Istorya han Kinabuhi

Hura nga Ginbalosan ni Jehova an Akon Hingyap nga Magin Misyonera

Iginsumat ni Sheila Winfield da Conceição

Usa nga misyonera nga bisita tikang ha Aprika an makausa nga nagsiring ha amon nga ha iya teritoryo an ngatanan nagpapasulod ha iya ngan atentibo nga namamati ha maopay nga sumat han Ginhadian han Dios. ‘Karuyag ko gud magsangyaw ha sugad hito nga teritoryo!’ naghunahuna ako. Ito nga pag-istorya, nga hito nga panahon 13 anyos ako, nakapugas ha akon hin hingyap nga magin misyonero.

KONDI, an amon pamilya mas temprano pa nga nagtikang mahibaro mahitungod kan Jehova. Usa ka aga han 1939, duha nga desente-an-pamado nga batan-on nga kalalakin-an an nagtuktok ha amon purtahan ha Hemel Hempstead, ha gawas la han Greater London, Inglatera. Mga Saksi ni Jehova hira. Natawo ako han tuig la antes hito, salit diri ko na nahinunumdoman ito nga pagbisita. Basi pabayaon hira, ginsidngan hira ni Nanay nga bangin interesado hi Tatay kondi mga alas 9:00 h.g. na hiya mauli. Nahipausa gud hi Nanay han binalik hira hito nga gab-i mismo! Katapos masiguro an ira disposisyon ha mga isyu may kalabotan ha politika ngan nasyonalismo, ginpasulod hira han akon tatay nga hi Henry Winfield, ngan nagkarawat hiya hin pag-aram ha Biblia. Madagmit nga nag-uswag hiya tubtob nga nagpabawtismo. Paglabay hin pipira ka tuig, an akon nanay nga hi Kathleen nag-aram liwat. Nabawtismohan hiya han 1946.

Han 1948, nagtikang ako ha regular nga pakigbahin ha pagsangyaw han maopay nga sumat han Ginhadian han Dios. Naghunahuna ako nga magkikinahanglan ako hin relo basi eksakto an akon pagreport han akon oras ha ministeryo. Kon nagbibinuotan kami nga kabataan, kada Sabado gintatagan kami hin usa nga sixpence (sinselyo nga katugbang hin unom ka sentabo). Gintirok  ko an kada usa hito ha sulod hin haros duha ka tuig basi mapalit ko an pinakabarato nga relo hito nga panahon. Kondi hi Ray, an manghod ha akon duha nga bugto nga lalaki, pirme naaro kan Tatay hin duha nga threepence (sinselyo nga katugbang hin tulo ka sentabo), ngan nadiri gud hin usa ka sixpence. Usa ka adlaw nagpirit gud hiya pag-aro hin duha nga sinselyo salit nasina hi Tatay. Nagtangis hi Ray ngan nagsiring nga kinahanglan niya an duha nga sinselyo tungod kay may-ada hiya sekreto nga hiya la ngan hi Jehova an maaram. Ha kataposan, nagsaysay hi Ray: “An usa nga sinselyo ihuhulog ko ha kahon han kontribusyon, ngan an usa para ha akon.” Nakatangis hi Nanay tungod ha kalipay, ginliwanan dayon ito ni Tatay hin duha nga sinselyo, ngan hinbaroan ko an pagkaimportante han pinansyal nga pagsuporta ha buruhaton ha Ginhadian.

Hini nga panahon, nagplano hi Tatay ha pagbalhin ha lugar nga may-ada mas daku nga panginahanglan hin mga parasamwak han Ginhadian. Han 1949 ginbaligya niya an iya uma ngan an buho han baras ngan graba ngan nagpayunir, nag-aalagad sugad nga bug-os-panahon nga ministro han mga Saksi ni Jehova. Nabawtismohan ako han Septyembre 24, 1950, sugad nga simbolo han akon dedikasyon kan Jehova. Tikang hito nga panahon padayon, kada bakasyon ha katpaso nagpapalista ako sugad nga vacation pioneer (auxiliary na yana), nga 100 ka oras an ginagamit ha ministeryo kada bulan. Kondi tinikangan pa la adto. Waray pag-iha nagkaada ako duro nga hingyap nga magbuhat hin dugang pa gud ha pagpauswag han putli nga pagsingba.

An Akon Hingyap nga Magin Misyonero

Han 1951, igintoka hi Tatay ha Bideford, North Devon. Waray pag-iha katapos namon umabot, binisita ha amon kongregasyon an misyonero nga nag-aalagad ha Aprika, sugad han gin-unabi ha tinikangan. Katapos hito, an akon hingyap nga magin misyonero nakaimpluwensya han ngatanan ko nga desisyon. An mga magturutdo ha eskwelahan maaram han akon tumong ngan ginbuhat nira an ngatanan basi kombinsihon ako nga diri ito ipadayon, naglalaom nga titinguhaon ko an sekular nga karera. Kondi, ha akon ultimo nga adlaw ha eskwelahan, han kinadto ako ha kwarto han mga magturutdo basi magpasalamat ha ira ngan magbabay, usa ha ira an nagsiring: “Congratulations! Ikaw la an estudyante nga maaram gud kon ano an imo karuyag ha kinabuhi. Naglalaom kami nga madangat mo an imo tumong.”

Namiling dayon ako hin part-time nga trabaho, ngan han Disyembre 1, 1955, nagin regular payunir ako. Ha urhi, hi Nanay ngan an akon kabugtoan nagin mga payunir liwat. Salit ha sulod hin pipira ka tuig, kami ngatanan ha pamilya bug-os-panahon nga nag-aalagad.

Ngadto ha Ireland

Katapos hin usa ka tuig, nakakarawat ako hin imbitasyon ha pag-alagad ha Ireland. Usa adto nga pitad ngadto ha pakadangat ko han akon tumong nga magin misyonero. Han Pebrero 1957, upod an duha pa nga batan-on nga payunir nga hira June Napier ngan Beryl Barker, inabot kami ha Cork, ha sur han Ireland.

Makuri an pag-alagad ha kanataran ha Ireland. An Iglesia Romana Katolika nakontra hinduro. Hinbaroan namon an pagsiguro nga may-ada  kami magagawsan tikang ha usa nga apartment o subdibisyon, kon kinahanglanon namon an tigda nga pagbaya. Gintatago namon an amon nga bisikleta ha hirayo, kondi agsob nga may nakakakita hito ngan gintutusok an mga lidong o ginpapahiyos ito.

Makausa, samtang nabisita kami ni Beryl ha mga umurukoy han usa nga daku nga subdibisyon, may grupo hin kabataan nga naggugliat hin pag-insulto ha amon ngan ginbato kami. Salit sinulod kami ha tindahan nga sumpay han usa nga balay, diin may iginbabaligya nga gatas. Usa nga masamok nga grupo an nagkatirok ha gawas. Tungod kay mahilig hi Beryl hin gatas, hinay-hinay nga ininom hiya hin duha o tulo ka baso, naglalaom nga mabaya an grupo. Waray hira bumaya. Katapos, an usa nga batan-on nga padi sinulod ha tindahan. Kahuna niya nga mga turista kami, salit nagsiring hiya nga karuyag niya nga updan kami ha pamasyada. Kondi iya anay kami gindara ha lain nga kwarto, ngan samtang nalingkod kami nga mamingaw, ginsantalanahan niya an usa nga nagtitikamatay nga lagas. Katapos binaya kami hito nga balay upod han padi. Ha pakakita nga nakikiistorya kami ha iya, nagburublag an grupo.

Ngadto ha Gilead

Han 1958 an Divine Will Internasyonal nga Asembleya dudumarahon ha New York. Matambong hi Tatay, ngan karuyag ko tumambong liwat, kondi waray ako kwarta. Katapos, an akon lola diri-linalaoman nga namatay ngan may-ada iginbilin ha akon nga 100 ka pound ($280 han E.U.). An balikan nga pamasahe ha asembleya 96 ka pound, salit nagpareserba ako dayon ha eruplano.

Waray pag-iha katapos hito, usa nga representante tikang ha sanga nga opisina han mga Saksi ni Jehova ha Britanya an binisita ha amon ngan gin-imbitar kami ngatanan nga espesyal payunir nga tikadto ha asembleya nga mag-aplay ha Watchtower Bible School of Gilead para ha pagbansay ha pagmisyonero. Diri gud ako makatoo hito! Gintagan niya hin aplikasyon an ngatanan gawas ha akon, tungod kay batan-on pa ako hinduro. Naghangyo ako nga mahiupod, iginsaysay ko nga ginbayaan ko na an akon nasud ngan sugad hin aada na ako ha toka hin pagmisyonero. Tungod kay nakita an akon determinasyon, iya ako gintagan hin porma. Igin-ampo ko gud nga karawaton ako! Inabot dayon an baton, ngan gin-imbitar ako pag-eskwela ha Gilead.

Daku gud an akon kalipay nga iginlista ako ha ika-33 nga klase han Gilead, upod han 81 nga payunir tikang ha 14 nga nasud. Madagmit nga natapos an lima ka bulan han kurso. Ha ikatarapos hito, hi Bugto Nathan H. Knorr naghatag ha amon hin makapaaghat nga upat-ka-oras nga pahayag. Gindasig niya nga magpabilin nga solo adton makakahimo. (1 Korinto 7:37, 38) Kondi para ha mga naruruyag mag-asawa ha tidaraon, nagsuhestyon hiya nga ilista namon an amon personal nga mga kwalipikasyon para ha angayan magin asawa. Katapos, kon may-ada na potensyal nga padis,  mahimo namon hiya obserbahan basado hito nga mga kwalipikasyon.

Upod han masunod amo an akon personal nga lista han mga kwalipikasyon para ha potensyal nga bana: Kinahanglan igkasi-misyonero hiya ngan nahigugma kan Jehova, mas damu an hinbabaroan ha kamatuoran ha Biblia kay ha akon, disidido nga diri magkaanak antes han Armagedon basi makapadayon ha bug-os-panahon nga pag-alagad, maopay mag-Ingles, ngan mas magurang ha akon. Ini nga lista nakabulig gud ha akon, nga 20-anyos nga daraga nga andam na ha pagkarawat hin toka ha hirayo nga nasud.

Ngadto ha Brazil

Han Domingo, Agosto 2, 1959, naggradwar kami ngan ginsumatan han amon mga toka. Kami nira Vehanouch Yazedjian, Sarah Greco, Ray ngan Inger Hatfield, Sonia Springate, Doreen Hines, igintoka ha Brazil. Nalipay gud kami. Nahanduraw ko an kagurangan, mga halas, kahoy nga rubber, ngan nitibo nga Indian. Kondi pag-abot ko, nakalasan ako! Imbes han marampag nga kagurangan han Amazon, inabot ako ha Rio de Janeiro, usa nga masirak ngan moderno nga syudad, nga amo an kapital han nasud hito nga panahon.

An pag-aram han Portuges nga yinaknan an nagin ayat dayon ha amon. Durante han siyahan nga bulan, 11 ka oras kami nga nag-aaram kada adlaw. Katapos magsangyaw ha Rio ngan mag-ukoy hin pipira ka panahon ha sanga nga opisina han mga Saksi ni Jehova didto, iginbalhin ako ha urukyan han mga misyonero ha Piracicaba, ha São Paulo State, ngan ha urhi ha urukyan han mga misyonero ha Porto Alegre, ha Rio Grande do Sul State.

Katapos, temprano han 1963, nakakarawat ako hin imbitasyon nga magtrabaho ha Translation Department ha sanga. Hi Floriano Ignez da Conceição, nga nagtutdo ha amon hin Portuges han inabot pa la kami, amo an nagdudumara hito nga departamento. Hinbaroan niya an kamatuoran han 1944, han mga 300 pa la an mga Saksi ha Brazil, ngan nag-eskwela hiya ha ika-22 nga klase han Gilead. Usa ka adlaw paglabay hin pipira ka bulan, ginhangyo ako ni Bugto Conceição nga magpabilin ha trabaho katapos han bagting ha udto, kay karuyag niya makiistorya ha akon. Ha siyahan nabaraka ako. Nakabuhat ba ako hin sayop? Han inabot na an oras han pagbagting, ginpakianhan ko hiya kon ano an karuyag niya isiring ha akon. Sugad nga baton hiya nagpakiana, “Karuyag mo ba nga ako an imo magin bana?” Kinalasan gud ako. Nangaro ako hin panahon nga hunahunaon ito, ngan nag-apura ngadto ha karaonan.

Diri hi Floriano an siyahan nga nagpahayag hin pagkaruyag ha akon. Kondi, tubtob hito nga takna waray usa nga nakakaabot han akon personal nga kwalipikasyon para hin magigin bana. Natoo ako nga ito nga listahan nakabulig ha akon nga malikyan an paghimo hin sayop nga desisyon. Hini nga takna, iba na an kahimtang. Naabot ni Floriano an ngatanan ko nga ginkikinahanglan! Salit nagpakasal kami han Mayo 15, 1965.

Pag-atubang ha Kakurian Tungod han Sakit

Malipayon an amon pag-asawa ni Floriano, bisan pa han mga kakurian nga amon gin-aatubang. Usa hini amo an iya mga problema ha kahimsog, nga nagtikang han hirani na kami magpakasal. Mga tuig antes hito, an iya wala nga bagà diri na nagana, ngan an epekto hito nagpakuri na gud ha iya. Tungod hito, binaya kami ha Bethel ngan igintoka kami sugad nga mga espesyal payunir ha syudad han Teresópolis, ha bukid-bukiron nga bahin han Rio de Janeiro State. Ginlaoman namon nga an klima didto mabulig ha iya nga mag-opay.

Dugang pa, han Disyembre 1965 ginsumatan ako nga hi Nanay grabe na an kanser. Pirme kami nagsusuratay, kondi pito na ka tuig nga waray kami magkita. Salit ginpamasahian niya kami pag-uli ha Inglatera basi makita hiya. Gin-operahan hiya, kondi waray makuha han mga doktor an kanser. Bisan kon naghihinigda na la ngan grabe na, nagpabilin an iya hingyap nga makigbahin ha pagsangyaw. May-ada hiya makinilya ha iya kwarto basi maidikta niya an mga surat nga igmamakinilya. Nagsasangyaw liwat hiya hin madaliay ha mga bisita. Namatay hiya han Nobyembre 27, 1966. Hito mismo nga bulan, nagreport hiya hin napulo ka oras ha pagsangyaw! Hi Tatay nagpadayon ha matinumanon ha pagpayunir tubtob han iya kamatay han 1979.

Han namatay ni Nanay, binalik kami ni Floriano ha Brazil, diin nag-alagad kami tikang hadto ha Rio de Janeiro State. Siyahan igintoka kami ha  sirkito nga buruhaton ha kapital han estado, kondi temporaryo la ini nga kalipay tungod kay hi Floriano naggrabe utro. Katapos hito binalik kami ha Teresópolis sugad nga mga espesyal payunir.

Han 1974, katapos han maul-ol nga mga pagtambal, ha kataposan ginkuha han mga doktor an wala nga bagà ni Floriano. Hito nga panahon, diri hiya nakakahimo pag-alagad sugad nga nangunguna nga paramangno o sugad nga espesyal payunir, kondi nakakagdumara hiya hin mga pag-aram ha Biblia durante han mga oras han pagbisita ha ospital—an usa hito ha Ingles, kan Bob nga retirado nga Amerikano. Ginkarawat ni Bob an kamatuoran ngan ha urhi nagpabawtismo. Hinay-hinay nga nag-opay hi Floriano ngan nag-aalagad na sugad nga regular payunir tikang hadto.

Ginbibendisyonan ni Jehova an Akon Ministeryo

Ha sulod hin damu na ka tuig, nagpapadayon ako ha pag-alagad sugad nga espesyal payunir, ngan ginbibendisyonan ni Jehova an akon ministeryo. Ha Teresópolis, nagkaada ako makalilipay nga pribilehiyo ha pakabulig hin sobra 60 ka tawo nga magdedikar han ira kinabuhi ngadto kan Jehova. An usa ha ira amo an babaye nga hi Jupira, nga gintutdoan ko liwat pagbasa. Inabot an panahon, gindumarahan ko hin pag-aram an walo han iya adulto na nga mga anak. Sugad nga resulta, hi Jupira ngan an iya sobra 20 nga kapamilya ngan paryente aktibo nga nag-aalagad kan Jehova yana. Usa an tigurang, tulo an ministeryal nga surugoon, ngan duha an payunir.

Hinbaroan ko an pagtipig hin positibo nga disposisyon mahitungod han posibilidad nga mahibaro han kamatuoran an mga tawo. Ha usa nga okasyon, nagdudumara ako hin pag-aram ha Biblia ha batan-on nga babaye nga hi Alzemira han an iya bana nga hi Antônio nagtarhog nga ipapalanat ako ha duha nga dagku nga ayam kon diri ako bumaya dayon ha ira balay. Katapos hito, talagsa na la ako makigkita kan Alzemira, ngan pito ka tuig anay an linabay antes ako tugotan ni Antônio nga dumarahan utro hin pag-aram an iya asawa. Kondi, diri niya karuyag nga makiistorya ako ha iya mahitungod han Biblia. Pero usa ka adlaw nga mauran, gin-imbitar ko hiya nga umapi ha pag-aram. Hito nga panahon hinbaroan ko nga diri ngay-an hiya maaram magbasa ngan magsurat. Tikang hito nga panahon, hi Floriano ngan an iba pa nagdumara ha iya hin pag-aram ngan gintutdoan hiya ha pagbasa. Yana hira Alzemira ngan Antônio bawtismado na. Daku gud hiya nga bulig ha kongregasyon, gin-uupdan niya ha ministeryo an damu nga m batan-on.

Pipira la ini han amon mga eksperyensya durante han sobra 20 ka tuig nga pag-alagad namon ha Teresópolis. Temprano han 1988, nakakarawat kami hin bag-o nga toka—an syudad han Niterói, diin nag-alagad kami hin lima ka tuig antes bumalhin ha Santo Aleixo. Katapos, iginbalhin kami ha Kongregasyon han Japuíba ha sentro han estado, ngan nagkaada pribilehiyo nga maestablisar an Kongregasyon han Ribeira.

Simple Kondi Makapatagbaw nga Kinabuhi

Ha paglabay han mga tuig, kami ni Floriano nagkaada pribilehiyo ha pakabulig hin sobra 300 ka tawo nga magdedikar han ira kinabuhi ngadto kan Jehova. Yana, an iba ha ira nag-aalagad ha sanga, ngan an iba mga payunir, tigurang, ngan ministeryal nga surugoon. Mapasalamaton gud ako nga ginagamit kami han Dios pinaagi han iya baraan nga espiritu ha pagbulig ha damu hinduro nga tawo!—Markos 10:29, 30.

Totoo nga kinahanglan atubangon ni Floriano an seryoso nga mga problema ha kahimsog. Bisan pa han iya kahimtang, nagpapabilin hiya nga marig-on, malipayon, ngan nasarig kan Jehova. Agsob hiya sumiring: “An kalipay yana diri resulta han kinabuhi nga waray problema. Resulta ito han pagkaada han bulig ni Jehova ha pag-atubang ha aton mga problema.”—Salmo 34:19.

Han 2003, nakita nga may kanser an akon wala nga mata. Gin-operahan ako, ngan an akon mata ginliwanan hin artipisyal, nga kinahanglan limpyohan hin damu ka beses kada adlaw. Bisan pa hini, ginbendisyonan ako ni Jehova hin kusog basi makapadayon ha pag-alagad ha iya sugad nga espesyal payunir.

Mahitungod ha materyal nga mga butang, simple an akon pagkinabuhi. Kondi, ginbibendisyonan ako ni Jehova ha akon toka ngan ginpariko niya ako ha espirituwal. An komento hito nga misyonera mahitungod ha pagsangyaw ha Aprika angayan liwat nga maihuhulagway ha amon toka ha Brazil. Oo, hura nga ginbalosan ni Jehova an akon hingyap nga magin misyonera!

[Retrato ha pahina 9]

Upod han akon pamilya, 1953

[Retrato ha pahina 9]

Nagsasangyaw ha Ireland, 1957

[Retrato ha pahina 10]

Brazil, 1959, upod han akon mga igkasi-misyonero. Tikang ha wala tipatoo: Ako, hira Inger Hatfield, Doreen Hines, ngan Sonia Springate

[Retrato ha pahina 10]

Upod an akon bana