray gud hiya ginpapalabay nga higayon ha pag-istorya mahitungod han Ginhadian han Dios. Bisan an pagtamay o direkta nga pagkontra waray magin hinungdan nga mahadlok hi Jesus ngan  diri na la magyakan. Lugod, maisugon nga iginbuhayhag niya an palso nga mga lider han relihiyon han iya panahon. (Mateo 23:13-36) Bisan han gin-aresto ngan ginbista, waray kahadlok nga nagyakan hiya.—Juan 18:6, 19, 20, 37.

An mga apostol ni Jesus nagin sugad liwat kaprangka. Han Pentekostes 33 K.P., nagyakan hi Pedro nga may kagawasan ha sobra 3,000 nga tawo. Makatirigamnan nga diri pa la maiha antes hito, nahadlok hiya han nakilal-an hiya hin surugoon nga babaye. (Markos 14:66-71; Buhat 2:14, 29, 41) Han pwersado nga ginpaatubang ha mga lider han relihiyon, waray mahadlok hira Pedro ngan Juan. Waray hira pag-alang ha pagsangyaw nga maisugon may kalabotan ha binanhaw nga hi Jesu-Kristo. Ha pagkamatuod, an ira pagkaprangka an nagin hinungdan nga makilala han mga lider han relihiyon nga ini nga kalalakin-an nakaupod ni Jesus. (Buhat 4:5-13) Ano an nakabulig ha ira nga magin maisugon hinduro ha pagyakan?

Hi Jesus nagsaad ha iya mga apostol: “Kon kamo ira na igtubyan, diri kamo mangarit kon oonanhon, o kon ano an igyayakan, kay ihahatag ha iyo hito ngahaw nga oras an iyo igyayakan. Kay diri kamo an magyayakan, kondi an espiritu han Amay, nga nagyayakan ha iyo.” (Mateo 10:19, 20) An baraan nga espiritu binulig kan Pedro ngan ha iba nga malamposan an bisan ano nga kaawdanon o kahadlok nga posible makaulang ha ira kagawasan ha pagyakan. An impluwensya hito nga gamhanan nga pwersa makakabulig liwat ha aton.

Dugang pa, ginsugo ni Jesus an iya mga sumurunod nga maghimo hin mga disipulo. Angayan ini, tungod kay hiya an gintagan han “ngatanan nga kagamhanan . . . ha langit ngan ha tuna.” Ngan ‘kaupod hiya nira.’ (Mateo 28:18-20) An paghibaro han suporta ni Jesus nakahatag ha siyahan nga mga disipulo hin kompyansa samtang naatubang hira ha mga awtoridad nga determinado ha pagpugong han ira pagsangyaw. (Buhat 4:18-20; 5:28, 29) An sugad nga kahibaro makakabulig liwat ha aton.

Ha paghisgot hin usa pa nga hinungdan ha pagin prangka, iginkaw-ing ni Pablo an paglaom ha ‘pagyakan nga waray kahadlok.’ (2 Korinto 3:12; Filipos 1:20) Tungod kay an mensahe han paglaom urusahon hinduro nga kawang kon titipigan la ha ira kalugaringon, kinahanglan ig-istorya ito han mga Kristiano ha iba. Oo, an aton paglaom usa nga hinungdan para ha aton nga magyakan nga may kagawasan.—Hebreo 3:6.

Pagsangyaw nga May Kaisog

Paonan-o kita makakagsangyaw nga may kaisog bisan kon nakakaeksperyensya kita hin mga kakurian? Tagda an susbaranan ni apostol Pablo. Samtang priso ha Roma, ginhangyo niya an iya mga igkasi-tumuroo nga mag-ampo nga ‘ihatag unta ha iya an katadongan hin pamulong, nga tungod hito makagyakan hiya hin waray kahadlok, sugad han kinahanglan niya igyakan.’ (Efeso 6:19, 20) Ginbaton ba adto nga mga pag-ampo? Oo! Samtang priso hi Pablo, nagpadayon hiya ha ‘pagwali han ginhadian han Dios ha bug-os nga kaisog, ha waray kaulangan.’—Buhat 28:30, 31.

An paggamit han mga higayon ha pagsangyaw ha trabaho, ha eskwelahan, o samtang nagbibiyahe mahimo magsari han aton kagawasan ha pagyakan. An kaawdanon, kahadlok ha reaksyon han iba, o kakulang hin kompyansa ha aton abilidad bangin magin hinungdan han aton diri pagyakan. May kalabotan na liwat hini, hi apostol Pablo maopay nga susbaranan. “Nangahas gud kami ha aton Dios ha pagyakan ha iyo han maopay nga sumat han Dios ha daku nga kasamokan,” o pangalimbasog, hiya nagsurat. (1 Tesalonika 2:2) Tungod la kay sinarig hi Pablo kan Jehova, nabuhat niya an mga butang nga diri niya mahimo ha iya la ngahaw.

An pag-ampo nakabulig ha babaye nga hi Sherry nga makagyakan nga may kaisog kon may higayon ha diri pormal nga pagsangyaw. Usa ka adlaw, samtang naghihinulat hiya ha iya bana ha pagbalik tikang ha usa nga kasabot, nakita niya an usa pa nga babaye nga naghihinulat liwat. “Tungod kay ginkulba ako,” siring ni Sherry, “nag-ampo ako kan Jehova para hin kaisog.” Samtang nadaop hiya ha babaye, may inabot nga ministro han Baptist. Diri niya linalaoman nga may makaistorya nga klerigo. Kondi, nag-ampo hiya utro ngan nakagsangyaw. Nakapahamutang hiya hin literatura ha babaye ngan nakigsabot ha pagbalik bisita. Kon aton ginsasalingabot an mga higayon ha pagsangyaw, makakasarig kita nga an pagtapod kan Jehova mabulig ha aton nga makagyakan nga maisugon.

 Kon Nagtututdo

An kagawasan ha pagyakan duok nga may kalabotan ha pagtutdo. May kalabotan ha “kalalakin-an nga nag-aalagad ha maopay nga paagi” ha kongregasyon, an Biblia nasiring: “Nakuha [hira] para ha ira kalugaringon hin maopay nga pagtindog ngan daku nga kagawasan ha pagyakan ha pagtoo may kalabotan kan Jesu-Kristo.” (1 Timoteo 3:13, NW) Nakukuha nira ini nga kagawasan ha pagyakan pinaagi ha pag-aplikar mismo han ira gintututdo ha iba. An ira pagbuhat hito nagpapanalipod ngan nagpaparig-on han kongregasyon.

Kon may-ada kita kagawasan ha pagyakan hini nga paagi, mas epektibo an aton sagdon ngan mas posible nga susundon. Imbes nga maulang han diri maopay nga ehemplo, nadadasig an mga mamarati kon nakita hira hin praktikal nga pag-aplikar han igintututdo ha ira. Ini nga kagawasan nabulig hadton may-ada espirituwal nga mga kwalipikasyon ha ‘pagpabalik han ira bugto’ antes dumaku an problema. (Galasia 6:1) Ha kabaliktaran, an tawo nga nagpapakita hin diri maopay nga ehemplo bangin mag-alang ha pagsagdon, tungod kay naabat hiya nga waray hiya katungod. An kalangan ha paghatag han ginkikinahanglan nga sagdon mahimo magresulta hin maraot.

An aton pagyakan nga may kaisog diri nangangahulogan hin pagin kritiko o dogmatiko. Gindasig ni Pablo hi Filemon “tungod ha gugma.” (Filemon 8, 9) Ngan an mga pulong han apostol matin-aw nga positibo nga ginkarawat. Ha pagkamatuod, gugma an sadang magin hinungdan han bisan ano nga sagdon nga mahimo ihatag han usa nga tigurang!

An kagawasan ha pagyakan sigurado nga importante kon kinahanglan maghatag hin sagdon. Importante liwat ito ha iba nga panahon. Hi Pablo nagsurat ha kongregasyon ha Korinto: “Daku an pangahas [“kagawasan ha pagyakan,” NW] ko ha pagyakan ngadto ha iyo, daku an paghimaya ko tungod ha iyo.” (2 Korinto 7:4) Waray mag-alang hi Pablo ha paghatag hin kumendasyon ha iya kabugtoan han takos hira hito. An gugma nagpagios ha iya ha pagsentro ha maopay nga mga kalidad han iya mga igkasi-tumuroo, bisan kon maaram hiya han ira mga kaluyahan. Nadadasig liwat an Kristiano nga kongregasyon yana kon hura nga ginkukumendasyonan ngan gindadasig han mga tigurang an ira kabugtoan.

Basi magin epektibo ha ira pagtutdo, an ngatanan nga Kristiano kinahanglan magkaada kagawasan ha pagyakan. Hi Sherry, nga gin-unabi kanina, naruyag ha pagdasig ha iya mga anak nga magsangyaw ha eskwelahan. “Bisan kon ginpadaku ako ha kamatuoran,” siring niya, “talagsa la ako magsangyaw ha eskwelahan. Ngan haros diri ako nagsasangyaw ha impormal nga paagi. Ginpakianhan ko an akon kalugaringon, ‘Ano nga klase hin susbaranan an akon iginpapakita ha akon mga anak?’ ” Nakaaghat ini kan Sherry nga dugang nga mangalimbasog ha pagsangyaw ha impormal nga paagi.

 Oo, inoobserbahan han iba an aton ginbubuhat ngan nakikita nira kon napapakyas kita ha pagbuhat han aton igintututdo. Mangalimbasog kita, kon sugad, ha pagkaada kagawasan ha pagyakan pinaagi ha pagpangalimbasog nga gumios uyon ha aton ginyayakan.

Ha Pag-ampo

An kagawasan ha pagyakan labi nga importante kon nag-aampo kita kan Jehova. Mahimo kita makagpahayag kan Jehova han aton inaabat nga diri naaawod tungod kay nasarig nga namamati hiya ha aton mga pag-ampo ngan babatunon niya ito. Ha sugad nga paagi, nagpapahimulos kita hin mahigugmaon ngan duok nga relasyon ha aton langitnon nga Amay. Diri gud kita sadang mag-alang ha pakiistorya kan Jehova, ha paghunahuna nga diri gud kita importante. Ano an sadang naton buhaton kon an aton pag-abat hin pagin salaan tungod hin sayop o sala nakakapugong han aton kinasingkasing nga mga kapahayagan? Makakaistorya pa ba gihapon naton an Soberano han uniberso nga diri nauulangan?

An ginpahitaas nga katungdanan ni Jesus sugad nga Hitaas nga Saserdote naghahatag hin dugang nga basihan para han kompyansa ha pag-ampo. Ha Hebreo 4:15, 16, aton mababasa: “Diri nga waray ta usa nga Hitaas nga Saserdote nga diri sadang makahimo hin pagbati ha aton mga kakurian; kondi hiya man ginsulay ha ngatanan nga paagi sugad ha aton, kondi waray sala. Busa manaraon kita nga nangahas [“kagawasan ha pagyakan,” NW] ngadto ha hadianon nga lingkuranan han grasya, basi nga makakarawat kita hin pagkalooy, ngan makaagi hin grasya nga makakatambulig ha aton ha oras nga may kinahanglan.” Sugad hito an bili han kamatayon ni Jesus ngan han iya bahin sugad nga Hitaas nga Saserdote.

Kon nangangalimbasog gud kita ha pagsugot kan Jehova, makakasarig kita nga pamamatian niya kita ha positibo nga paagi. Hi apostol Juan nagsurat: “Mga hinigugma, kon an aton kasingkasing diri maghukom hin sirot ha aton, may-ada ta pagsarig [“kagawasan ha pagyakan,” NW] ha Dios: ngan kakarawaton ta tikang ha iya an ngatanan nga aton pangaroon, kay gintuman ta an iya mga sugo ngan ginbuhat ta an mga bagay nga mag-opay ha iya atubangan.”—1 Juan 3:21, 22.

An waray-ulang nga pakiistorya kan Jehova ha pag-ampo nangangahulogan nga mahimo naton isumat ha iya an bisan ano. Anoman an aton ginkakahadlokan, ginkakabarak-an, ginpuproblemahan, o ginkakagol-an, mahimo naton ito isumat kan Jehova, nasarig nga pirme hiya mamamati gud ha aton sinsero nga mga pag-ampo. Bisan kon nakasala kita hin seryoso, an pag-abat hin pagin salaan diri makakaulang han aton pagpahayag ha pag-ampo kon sinsero kita nga nagbabasol.

An diri-takos nga regalo nga kagawasan ha pagyakan presyoso gud. Pinaagi hito mahimo naton madayaw an Dios ha aton pagsangyaw ngan pagtutdo nga buruhaton ngan magin mas duok ha iya ha pag-ampo. Diri naton ‘wad-on an kagawasan ha pagyakan, nga may daku nga balos nga ibabayad’—an balos nga kinabuhi nga waray kataposan.—Hebreo 10:35, NW.

[Retrato ha pahina 13]

Hi apostol Pablo nagyakan nga may kaisog

[Mga Retrato ha pahina 15]

An epektibo nga pagtutdo nagkikinahanglan hin kagawasan ha pagyakan

[Retrato ha pahina 16]

Importante an kagawasan ha pagyakan ha pag-ampo