Istorya han Kinabuhi

An Husto nga mga Desisyon Nagresulta ha Bug-os-kinabuhi nga mga Bendisyon

Iginsumat ni Paul Kushnir

HAN 1897 binalhin an mga kag-anak ni nanay tikang ha Ukraine ngadto ha Canada ngan inukoy hirani ha Yorkton, Saskatchewan. Han inabot hira, upat an ira anak—tulo nga lalaki ngan usa nga babaye. Han 1923 an babaye, hi Marinka, nagin akon nanay; ako an iya ikapito nga anak. An amon kinabuhi hadto simple kondi murayaw. Masustansya an amon pagkaon ngan magdakmol an amon mga bado, ngan nagtatagana an gobyerno han kinahanglanon nga mga serbisyo. An makisangkayon nga mga amyaw nagbubuligay dayon ha dagku nga buruhaton. Durante han katugnaw han 1925, binisita ha amon an usa han mga Estudyante han Biblia—an tawag hadto ha mga Saksi ni Jehova. Ito nga pagbisita nagpagios ha amon nga maghimo hin mga desisyon nga akon pa gihapon ginpapasalamatan.

An Kamatuoran han Biblia Nakasulod ha Amon Panimalay

Kinarawat hi Nanay hin mga bokleta tikang ha mga Estudyante han Biblia ngan iya dayon ginkilala nga ito an kamatuoran. Madagmit an iya pag-uswag ngan nabawtismohan hiya han 1926. Han nagin Estudyante han Biblia hi Nanay, nagbag-o gud an panlantaw ha kinabuhi han amon pamilya. An amon balay nagin urukyan han mga bisita. An nagbibiyahe nga mga paramangno, nga tinatawag nga mga pilgrimo, pati an iba nga mga Estudyante han Biblia agsob umukoy ha amon. Han 1928 iginpasalida ha amon hin nagbibiyahe nga paramangno an “Eureka Drama,” an ginpasimple nga bersyon han “Photo-Drama of Creation.” Hinuram hiya ha amon nga kabataan hin pakla nga mulayan nga nagtutunog. Kon natunog an pakla, ginsasaliwnan an slide. Nalipay gud kami han amon naibulig!

Agsob kami bisitahon han nagbibiyahe nga paramangno nga hi Emil Zarysky, nga dara an iya awto nga urukyan. Usahay inuupdan hiya han iya daku na nga anak nga lalaki nga nagdadasig ha amon nga kabataan nga hunahunaon an pagin bug-os-panahon nga mga ministro, o payunir. Damu liwat nga payunir an nag-ukoy ha amon  balay. Makausa, ginpahuram ni Nanay an usa nga payunir hin kamiseta samtang iya gintatahi an kamiseta han payunir. Waray tuyoa nga nadara ito han payunir ha iya pagbaya. Ha urhi, iya iginbalik ito ngan nangaro hin pasensya han kalangan. “Diri ko maakos an dyes sentabos nga selyo,” nagsurat hiya. Maopay na la unta kon waray niya ipadara ito! Karuyag ko gud unta nga ha tidaraon masubad ko an sugad nga nagsasakripisyo-ha-kalugaringon nga mga payunir. Mapasalamaton ako ha pagkamaabiabihon ni Nanay, nga naghatag hin katuyoan ha amon kinabuhi ngan nagpauswag han amon gugma ha kabugtoan.—1 Pedro 4:8, 9.

Waray magin Estudyante han Biblia hi Tatay; pero waray hiya kumontra ha amon. Han 1930 tinugot pa ngani hiya nga gamiton han kabugtoan an iya daku nga kamalig para hin usa ka adlaw nga asembleya. Bisan kon syete anyos pa la ako, naruyagan ko gud an kalipay ngan dignidad hito nga okasyon. Namatay hi Tatay han 1933. Hi Nanay, nga balo na nga may walo nga anak, waray manluya hin bisan gutiay ha iya determinasyon nga buligan kami nga magpabilin ha totoo nga pagsingba. Iya ako igin-uupod ha mga katirok. Hito nga panahon, baga hin maiha hinduro an mga katirok, ngan naiipa ako ha iba nga kabataan nga tinutugotan pagmulay ha gawas. Kondi, tungod han akon pagtahod kan Nanay, diri ako nagawas. Samtang nagluluto hi Nanay, agsob nga nagkukotar hiya hin teksto ngan ginpapakianhan ako kon diin ito nabibilngan ha Biblia. Han 1933 damu hinduro an amon naani, ngan an dugang nga kita iginpalit ni Nanay hin awto. Ginhunahuna han amon iba nga amyaw nga ginkaragan la niya an kwarta, kondi naglalaom hiya nga an awto makakabulig ha amon teokratiko nga buruhaton. Husto hiya.

Ginbuligan Kami han Iba ha Paghimo hin Husto nga mga Desisyon

Naabot an panahon ha kinabuhi han usa nga batan-on nga kinahanglan hiya maghimo hin mga desisyon nga makakaapekto han iya kabubwason. Han inabot ito ha akon mga magurang—hira Helen ngan Kay—nagpayunir hira. Usa nga buotan nga olitawo nga payunir nga nakaeksperyensya han amon pagkamaabiabihon amo hi John Jazewsky. Ginhangyo hiya ni Nanay nga magpabilin anay basi buligan kami ha uma. Ha urhi, ginkasal hira John ngan Kay, ngan nagpayunir hira ha hirani han amon lugar. Han 12 anyos ako, pinapaupod nira ako ha pag-alagad ha kanataran kon bakasyon. Hito nga paagi nasarihan ko an kinabuhi han payunir.

Inabot an panahon, baga hin naakos na namon ni John an akon magurang an pagdumara han uma. Tungod hito nagamit na ni Nanay an mga bulan han katpaso para ha tinatawag yana nga pag-auxiliary payunir. Usa nga kariton nga duha an ruyda nga gindadanas hin lagas na nga kabayo an iya sarakyan. Ginngaranan ni Tatay hin Saul iton makuri mamanso nga kabayo, kondi maanad ito kan nanay. Naruyagan gud namon ni John an uma, kondi ha kada pag-aabot ni Nanay tikang ha pagsangyaw ngan nagsusumat han iya mga eksperyensya, an amon interes ha pag-uma hinay-hinay nga nabalhin ha pagpayunir. Han 1938, ginpauswag ko an akon ministeryo, ngan han Pebrero 9, 1940, nabawtismohan ako.

Paglabay han panahon, ginpili ako sugad nga surugoon ha kongregasyon. Igintoka ha akon an mga rekord han kongregasyon ngan nalipay ako ha kada pag-uswag. Nagin personal nga teritoryo ko an bungto nga mga napulo ka milya tikang ha balay. Durante han katugnaw, nagbabaktas ako ngadto kada semana ngan nakaturog hin usa o duha ka gab-i ha gutiay nga kwarto ha may alkuba han balay han usa nga pamilya nga nagpakita hin interes ha Biblia. Katapos makiistorya ha usa nga Lutherano nga ministro—nga durante hito baga hin nagkulang ako hin pagtahod—gintarhog niya ako nga matawag hiya hin polis kon diri ko pabay-an na la an iya panon. Tungod hito nagin mas determinado ako nga magpadayon.

Han 1942 an akon bugto nga hi Kay ngan an iya bana, nagplano ha pagtambong  hin kombensyon ha Cleveland, Ohio, ha Estados Unidos. Nalipay ako nga ira ako ginpaupod. Ito nga kombensyon usa han gimaopayi nga nahitabo ha akon kinabuhi. Ginparig-on hito an akon mga plano para ha tidaraon. Han nanawagan hi Bugto Nathan Knorr—an nangunguna ha bug-os-kalibotan nga buruhaton hito nga panahon—hin 10,000 nga payunir, nagdesisyon dayon ako nga magin usa hito!

Han Enero 1943 an amon kongregasyon ginbisita ni Henry nga nagbibiyahe nga ministro. Naghatag hiya hin makapaaghat nga pahayag nga nakadasig gud ha amon. Kinabuwasan, haros -40°Celsius an temperatura, ngan nagin mas mahagkot pa gud an panahon tungod han makusog nga hangin tikang ha norte-weste. Durante han sugad nga panahon, kasagaran nga diri kami nagawas, kondi naiikag hi Henry nga magsangyaw. Hiya ngan an iba pa sinakay ha caboose—inatopan nga karomata nga may pugon ngan gindadanas hin kabayo—ngadto ha barangay nga onse kilometro an kahirayo. Nag-usahan la ako pagbisita ha pamilya nga may lima nga anak. Inuyon hira ha akon tanyag nga pag-aram ha Biblia, ngan ha urhi ira kinarawat an kamatuoran.

Pagsangyaw Ilarom han Pagdiri

Durante han Girra ha Kalibotan II, igindiri ha Canada an buruhaton para ha Ginhadian. Kinahanglan itago namon an mga literatura, ngan maopay la nga damu an amon natatagoan ha uma. Agsob kami bisitahon han mga polis kondi waray gud hira nabilngan. Kon nagsasangyaw, Biblia la an amon ginagamit. Nagkakatirok kami ha gudtiay nga grupo, ngan ginpili kami ni John, nga akon bugto, ha sekreto nga pagdul-ong hin mga literatura.

Durante han girra, nakigbahin an amon kongregasyon ha bug-os-nasud nga pagpanaltag han bokleta nga End of Nazism. Nanaltag kami ha katutnga han gab-i. Ginkukulba ako hinduro samtang maikmat nga amon kinakadto an kada balay ngan nagbibilin hin bokleta ha purtahan. Ito an pinakamakulba nga akon nahimo. Nakaginhawa gud kami han amon iginbutang an ultimo hito nga bokleta! Katapos nagdagmit kami pagbalik ha naghuhulat nga awto, ginsiguro nga nakabalik an ngatanan, ngan madagmit nga binaya.

Pagpayunir, Kapriso, Ngan mga Asembleya

Han Mayo 1, 1943, katapos ko manarit kan Nanay, nagbiyahe ako nga 20 dolyares la ngan gutiay nga maleta an dara ngadto ha akon siyahan nga toka sugad nga payunir. Malipayon nga ginkarawat ako ni Bugto Tom Troop ngan han iya mahigugmaon nga pamilya ha Quill Lake, Saskatchewan. Han sunod nga tuig, kinadto ako ha nahibubulag nga teritoryo ha Weyburn, Saskatchewan. Samtang nagsasangyaw ha kalsada han Disyembre 24, 1944, gin-aresto ako. Katapos prisuhon didto, gindara ako ha usa nga prisohan ha Jasper, Alberta. Upod han iba nga mga Saksi, napapalibotan kami didto han makatarag-ob nga linarang ni Jehova—an Canadian Rockies. Ha temprano nga bahin han 1945, gintugotan kami han mga opisyal han prisohan nga tumambong ha usa nga katirok ha Edmonton, Alberta. Iginpahayag ni Bugto Knorr an makalilipay nga report mahitungod han pag-uswag han buruhaton ha bug-os nga kalibotan. Ginhandom gud namon nga makagawas na kami ngan makigbahin na liwat hin bug-os ha ministeryo.

Han nakagawas ako, nagpadayon ako pagpayunir. Waray pag-iha katapos hito, iginpahibaro nga an “All Nations Expansion” nga Asembleya pagdudumarahon ha Los Angeles, California. Ginbutangan hin mga lingkoran an awto han usa nga bugto ha akon bag-o nga teritoryo basi masakyan hin 20 nga pasahero. Han Agosto 1, 1947, gintikangan namon an diri gud mahingangalimtan nga biyahe. Nagbiyahe kami hin 7,200 kilometro ha mga kabanwaan, disyerto, ngan makatarag-ob nga mga kiritaon, upod na an Yellowstone ngan Yosemite nga mga parke han nasud. Inabot hin 27 ka adlaw an bug-os nga biyahe—makalilipay hinduro ito nga eksperyensya!

An kombensyon mismo usa nga bendisyon nga diri gud mahingangalimtan. Basi makigbahin hin bug-os, nagboluntaryo ako sugad nga attendant ha adlaw ngan bantay ha gab-i. Katapos tumambong han katirok para ha mga naruruyag pagmisyonero, nagpasa ako hin aplikasyon kondi waray maglaom nga matatawag. Samtang hito nga panahon, han 1948, nagboluntaryo ako ha pagpayunir ha probinsya han Quebec ha Canada.—Isaias 6:8.

 Ha Gilead Ngan Katapos Hito

Han 1949, nalipay ako ha pakakarawat hin imbitasyon ha pagtambong han ika-14 nga klase han Watchtower Bible School of Gilead. Ito nga pagbansay nagparig-on han akon pagtoo ngan nagin mas duok ako kan Jehova. Hira John ngan Kay naggradwar na ha ika-11 nga klase ngan hito nga panahon mga misyonero ha Northern Rhodesia (Zambia na yana). An akon bugto nga hi John naggradwar ha Gilead han 1956. Kaupod han iya asawa, hi Frieda, nag-alagad hiya ha Brazil ha sulod hin 32 ka tuig tubtob han iya kamatay.

Ha adlaw han amon gradwasyon han Pebrero 1950, nadasig gud ako han duha nga telegrama, usa tikang kan Nanay ngan an usa tikang ha pamilya nga Troop ha Quill Lake. An telegrama han mga Troop nga may ulohan nga “Sagdon ha Nagradwar” nasiring: “Usa ini nga espesyal hinduro nga adlaw para ha imo. An adlaw nga diri mo gud hingangalimtan; ngan hinaot an imo kinabuhi mapuno hin kalipay ngan kalamposan.”

Igintoka ako ha pag-alagad ha syudad han Quebec, kondi nagpabilin anay ako ha Kingdom Farm, ha New York State, diin nahimumutang an Gilead School. Usa ka adlaw ginpakianhan ako ni Bugto Knorr kon maruruyag ba ako kumadto ha Belgium. Kondi, paglabay hin duha ka adlaw, ginpakianhan niya ako kon kakarawaton ko ba an toka ha Netherlands. Han nakarawat ko an surat para han toka, nasiring ito nga “mag-aalagad ako sugad nga surugoon han sanga.” Nalipay ako hinduro.

Han Agosto 24, 1950 nagtikang an akon 11-ka-adlaw nga pagbiyahe ha barko tipakadto ha Netherlands—igo nga panahon basi mabasa an bug-os nga bag-o nga gowa han New World Translation of the Christian Greek Scriptures. Inabot ako ha Rotterdam han Septyembre 5, 1950, diin malipayon nga gin-abiabi ako han pamilya han Bethel. Bisan pa han mga nadaot han Girra ha Kalibotan II, pinangalimbasogan gud han kabugtoan nga maipadayon utro an Kristiano nga mga buruhaton. Samtang namamati ha ira mga asoy ha pagpabilin nga maunungon ilarom han duro nga pagtimaraot, nahunahuna ko nga magigin makuri para hini nga kabugtoan an pag-alagad ilarom han pagdumara han waray eksperyensya nga batan-on nga surugoon han sanga. Kondi, waray pag-iha nagin matin-aw nga waray basihan an akon kabaraka.

Syempre, may-ada pipira nga butang nga nagkikinahanglan hin atensyon. Inabot ako didto antes han kombensyon ngan nalipay ha pakakita nga an yinukot nga delegado ginpaukoy ha lugar han kombensyon. Han sunod nga kombensyon, nagsuhestyon ako nga mamiling kami hin akomodasyon ha pribado nga mga balay. Nahunahuna han kabugtoan nga maopay ito nga ideya, pero diri angayan ha ira nasud. Katapos namon paghisgotan an sitwasyon, nagkauruyon kami—katunga han mga delegado maukoy ha lugar han kombensyon ngan an katunga pa ha mga balay han mga diri-Saksi ha syudad. Tungod kay nalipay ako han resulta, iginsumat ko ito kan Bugto Knorr han tinambong hiya ha kombensyon. Kondi, an ngatanan nga pag-abat hin kalamposan nawara dayon han ha urhi nabasa ko an report mahitungod han amon kombensyon ha The Watchtower, nga nasiring: “Nasarig kami nga ha sunod an kabugtoan diri mag-aalang ngan maghihimo hin mga kahikayan ha pagpamiling hin akomodasyon ha  pinakaepektibo nga lugar para ha pagsangyaw, ha mga balay han mga tawo.” Ito gud an amon ginbuhat han “sunod nga higayon”!

Han Hulyo 1961, duha nga representante han amon sanga nga opisina an gin-imbitar nga tumambong ha katirok ha Londres kaupod han iba nga representante han sanga. Iginpahibaro ni Bugto Knorr nga an New World Translation of the Holy Scriptures ihuhubad ha damu nga yinaknan, upod na an Dutch. Makalilipay gud ito nga sumat! Maopay na la nga waray kami ideya kon mationan-o kadaku ito nga proyekto. Paglabay hin duha ka tuig, han 1963, nalipay ako nga magkaada bahin ha programa ha kombensyon ha New York diin iginpagowa an New World Translation of the Christian Greek Scriptures ha Dutch nga yinaknan.

Mga Desisyon Ngan Bag-o nga mga Toka

Han Agosto 1961, ginkasal kami ni Leida Wamelink. An iya bug-os nga pamilya kinarawat han kamatuoran han 1942, durante han panahon han pagtimaraot han Nazi. Nagtikang hiya magpayunir han 1950 ngan nahingadto ha Bethel han 1953. Tungod han iya pagkamaduruto ha Bethel ngan ha kongregasyon, nasantop ko nga magigin maunungon hiya nga kaupod ha akon ministeryo.

Paglabay hin sobra usa ka tuig katapos han amon kasal, gin-imbitar ako ha Brooklyn para hin napulo ka bulan nga kurso han dugang nga pagbansay. Waray mga kahikayan para ha pag-upod han asawa ha ira bana. Bisan kon diri maopay an iya panlawas, mahigugmaon nga inuyon hi Leida nga karawaton ko an imbitasyon. Ha urhi, nagtikagrabe an iya problema ha kahimsog. Nangalimbasog kami nga magpadayon ha Bethel kondi ha urhi nagdesisyon kami nga magigin mas praktikal an pagpadayon han amon bug-os-panahon nga pag-alagad ha kanataran. Salit nagtikang kami ha nagbibiyahe nga pag-alagad ha ministeryo. Waray pag-iha, kinahanglan operahan an akon asawa. Tungod han mahigugmaon nga bulig han amon kasangkayan, nalamposan namon ito, ngan paglabay hin usa ka tuig kumarawat na ngani kami hin toka ha pag-alagad ha distrito.

Malipayon kami ha pito ka tuig han makaparig-on nga pagbiyahe nga pag-alagad. Katapos, kinahanglan na liwat kami maghimo hin mabug-at nga desisyon han gin-imbitar ako ha pagtutdo ha Kingdom Ministry School ha Bethel. Ginkarawat namon ito—bisan kon makuri ito nga pagbag-o han toka—tungod kay karuyag gud namon an pagbiyahe nga ministeryo. An 47 nga klase han eskwelahan, nga an tagsa naabot hin duha ka semana, nakahatag ha akon hin maopay nga higayon ha pakigbahin han espirituwal nga mga bendisyon ha mga tigurang han kongregasyon.

Durante hito nga panahon, nag-inandam ako ha pagbisita kan Nanay han 1978. Kondi han Abril 29, 1977, tigda la nga nakakarawat kami hin telegrama nga nagpapahibaro ha amon nga patay na hiya. Nasubo gud ako nga diri ko na hibabatian an iya mahigugmaon nga tingog ngan diri ko na hiya masusumatan utro nga mapasalamaton gud ako han ngatanan nga iya ginhimo para ha akon.

Han matapos an kurso han Kingdom Ministry School, ginhangyo kami nga magin membro han pamilya han Bethel. Durante han sumunod nga mga tuig, napulo ka tuig nga nag-alagad ako sugad nga coordinator han Komite han Sanga. Inabot an panahon, an Nagmamando nga Lawas nagpili hin bag-o nga coordinator, nga mas nakagdumara hin maopay han responsabilidad. Nagpasalamat gud ako hito.

Pag-alagad Samtang Mahihimo Pa han Amon Pangidaron

Kami ni Leida 83 anyos na yana. Malipayon gud ako ha sobra 60 ka tuig na yana han bug-os-panahon nga pag-alagad, an urhi nga 45 ka tuig hito kaupod han akon maunungon nga asawa. Ginhuhunahuna niya an iya bulig ha ngatanan nga toka namon sugad nga bahin han iya dedikado nga pag-alagad kan Jehova. Yana, ginbubuhat namon an ngatanan nga mahihimo ha Bethel ngan ha kongregasyon.—Isaias 46:4.

Ha panapanahon, nalilipay kami ha paghinumdom han pipira han importante nga panhitabo ha amon kinabuhi. Waray kami ginbabasulan mahitungod han amon nahimo ha pag-alagad kan Jehova, ngan kombinsido kami nga an amon mga desisyon han bata pa kami amo an pinakamaopay. Determinado kami ha pagpadayon ha pag-alagad ngan pagpasidungog kan Jehova ha amon bug-os nga kusog.

[Retrato ha pahina 13]

Kami ni Bill, an akon magurang, ngan hi Saul, an amon kabayo

[Retrato ha pahina 15]

Ha adlaw han amon kasal, han Agosto 1961

[Retrato ha pahina 15]

Kami ni Leida yana