Mapulsanon an Pagin Tangkod

AN PAGIN diri-tangkod naeksister na tikang pa ha hardin ha Eden. Bisan pa hito, ha kadam-an nga kultura ngan sosiedad pinabibilhan an pagin tangkod ngan gintatagad an pagbuwa ngan panlimbong sugad nga diri-makaruruyag ngan maraot. Kon an usa gintatagad nga masasarigan, sadang malipay gud hiya hito. Kondi, nagtitikadamu an naghuhunahuna nga kinahanglanon an pagin diri-tangkod basi makapadayon ha sosiedad yana. Ano an inaabat mo mahitungod hito? Takos ba patuboon an pagin tangkod? Ano an imo suruklan ha pagdesisyon kon ano an tangkod nga paggawi ngan kon ano an diri?

Basi mapalipay an Dios, kinahanglan magin tangkod kita ha aton pagyakan ngan ha aton pagkinabuhi. Hi apostol Pablo nagsagdon ha mga igkasi-Kristiano: “Magyakan kamo an tagsa-tagsa hin kamatuoran ha iya amyaw.” (Efeso 4:25) Hi Pablo nagsurat liwat: “Nagtitinguha kami ha paggawi hin maopay [“tangkod,” NW] ha ngatanan nga mga butang.” (Hebreo 13:18) An aton motibo ha pagin tangkod diri kay basi dayawon han mga igkasi-tawo. Tangkod kita tungod kay gintatahod naton an aton Maglalarang ngan karuyag naton nga lipayon hiya.

Ayaw Itago Kon Hin-o Ka

Ha damu nga nasud, an mga tawo nagbubuwa kon hin-o hira basi magkaada mga bentaha ha kinabuhi. Nakuha hira hin palsipikado nga mga dokumento, diploma, ngan ID basi la makasulod ha usa nga nasud o karawaton ha trabaho o katungdanan bisan kon diri hira kwalipikado hito. Ginpapalsipikar han iba nga kag-anak an mga sertipiko han katawo han ira mga anak basi makagpadayon an kabataan ha ira pag-eskwela.

Kondi basi makapalipay ha Dios, diri kita mahimo magin malimbong. An Biblia nasiring nga hi Jehova an “Dios han kamatuoran” ngan ginlalaoman niya nga magin maminatud-on adton duok ha iya. (Salmo 31:5) Kon karuyag naton tipigan an duok nga relasyon kan Jehova, diri naton susubaron an ‘mga tawo nga buwaon,’ adton ‘mga maglimbungon.’—Salmo 26:4.

Ordinaryo na la liwat ha mga tawo nga diri igsumat an kamatuoran kon posible nga madisiplina hira tungod han sayop nga buhat. Bisan ha Kristiano nga kongregasyon, an usa bangin masulay ha pagbuhat hito. Pananglitan, ha usa nga kongregasyon, iginsumat han usa nga batan-on ha mga tigurang nga nakabuhat hiya hin mga sala. Kondi, waray niya angkona nga nangawat hiya, bisan kon may ebidensya nga ginbuhat niya ito. Ha kataposan napamatud-an ito ngan kinahanglan paiwason hiya ha kongregasyon. Diri ba mas maaramon unta para ha iya nga magin bug-os nga tangkod ngan karawaton an bulig nga mahibalik an iya presyoso nga relasyon kan Jehova?  Ha pagkamatuod, an Biblia nasiring: “Diri mo pag-isipon hin gutiay la an sirot han Ginoo, ngan diri ka lumuya kon babadlungon ka niya; kay kon hin-o an hinihigugma han Ginoo ginsisirotan niya.”—Hebreo 12:5, 6.

Usahay, an bugto nga nagtitinguha hin responsabilidad ha kongregasyon mahimo mangalimbasog nga itago an personal nga mga problema o naglabay nga sayop nga paggawi. Pananglitan, kon ginsusuratan an aplikasyon para ha espesyal nga pribilehiyo han pag-alagad, bangin diri niya batunon hin kompleto an mga pakiana may kalabotan ha kahimsog ngan moralidad, naghuhunahuna nga bangin diri hiya magin kwalipikado kon isumat niya an totoo mahitungod hito. Bangin mangatadongan hiya, ‘Waray gud ako magbuwa,’ kondi prangka gud ba hiya ngan tangkod ha iba? Tagda an punto ha Proberbios 3:32: “An malinarisnon mangil-ad kan Jehova; kondi an Iya pakigsangkay aada ha matadong.”

Siyahan ha ngatanan, an pagin tangkod nangangahulogan hin pagin tangkod ha aton kalugaringon. Agsob nga natoo kita ha karuyag naton toohan imbes ha kon ano an husto o totoo. Masayon gud la para ha aton nga basulon an iba! Pananglitan, nangalimbasog hi Hadi Saul nga pakamatadungon an iya pagtalapas salit iya ginbasol an iba. Sugad nga resulta, hi Jehova nagsalikway ha iya sugad nga hadi. (1 Samuel 15:20-23) Kaiba gud hi Hadi David, nga nag-ampo kan Jehova: “Iginpapahayag ko an akon sala ngadto ha imo, ngan an akon karat-an waray ko pagtagoa: siniring ako: Ig-aasoy ko an akon mga pagsupak kan  Jehova; ngan ikaw nagpasaylo han akon mga sala.”—Salmo 32:5.

An Pagin Tangkod Nagriresulta hin mga Bendisyon

An pagin tangkod, o pagin diri-tangkod, nakakaapekto han pagtagad ha imo han iba. Kon hibaroan han mga tawo nga ginlimbongan mo hira hin bisan makausa la, mawawara an ira pagtapod ha imo, ngan diri ito masayon mahibalik. Ha luyo nga bahin, kon tangkod ka ngan nagsusumat han totoo, magkakaada ka reputasyon sugad nga tawo nga may-ada integridad ngan takos han pagtapod. An mga Saksi ni Jehova nagkaada na han sugad nga reputasyon. Tagda an pipira nga ehemplo.

Usa nga direktor han kompanya an nakasantop nga damu han iya mga empleyado an naglilimbong ha kompanya, salit naghangyo hiya han bulig han mga polis. Han hinbaroan niya nga usa nga empleyado nga Saksi ni Jehova an kaupod ha mga gin-aresto, kinadto hiya ha mga polis basi pagawson dayon an Saksi. Kay ano? Tungod kay kilala han direktor nga ini nga Saksi tangkod nga empleyado ngan inosente hiya. Nagpabilin an Saksi ha iya trabaho, samtang an iba ginpaiwas. Nalipay an iya mga igkasi-Saksi tungod kay maaram hira nga an iya paggawi nagpasidungog ha ngaran ni Jehova.

Natitigamnan an maopay nga paggawi. Ha usa nga komunidad ha Aprika, kinahanglan aydon an usa nga hilaba nga tulay tungod kay ginkawat an pipira nga tabla hito. An lokal nga mga residente nagdesisyon nga mangulekta hin kwarta basi masaliwnan an mga tabla, kondi hin-o an puydi taporan ha pagkapot han pundo? An ngatanan nagkauruyon nga kinahanglan usa han mga Saksi ni Jehova.

Han an usa nga nasud ha Aprika nakaeksperyensya hin kasamok ha politika ngan ha mga tribo, usa nga Saksi nga nagtatrabaho sugad nga accountant ha usa nga internasyonal nga kompanya an iginbalhin han iya kompanya, tungod kay namimeligro an iya kinabuhi. An kompanya naghikay nga magtrabaho anay hiya hin damu ka bulan ha iba nga nasud—nga gastos han kompanya—tubtob nga murayaw na an sitwasyon. Kay ano? Tungod kay nagdumiri hiya hadto ha pag-api ha mga nagplano nga limbongan an kompanya. Maaram an administrasyon han iya reputasyon ha bug-os nga pagin tangkod. Magigin disidido ba hira nga buligan ini nga empleyado kon kilala hiya ha malimbong nga mga buhat?

“An tawo nga matadong . . . naglalakat ha iya kaligdong,” siring han Proberbios 20:7. An tangkod nga tawo may-ada integridad. Diri gud hiya naglilimbong ha iya igkasi-tawo. Diri ba ito an karuyag mo nga pagtratar han iba ha imo? An pagin tangkod importante nga bahin han totoo nga pagsingba. Kapahayagan ito han aton gugma ha Dios ngan ha igkasi-tawo. Pinaagi han pagin tangkod, ipinapakita naton an aton hingyap nga sundon an prinsipyo han paggawi nga iginpahayag ni Jesus: “Busa, an ngatanan nga mga butang, nga buot niyo ipapagbuhat han mga tawo ha iyo, buhata man niyo ha ira.”—Mateo 7:12; 22:36-39.

An pagin tangkod ha ngatanan nga panahon mahimo magkaada diri-makaruruyag nga mga resulta, kondi an limpyo nga konsensya nga resulta hito mas birilhon gud kay ha bisan ano nga sakripisyo nga bangin pagkinahanglanon. Ha kamaihaan, an pagin tangkod ngan pagin matadong may-ada gidadakui nga kapulsanan. Oo, birilhon hinduro an maopay nga relasyon kan Jehova. Kay ano nga dauton ito pinaagi han paggamit hin diri-tangkod nga pamaagi basi la malikyan an kawad-i han pagtahod han iba o basi kumarawat hin ilegal nga bentaha? Anoman nga ayat an bangin atubangon naton, makakasarig kita ha mga pulong han salmista: “Bulahan an tawo nga nasarig kan Jehova, ngan diri natahod ha mga palabilabihon, ngan diri nabalhin ngadto ha mga buwa.”—Salmo 40:4.

[Mga Retrato ha pahina 18]

An totoo nga mga Kristiano diri napalit o nagamit hin palsipikado nga mga dokumento