“Kinahanglan Sugton Namon an Dios Sugad nga Magmarando Imbes nga an mga Tawo”

Bug-os nga Pagpamatuod nga May ‘Pagsarig’

USA nga madarahog nga grupo an andam na ha pagkastigo ha masinugtanon nga surugoon han Dios tubtob nga hiya mamatay. Kondi igo-igo gud la, ginrabot hiya han Romano nga mga sundalo tikang ha mga naatake ngan ginpriso hiya. Hini nga paagi nagtikang an sunod-sunod nga panhitabo nga inabot hin mga lima ka tuig. Sugad nga resulta, damu nga higtaas-an-ranggo nga opisyal han Roma an nakabati mahitungod kan Jesu-Kristo.

Hi apostol Pablo ito nga tawo. Han mga 34 K.P., iginpahayag ni Jesus nga hi Pablo (Saulo) magdadara han Iya ngaran ha “kahadian.” (Buhat 9:15) Pag-abot han tuig 56 K.P., waray pa ini mahitabo. Kondi, samtang nagtitikatarapos an iya ikatulo nga pagbiyahe sugad nga misyonero, hirani na magbag-o an kahimtang.

Ginsamok Kondi Waray Mahulop

Nagpapadayon hi Pablo han iya pagbiyahe ngadto ha Jerusalem, ngan pinaagi han “espiritu” may mga Kristiano nga nagpahamangno ha iya nga an duro nga pagtimaraot naghuhulat ha iya didto. Hi Pablo maisugon nga nagsiring: “Ako andam na, diri la ha pagpagapos, kondi ha kamatay man didto ha Jerusalem tungod han ngaran han Ginoo nga hi Jesus.” (Buhat 21:4-14) Han binisita hi Pablo ha templo ha Jerusalem, an mga Judio tikang ha Asia nga maaram han kalamposan han iya pag-ebanghelyo didto nag-aghat hin masamok nga grupo basi patayon hiya. Ginbuligan dayon hiya han Romano nga mga sundalo. (Buhat 21:27-32) Ito nga pagbulig nakahatag kan Pablo hin talagsahon nga mga higayon nga ipasamwak an kamatuoran mahitungod kan Kristo ha mga nakontra ngan ha higtaas-an-ranggo nga opisyal.

Pagsangyaw ha Makuri Maabot nga mga Tawo

Basi matalwas, gindanas hi Pablo tipasagka ha hagdan han balwarte nga kilala sugad nga Torre han Antonia. a Tikang didto, mapwersa nga nagsangyaw hiya ha masamok nga relihiyoso nga grupo. (Buhat 21:33–22:21) Kondi han gin-unabi niya an iya toka ha pagsangyaw ha mga Hentil, nagsaramok utro. An kumander han militar nga hi Lisias nagsugo nga kastiguhon hi Pablo samtang gin-iimbestigahan basi hibaroan kon kay ano nga gin-akusahan hiya han mga Judio. Kondi, waray ito madayon han iginpahibaro ni Pablo nga Romano nga tuminungnong hiya. Kinabuwasan, gindara ni Lisias hi Pablo ha Sanhedrin basi hibaroan kon kay ano nga gin-akusahan hiya han mga Judio.—Buhat 22:22-30.

Samtang natindog hi Pablo ha atubangan hini nga korte suprema, nagkaada na liwat hiya maopay nga higayon ha pagsangyaw ha iya mga igkasi-Judio. Iginpahayag hinin waray kahadlok nga ebanghelisador an iya pagtoo ha pagkabanhaw. (Buhat 23:1-8) Duro pa gihapon an makamaratay nga kapungot han mga Judio, ngan gindara hi Pablo ha kwartel han mga sundalo. Han sumunod nga gab-i, kinarawat niya inin makalilipay nga pasarig han Ginoo: “Sumarig ka, kay sugad nga ikaw nagtestigo gud han mga bagay nahitutungod ha akon ha Jerusalem, sugad man kinahanglan nga testigo ka ha Roma.”—Buhat 23:9-11.

Napugngan an plano ha pagpatay kan Pablo han sekreto nga gindara hiya ha kadagmitan ha Cesarea, an administratibo nga kapital han Roma ha Judea. (Buhat 23:12-24) Nagkaada dugang nga birilhon nga mga higayon didto, ngan nagpamatuod hi Pablo ha “kahadian.” Kondi, iginpakita anay han apostol kan Gobernador Felix nga waray ebidensya nga nasuporta ha mga akusasyon kontra ha iya. Ha urhi, hi Pablo nagsangyaw ha iya ngan ha iya asawa nga hi Drusila mahitungod kan Jesus, han pagpugong ha kalugaringon, pagkamatadong, ngan han tiarabot nga paghukom. Kondi, nagpabilin nga priso hi Pablo ha sulod hin duha ka tuig, tungod  kay naglaom hi Felix nga huhukipan hiya ni Pablo, kondi waray gud ito mahitabo.—Buhat 23:33–24:27.

Han ginsaliwnan hi Felix ni Festo, nangalimbasog utro an mga Judio nga masentensyahan hi Pablo ngan patayon. Ginbista utro an kaso ha Cesarea, ngan basi diri maibalhin an pagbista ha Jerusalem, hi Pablo nagsiring: “Ako natukdaw ha lingkoran nga hukmanan ni Cesar . . . Ako madangop kan Cesar.” (Buhat 25:1-11, 20, 21) Paglabay hin pipira ka adlaw, katapos ipresenta han apostol an iya kaso ha atubangan ni Hadi Herodes Agripa II, ito nga hadi siniring: “Baga imo ako ginpapaalagad, nga ako makristohanon.” (Buhat 26:1-28) Han mga 58 K.P., iginpadara hi Pablo ha Roma. Sugad nga priso didto, ha sulod hin duha pa ka tuig an mataktika nga apostol padayon nga namiling hin mga paagi ha pagsangyaw mahitungod kan Kristo. (Buhat 28:16-31) Baga hin ha kaurhian inatubang gud hi Pablo kan Emperador Nero, gindeklara nga inosente, ngan ha kataposan nakabalik ha iya pagmisyonero sugad nga may kagawasan nga tawo. Waray rekord nga may-ada iba pa nga apostol nga nagkaada han higayon ha pagpahayag han maopay nga sumat ha sugad nga prominente nga mga tawo.

Sugad han iginpapakita han asoy, nagkinabuhi hi apostol Pablo uyon ha importante nga prinsipyo nga iginpahayag han iya mga igkasi-Kristiano ha atubangan han korte han mga Judio: “Kinahanglan sugton namon an Dios sugad nga magmarando imbes nga an mga tawo.” (Buhat 5:29, NW) Maopay gud nga ehemplo an iya iginhatag ha aton! Bisan pa han padayon nga pangalimbasog han mga tawo ha pagpaundang ha iya, ginsunod gud han apostol an sugo nga bug-os nga magpamatuod. Sugad nga resulta hiton determinado nga pagkamasinugtanon ha Dios, natuman ni Pablo an toka ha iya sugad nga “pinili nga garamiton” ha pagdara han ngaran ni Jesus ‘ha mga Hentil ngan ha kahadian ngan ha mga anak ni Israel.’—Buhat 9:15.

[Footnote]

[Kahon/Mga Retrato ha pahina 9]

INTERESADO BA HI PABLO HA PAGDEPENSA LA HAN IYA KALUGARINGON?

Ha pagkomento may kalabotan hini nga pakiana, an awtor nga hi Ben Witherington III nagsurat: “Ha punto de bista . . . ni Pablo, an importante diri amo an pagdepensa han iya kalugaringon, kondi lugod an pagsangyaw mahitungod han ebanghelyo ha mga awtoridad, ha mga Judio ngan Hentil. . . . Ha pagkamatuod an ebanghelyo amo gud an ginbibista.”