“An Siyahan nga Pagkabanhaw”—Nahitatabo na Yana!

“An mga patay nga aada kan Kristo mauna hin pagkabanhaw.”—1 TESALONIKA 4:16.

1, 2. (a) Ano an paglaom hadton nagkamatay? (b) Ano an imo basihan ha pagtoo ha pagkabanhaw? (Kitaa an footnote.)

 “AN MGA buhi maaram nga hira mapatay.” Ito an nahitatabo tikang nga nakasala hi Adan. Ha bug-os nga kasaysayan, an tagsa nga natatawo maaram nga ha kamaihaan hiya mamamatay, ngan damu an nagpapakiana: ‘Ano an sunod nga mahitatabo? Ano an kahimtang han mga patay?’ An Biblia nabaton: “An mga patay diri maaram han bisan ano.”—Eklesiastes 9:5.

² Kon amo, may-ada ba paglaom adton nagkamatay? Oo. Ha pagkamatuod, basi matuman an orihinal nga katuyoan han Dios para ha katawohan, kinahanglan may-ada paglaom an mga patay. Ha paglabay han mga siglo, an maunungon nga mga surugoon han Dios natoo ha saad ni  Jehova mahitungod han usa nga Binhi nga magbubungkag kan Satanas ngan magkukuha han kadaot nga iya ginbuhat. (Genesis 3:15) An kadam-an ha ira nagkamatay na. Basi makita nira an katumanan hito nga saad ngan han iba pa nga iginsaad ni Jehova, kinahanglan banhawon hira tikang ha mga minatay. (Hebreo 11:13) Posible ba ito? Oo. Hi apostol Pablo nagsiring: “May pagkabanhaw han mga minatay han mga magtadong ngan diri man magtadong.” (Buhat 24:15) Ginbanhaw hadto ni Pablo an batan-on nga hi Eutiko, nga nahulog ha bintana han ikatulo nga andana ngan “pinurot nga patay.” Ini an ultimo han siyam nga pagbanhaw nga iginrekord ha Biblia.—Buhat 20:7-12. a

3. Ano an nakakaliaw ha imo mismo ha mga pulong ni Jesus nga iginrekord ha Juan 5:28, 29, ngan kay ano?

³ Iton siyam nga pagkabanhaw naghahatag hin basihan nga tumoo ha ginsiring ni Pablo. Nagpaparig-on ito han aton kompyansa ha pasarig ni Jesus: ‘Maabot an oras nga an ngatanan nga aadto ha mga lubnganan makakabati han tingog ni Jesus, ngan manggogowa.’ (Juan 5:28, 29) Makalilipay gud ito nga mga pulong! Ngan nakakaliaw gud ito ha minilyon nga tawo nga namatayan hin mga hinigugma!

4, 5. Ano nga iba-iba nga pagkabanhaw an gin-uunabi ha Biblia, ngan ano nga pagkabanhaw an paghihisgotan hini nga artikulo?

⁴ An kadam-an hadton babanhawon mabalik ha tuna nga mamurayawon na ilarom han Ginhadian han Dios. (Salmo 37:10, 11, 29; Isaias 11:6-9; 35:5, 6; 65:21-23) Kondi, may-ada iba pa nga pagkabanhaw nga mahitatabo antes hito. Siyahan, kinahanglan banhawon hi Jesu-Kristo basi maipresenta niya ha Dios an bili han iya halad para ha aton. Namatay hi Jesus ngan ginbanhaw han 33 K.P.

⁵ Sunod, an mga membro han ‘Israel han Dios’ kinahanglan umupod ha Ginoo nga hi Jesu-Kristo ha langitnon nga himaya, diin hira ‘mahiuupod ha Ginoo’ pirme. (Galasia 6:16; 1 Tesalonika 4:17) Tinatawag ito nga an “mas temprano nga pagkabanhaw” o an “siyahan nga pagkabanhaw.” (Filipos 3:10, 11, NW; Pahayag 20:6) Katapos hito nga pagkabanhaw, panahon na ha pagbanhaw han minilyon nga tawo dinhi ha tuna nga may paglaom ha kinabuhi nga waray kataposan ha Paraiso. Salit, ha langit  man o ha tuna an aton paglaom, interesado gud kita ha “siyahan nga pagkabanhaw.” Ano nga klase ito hin pagkabanhaw? San-o ito mahitatabo?

“Mationan-o nga Lawas?”

6, 7. (a) Antes makakadto ha langit an dinihogan nga mga Kristiano, ano an kinahanglan mahitabo? (b) Babanhawon hira nga may-ada ano nga lawas?

⁶ Ha siyahan nga surat ni Pablo ha mga taga-Korinto, nagbangon hiya hin pakiana mahitungod han siyahan nga pagkabanhaw: “Inoonan-o an pagbanhaw han mga minatay? Ngan mationan-o nga lawas kon hira kumanhi?” Katapos, iya ginbaton an pakiana: “An imo ngahaw iginpupugas diri mabubuhi kon diri anay mamatay . . . Kondi an Dios sugad ha iya kaburut-on naghahatag hini hin lawas . . . An himaya han langitnon amo an usa, ngan an himaya han tunan-on lain.”—1 Korinto 15:35-40.

⁷ Ipinapakita han mga pulong ni Pablo nga an mga Kristiano nga dinihogan hin baraan nga espiritu kinahanglan mamatay antes nira makarawat an ira langitnon nga balos. Ha ira kamatay, an ira tunan-on nga lawas nabalik ha tapotapo. (Genesis 3:19) Ha itinanda nga panahon han Dios, babanhawon hira nga may-ada lawas nga angayan para ha kinabuhi ha langit. (1 Juan 3:2) An Dios maghahatag liwat ha ira hin pagkadiri-mamaratyon. Diri awtomatiko nga may-ada hira hito ha katawo, nga sugad hin ginbutangan hira hin imortal nga kalag. “Kinahanglan nga ini nga madinunuton pagsul-uban han pagkadiri-madinunuton,” siring ni Pablo. An pagkadiri-mamaratyon regalo tikang ha Dios, nga ‘isusul-ob’ hadton kaangbit ha siyahan nga pagkabanhaw.—1 Korinto 15:50, 53; Genesis 2:7; 2 Korinto 5:1, 2, 8.

8. Paonan-o kita nahibaro nga an Dios diri nagpipili han 144,000 tikang ha mga membro han magkalain-lain nga relihiyon?

⁸ Ha siyahan nga pagkabanhaw, 144,000 la an makikiangbit. Gintikangan ni Jehova an pagpili ha ira han Pentekostes 33 K.P., waray pag-iha katapos niya banhawon hi Jesus. Hira ngatanan may-ada han “ngaran [ni Jesus], ngan han iya Amay, nga ipinanurat dida ha ira mga agtang.” (Pahayag 14:1, 3) Salit, diri hira ginpipili tikang ha damu nga relihiyon. Hira ngatanan mga sumurunod ni Kristo, ngan iginpapasigarbo nira ngatanan nga may-ada hira han ngaran han Amay—hi Jehova. Kon banhawon na hira, makarawat hira hin toka nga buruhaton ha langit. An paglaom ha sugad kadirekta nga pag-alagad ha Dios makalilipay hinduro para ha ira.

Nahitatabo Na ba Yana?

9. Paonan-o an Pahayag 12:7 ngan 17:14 nabulig ha aton ha pagbanabana kon kakan-o nagtikang an siyahan nga pagkabanhaw?

⁹ San-o mahitatabo an siyahan nga pagkabanhaw? May-ada marig-on nga ebidensya nga nahitatabo na ito yana. Pananglitan, tandinga an duha nga kapitulo han Pahayag. Siyahan, kitaa an Pahayag kapitulo 12. Aton mababasa nga an bag-o la nga nahitrono na nga hi Jesu-Kristo, upod an iya baraan nga mga anghel, nakig-away kan Satanas ngan ha iya mga demonyo. (Pahayag 12:7-9) Sugad han agsob nga iginsasaysay hini nga magasin, ito nga girra nagtikang han 1914. b Kondi, tigamni nga waray usa han dinihogan nga mga sumurunod ni Kristo an ginsiring nga kaupod niya hito nga girra ha langit. Yana kitaa an kapitulo 17 han Pahayag. Aton mababasa nga katapos han kabungkagan han ‘Babilonya nga Daku,’ an Kordero magdadaog ha mga nasud. Katapos, nagdugang ito: “Ngan an mga upod niya, nga mga tinawag ngan mga pinili ngan mga magtinumanon magdadaog man.” (Pahayag 17:5, 14) An “mga tinawag ngan mga pinili ngan mga magtinumanon” sigurado nga ginbanhaw na basi makaupod hira ni Jesus para ha ultimo nga pagbungkag ha kalibotan ni Satanas. Makatadunganon, kon sugad, nga an mga dinihogan nga nagkakamatay antes han Armagedon ginbabanhaw na ha panahon butnga han 1914 ngan ha Armagedon.

10, 11. (a) Hin-o an 24 nga tigurang, ngan ano an iginsumat kan Juan han usa ha ira? (b) Ano an masisiring naton tikang hini?

¹⁰ Makakasiring ba kita hin mas eksakto kon kakan-o nagtikang an siyahan nga pagkabanhaw? An usa nga makapainteres nga ebidensya mababasa ha Pahayag 7:9-15, diin iginhuhulagway ni apostol Juan an iya bisyon mahitungod han “kadam-an nga mga tawo [“daku nga panon,” NW], nga waray tawo nga sadang makaihap.” An  pangirilal-an hiton daku nga panon iginpahayag kan Juan han usa han 24 nga tigurang, ngan ini nga mga tigurang nagrirepresentar han 144,000 nga igkasi-manurunod ni Kristo ha ira langitnon nga himaya. c (Lukas 22:28-30; Pahayag 4:4) Hi Juan mismo may-ada langitnon nga paglaom; kondi tungod kay tawo pa hiya dinhi ha tuna han nakiistorya ha iya an tigurang, sigurado nga ha bisyon hi Juan nagrirepresentar ha mga dinihogan dinhi ha tuna nga waray pa makakarawat han ira langitnon nga balos.

¹¹ Ano, kon sugad, an masisiring naton tungod kay usa han 24 nga tigurang an nagpakilala han daku nga panon kan Juan? Baga hin iginpapasabot hito nga an binanhaw nga mga membro han grupo han 24 nga tigurang posible nga may-ada bahin ha paghatag han mga kamatuoran han Dios yana. Kay ano nga importante ito? Tungod kay an husto nga pangirilal-an han daku nga panon iginpahayag ha dinihogan nga mga surugoon han Dios dinhi ha tuna han 1935. Kon usa han 24 nga tigurang an ginamit ha pagsumat hiton importante nga kamatuoran, magpapasabot ito nga ginbanhaw na hiya ngadto ha langit han 1935, ha pinakaurhi. Magpapasabot ito nga an siyahan nga pagkabanhaw nagtikang ha panahon butnga han 1914 ngan 1935. Posible ba an paghatag hin mas eksakto nga baton?

12. Isaysay kon kay ano nga mahimo hunahunaon nga ha katsaringsing han 1918 posible nga nagtikang an siyahan nga pagkabanhaw.

¹² Hini nga punto, bangin makabulig an paghisgot han mga hitabo nga mahimo tagdon nga katugbang hito ha Biblia. Hi Jesu-Kristo gindihogan sugad nga tidaraon nga Hadi ha Ginhadian han Dios ha katrakdag han 29 K.P. Paglabay hin tulo ngan tunga ka tuig, ha katsaringsing han 33 K.P., ginbanhaw hiya sugad nga gamhanan nga espiritu nga persona. Masisiring ba, kon sugad, nga tungod kay nahitrono hi Jesus ha katrakdag han 1914, nagtikang an pagkabanhaw han iya matinumanon nga dinihogan nga mga sumurunod paglabay hin tulo ngan tunga ka tuig, ha katsaringsing han 1918? Makapainteres ito nga posibilidad. Bisan kon diri ito direkta nga mapapamatud-an ha Biblia, diri ito nasumpaki ha iba nga teksto nga nagpapakita nga an siyahan nga pagkabanhaw nagtikang waray pag-iha katapos magtikang an presensya ni Kristo.

13. Ha ano nga paagi baga hin iginpapasabot han 1 Tesalonika 4:15-17 nga an siyahan nga pagkabanhaw nagtikang temprano han presensya ni Kristo?

¹³ Pananglitan, hi Pablo nagsurat: “Kita nga mga buhi, nga nanhibilin ngada ha pag-abot han Ginoo [diri ha kataposan han iya presensya], diri kita manhihiuna hadto nga nangangaturog [ha kamatayon]. Kay an amo nga Ginoo ha usa nga pagsinggit, ngan ha tingog han punoan han mga anghel, ngan ha budyong han Dios, malusad tikang ha langit: ngan an mga patay nga aada kan Kristo mauna hin pagkababanhaw. Niyan kita nga mga buhi, ngan manhibilin, babayawon kita upod ha ira ha mga dampog, ha pagtapo han Ginoo didto ha hangin: ngan tungod hini mahiuupod kita gihapon [“pirme,” NW] ha Ginoo.” (1 Tesalonika 4:15-17) Salit, an dinihogan nga mga Kristiano nga nagkamatay antes han presensya ni Kristo ginbanhaw na ngadto ha langitnon nga kinabuhi nga una hadton mga buhi pa durante han presensya ni Kristo. Nangangahulogan ini nga an siyahan nga pagkabanhaw posible gud nga nagtikang temprano han presensya ni Kristo, ngan nagpapadayon ito “durante han iya presensya.” (1 Korinto 15:23, NW) Imbes nga durungan nga banhawon hira ngatanan, an siyahan nga pagkabanhaw nahitatabo durante han usa ka peryodo han panahon.

“An Tagsa-tagsa ha Ira Tinagan hin Busag nga Higlawig nga Panapton”

14. (a) San-o natutuman an mga bisyon nga iginrekord ha Pahayag kapitulo 6? (b) Ano an iginhuhulagway ha Pahayag 6:9?

¹⁴ Tagda liwat an ebidensya ha Pahayag kapitulo 6. Nakikita dinhi hi Jesus nga nangangabayo sugad nga magdaraog nga Hadi. (Pahayag 6:2) An mga nasud nahiuupod ha duro nga pakiggirra. (Pahayag 6:4) Kalyap an gutom. (Pahayag 6:5, 6) An makamaratay nga mga peste nakakadaot ha katawohan. (Pahayag 6:8) Ini ngatanan nga igintagna nga mga hitabo matin-aw nga naangay ha mga kahimtang ha kalibotan tikang han 1914. Kondi may-ada pa nahitatabo. An aton atensyon  ginigiyahan ngadto ha usa nga halaran. Ha ubos hito aada “an mga kalag hadton pinanmatay tungod han pulong han Dios, ngan tungod han pagpamatuod nga ira gintipigan.” (Pahayag 6:9) Tungod kay “an kinabuhi [o, kalag] han unod aada ha dugo,” an aktuwal nga iginhuhulagway nga aada ha ubos han halaran amo an dugo han matinumanon nga mga surugoon ni Jesus nga pinanmatay tungod han ira maisugon ngan madasigon nga pagpamatuod.—Lebitiko 17:11.

15, 16. Isaysay kon kay ano nga an Pahayag 6:10, 11 nagtutudlok ha siyahan nga pagkabanhaw.

¹⁵ Pariho han dugo han matadong nga hi Abel, an dugo hinin Kristiano nga mga martir nagsisinggit para han hustisya. (Genesis 4:10) “Hira nagguliat hin daku nga tingog, nga nasiring, Tubtob pa san-o, O, Agaron, baraan, ngan matuod, nga waray mo paghukmi ngan pagbulusi an amon dugo ha mga nag-uukoy pa ha tuna?” Ano an sunod nga nahitabo? “An tagsa-tagsa ha ira tinagan hin busag nga higlawig nga panapton; ngan ginsiring hira, nga manmahuway hira hin gutiay nga panahon, tubtob nga an ira mga igkasi-surugoon man ngan an ira mga kabugtoan, nga pamamatayon hin sugad ha ira.”—Pahayag 6:10, 11.

¹⁶ Ini ba nga busag nga higlawig nga panapton iginhatag ha damu hinduro nga dugo ha ubos han halaran? Syempre diri! An higlawig nga panapton ipinanhatag ha mga indibiduwal nga an ira dugo simboliko nga iginbubo ha halaran. Ira iginhalad an ira kinabuhi ha ngaran ni Jesus ngan ginbanhaw na hira yana sugad nga mga espiritu. Paonan-o kita nahibaro hito? Ha siyahan nga mga bahin han Pahayag, aton mababasa: “An makadaog pagpapanaptonan hin busag nga panapton; ngan diri ko papanason iton iya ngaran ha basahon han kinabuhi.” Hinumdumi liwat nga an 24 nga tigurang “namamanapton hin magbusag nga mga panapton; ngan ha ira mga ulo mga bulawan nga pudong-pudong.” (Pahayag 3:5; 4:4) Salit katapos magtikang an girra, gutom, ngan peste ha pagdaot ha tuna, an mga membro han 144,000 nga mga patay na, nga ginrirepresentaran han dugo ha ubos han halaran, ginbanhaw ngadto ha langitnon nga kinabuhi ngan ginpanaptonan hin simboliko nga busag nga higlawig nga panapton.

17. Ha ano nga paagi kinahanglan “manmahuway” adton nakarawat hin busag nga higlawig nga panapton?

¹⁷ Adton bag-o la nga mga binanhaw kinahanglan “manmahuway.” Kinahanglan mapailubon nga maghulat hira han adlaw han pagpanimalos han Dios. An ira “mga igkasi-surugoon,” an dinihogan nga mga Kristiano nga aanhi pa ha tuna, kinahanglan magpamatuod pa han ira pagkamatinumanon ilarom han pagsari. Kon umabot na an panahon han paghukom han Dios, matatapos na an ‘panmahuway.’ (Pahayag 7:3) Hito nga panahon, adton mga binanhaw makakaupod han Ginoo nga hi Jesu-Kristo ha pagbungkag ha mga magraot, upod na adton nagpaagay han dugo han inosente nga mga Kristiano.—2 Tesalonika 1:7-10.

 Kon Ano an Kahulogan Hito Para ha Aton

18, 19. (a) Tungod ha ano nga mga hinungdan makakasiring ka nga an siyahan nga pagkabanhaw nahitatabo na yana? (b) Ano an inaabat mo ha imo pagsabot mahitungod han siyahan nga pagkabanhaw?

¹⁸ An Pulong han Dios diri nagsusumat hin eksakto nga petsa han siyahan nga pagkabanhaw, kondi iginpapahayag gud hito nga nahitatabo ito ha usa ka peryodo han panahon, durante han presensya ni Kristo. An siyahan nga ginbanhaw amo an dinihogan nga mga Kristiano nga nagkamatay antes magtikang an presensya ni Kristo. Samtang nagpapadayon an presensya ni Kristo, an dinihogan nga mga Kristiano nga matinumanon nga nakakatapos han ira kinabuhi ha tuna, “ha usa ka pagpirok” nagigin gamhanan nga espiritu nga mga linarang. (1 Korinto 15:52) An ngatanan ba nga dinihogan makarawat han ira langitnon nga balos antes han girra han Armagedon? Diri kita maaram. Kondi, maaram gud kita nga ha itinanda nga panahon han Dios, an ngatanan han 144,000 manunukdaw ha langitnon nga Bukid Sion.

¹⁹ Maaram liwat kita nga an kadam-an han 144,000 kaupod na ni Kristo yana ha langit. Gutiay na la an nahibibilin dinhi ha tuna. Marig-on nga iginpapasabot gud hini nga madagmit nga nagtitiarabot an panahon han pagpadapat han paghukom han Dios! Diri na mag-iiha, bubungkagon an bug-os nga sistema han kalibotan ni Satanas. Hi Satanas mismo ilalabog ha kahiladman. Katapos, mahimo na magtikang an pagkabanhaw han katawohan ha kabug-osan, ngan pinaagi han halad lukat ni Jesus, an matinumanon nga mga tawo mahimo na magkaada han kahingpitan nga pariho han nawara ni Adan. An tagna ni Jehova ha Genesis 3:15 urusahon nga natutuman. Daku gud nga pribilehiyo an magin buhi hini nga mga panahon!

[Mga footnote]

Maisasaysay Mo Ba?

Paonan-o an masunod nga mga teksto nabulig ha aton nga masabtan an panahon han “siyahan nga pagkabanhaw”?

• Pahayag 12:7; 17:14

• Pahayag 7:13, 14

• 1 Korinto 15:23; 1 Tesalonika 4:15-17

• Pahayag 6:2, 9-11

[Mga Pakiana]

[Mga Retrato ha pahina 26]

Ano nga mga pagkabanhaw an nahitatabo antes banhawon tikang ha mga minatay an katawohan ha kabug-osan?

[Retrato ha pahina 29]

Ha ano nga paagi gintagan hin busag nga hilawig nga panapton an pipira nga nangangaturog na ha kamatayon?