Mga Pakiana Tikang ha mga Magbarasa

Ha Mosaiko nga Balaud, kay ano nga an pipira nga natural nga buruhaton may kalabotan ha sekso ginhuhunahuna nga ‘nakakapahugaw’ ha usa nga tawo?

Ginlarang han Dios an sekso para ha pagdamu han mga tawo ngan para ha kalipayan han mag-asawa. (Genesis 1:28; Proberbios 5:15-18) Kondi, ha kapitulo 12 ngan 15 han Lebitiko, makakabiling kita hin detalyado nga mga balaud may kalabotan ha kahugawan tungod ha paggawas han semilya, pagregla, ngan pagpanganak. (Lebitiko 12:1-6; 15:16-24) An sugad nga mga balaud nga iginhatag ha kadaan nga Israel nakaaghat hin mahimsog nga estilo han pagkinabuhi, nagsuporta ha hitaas nga mga prinsipyo ha moral, ngan nagpabug-at han pagkabaraan han dugo ngan han panginahanglan hin pagtabon han mga sala.

An usa nga ginpauswag han mga igin-obligar han Mosaiko nga Balaud may kalabotan ha seksuwal nga mga buruhaton amo an kabug-osan nga kahimsog han komunidad han mga Israelita. An libro nga The Bible and Modern Medicine nasiring: “An regulasyon ha pagdiri han pakighilawas durante han regla nagin epektibo ha paglikay ha pipira nga sakit nga makukuha ha pakighilawas . . . ngan usa gud nga proteksyon ha pagkaporma ngan pagtubo hin mga kanser ha serbiks.” An sugad nga mga balaud nagpanalipod ha katawohan han Dios ha mga sakit nga bangin waray pa hibaroi o diri ngani mahibabaroan nira. An pagin limpyo may kalabotan ha sekso nagpauswag han kapasidad ha pagpanganak hini nga nasud nga ginsaaran han Dios hin pagdamu ngan kahuraan. (Genesis 15:5; 22:17) Ginpanalipdan liwat han sugad nga mga balaud an emosyonal nga kahimsog han katawohan han Dios. Pinaagi ha pagsunod hini, nahibaro an mga bana ngan asawa ha pagkontrol han hingyap ha pakighilawas.

Kondi, an nangunguna nga isyu nga nahiupod ha mga klase han kahugaw nga resulta han mga butang may kalabotan ha sekso amo an pag-agos o kawara han dugo. An mga balaud ni Jehova may kalabotan ha dugo nagpasilsil ha hunahuna han mga Israelita diri la han pagkabaraan han dugo kondi han espesyal nga bahin liwat hito ha pagsingba kan Jehova, labi na ha mga halad ngan ha paglukat ha mga sala.—Lebitiko 17:11; Deuteronomio 12:23, 24, 27.

Salit, an detalyado nga ginkikinahanglan han Balaud may kalabotan hini duok nga nakakaw-ing ha pagkadiri-hingpit han tawo. Maaram an mga Israelita nga hira Adan ngan Eva—katapos nira makasala—diri na magkakaanak hin hingpit nga mga anak. An ngatanan han ira katulinan mag-aantos han mga epekto han napanunod nga sala—pagkadiri-hingpit ngan kamatayon. (Roma 5:12) Tungod hini, an maipapasa la han mga kag-anak amo an diri-hingpit ngan makasasala nga kinabuhi, bisan kon ha tinikangan an mga organo ha pagpanganak han tawo gindisenyo ha pagpasa hin hingpit nga kinabuhi pinaagi ha kahikayan han pag-asawa.

Hito nga paagi, an mga ginkikinahanglan han Balaud may kalabotan ha paglimpyo nagpahinumdom ha mga Israelita diri la han ira napanunod nga pagkamakasasala kondi han panginahanglan liwat hin halad lukat ha pagtabon han mga sala ngan pagpabalik han kahingpitan han tawo. Syempre, an ira iginhalad nga mga hayop waray makatuman hito. (Hebreo 10:3, 4) An katuyoan han Mosaiko nga Balaud amo an pagtugway ha ira ngadto kan Kristo ngan an pagbulig ha ira nga hisabtan nga pinaagi la han hingpit nga tawhanon nga halad ni Jesus posible an totoo nga kapasayloan, nga nag-aabri han dalan ngadto ha kinabuhi nga waray kataposan para ha matinumanon nga mga tawo.—Galasia 3:24; Hebreo 9:13, 14.