Tutdui an Imo mga Anak ha Pagkomento

HI Perla nga taga-Mexico nahinunumdom nga han gutiay pa hiya, binubuligan hiya han iya nanay ha pag-andam hin haglipot nga komento para ha Pag-aram ha Barantayan. Yana may-ada na hiya singko-anyos nga anak. Paonan-o niya ginbubuligan hiya? “Siyahan kinahanglan mag-aram ako. Ha akon pag-aram, namimiling ako hin parapo nga hisasabtan han akon anak ngan maisasaysay niya ha iya kalugaringon nga mga pulong. Katapos iginsisentro namon an amon pag-aram ha tinatawag niya nga ‘akon parapo.’ Iginpapasaysay ko ito ha iya gamit an ordinaryo nga mga ehemplo nga iya hinbabaroan. Katapos ginbabansay namon an iya baton hin makadamu ka beses. Nagamit kami hin butang nga pariho kadaku hin mikropono basi mahibaro hiya ha pagkapot hito ha iya pagkomento. Nalilipay gud ako nga waray nalabay nga katirok nga diri hiya nakomento o naalsa na man la han iya kamot. Kasagaran nga antes han katirok, nadaop hiya ha konduktor ngan nagsusumat kon ano nga pakiana an karuyag niya batunon.”

Hi Jens, usa nga tigurang ha grupo nga nagyayakan hin Hindi, may duha nga anak—dos ngan kwatro anyos. Kon hiya ngan an iya asawa nag-aandam para ha katirok upod han ira mga anak, ginagamit nira an paagi nga hinbaroan ni Jens ha iya mga kag-anak. Hiya nasiring: “Gin-uusisa namon kon ano nga mga bahin han aradman an hisasabtan han kabataan. Katapos, gintatagan namon hira hin sumaryo han partikular nga topiko o han nangunguna nga mga punto han artikulo, katapos iginbabangon namon an mga pakiana nga karuyag namon nga batunon nira ha katirok. Agsob nga nahipapausa kami ha ira natural nga paagi han pagbaton. Nagpapakita gud ito han ira hinsasabtan. Sugad nga resulta, an ira mga baton nagigin totoo nga pagdayaw kan Jehova ngan personal nga kapahayagan han ira pagtoo.”